1 Samɩɛl 28 - A SƐB-SÕW

¹ A alɩ bibie nɛ pʋɔ a, a Filisɩtɛ̃ mɩnɛ tɩ ɓã n a bɛ sojarɩ taa, kɛ́ bɛ zɛb'ɩ a Ɩsɩrayɛl. A Akisɩ tɩ yel'ɩ a Daviir: «Bãwnɩ a, fʋ̃ʋ nɩ a fʋ nɩbɛ, nyɩ na páw mɛ̃ na tɩ cen a zɛbr.»

² A Daviir tɩ sɔw nɩ a Akisɩ: «A vɩɛl'a, fʋ̃ʋ mɩŋa na nyɛ̃ nɩ a lɛ a fʋ tõ-tõ-bie na na ɩ a.» A Akisɩ lɛb yel à ŋá: «Alɛ wa ɩ à ŋá a, fʋ na ɩ n a soja na gùre mɛ̃ bɛ yire pùor a, kʋralɛ.»

A Sawul cen na tɩ sowri a Samɩɛl nyãakpɩ̃ɩn a Ɛɩn-Door tẽw pɔw zie

³ A Samɩɛl na tɩ kpi a, a Ɩsɩrayɛl nɩbɛ za tɩ kõ n a ʋ kuor, ɛ́ ũù ʋ a ʋ tẽw Arama. A Sawul tɩ diw nɩ a kpɩmɛ sowru ɩ-ɩrɩ bɛr a ʋ naalʋ-tẽw pʋɔ.

⁴ Bibir kãw, a Filisɩtɛ̃ mɩnɛ tɩ ɓã n a bɛ sojarɩ taa, ɛ́ cen tɩ maalɩ a bɛ laɩ Sunɛm. A Sawul mɩ̀ tɩ ɓã n a Ɩsɩrayɛl zɛbr-nɩbɛ za taa, bɛ cen tɩ maalɩ a bɛ laɩ Gilbowa.

⁵ A Sawul na tɩ nyɛ̃ a Filisɩtɛ̃ mɩnɛ laɩ a, pʋ̀lá tɩ vʋ̃ɔ ʋ na, ʋ màwr ʋ za.

⁶ Lɛ n'a ʋ tɩ sowri a Sore, ɛcɛ a Sore bɛ tɩ sɔw ʋ ɛ: a ɩ n a zánʋ pʋɔ bɩɩ, ʋ bɛ tɩ sɔw ʋ ɛ, a bàwr-maalbɛ kpan-bie n'a ʋ tɩ gba bɩɩ, a Sore cãà bɛ tɩ sɔw ʋ ɛ, a naaŋmɩn-ƴɛ̀r-manbɛ zie n'a bɩɩ, a Sore bɛ tɩ sɔw ʋ bom za ɩ.

⁷ Lɛ n'a a Sawul tɩ yel a ʋ tõ-tõ-biir: «Nyɩ bɔ pɔw na na tʋ̃ɔ́ sowri a kpɩmɛ a kʋ̀ m, ɩ̃ tʋ̃ɔ́ cen a ʋ zie tɩ bɔ nyɛ̃.» A ʋ tõ-tõ-biir tɩ yel ʋ na: «Kãw be n a Ɛɩn-Door.»

⁸ A Sawul tɩ lɩɛr'ɩ a ʋ bʋ̃-suuri, kɛ́ bɛ ta tʋ̃ɔ́ bãw ʋ ɛ, ɛ́ ƴãw nɩbɛ ayi bɩɛl'ʋ cen nɩ. Tɩ̃ɩsɔw n'a bɛ tɩ ta a pɔw nɛ zie. A Sawul tɩ yel ʋ na: «Ɩ̃ bɔbr'a kɛ́ fʋ sowri kpɩ̃ɩn kãw kʋ̀ m, ɛ́ bʋɔlɩ a sob nɛ ɩ̃ na na yel kʋ̀ b a.»

⁹ A pɔw tɩ sɔw na: «Fʋ mɩŋa za bãw nɩ a na a Sawul na diw a kpɩmɛ sowru ɩ-ɩrɩ bɛr a tẽw pʋɔ a. Bʋ̃ʋ n'ʋ so fʋ bɔbr kɛ́ fʋ ƴãw mɛ̃ bɛra ɩ bɛ kʋ m?»

¹⁰ A Sawul tɩ pɔ n nɩ a Sore yel à ŋá: «A Sore na vʋʋrɛ a ƴãw, bom bɛ ɩrɛ fʋ a yel ŋa pʋɔ ɩ.»

¹¹ A pɔw tɩ sowr'ʋ na: «Ãa n'ʋ fʋ bɔbr k'ɩ̃ɩ bʋɔlɩ kʋ̀ b?» Ʋ sɔw: «Bʋɔlɩ Samɩɛl.»

¹² A pɔw na tɩ nyɛ̃ a Samɩɛl a, ʋ tɩ ŋmɛ n cɛl, ɛ́ yel a Sawul: «Alɛ, Sawul nɛ b! Bʋ̃ʋ ƴãw n'a fʋ tuli mɛ̃?»

¹³ A nãà tɩ sɔw na: «Ta zɔrɛ dɛ̃bɩ̃ɛ ɩ. Ɛcɛ bʋ̃ʋ n'ʋ fʋ nɩ̃ɛ nyɛ̃?» A pɔw sɔw ʋ: «Ɩ̃ nyɛ̃ nɩ kpɩ̃ɩn na yi a tẽw pʋ̃ɔmɩ dúor waar a.»

