1 Samɩɛl 5 - A SƐB-SÕW

A Filisɩtɛ̃ mɩnɛ nyɛrɛ nɩ dɔwrʋ a Naaŋmɩn wõ-taa daga ƴãw

¹ A Filisɩtɛ̃ mɩnɛ na tɩ faa a Naaŋmɩn wõ-taa daga a, bɛ tuo ʋ na yi n a Evɛn-Ezɛɛr ɛ́ cen nɩ Asɩdɔdɩ,

² tɩ kpɛ n a bɛ ŋmɩn Dagon yir pʋɔ, bin ʋ kɔwlɩ a bɛ ŋmɩn Dagon.

³ A bio daarɩ́ biɓaar-pipi, a Asɩdɔdɩ tẽw dem tɩ ìr'a nyɛ̃ a Dagon ʋ lo gã a tẽw, a Sore wõ-taa daga niŋé. Bɛ tɩ ɓáw nɩ a Dagon lɛb bin a ʋ binu zie.

⁴ A bio daarɩ́ biɓaar-pipi, bɛ tɩ lɛb'a ìr nyɛ̃ a Dagon ʋ lɛb lo gã a tẽw, a Sore wõ-taa daga niŋé. A Dagon ƴã-gan yõ n'ʋ tɩ be be, a zu nɩ a nuru tɩ ŋma na gã a ʋ yir dɩ̃dɔr zu.

⁵ — Alɛ n'a so, wa tɩ tɔ a dɩ̃a, a Asɩdɔdɩ tẽw a, a Dagon bàwr-maalbɛ nɩ a bɛlɩ dem za na mɩ́ kpɩɛr a Dagon yir pʋɔ a, bɛ bine a bɛ gbɛ́ɛ a Dagon yir dɩ̃dɔr zu ɛ. —

⁶ A Sore tɩ lɛb'a bãw wul a ʋ kpɛnʋ a Asɩdɔdɩ tẽw dem, ɩ a kpɛ bɛ yaga za, ʋʋ sãw bome yaga a bɛ zie: ʋ tɩ ɩ na mãsuur nyɔw a Asɩdɔdɩ tẽw dem nɩ a bɛ tẽ-kpɔwlɩ dem.

⁷ A Asɩdɔdɩ tẽw dem na tɩ nyɛ̃ a lɛ a na ŋmɛ̃ bɛ a, bɛ yel'a: «A Ɩsɩrayɛl Naaŋmɩn wõ-taa daga ta cãà be a tɩ zie ɩ, bʋ̃ʋ n'ʋ vɛ̃, ʋ wule tɩ nɩ a ʋ kpɛnʋ, ɩrɛ nɩ a kpɩɛr tɩ yaga za, a tɩɩm nɩ a tɩ ŋmɩn Dagon.»

⁸ Bɛ tɩ bʋɔl'ɩ a Filisɩtɛ̃ mɩnɛ na-mɩnɛ za ɓã taa a bɛ zie, ɛ́ yel bɛ: «Tɩ ɩ a Ɩsɩrayɛl Naaŋmɩn wõ-taa daga ŋmɩn?» Bɛ tɩ sɔw na: «Nyɩ tuo ʋ cen nɩ Gatɩ.» Bɛ tuo ʋ cen nɩ a Gatɩ.

⁹ Ɛcɛ ʋ na dɛ wa tarɛ a be a, a Sore wul'ɩ a ʋ kpɛnʋ a tẽw dem. Dɛ̃bɩ̃-kpɛ̃ɛ tɩ gã na. Mãsuur tɩ nyɔw nɩ a tẽw dem za, a bibiir nɩ a nɩ-bɛrɛ.

¹⁰ Daadaalɛ, bɛ tɩ ƴãw na bɛ tuo a Naaŋmɩn wõ-taa daga cen nɩ Ekiron. A Naaŋmɩn wõ-taa daga na dɛ wa tarɛ a Ekiron a, a Ekiron tẽw dem tɩ ŋmɛ n cɛl yel: «Bɛ tuo nɩ a Ɩsɩrayɛl Naaŋmɩn wõ-taa daga wa n a tɩ zie, kɛ́ bɛ wa ɩ tɩ kpi, tɩɩm nɩ a tɩ nɩbɛ!»

¹¹ Bɛ mɩ̀ tɩ bʋɔl'ɩ a Filisɩtɛ̃ mɩnɛ na-mɩnɛ za wa yel bɛ: «Nyɩ lɛb tɩr a Ɩsɩrayɛl Naaŋmɩn wõ-taa daga bɛr ʋ cen a ʋ tẽw, alɛ bɛ ɩ lɛ, tɩ za na kpi na.» Dɛ̃bɩ̃-kpɛ̃ɛ tɩ sɩrɩ na nyɔw a tẽw nɩbɛ za, bʋ̃ʋ n'ʋ vɛ̃, a Sore mɩ̀ tɩ wul'ɩ a ʋ kpɛnʋ yaga za a be.

¹² Mãsuur tɩ nyɔw nɩ a bɛlɩ dem na bɛ tɩ kpi a, a kpɩɛrʋ cɛlsɩ bɛ na lɔbr a do tɩ tɔ a salom.