1 Samɩɛl 30 - A SƐB-SÕW

A Amalesitɩ mɩnɛ za n a Sɩkɩlagɩ tẽw bome

¹ A deyere daarɩ́, a Daviir nɩ a ʋ nɩbɛ tɩ ta n a Sɩkɩlagɩ. Zɩ̃ k'aa Amalesitɩ mɩnɛ tɩ yi na zɛbr'ɩ a Sɩkɩlagɩ a Zuda saa-pɛrɩ́-dʋrʋ-lowr. Bɛ tɩ sãw nɩ a Sɩkɩlagɩ bɛr, ɛ́ nyɩw ʋ bɛr.

² Bɛ tɩ nyɔw nɩ a pɔwbɛ nɩ a nɩbɛ bɛl za na tɩ be be a, a bibiir nɩ a nɩ-bɛrɛ, cen nɩ. Bɛ bɛ tɩ kʋ nɩr ɛ, ɛcɛ bɛ tɩ tɛr bɛ na tɔl cen nɩ.

³ A Daviir nɩ a ʋ nɩbɛ na tɩ ta a, bɛ tɩ nyɛ̃ na bɛ na nyɩw a tẽw, ɛ́ tɛr a bɛ pɔwbɛ, a bɛ bidɛbr nɩ a bɛ pɔwyaar tɔl cen nɩ a.

⁴ A Daviir nɩ a ʋ nɩbɛ za tɩ vaa nɩ kɔkɔr kone, kõ lɛɛɛ bɛ tɩ cãà tɛr fãw na kõ ɛ.

⁵ Bɛ tɩ nyɔw nɩ a Daviir pɔwbɛ bɛ za ayi, a Izireyɛl tẽw Ahinowam nɩ a Karmɛl tẽw Avɩgayil, a Naval pɔw-kʋɔr.

⁶ Kpɩɛrʋ kpɛ̃ɛ tɩ nyɔw nɩ a Daviir, bʋ̃ʋ n'ʋ vɛ̃, a nɩbɛ tɩ bɔbr'a kɛ́ bɛ lɔb'ɩ ʋ kʋsɛbɛ. Ŋa za pʋɔ tɩ sãw nɩ yaga, a ʋ bidɛbr nɩ a ʋ pɔwyaar ƴãw. Ɛcɛ a Sore ʋ Naaŋmɩn tɩ ɩ na ʋ lɛb tɛr kanyir.

⁷ A Daviir tɩ yel'ɩ a Ahimelɛkɩ bidɛb, Abɩataar, na ɩ a bàwr-maalɛ a: «De a kpan-bi-son wa kʋ̀ m.» A Abɩataar tɩ de nɩ a kpan-bi-son wa kʋ̀ a Daviir.

⁸ A Daviir tɩ sowr'ɩ a Sore: «Mãa diwr bɩ́ɛrɛ a nɩbɛ bɛ ŋa na fa tɩ a, ɩ̃ na páw bɛ na a?» A Sore sɔw ʋ: «Diwr bɩ́ɛrɛ bɛ. Fʋ na páw bɛ na, ɛ́ fʋ na faa nɩ a fʋ nɩbɛ.»

⁹ A Daviir nɩ ʋ nɩbɛ kɔbr ayʋɔb (600) tɩ ìr'a cen. Bɛ na tɩ ta a Besɔɔr bãá a,

¹⁰ nɩbɛ kɔbr ayi (200) tɩ bàl'a zuo kʋ̃ tʋ̃ɔ́ gãw a bàa ɩ, bɛ tɩ àr'ɩ a be. A Daviir nɩ a kɔbr anaar (400) bɛl tɩ gãw na cãà cere.

