1 Samɩɛl 19 - A SƐB-SÕW

A Zonatã ƴɛ̀r'a faa a Daviir

¹ A Sawul tɩ yel'a kʋ̀ a ʋ bidɛb Zonatã, nɩ a ʋ tõ-tõ-biir za, ʋ na bɔbr a Daviir kʋb a. Ɛcɛ a Zonatã na tɩ nɔnɛ a Daviir a

² tɩ cen na tɩ yel kʋ̀ ʋ: «A ɩ̃ sãà Sawul bɔbr'ɩ a fʋ kʋb. Bio biɓaara a, fʋ̃ʋ gù fʋ tʋɔra vla, bɔ sɔwlʋ zie sɔwlɩ.

³ Ɩ̃ na páw nɩ a ɩ̃ sãà yi tɩ àr kɔw ʋ a wɩ̀ɛ pʋɔ be lowr fʋ na na be a. Ɩ̃ na ƴɛ̀r'ɩ a fʋ ƴɛ̀rʋ a ʋ zie, ɛ́ nyɛ̃ a lɛ ʋ na na yel a, lɛb wa yel kʋ̀ b.»

⁴ A Zonatã tɩ mʋʋr'ɩ a Daviir a ʋ sãà Sawul zie, al pùorí ʋ yel: «Nãà, taa ɩrɛ sãwnɛ a fʋ tõ-tõ-bie Daviir ƴãw ɛ, bʋ̃ʋ n'ʋ vɛ̃, ʋ bɛ ɩ sãw fʋ ɛ, a fʋ vla ƴãw n'a ʋ nɩ̃ɛ ɩ bom za wa tɔ a dɩ̃a.

⁵ Ʋ sàw nɩ a kũu, ɛ́ cen tɩ zɛb'ɩ a Filisɩtɛ̃ dɔɔ kʋ ʋ, a Sore ɩ a Ɩsɩrayɛl zɛb tʋ̃ɔ́, zɛb-tʋ̃ɔ́fʋ na ɩ zɛb-tʋ̃ɔ́fʋ a, a ʋlɩ bibir nɛ. Fʋ tɩ nyɛ̃ ʋ na nʋ̃ɔ̀ kpɛ b. Bʋ̃ʋ pãa so fʋ na maalɩ yel-bier, fʋ na na kʋ a Daviir, a ɩ nɩr na bɛ tɛr sãwna a n'ʋ fʋ kʋ ɛ́ a bɛ tɛr pɛr a?»

⁶ A Sawul tɩ bɛr'a wõ a Zonatã ƴɛ̀rʋ, ɛ́ pɔ yel: «A Sore na vʋʋrɛ a zũú, ʋ kʋ̃ kpi ɛ!»

⁷ Lɛ n'a a Zonatã tɩ bʋɔlɩ a Daviir wa manɩ a ƴɛ̀rʋ á ŋá za kʋ̀ ʋ. Al pùorí, a Zonatã tɩ tɛr'ɩ a Daviir cen nɩ a Sawul zie, a Daviir tɩ lɛb de a ʋ tome mɛ̃ a dãwdãw a.

A Mɩkal faa nɩ a Daviir

⁸ A zɛbr tɩ lɛb'a ìr, lɛ n'a a Daviir tɩ cen tɩ zɛb'ɩ a Filisɩtɛ̃ mɩnɛ, ʋ tɩ zɛb'a tʋ̃ɔ́ bɛ, bɛ zɔ yaarɩ.

⁹ Bibir kãw, vʋʋr-faa kãw na yi a Sore zie a tɩ siw nɩ a Sawul. Ʋ tɩ ƴãw nɩ a ʋ kafin a nũú zɩ̃ nɩ a ʋ yir, ɛ́ a Daviir tɩ ŋmɩɛr a korijom.

¹⁰ A Sawul tɩ bɔbr'a k'ʋʋ cɔ̀r a Daviir gbem'ɩ a dacin nɩ a ʋ kafin, ɛcɛ a Daviir tɩ nɩɩr'a bɛr, ɛ́ a kafin tɩ bà a dacin zu. A Daviir tɩ yi na zɔ a tɩ̃ɩsɔw nɛ.

¹¹ A Sawul tɩ ƴãw nɩ nɩbɛ bɛ cen tɩ gù a Daviir yir, kɛ́ bɛ tʋ̃ɔ́ kʋ ʋ a bio daarɩ́ biɓaara. A Daviir pɔw Mɩkal tɩ yel'a kʋ̀ a Daviir à ŋá: «Fʋ̃ʋ bɛ wa yi zɔ a tɩ̃ɩsɔw ŋa a, a bio a, kũu nɛ b.»

¹² Lɛ n'a ʋ tɩ ɩ a Daviir tu a tokoro vʋɔrɩ́ siw, zɔ cɩ̃ɛ.

