1 Samɩɛl 31 - A SƐB-SÕW

A SAWUL KŨU 31 A Sawul nɩ a ʋ bibiir kpi n zɛbr zie

¹ A Filisɩtɛ̃ mɩnɛ tɩ zɛbr'ɩ nɩ a Ɩsɩrayɛl nɩbɛ a Gilbowa tãw zu. A Ɩsɩrayɛl nɩbɛ tɩ lɩɛb'a zɔ a Filisɩtɛ̃ mɩnɛ niŋé, ɛ́ a Filisɩtɛ̃ mɩnɛ kʋ bɛ yaga.

² A Filisɩtɛ̃ mɩnɛ tɩ gbʋnɛ nɩ a Sawul nɩ a ʋ bidɛbr. Bɛ tɩ kʋ n a Sawul bidɛbr, a Zonatã, a Abinadab nɩ a Malki-Suwa.

³ Lɛ n'a a zɛbr tɩ zul ʋ za cen a Sawul lowr. A tã-tɛbrbɛ tɩ nyɛ̃ ʋ na bãw. A Sawul na wa nyɛ̃ a tã-tɛbrbɛ a, dɛ̃bɩ̃ɛ tɩ kpɛ ʋ nɩ yaga za.

⁴ Lɛ n'a ʋ tɩ yel a ʋ zɛbr bʋ̃-tɛrɛ: «Vʋ̃ɔ a fʋ zɛbr-sɔ-kpɛ̃ɛ cɔr'ɩ mɛ̃ kʋ, a yɔ-ɓile dem bɛ ŋa taa wa kʋrɛ mɛ̃ a bɛl mɩŋa, ɛ́ ɩrɛ mɛ̃ laar ɛ.» Ɛcɛ a ʋ zɛbr bʋ̃-tɛrɛ tɩ zawr'a, dɛ̃bɩ̃ɛ na tɩ ɩrɛ ʋ yaga za a ƴãw. Lɛ n'a a Sawul tɩ lɩɛbɩ a ʋ zɛbr-sɔ-kpɛ̃ɛ bà tul ɛ́ lo a ʋ zu.

⁵ A Sawul zɛbr bʋ̃-tɛrɛ na tɩ nyɛ̃ k'aa Sawul kpi na a, ʋ mɩ̀ tɩ bà n a ʋ zɛbr-sɔ-kpɛ̃ɛ tul ɛ́ lo a ʋ zu mɩ̀ kpi.

⁶ À ŋá n'a a Sawul nɩ a ʋ bidɛbr ata, nɩ a ʋ zɛbr bʋ̃-tɛrɛ nɩ a ʋ sojarɩ za tɩ lãw kpi bibi-been.

⁷ A Ɩsɩrayɛl nɩbɛ bɛl na tɩ kpɩɛr a fʋɔla gãwn ŋa lowr a, nɩ a bɛl na kpɩɛr a Zurdɛ̃ gãwn a, tɩ wõ na k'aa Ɩsɩrayɛl zɛbr-nɩbɛ zɔ na, nɩ k'aa Sawul nɩ a ʋ bidɛbr kpi na. Lɛ n'a bɛ tɩ yi zɔ, ɛ́ bɛr a bɛ tẽ-bɛrɛ a Filisɩtɛ̃ mɩnɛ cen tɩ de kpɩɛr.

⁸ A bio daarɩ́, a Filisɩtɛ̃ mɩnɛ tɩ cen na kɛ́ bɛ tɩ de a nɩbɛ bɛ na kʋ a bome. Bɛ tɩ nyɛ̃ nɩ a Sawul nɩ a ʋ bidɛbr ata, bɛ kpi gã a Gilbowa tãw zu.

⁹ Bɛ tɩ ŋmãa nɩ a Sawul zu, ɛ́ de a ʋ zɛbr bome. Bɛ tɩ tɛr a na cɔlɩ nɩ a Filisɩtɛ̃ mɩnɛ tẽw pʋɔ, hieri nɩ a yel-vla ŋa a bɛ ŋmɩmɛ dirú, nɩ a nɩbɛ pʋɔ.

¹⁰ Al pùorí bɛ tɩ ƴãw nɩ a Sawul zɛbr bome a Asɩtarte mɩnɛ yir pʋɔ, ɛ́ kpa a Sawul kũu yawlɩ a Bɛtɩ-Sean dacin zu.

¹¹ A Yavɛsɩ tẽw na be a Galaadɩ a nɩbɛ tɩ wõ n a lɛ a Filisɩtɛ̃ mɩnɛ na tɩ ɩ a Sawul a.

¹² A bɛl na kpɛ socir zuo bɛ za a, tɩ ìr'a lo a sɔ́r cen a tɩ̃ɩsɔw za, tɩ yàw a Sawul nɩ a ʋ bidɛbr kũuni a Bɛtɩ-Sean dacin zu, lɛb wa n a Yavɛsɩ wa nyɩw a.

¹³ Bɛ tɩ wob'ɩ a bɛ kɔbɛ ɓã taa ũù a Yavɛsɩ tamarisɩ tɩɛ pile, ɛ́ tɛr mʋta-tuo bibie ayopõi.