1 Samɩɛl 23 - A SƐB-SÕW

¹ Bibir kãw, a Daviir tɩ wõ na bɛ yel k'aa Filisɩtɛ̃ mɩnɛ zɛbr'ɩ nɩ a Keila tẽw, ɛ́ zarɛ a bʋ̃-bie bɛ na maal bin a.

² A Daviir tɩ sowr'ɩ a Sore: «Ɩ̃ na tʋ̃ɔ́ na siw tɩ zɛb'ɩ a Filisɩtɛ̃ mɩnɛ bɛ ŋa a?» A Sore tɩ sɔw ʋ na: «Cen, fʋ na tɩ zɛb'a tʋ̃ɔ́ a Filisɩtɛ̃ mɩnɛ, ɛ́ faa a Keila tẽw.»

³ A Daviir nɩbɛ tɩ yel ʋ na: «A Zuda ka a, a dɛ̃bɩ̃ɛ nyɔw tɩ na baarɩ. Ŋmɩŋmɩn n'a a na ŋmɛ̃, tɩ nãà wa cen kɛ́ tɩ tɩ zɛb'ɩ a Filisɩtɛ̃ mɩnɛ zɛbr-nɩbɛ a?»

⁴ A Daviir tɩ lɛb'a maal sowri a Sore, ʋ yel ʋ: «Ìr lo a sɔ́r siw a Keila! Ɩ̃ na ƴãw nɩ a Filisɩtɛ̃ mɩnɛ a fʋ nuru pʋɔ.»

⁵ Lɛ n'a a Daviir nɩ a ʋ nɩbɛ tɩ cen a Keila tɩ zɛb'ɩ a Filisɩtɛ̃ mɩnɛ. Bɛ tɩ zɛb'a de a bɛ dʋn, ɛ́ zɛb tʋ̃ɔ́ bɛ yaga. À ŋá n'a a Daviir tɩ faa a Keila tẽw nɩbɛ.

⁶ Zɩ̃ k'aa Ahimelɛkɩ bidɛb Abɩataar na tɩ zɔ wa a Daviir zie a Keila a, ʋ tɩ tɛr'ɩ a kpan bi-son bɛ na mɩ́ sowr'ɩ a Naaŋmɩn a, wa n.

⁷ A Sawul tɩ wõ na k'aa Daviir kpɛ n a Keila, ɛ́ yel à ŋá: «Naaŋmɩn ƴãw ʋ nɩ a ɩ̃ nũú, bʋ̃ʋ n'ʋ vɛ̃, ʋ pàw nɩ ʋ tʋɔra, ʋ na kpɛ tẽw na tɛr dɩ̃dɛɛ a kparɛ a pʋɔ a.»

⁸ A Sawul tɩ bʋɔl'ɩ a ʋ zɛbr-nɩbɛ za ɓã taa, k'ʋʋ siw nɩ a Keila tɩ piw a Daviir nɩ a ʋ nɩbɛ.

⁹ A Daviir na tɩ wõ kɛ́ ʋl ƴãw n'a a Sawul cɔbrɛ a zɛbr a, ʋ tɩ yel'ɩ a bàwr-maalɛ Abɩataar: «De a kpan-bi-son wa n tɩ wa sowr'ɩ a Naaŋmɩn.»

¹⁰ Al pùorí, a Daviir tɩ yel'a: «Sore e, Ɩsɩrayɛl Naaŋmɩn i, ɩ̃ wõ na k'aa Sawul bɔbr'a k'ʋʋ wa a Keila, wa sãw a tẽw bɛr a mãa ƴãw.

¹¹ A Sawul wa wa a tẽw sãw bɛ́rʋ a, a Keila nɩbɛ na de m a ƴãw a ʋ nuru pʋɔ, mɛ̃ a lɛ ɩ̃ na wõ a? Sore e, Ɩsɩrayɛl Naaŋmɩn i, ɩ̃ zɛlɛ fʋ na, sɔw kʋ̀ m.» A Sore tɩ sɔw na: «Ʋ na siw na wa.»

¹² A Daviir lɛb yel: «A Keila nɩbɛ na de tɩ na ƴãw a Sawul nuru pʋɔ, a mãa nɩ a ɩ̃ nɩbɛ ɛ?» A Sore tɩ sɔw na: «Bɛ na de nyɩ na ƴãw a ʋ nuru pʋɔ.»

¹³ Daadaalɛ, a Daviir nɩ a ʋ nɩbɛ na tɩ faar na ta nɩbɛ kɔbr ayʋɔb (600) a tɩ bɛr'ɩ a Keila, ɛ́ tɔl cen zi-yoru. A Sawul na tɩ wõ k'aa Daviir yi n a Keila a, ʋ tɩ bɛr'ɩ a zɛbr.

¹⁴ A Daviir tɩ ta n a Zifɩ wɛja-kpalɛ pʋɔ, kpɩɛr a pie pʋɔ, a tan vuo pʋɔ. A Sawul tɩ bɔbr ʋ na, ɛcɛ a Naaŋmɩn bɛ tɩ sàw de a Daviir ƴãw a ʋ nuru pʋɔ ɩ.

