1 Samɩɛl 4 - A SƐB-SÕW

¹ Ɛ́ a Samɩɛl mɩ́ tɩ manɩ a ƴɛ̀rʋ ŋa kʋ̀ a Ɩsɩrayɛl nɩbɛ za. Bibir kãw, a Ɩsɩrayɛl nɩbɛ tɩ ìr'a kɛ́ bɛ zɛb'ɩ a Filisɩtɛ̃ mɩnɛ. Evɛn-Ezɛɛr'a a bɛ laɩ tɩ be, ɛ́ a Filisɩtɛ̃ mɩnɛ dem be Afɛkɩ.

A Filisɩtɛ̃ mɩnɛ faa nɩ a wõ-taa daga

² A Filisɩtɛ̃ mɩnɛ tɩ pɩɛr'ɩ a zɛbr ƴãw a Ɩsɩrayɛl nɩbɛ niŋé. A zɛbr tɩ tʋl'ɩ kpãkpã, ɛ́ a Filisɩtɛ̃ mɩnɛ zɛb tʋ̃ɔ́ a Ɩsɩrayɛl nɩbɛ: bɛ tɩ kʋ n a Ɩsɩrayɛl nɩbɛ ta túr anaar (4 000) a zɛbr nɛ pʋɔ.

³ A Ɩsɩrayɛl nɩbɛ na tɩ cɛ a tɩ lɛb'a cen a bɛ laɩ pʋɔ. A Ɩsɩrayɛl nɩbɛ nɩ-kore tɩ yel'a: «Bʋ̃ʋ n'ʋ so a Sore bɛr a Filisɩtɛ̃ mɩnɛ zɛb tʋ̃ɔ́ tɩ a dɩ̃a? Tɩ cen a Silo tɩ de a Sore wõ-taa daga wa n ʋ wa be a tɩ sɔgɔ, ɛ́ faa tɩ a tɩ dɔ̃ dem nuru pʋɔ.»

⁴ Lɛ n'a bɛ tɩ tõ nɩbɛ a Silo bɛ tɩ de a Sore, a Kpɛnʋ-za-sob na zɩ̃ a seribɛ̃ mɩnɛ zu-sɔw a, wõ-taa daga wa n. A Eli bidɛbr ayi, a Hɔfɩnɩ nɩ a Pɩnasɩ, tɩ bɩɛl'ɩ a wõ-taa daga.

⁵ A wõ-taa daga na dɛ wa tarɛ a laɩ pʋɔ a, a Ɩsɩrayɛl nɩbɛ za tɩ lɔb'ɩ cɛlsɩ ɩ n gɔmɛ yaga za, k'a tẽsɔw dam.

⁶ A Filisɩtɛ̃ mɩnɛ tɩ wõ n a cɛlsɩ gɔmɛ ɛ́ yel: «A cɛlsɩ gɔmɛ á ŋá pɛr'ɩ bo a Ebre mɩnɛ laɩ pʋɔ?» Bɛ tɩ wa bãwnɩ a na k'aa Sore wõ-taa daga ta n a laɩ pʋɔ.

⁷ Lɛ n'a dɛ̃bɩ̃ɛ tɩ nyɔw bɛ, bɛ yere: «Naaŋmɩn ta n a bɛ laɩ pʋɔ. Ʋ bɛ tɩ ka be ɩ, ɛcɛ ƴɛrɛŋa a, tɩ kab'a!

⁸ Tɩ kab'a! Ãa n'ʋ na faa tɩ a Naaŋmɩn-kpɛ̃w ŋa nũú? A Naaŋmɩn ʋl na ɩ bʋ̃-fa-bʋʋrɛ za páw a Eziptɩ tẽw dem a wɛja-kpalɛ pʋɔ a, ʋlɛ n'ʋ.

⁹ Ɛcɛ nyɩ ɩ tɩ ƴãw fãw Filisɩtɛ̃ mɩnɛ ɛ, tɩ tɛr dɛbr kanyir, alɛ bɛ ɩ lɛ tɩ mɩ̀ na lɩɛb'ɩ a Ebre mɩnɛ gbãgbaar, mɛ̃ a lɛ tɔr za bɛ na tɩ ɩ a tɩ gbãgbaar a. A na ɩ lɛ a, tɩ dɩ kanyir zɛbr'ɩ bɛ!»

¹⁰ Lɛ n'a a Filisɩtɛ̃ mɩnɛ tɩ tĩ a zɛbr. Bɛ tɩ zɛb'a tʋ̃ɔ́ a Ɩsɩrayɛl nɩbɛ, ɛ̀ ŋa za mɩ́ zɔ tɩ kul. A zɛb-tʋ̃ɔ́fʋ a Filisɩtɛ̃ mɩnɛ na tɩ zɛb tʋ̃ɔ́ a Ɩsɩrayɛl nɩbɛ a tɩ wõ n a Ɩsɩrayɛl nɩbɛ yaga: soja-gbɛ́ɛ dem tùr-lɩzɛr'ɩ pie (30 000) n'a tɩ kpi,

¹¹ ɛ́ a Filisɩtɛ̃ mɩnɛ faa a Naaŋmɩn wõ-taa daga, ɛ́ a Eli bidɛbr bɛ za ayi, a Hɔfɩnɩ nɩ a Pɩnasɩ, kpi.

