1 Samɩɛl 21 - A SƐB-SÕW

¹ Lɛ n'a a Daviir tɩ tɔl cen, ɛ́ a Zonatã lɛb kpɛ a tẽw pʋɔ.

A Daviir cen nɩ a bàwr-maalɛ Ahimelɛkɩ zie Nɔvʋ

² A Daviir tɩ cen nɩ Nɔvʋ, a bàwr-maalɛ Ahimelɛkɩ zie. A Ahimelɛkɩ tɩ maw na tuor'ɩ a Daviir. Ʋ tɩ sowri ʋ na: «Bʋ̃ʋ n'ʋ so fʋ ɩ fʋ yõ, nɩr za bɛ bɩɛlɛ fʋ?»

³ A Daviir tɩ yel'ɩ a bàwr-maalɛ Ahimelɛkɩ: «A nãà tõ m'a, ɛ́ yel mɛ̃: “Nɩr bɛ tɛr sɔ́r k'ʋʋ bãw a bom ʋl ƴãw ɩ̃ na tõ b a ɩ.” Lɛ so ɩ̃ yel a nɩbɛ na bɩɛlɛ mɛ̃ a, kɛ́ bɛ 'lawr mɛ̃ zie kãw.

⁴ Ɛcɛ fʋ tɛr'ɩ bʋ̃-dɩrɩ a ka a? Kʋ̀ m dipɛ̃ anũu bɩɩ bom nɛ za na na be be a.»

⁵ A bàwr-maalɛ tɩ sɔw nɩ a Daviir: «Ɩ̃ bɛ tɛr dipɛ̃-zawla a ka ɩ, dipɛ̃ bɛ na de kʋ̀ a Naaŋmɩn a, alɛ n'a be be, a fʋ taabɛ bɛ wa tɔ pɔwbɛ a, ɩ̃ na tʋ̃ɔ́ na de a kʋ̀ b.»

⁶ A Daviir tɩ yel'ɩ a bàwr-maalɛ: «Bʋnʋ ɩ, tɩ ciir'ɩ pɔwbɛ a yele á ŋá taabɛ pʋɔ. Ɛ́ lɛb waar, mãa wa yire a zɛbr a, bɛ mɩ́ de nɩ a ɩ̃ taabɛ zɛbr bome kʋ̀ a Naaŋmɩn, a dɩ̃a yib ŋa saa ɩ yib zawlalɛ a, ʋ na ɩ n sõw a dɩ̃a, a zɛbr bome na ɩ son a ƴãw.»

⁷ Lɛ n'a a bàwr-maalɛ tɩ de a dipɛ̃ bɛ na de kʋ̀ a Naaŋmɩn a, kʋ̀ a Daviir, dipɛ̃ kãw za na bɛ tɩ be be a ƴãw. A dipɛ̃ al bɛ na tɩ de kʋ̀ a Naaŋmɩn, ɛ́ de a a Sore zi-sõw pʋɔ yi n bɛr, ɛ́ lɩɛr'ɩ a dipɛ̃-paala a, alɛ tɩ n'a.

⁸ Zɩ̃ k'aa ʋlɩ bibir nɛ tɔr za a, a Sawul tõ-tõ-bie kãw tɩ be n a Sore zi-sõw pʋɔ, puoru ton kãw ƴãw. Edɔm tẽw nɩr tɩ n'ʋ, a yúor dɩ kɛ́ Dowɛgɩ, ʋlɛ tɩ n'ɩ a Sawul dʋ̃-cɩ̃ɩnbɛ nɩ-kpɛ̃ɛ.

⁹ A Daviir tɩ lɛb'a sowri a Ahimelɛkɩ: «Fʋ tɛr'ɩ kafin bɩɩ zɛbr-sɔ-kpɛ̃ɛ a ka a? A nãà ton tɩ pawr'a ɩ̃ bɛ tʋ̃ɔ́ de a ɩ̃ zɛbr-sɔ-kpɛ̃ɛ nɩ zɛbr bom kãw za ɩ.»

¹⁰ A bàwr-maalɛ tɩ sɔw ʋ na: «A Filisɩtɛ̃ dɔɔ, Golɩatɩ, fʋ na kʋ a Terebɛ̃tɩ tɩɛ bà-fʋɔla pʋɔ a, a ʋ zɛbr-sɔ-kpɛ̃ɛ be n ka. Ʋlɛ n'ɩ ŋan bɛ na pili nɩ kpar-kpɛ̃ɛ bin a bàwr-maalɛ kparɩ pùorí a. Fʋ̃ʋ wa bɔbr ʋ a, fʋ̃ʋ de, kãw bɛ lɛb ka be a ka ɩ.» A Daviir tɩ yel'a: «Ʋ bɛ tɛr ʋ tɔ ɩ. De ʋ kʋ̀ m.»

A Daviir na cen a Filisɩtɛ̃ mɩnɛ zie a

¹¹ A ʋlɩ bibir tɔr za a, a Daviir tɩ cãà na lo a ʋ sɔ́r, zɔ zãá nɩ a Sawul. Ʋ tɩ ta n a Gatɩ tẽw nãà Akisɩ zie.

¹² A Akisɩ tõ-tõ-biir tɩ yel ʋ na: «A Ɩsɩrayɛl tẽw nãà Daviir bɛ tʋ̃ɔ́ n'ɩ à ŋà ɩ? Ʋl ƴãw bɛ n'a a pɔwbɛ tɩ yiele ƴawr'ɩ yere nɩ kɛ́: “Sawul kʋ n dɔ̃ dem túre túre, ɛ́ Daviir kʋ tùr-piir piir ɛ”»?

¹³ A ƴɛ̀r-bie á ŋá tɩ tɔ n a Daviir, ɛ́ dɛ̃bɩ̃ɛ nyɔw ʋ yaga za, a Gatɩ tẽw nãà Akisɩ ƴãw.

¹⁴ Lɛ n'a ʋ tɩ bãw kɛ́ yarɛ a bɛ niŋé, bʋ̀nɛ ƴɛ̀rɛ, sɛbr'ɩ a pamɛ zu, ɛ́ cire mʋtaar pàwr a ʋ tɩɛm za.

¹⁵ Lɛ n'a a Akisɩ tɩ yel a ʋ tõ-tõ-biir: «Nyɩ pãa nyɛ̃ ʋ na ʋ yarɛ, ɛ́ bʋnʋ ƴãw n'a nyɩ tɛr ʋ waar'ɩ a ɩ̃ zie?

¹⁶ A yãyaar dem'a ɩ̃ bɛ tɛr bɩɩ, ɛ̀ nyɩ na tɛr à ŋà wa kʋ̀ m, ʋ bàlɛ mɛ̃ nɩ a ʋ yãya-yele e? A nɩr ŋa bɛ kpɩɛr a ɩ̃ yir ɛ!»