1 Samɩɛl 29 - A SƐB-SÕW

A Filisɩtɛ̃ mɩnɛ bɛr'ɩ a Daviir ʋ lɛb kul

¹ A Filisɩtɛ̃ mɩnɛ tɩ ɓã n a bɛ sojarɩ za taa Afɛkɩ. A Ɩsɩrayɛl nɩbɛ tɩ maal'ɩ a bɛ laɩ pɩɛlɩ a bul-nʋɔr ʋl na pɩɛlɩ a Izireyɛl a.

² A Filisɩtɛ̃ mɩnɛ nɩ-bɛrɛ tɩ de nɩ a sojarɩ kɔbr, nɩ a sojarɩ túre niwn bɛ cɔrɩ cere. A Daviir nɩ a ʋ nɩbɛ tɩ pàw nɩ a pùor, cɔrɩ cere lãwnɩ a nãà Akisɩ.

³ A Filisɩtɛ̃ mɩnɛ zɛbr-nɩbɛ nɩ-bɛrɛ tɩ sowr'a: «Tẽbowle n'ɩ a Ebre mɩnɛ bɛ ŋa?» A Akisɩ tɩ sɔw bɛ: «A Daviir'ʋ wɛ! A Ɩsɩrayɛl nãà, Sawul, tõ-tõ-bie. yũon-been bɩɩ yome ayi n'ɩ à ŋá ʋ na be a ɩ̃ zie a, a ʋlɩ bibir ʋ na wa a ɩ̃ zie wa tɩ tɔ a dɩ̃a a, ɩ̃ bɛ nyɛ̃ sãwna a ʋ zie na yere ɩ.»

⁴ A Filisɩtɛ̃ mɩnɛ zɛbr-nɩbɛ nɩ-bɛrɛ tɩ nyɛ̃ nɩ nɩ a Akisɩ suur, ɛ́ yel ʋ: «Lɛb bɛr a nɩr ŋa ʋ lɛb kul a be fʋ na kʋ̀ ʋ k'ʋʋ kpɩɛr a. Ʋ ta páw tɩ cen a zɛbr ɛ, ʋ nãà tʋ̃ɔ́ na lɩɛbɩ lo a tɩ zu a zɛbr daar. Ŋmɩŋmɩn n'a ʋ na ɩ ʋlɛ nɩ a ʋ nɩ-kpɛ̃ɛ lɛb kpɛ taa, a bɛ ɩ a tɩ nɩbɛ ʋ na na nyɔw cen nɩ tɩ kʋ̀ ʋ a?

⁵ A Daviir ŋa bɛ n'ʋ a pɔwbɛ tɩ yiele ƴawr'ɩ yere nɩ kɛ́: “Sawul kʋ n dɔ̃ dem túre túre, ɛ́ Daviir tùr-piir piir e»?”

⁶ Lɛ n'a a Akisɩ tɩ bʋɔl'ɩ a Daviir tɩ yel ʋ: «A Sore na vʋʋrɛ a yúor ƴãw, nɩ-mɩŋa nɛ b. Ɩ̃ pʋɔ tɩ pɛlɩ na, fʋ na tɩ páw mɛ̃ cere a zɛbr a, bʋ̃ʋ n'ʋ vɛ̃, a lɛn daar za fʋ na wa a ɩ̃ zie wa tɔ a dɩ̃a a, ɩ̃ bɛ nyɛ̃ faa a fʋ zie ɩ. Ɛcɛ a Filisɩtɛ̃ mɩnɛ nɩ-bɛrɛ bɛl na cɛ a bɛ nɔnɛ a fʋ yele ɩ.

⁷ A na ɩ à ŋá a, lɛb kule nɩ ƴã-ɓaarʋ, lɛ n'a fʋ kʋ̃ ɩ a bɛ pʋɔ sãw ɛ.»

⁸ A Daviir tɩ sowr'ʋ na: «Bʋ̃ʋ n'ʋ ɩ̃ nɩ̃ɛ ɩ? Ɩ̃ na tone fʋ wa tɔ a dɩ̃a a, sãwna buor'ʋ fʋ nyɛ̃ a ɩ̃ zie, ɩ̃ kʋ̃ tʋ̃ɔ́ cen tɩ zɛb'ɩ a fʋ dɔ̃ dem?»

⁹ A Akisɩ sɔw ʋ: «Fʋ bɛ ɩ m bom za ɩ, ɩ̃ bãwnɩ a na. Sɩza, fʋ pɛlɩ nɩ a ɩ̃ pʋɔ mɛ̃ Naaŋmɩn malkɩ a. Ɛcɛ a Filisɩtɛ̃ mɩnɛ zɛbr-nɩbɛ nɩ-bɛrɛ yel'a: “Ʋ ta páw tɩ cen a zɛbr ɛ.”

¹⁰ A na ɩ à ŋá a, bio biɓaar-pipi a, fʋ̃ʋ nɩ a fʋ tõ-tõ-biir na bɩɛlɩ fʋ a, nyɩ ìr lɛb cen a zie ʋl ɩ̃ na kʋ̀ nyɩ, nyɩ kpɩɛr a. Ta tɩɛrɛ faa a ɩ̃ ƴãw ɛ, ɩ̃ pʋɔ pɛlɩ nɩ a fʋ ƴãw. Nyɩ dãwnɩ ìru, ɛ́ a zie wa vɩɛrɛ wa báarɛ a, nyɩɩm cere.»

¹¹ A bio daarɩ́ a, a Daviir nɩ a ʋ nɩbɛ tɩ dãwnɩ nɩ ìru, k'aa zie wa vɩɛrɛ wa báarɛ a, bɛ̃ɛ lɛb kul a Filisɩtɛ̃ mɩnɛ tẽw. A Filisɩtɛ̃ mɩnɛ bɛl a, bɛ tɩ cen nɩ a Izireyɛl.