¹¹ A sojarɩ tɩ tuor'ɩ Eziptɩ tẽw pɔl kãw a wɩ̀ɛ pʋɔ, nyɔw ʋ tɛr cen nɩ a Daviir zie. Bɛ tɩ kʋ̀ ʋ nɩ dipɛ̃ ʋ 'wɔb nɩ kʋ̃ɔ ʋ nyũ,

¹² ɛ́ kʋ̀ ʋ kãkamɛ gato nɩ divɛ̃ tɩ-wɔ̃-kon cãacule ayi. Ʋ na wa 'wɔb a baarɩ a, ʋ tɩ lɛb'a nyɛrɛ, bʋ̃ʋ n'ʋ vɛ̃, bibie ata nɩ tɩ̃ɩsɔwr ata n'a, ʋ bɛ tɩ dɩ bom, bɛ nyũ bom ɛ.

¹³ A Daviir tɩ sowr'ʋ na: «Ãa so b, ɛ́ nyɩnɛ n'a fʋ yi?» Ʋ sɔw: «Eziptɩ tẽw pɔl nɛ m, ɛ́ ɩ Amalesitɩ nɩr gbãgbaa. Bibie ata n'ɩ à ŋá a ɩ̃ nɩ-kpɛ̃ɛ na zawrɩ mɛ̃ bɛr ɩ̃ na tɩ ɩ bàal a ƴãw.

¹⁴ Tɩɩm n'a zɛb'ɩ a Keretɩ̃ɛ mɩnɛ tẽw saa-pɛrɩ́-dʋrʋ-lowr dem, nɩ a Zuda tẽw saa-pɛrɩ́-dʋrʋ-lowr dem nɩ a Kalɛb tẽw saa-pɛrɩ́-dʋrʋ-lowr dem, ɛ́ nyɩw a Sɩkɩlagɩ.»

¹⁵ A Daviir tɩ yel ʋ na: «Fʋ na sàw na tɛr mɛ̃ cen nɩ a nɩ-farbɛ bɛ ŋa zie e?» Ʋ sɔw: «Pɔ n Naaŋmɩn kɛ́ fʋ kʋ̃ kʋ m ɛ, nɩ kɛ́ fʋ kʋ̃ de m ƴãw a ɩ̃ nɩ-kpɛ̃ɛ nuru pʋɔ ɩ, ɩ̃ɩ na tɛr fʋ na cen nɩ a bɛ zie.»

A Daviir zɛb'a tʋ̃ɔ́ a Amalesitɩ mɩnɛ

¹⁶ Lɛ n'a a nɩr ʋl tɩ tɛr a Daviir tɩ ta n a Amalesitɩ mɩnɛ zie. A Amalesitɩ mɩnɛ tɩ yɛ́r a pàw a tẽw za, pãa dɩrɛ ɛ́ nyuur, ɛ́ maalɛ cuw nɩ a bʋ̃-yaga al za bɛ na tɩ de a Filisɩtɛ̃ mɩnɛ tẽw nɩ a Zuda tẽw a.

¹⁷ A Daviir tɩ zɛb'a tʋ̃ɔ́ bɛ, a biɓaara tɩ ta n a bio daarɩ́ zaanʋɔra. Nɩr za bɛ tɩ cɩ̃ɛ ɩ, a bɛ ɩ pɔ́lɛ́ kɔbr anaar (400) kãw na tɩ ƴaw zɔm nyɔ̃wmɩ zɔ cɩ̃ɛ a ɩ.

¹⁸ A Daviir tɩ faa nɩ a alɩ bome nɛ za a Amalesitɩ mɩnɛ na tɩ de a. Baa zuo a za, ʋ tɩ faa nɩ a ʋ pɔwbɛ ayi.

¹⁹ Nɩr bɛ tɩ cɛ ɩ, a bibiir nɩ a nɩ-bɛrɛ pʋɔ, a bidɛbr nɩ a pɔwyaar pʋɔ, ɛ́ bom bɛ tɩ cɛ a bome a Amalesitɩ mɩnɛ na tɩ zɛb de a pʋɔ ɩ. A alɩ Bome nɛ za a dɔ̃ dem na tɩ de cen nɩ a, a Daviir tɩ lɛb'a de a.

