1 Samɩɛl 15 - A SƐB-SÕW

A Naaŋmɩn zawr'ɩ a Sawul bɛr

¹ A Samɩɛl tɩ yel'ɩ a Sawul à ŋá: «Mãa n'ʋ a Sore tɩ tõ k'ɩ̃ɩ wa ka a nũu ƴãw fʋ, fʋ ɩ a Ɩsɩrayɛl nãà. Lɛ so, ƴɛrɛŋa a, bɛrɛ wone a lɛ a Sore na yere kʋ̀rɛ fʋ a.

² À ŋá n'a a Sore, a Kpɛnʋ-za-sob, yere: Ɩ̃ na sowr'ɩ bom a Amalɛkɩ, a lɛ ʋ na tɩ ɩ a Ɩsɩrayɛl a ƴãw. A lɛn daar a Ɩsɩrayɛl na tɩ yire a Eziptɩ a, ʋ tɩ piw ʋ nɩ a sɔ́r.

³ Lɛ so, cen tɩ zɛb'ɩ a Amalɛkɩ a ƴɛrɛŋa. Bom nɛ za ʋ na so a, sãw ʋ bɛr pẽlẽpẽlẽ, taa bɛrɛ ʋ ɛ. Kʋ bɛ za pàw pɛr, a dɛbr, a pɔwbɛ, a bibiir nɩ a bi-pɩɩlɛ, a nĩi nɩ a píir, a nyɔ̃wmɩ nɩ a bòn.»

⁴ A Sawul tɩ bʋɔl'ɩ a zɛbr-nɩbɛ ɓã taa, ɛ́ sɔ́r bɛ a Telayim. Bɛ tɩ ɩ n soja-gbɛ́ɛ dem tùr-kɔbr ayi (200 000), ɛ́ a Zuda nɩbɛ ɩ tùr-pie (10 000).

⁵ A Sawul tɩ ta n a Amalɛkɩ tẽw, kpɛ sɔwlɩ a bà-fʋɔla pʋɔ, k'ʋʋ wa ùr zɛb'ɩ bɛ.

⁶ Al pùorí, ʋ tɩ ƴãw na bɛ yel a Kenitɩ mɩnɛ: «Nyɩ yi zaa a Amalɛkɩ tẽw dem sɔgɔ, nyɩ cen zãá nɩ bɛ, ɩ̃ taa wa ɩrɛ nyɩ mɛ̃ a bɛl a ɩ, bʋ̃ʋ n'ʋ vɛ̃, a lɛn daar a Ɩsɩrayɛl nɩbɛ na tɩ yi a Eziptɩ a, nyɩ tɩ ɩ n vla a bɛ zie.» Lɛ n'a a Kenitɩ mɩnɛ tɩ yi zaa a Amalɛkɩ tẽw dem sɔgɔ.

⁷ Lɛ n'a a Sawul tɩ zɛb tʋ̃ɔ́ a Amalɛkɩ tẽw dem a Hawila tɩ sãá nɩ a Suur nʋɔr na tori a Eziptɩ a.

⁸ Ʋ tɩ kʋ n a nɩbɛ pàw pɛr, ɛ́ nyɔw a Amalɛkɩ tẽw nãà, Agagɩ, mimir.

⁹ Ɛcɛ a Sawul nɩ a ʋ sojarɩ tɩ bɛr'ɩ a Agagɩ nɩ a dʋn pʋɔ dʋ̃-vɩɛlɩ vɩɛlɩ, a nĩi nɩ a píir, a dʋ̃-kpɛn nɩ a péli, nɩ a bʋ̃-vɩɛlɩ za, bɛ bɛ tɩ sàw sãw a bɛr ɛ. Ɛcɛ a al za na bɛ tɩ tɛr pɛr a, bɛ tɩ sãw a na bɛr pẽlẽpẽlẽ.

¹⁰ Lɛ n'a a Sore tɩ ƴɛ̀r a Samɩɛl zie à ŋá:

¹¹ «Mãa tɩ bãw kɛ́ lɛ a, ɩ̃ kʋ̃ʋ tɩ ɩ a Sawul ʋ ɩ a nãà ɩ, bʋ̃ʋ n'ʋ vɛ̃, ʋ zawrɩ mɛ̃ na bɛr, ɛ́ bɛ tu a lɛ ɩ̃ na yel a ɩ.» A tɩ dam'ɩ a Samɩɛl, ɛ́ a tɩ̃ɩsɔw ɓil za ʋ zɛlɩ a Sore.

¹² A bio daarɩ́ biɓaar-pipi, a Samɩɛl tɩ ìr'a cen tɩ sowri a Sawul, bɛ yel ʋ: «Sawul cen nɩ Karmɛl tẽw, k'ʋʋ tɩ mɛ zɛb-tʋ̃ɔ́fʋ bãwfʋ bom a ʋ ƴãw, al pùorí, ʋ cãà lo a sɔ́r tɔl siw Gilgal.»

¹³ A Samɩɛl na tɩ ta a Sawul zie a, a Sawul tɩ yel ʋ na: «A Sore, ʋ maalɩ fʋ! Ɩ̃ tu n a lɛ a Sore na yel kʋ̀ m a.»