¹⁴ A Sawul lɛb sowr'ʋ: «Ŋmɩŋmɩn n'a ʋ ŋmɛ̃?» Ʋ yel: «Dɛb-nyãw n'ʋ dúor waar. Ʋ vaar'ɩ kpar-kpɛ̃ɛ.» Lɛ n'a a Sawul tɩ bãw k'aa Samɩɛl sɩrɩ n'ʋ. Ʋ tɩ lo na gbĩ dume, ɛ́ gũu tɩ tɔ tẽw.

¹⁵ A Samɩɛl tɩ sowr'ɩ a Sawul: «Bʋ̃ʋ n'ʋ so fʋ sãw a ɩ̃ pɩ̃ɛnʋ bɛr? Bʋnʋ ƴãw n'a fʋ ƴãw bɛ bʋɔlɩ mɛ̃?» A Sawul sɔw: «Kpɩɛrʋ nyɔw mɛ̃ nɩ yaga za. A Filisɩtɛ̃ mɩnɛ zɛbr'ɩ mɛ̃ na, ɛ́ a Naaŋmɩn zawrɩ mɛ̃ bɛr. A naaŋmɩn-ƴɛ̀r-manbɛ zie n'a ɩ̃ sowre ʋ bɩɩ, ʋ bɛ sɔwr ɛ, zánʋ pʋɔ n'a bɩɩ, ʋ bɛ sɔwr ɛ. Alɛ n'a so ɩ̃ bʋɔlɩ fʋ kɛ́ fʋ wul mɛ̃ bom nɛ a na fɛr k'ɩ̃ɩ ɩ a.»

¹⁶ A Samɩɛl tɩ yel ʋ a: «A Sore wa zawrɩ fʋ bɛr, ɛ́ lɩɛbɩ a fʋ dɔ̃ sob a, bʋ̃ʋ n'ʋ so fʋ sowre mãa?

¹⁷ A Sore ɩ n a bom nɛ ʋ na tɩ ƴãw ɩ̃ yel a, ʋ faa nɩ a naalʋ a fʋ zie kʋ̀ nɩ-yũo, a Daviir.

¹⁸ A Sore ɩrɛ fʋ nɩ à ŋá a dɩ̃a, fʋ na bɛ bɛr wõ a ʋ ƴɛ̀rʋ a ƴãw, ɛ́ bɛ kʋ a Amalesitɩ mɩnɛ pàw pɛr a.

¹⁹ Lɛ so, a fʋ̃ʋ nɩ a Ɩsɩrayɛl nɩbɛ za a, a Sore na de nyɩ na ƴãw a Filisɩtɛ̃ mɩnɛ nuru pʋɔ. A bio a, fʋ̃ʋ nɩ a fʋ bidɛbr na lãwnɩ mɛ̃ na be a kpɩmɛ tẽw, ɛ́ a Ɩsɩrayɛl zɛbr-nɩbɛ a, a Sore na de bɛ na ƴãw a Filisɩtɛ̃ mɩnɛ nuru pʋɔ.»

²⁰ A Sawul na dɛ tɩ wõ a Samɩɛl ƴɛ̀rʋ á ŋá a, ʋ tɩ 'law na lo tẽw gã vɔlʋʋ, dɛ̃bɩ̃ɛ na tɩ nyɔw ʋ yaga za a ƴãw. Ɛ́ lɛb waar, ʋ bɛ tɩ cãà tɛr fãw ɛ, ʋ na bɛ tɩ dɩ bom a mʋ̃tɔ̃w nɩ a tɩ̃ɩsɔw za a ƴãw.

²¹ A pɔw tɩ taw na ta pɩɛl'ʋ, ɛ́ nyɛ̃ lɛ a dɛ̃bɩ̃ɛ na tɩ nyɔw ʋ a. Ʋ tɩ yel ʋ na: «Nyɛ̃, ɩ̃ bɛr'a wo b. Ɩ̃ tɩ sàw nɩ a ɩ̃ kũu, ɛ́ ɩ a lɛ za fʋ na yel k'ɩ̃ɩ ɩ a.

²² Ƴɛrɛŋa a, mɩ̀ bɛr wõ m. Sàw ɩ̃ wa n dipɛ̃-ŋmale wa kʋ̀ b fʋ 'wɔb, lɛ n'a fʋ na tɛr fãw lɛb lo n a sɔ́r.»

²³ A Sawul tɩ zawr'a ɛ́ yel: «Ɩ̃ kʋ̃ dɩ ɛ.» Ɛcɛ, a ʋ tõ-tõ-biir nɩ a pɔw tɩ tɛr'ɩ lɛɛɛ ʋ tɩ sàw. Ʋ tɩ ìr'ɩ a tẽw, zɩ̃ a gado zu.

²⁴ A pɔw tɩ tɛr'ɩ nadele kãw ʋ na tɩ guole k'ʋʋ 'wɔr a. Ʋ tɩ nyɔw ʋ na kʋ fɔ̃wlɛ, de zɔ̃ naw maal'ɩ dipɛ̃ na bɛ ƴãw dãbɩl a.

²⁵ Ʋ tɩ de nɩ a dɩb wa kʋ̀ a Sawul nɩ a ʋ tõ-tõ-biir bɛ dɩ. Al pùorí, bɛ tɩ lɛb'a lo a sɔ́r a tɩ̃ɩsɔw nɛ lɛb kul.