²⁰ Ʋ mɩ̀ tɩ zɛb'a de a Amalesitɩ mɩnɛ píir nɩ a bʋʋr nɩ a nĩi, ɛ́ a bɛlɩ dem na tɩ kpárɛ a dʋn á ŋá a tɩ yere na: «A bome a Daviir na zɛb de a n'ɩ à á ŋá!»

²¹ A Daviir tɩ lɛb'a cen a nɩbɛ kɔbr ayi (200) bɛl zie, a bɛl na tɩ bàl zuo bɛ tʋ̃ɔ́ tu ʋ, ɛ́ bɛ bɛr bɛ a Besɔɔr bãá a. Bɛ tɩ yi na tuori a Daviir nɩ a ʋ nɩbɛ. A Daviir nɩ a ʋ nɩbɛ tɩ taw na ta puori bɛ.

²² Lɛ n'a a nɩbɛ bɛl na tɩ bɩɛlɩ a Daviir a pʋɔ, nɩ-faar nɩ a nɩ-bɛ-tɛr-bir mɩnɛ, tɩ zɛw kɔkɔr yel à ŋá: «Bɛ na bɛ páw tɩ cen a, tɩ bɛ kʋ̀rɛ bɛ bom za a bome tɩ na zɛb de a pʋɔ ɩ, a bɛ ɩ a bɛ pɔwbɛ nɩ a bɛ bibiir ɛ. Bɛ tɛr bɛ cere nɩ.»

²³ Ɛcɛ a Daviir tɩ yel'a: «Ɩ̃ yɛbr i, nyɩ ta ɩ a lɛ nɩ a bome a Sore na kʋ̀ tɩ a ɩ. Ʋlɛ n'ʋ gù tɩ, ɛ́ ɩ a nɩbɛ na tɩ zɛb'ɩ a Sɩkɩlagɩ a lo a tɩ nuru pʋɔ.

²⁴ Ãa n'ʋ na tʋ̃ɔ́ sàw kʋ̀ nyɩ a yel ŋa pʋɔ. “Ŋa za na mɩ́ páw nɩ a ʋ dem a zɛbr bome pʋɔ, a sob nɛ na cen a zɛbr zie a, nɩ a sob nɛ na gù a zɛbr laɩ a: bɛ za na mɩ́ põ na.”»

²⁵ A na tĩ a ʋlɩ bibir nɛ a n'a, a Daviir ƴãw a yel ŋa ʋ ɩ nʋɔr nɩ tub a Ɩsɩrayɛl tẽw wa tɩ tɔ a dɩ̃a.

²⁶ A Daviir na tɩ lɛb wa a Sɩkɩlagɩ a, ʋ tɩ tɩr'ɩ a zɛbr bome a mɩnɛ bɛ tɩ kʋ̀ a Zuda tẽw nɩ-kore, a ʋ tẽ-bi-taabɛ, ɛ́ ƴãw bɛ yel bɛ: «A Sore dɔ̃ dem bome tɩ na de a, a nyɩ dem n'ɩ à á ŋá.»

²⁷ Ʋ tɩ tɩr'a na kʋ̀ a Betɛl tẽw nɩ-kore, a Negɛɛvʋ tẽw Aramɔtɩ nɩ-kore, a Yatiir nɩ-kore,

²⁸ a Arowɛɛr nɩ-kore, a Sifemɔtɩ nɩ-kore, a Ɛsɩtemoa nɩ-kore,

²⁹ a Arakal nɩ-kore, a Yeramelitɩ mɩnɛ tẽ-bɛrɛ nɩ-kore nɩ a Kenitɩ mɩnɛ tẽ-bɛrɛ nɩ-kore,

³⁰ a Hɔrma nɩ-kore, a Bɔɔr-Asan nɩ-kore, a Atakɩ nɩ-kore,

³¹ a Ebrɔ̃ nɩ-kore, nɩ a be za a Daviir nɩ a ʋ nɩbɛ na tɩ tu tɔl a nɩ-kore.