¹³ A Mɩkal tɩ ɓáw nɩ a yir tɩɩb gaalɩ a gado zu, ɛ́ de gãw pàw ʋ, ɛ́ de bʋɔ kɔblʋ mɩ̃ɛ kɔw nɩ a ʋ zu.

¹⁴ A Sawul nɩbɛ na tɩ cen a Daviir nyɔwfʋ a, a Mɩkal tɩ yel bɛ na: «Ʋ ɩ n bàal.»

¹⁵ A Sawul tɩ lɛb'a tõ nɩbɛ a gb'a ayi sob, ɛ́ yel: «Nyɩ tɩ ɓáw ʋ nɩ a ʋ gado za wa n, ɩ̃ wa kʋ ʋ.»

¹⁶ A Sawul nɩbɛ tɩ kpɛ na, ɛcɛ a tɩɩb yõ n'ʋ bɛ tɩ nyɛ̃ a gado zu, nɩ a bʋɔ kɔblʋ mɩ̃ɛ a gado zu ƴãw.

¹⁷ A Sawul tɩ sowr'ɩ a Mɩkal: «Bʋ̃ʋ n'ʋ so fʋ zu m à à ŋá? Fʋ bɛr'ɩ a ɩ̃ dɔ̃ sob ʋ zɔ cɩ̃ɛ!» A Mɩkal tɩ sɔw na: «Ʋlɛ n'ʋ yel mɛ̃: “Fʋ̃ʋ bɛ wa bɛrɛ mɛ̃ ɩ̃ cere a, ɩ̃ kʋrɛ fʋ na”.»

A Sawul diw nɩ a Daviir tɩ sãá nɩ Arama tẽw Nayɔtɩ

¹⁸ A Daviir na tɩ zɔ cɩ̃ɛ à ŋá a, ʋ cen nɩ a Samɩɛl zie a Arama, tɩ manɩ a lɛ za a Sawul na tɩ ɩ ʋ a kʋ̀ ʋ. Ʋlɛ nɩ a Samɩɛl tɩ cen na tɩ kpɩɛr Nayɔtɩ.

¹⁹ Bɛ tɩ yel'a kʋ̀ a Sawul k'aa Daviir be n Arama tẽw Nayɔtɩ.

²⁰ Lɛ n'a a Sawul lɛb tɩ tõ nɩbɛ kɛ́ bɛ tɩ nyɔw a Daviir. Bɛ tɩ nyɛ̃ nɩ naaŋmɩn-ƴɛ̀r-manbɛ bɛ ɓã taa a, ɛ́ a naaŋmɩn-ƴɛ̀r-manbɛ ƴã-cɩrʋ tɛr bɛ, ɛ́ a Samɩɛl de bɛ niwn. A Naaŋmɩn Vʋʋrʋ mɩ̀ tɩ siw nɩ a Sawul nɩbɛ zu, a naaŋmɩn-ƴɛ̀r-manbɛ ƴã-cɩrʋ mɩ̀ tɛr bɛ.

²¹ Bɛ tɩ manɩ nɩ a yel ŋa kʋ̀ a Sawul, ʋ lɛb tõ nɩ-yoru. A bɛl mɩ̀ a, a naaŋmɩn-ƴɛ̀r-manbɛ ƴã-cɩrʋ mɩ̀ tɩ tɛr bɛ na. A Sawul lɛb tõ bɛ mɩnɛ a gb'a ata sob, a mɩ̀ lɛb tɩ ŋmɛ̃ bɛ a lɛ tɔr za.

²² Lɛ n'a a ʋl tɔr za tɩ ìr cere a Arama, tɩ ta Seku tẽw sa-bie-kʋ̃ɔ-bɔw kpɛ̃ɛ pɛr sowri: «Nyɩnɛ n'a a Samɩɛl nɩ a Daviir be?» A nɩbɛ sɔw: «Arama tẽw Nayɔtɩ n'a!»

²³ Ʋ tɩ cen a be. A sɔ́r zu a, a Naaŋmɩn Vʋʋrʋ mɩ̀ tɩ siw ʋ na, a naaŋmɩn-ƴɛ̀r-manbɛ ƴã-cɩrʋ mɩ̀ tɛr ʋ, ʋ cãà cere nɩ tɩ ta n a Arama tẽw Nayɔtɩ.

²⁴ Ʋ mɩ̀ tɩ yaa nɩ a ʋ bʋ̃-suuri bɛr, ɛ́ a naaŋmɩn-ƴɛ̀r-manbɛ ƴã-cɩrʋ mɩ̀ tɛr ʋ a Samɩɛl niŋé. Ʋ wa tɩ lo na gã nɩ ƴã-gã-kpãkpol, ɛ́ gã a lɛ a bibi-ɓil za nɩ a tɩ̃ɩsɔw ɓɩl za. Lɛ n'a so bɛ mɩ́ yel: «A Sawul mɩ̀ lɩɛb'ɩ naaŋmɩn-ƴɛ̀r-manɛ bɩɩ?»