A bàwr-maalɛ Eli nɩ a ʋ bie-pɔw kpi na

¹² A bibir nɛ tɔr za a, Bɛ̃zamɛ dɔwlʋ nɩr kãw tɩ yi n a zɛbr zie zɔ tɩ ta a Silo. Kpar-zarmɛ n'a ʋ tɩ su, ɛ́ ŋmɛ tanɛ a zũú, a ɩ pʋ-sãwna bãwfʋ.

¹³ A Eli tɩ zɩ̃ n a ʋ dà-kɔw zu, a sɔ́r nʋɔr piwre, bʋ̃ʋ n'ʋ vɛ̃, pʋ̀lá tɩ vʋ̃ɔnɛ ʋ na a Naaŋmɩn wõ-taa daga ƴãw. Lɛ n'a a nɩr nɛ tɩ kpɛ a tẽw pʋɔ manɩ a yele, a tẽw nɩbɛ za kõ ŋmɛ n cɛlsɩ.

¹⁴ A Eli tɩ wõ n a cɛlsɩ ɛ́ sowre: «A gɔmɛ á ŋá a nɩbɛ na ɩrɛ a pɛr'ɩ bo?» A nɩr ʋl tɩ wa n fɔ̃wlɛ, wa manɩ a yele kʋ̀ a Eli.

¹⁵ — A lɛn daar, a Eli tɩ tɛr'ɩ yome lɩz'a anaar nɩ pie nɩ ani. Ʋ tɩ zɔ̃w na baarɩ, mɩ́ yuo a mimie ɛ́ kʋ̃ nyɛ̃ bom ɛ. —

¹⁶ A nɩr ʋl tɩ yel'ɩ a Eli: «A zɛbr zie n'a ɩ̃ yi ta a ƴɛrɛŋa. A dɩ̃a tɔr za n'a ɩ̃ yi a be zɔ.» — A Eli sowr'ʋ: «Ɩ̃ bie e, bʋ̃ʋ n'ʋ ɩ?»

¹⁷ A yel-yere tɩ sɔw ʋ na: «A Ɩsɩrayɛl nɩbɛ lɩɛb'a zɔ a Filisɩtɛ̃ mɩnɛ niŋé. A tɩ sojarɩ kpi n yaga za. A fʋ bidɛbr bɛ za ayi, a Hɔfɩnɩ nɩ a Pɩnasɩ, kpi na, ɛ́ a Filisɩtɛ̃ mɩnɛ faa nɩ a Naaŋmɩn wõ-taa daga.»

¹⁸ Ʋ na dɛ wa ƴɛ̀r a Naaŋmɩn wõ-taa daga ƴɛ̀rʋ a, a Eli tɩ yi n a ʋ dà-kɔw zu 'law tɩ lo a dɩ̃dɔr ƴãw. Ʋ tɩ lo na ka nyũu kpi, bʋ̃ʋ n'ʋ vɛ̃, ʋ tɩ kor'a ɛ́ tɩbrɛ. Yome lɩz'a ayi n'a ʋ tɩ ɩ a Ɩsɩrayɛl nɩbɛ ƴɛ̀r-dɩrɛ.

¹⁹ A Eli bie-pɔw, a Pɩnasɩ pɔw, tɩ tɛr'ɩ pʋɔ ta dɔwfʋ. Ʋ na wa wõ kɛ́ bɛ faa nɩ a Naaŋmɩn wõ-taa daga nɩ k'aa ʋ sɩr-sãà nɩ a ʋ sɩr kpi na a, ʋ tɩ dɔm'a ɛ́ dɔw, a pʋɔ na tɩ 'wɔbr ʋ a ƴãw.

²⁰ Ʋʋ na tɩ ŋmaar a vʋʋrʋ a, a pɔwbɛ bɛl na tɩ àr gù ʋ a, tɩ yel ʋ na: «Bɛr dɛ̃bɩ̃ɛ, dɛble n'ʋ fʋ dɔw.» Ʋ bɛ tɩ ƴɛ̀r ƴɛ̀rʋ sɔw bɛ ɩ, ɛ́ mɩ̀ bɛ cɛlɛ be ɩ.

²¹ Ʋ tɩ por'ɩ a bie kɛ́ Ikavɔdɩ, a pɛr lɛ kɛ́: «Yúor-vɩɛlʋ-danʋ-bɛ-cãa-ɩ»: ʋ tɩ yel'a: «A Naaŋmɩn yúor-vɩɛlʋ-danʋ yi na zaa a Ɩsɩrayɛl tẽw!» A Naaŋmɩn wõ-taa daga bɛ na faa a, nɩ a ʋ sɩr-sãà nɩ a ʋ sɩr kũu ƴɛ̀rʋ n'a ʋ tɩ ƴɛ̀r à à ŋá.

²² Ʋ tɩ yel'a: «A yúor-vɩɛlʋ-danʋ bɛ cãà a Ɩsɩrayɛl ɛ», a Naaŋmɩn wõ-taa daga a dɔ̃ dem na tɩ faa a ƴãw.