¹⁵ A Daviir tɩ nyɛ̃ a na a Sawul na ŋmãa wɩ̀ɛ a ʋ kʋb ƴãw a, ɛcɛ ʋ tɩ kpɩɛr'ɩ a Horesa a Zifɩ wɛja-kpalɛ pʋɔ.

¹⁶ Bibir kãw, a Sawul bidɛb, Zonatã, tɩ ìr'a cen a Daviir zie a Horesa. Ʋ tɩ ɩ na a tɩɛrʋ a Daviir na ƴãw a Naaŋmɩn ƴãw a, ʋ kpɛmɛ.

¹⁷ Ʋ tɩ yel ʋ na: «Ta zɔrɛ dɛ̃bɩ̃ɛ ɩ, a ɩ̃ sãà Sawul bɛ páwr fʋ ɛ. Fʋ̃ʋ n'ʋ na ɩ a Ɩsɩrayɛl nãà, ɛ́ mãa ɩ a fʋ tuure, a ɩ̃ sãà Sawul mɩŋa za bãwnɩ a nɩ vla.»

¹⁸ Bɛ za ayi tɩ maal'ɩ wõ-taa a Sore niŋé. Al pùorí, a Zonatã tɩ lɛb'a kul, ɛ́ a Daviir kpɩɛr a Horesa.

A Sawul diwr'ɩ a Daviir

¹⁹ Zifɩ tẽw nɩbɛ kãw tɩ cen na tɩ páw a Sawul a Givea yel ʋ: «Nãà a, a Daviir sɔwl'ɩ a tɩ zie, a Horesa pie pʋɔ, a Hakila tãw zu, a wɛ-kar zi-tɩ̃tal saa-pɛrɩ́-dʋrʋ-lowr, fʋ nɔ̃w bɛ bãwnɩ a ɩ?

²⁰ Lɛ so, nãà a, a lɛn daar za fʋ nãà wa bɔbr a, fʋ̃ʋ wa, tɩɩm na ƴãw ʋ nɩ a fʋ nũú.»

²¹ A Sawul tɩ yel'a: «A Sore, ʋ maalɩ nyɩ, nyɩɩm na zɔ ɩ̃ nɩbaalʋ a.

²² A na ɩ à ŋá a, nyɩ lɛb cen tɩ lɛb bãw sowri vla bãw a be ʋ na be a, nɩ sob nɛ na nyɛ̃ ʋ a. Ɩ̃ wõ na k'ʋʋ kpɛ n yã za.

²³ Nyɩ bɔ bãw a ziir al za ʋ na na tʋ̃ɔ́ sɔwlɩ a, ɛ́ nyɩmɛ wa bãw a vla vla a, nyɩɩm lɛb wa yel kʋ̀ m, ɩ̃ páw nyɩ tɩ cen. Ʋlɛ wa sɩrɩ be a tẽw pʋɔ a, ɩ̃ na bɔ n a Zuda tẽw ziir za tɩ nyɛ̃ ʋ.»

²⁴ A Zifɩ nɩbɛ tɩ bɛr'ɩ a Sawul ɛ́ lɛb kul. A Daviir nɩ a ʋ nɩbɛ tɩ be n a Maon wɛja-kpalɛ pʋɔ, a zi-tɩ̃tal pʋɔ, a wɛ-kar zi-tɩ̃tal saa-pɛrɩ́-dʋrʋ-lowr.

²⁵ A Sawul nɩ a ʋ nɩbɛ tɩ ìr'a nyɔw a Daviir bɔb. Nɩr kãw tɩ yel'a kʋ̀ a Daviir, ʋ ìr cen tɩ be a Maon wɛja-kpalɛ pie pʋɔ. A Sawul na tɩ wõ a a, ʋ tɩ diwr'a bɩ́ɛrɛ a Daviir a zie ʋl.

²⁶ A Sawul nɩ a ʋ sojarɩ tɩ lanɛ nɩ a tãw kõkowr kãw, ɛ́ a Daviir nɩ a ʋ nɩbɛ mɩ̀ lanɛ a kõkowr kãw. A Daviir nɩ a ʋ nɩbɛ tɩ pawr'a, k'aa Sawul ta páw bɛ ɩ. A Sawul nɩ a ʋ sojarɩ tɩ cɛ nɩ blã bɛ na ŋmãa viiri a Daviir nɩ a ʋ nɩbɛ nyɔw bɛ,

²⁷ ɛ́ wa bere nɩr kãw ta yel a Sawul: «Wa fɔ̃w, a Filisɩtɛ̃ mɩnɛ zɛbr'ɩ nɩ a tẽw!»

²⁸ Lɛ n'a a Sawul tɩ bɛr a Daviir diwfʋ a pɛr nɛ pʋɔ, ɛ́ lɩɛbɩ tuore a Filisɩtɛ̃ mɩnɛ. Lɛ so bɛ bʋɔlɛ a zie ŋa kɛ́: «Bʋ́r-taa Pìir.»