¹⁴ A Samɩɛl tɩ sowr'a: «A píir nɩ a nĩi kon á ŋá ɩ̃ na wone a, nyɩnɛ n'a a yi?»

¹⁵ A Sawul tɩ sɔw na: «A sojarɩ jɩɩr'ɩ a Amalɛkɩ tẽw dem dʋ̃-vɩɛlɩ vɩɛlɩ zie bɛr, ɛ́ tɛr a wa n a ka kɛ́ bɛ wa kʋ a maal'ɩ bàwr kʋ̀ a Sore fʋ Naaŋmɩn. A ŋmãa al na cɛ a, tɩ sãw a na bɛr pẽlẽpẽlẽ.»

¹⁶ A Samɩɛl tɩ tur'a de a ƴɛ̀rʋ yel: «A man na. Ɩ̃ na yel'ɩ a bom nɛ a Sore na yel kʋ̀ m a tɩ̃ɩsɔw ŋa a kʋ̀ b.» A Sawul yel ʋ: «Ƴɛ̀rɛ.»

¹⁷ A Samɩɛl yel: «Fʋ na saa nyɛ̃ fʋ bɛ zɛ̃ bom a fʋ mɩŋa zie a, fʋ̃ʋ bɛ n'ɩ a Ɩsɩrayɛl dɔwlʋ nɩ-kpɛ̃ɛ ɩ? A Sore ka n nũu ƴãw fʋ, fʋ ɩ a Ɩsɩrayɛl nãà.

¹⁸ A Sore tɩ tõ fʋ na yel: “Cen. Fʋ na tɩ zɛb'ɩ nɩ a Amalɛkɩ tẽw dem, a yel-bebe dem bɛ ŋa, kʋ bɛ pàw pɛr.”

¹⁹ Bʋ̃ʋ pãa so fʋ bɛ tu a lɛ a Sore na yel a? Bʋ̃ʋ n'ʋ so fʋ lo nyɛ a bɛ na-bome, sãw nɩ a Sore pʋɔ?»

²⁰ A Sawul tɩ yel'ɩ a Samɩɛl: «Ɛcɛ ɩ̃ nɩ̃ɛ na tu a lɛ a Sore na yel kʋ̀ m a. Ɩ̃ cen nɩ a zɛbr, a be a Sore na tɩ tõ m a. Ɩ̃ nyɔw nɩ a Amalɛkɩ tẽw nãà Agagɩ mimir wa n, ɛ́ kʋ a Amalɛkɩ tẽw dem pàw pɛr.

²¹ A ɩ̃ sojarɩ ír'ɩ a dʋ̃-vɩɛlɩ vɩɛlɩ zie tɩ nãá kʋ pàw pɛr a, kɛ́ bɛ wa maal'ɩ bàwr kʋ̀ a Sore fʋ Naaŋmɩn a Gilgal ka.»

²² Lɛ n'a a Samɩɛl tɩ yel: «A Sore nɔ̃w nɔnɛ nɩ a nyɩw-a-za-bàwr nɩ a bagɛ man a ʋ nʋɔr-sàwfʋ bɩɩ? Ʋ̃ʋ'hʋ̃! Ʋl zie a, a nʋɔr-sàwfʋ sa n a bàwr, a tu-a-lɛ-ʋ-na-yel-a sa n a pʋ́rɩ nɛn-kãá.

²³ A nʋɔr-zawrʋ ɩ n yel-bier-faa sɛw a bàwr bʋwfʋ, ɛ́ a kpãa-tobr ɩ faa sɛw a tɩbɛ maalʋ. Fʋ na faa zawrɩ na tu a Sore ƴɛ̀rʋ a, a Sore mɩ̀ zawrɩ fʋ na bɛr, fʋ bɛ cãà ɩ a nãà ɩ.»

²⁴ A Sawul tɩ yel'ɩ a Samɩɛl: «Ɩ̃ maal'ɩ yel-bier, ɩ̃ bɛ tu a lɛ a Sore na yel a ɩ, mɩ̀ bɛ lɛb tu a fʋ ƴɛ̀rʋ ɛ. A sojarɩ dɛ̃bɩ̃ɛ n'a ɩ̃ tɩ zɔrɛ, alɛ so ɩ̃ sàw a bɛ zɛlʋ.

²⁵ Ƴɛrɛŋa a, ɩ̃ zɛlɛ fʋ na, dɩ a ɩ̃ yel-bier suur kʋ̀ m, ɛ́ lɛb wa mãa nɩ fʋ̃ʋ tɩ cen ɩ̃ tɩ puori a Sore.»

²⁶ A Samɩɛl tɩ sɔw na: «Ɩ̃ kʋ̃ lɛb wa a fʋ zie ɩ, bʋ̃ʋ n'ʋ vɛ̃, fʋ zawr'a na tu a lɛ a Sore na yel a, a Sore mɩ̀ zawrɩ fʋ na bɛr, fʋ bɛ cãà ɩ a Ɩsɩrayɛl nãà ɩ.»

²⁷ A Samɩɛl tɩ lɩɛb'a maal k'ʋʋ cen, a Sawul ŋmãa nyɔw a ʋ kpar-kpɛ̃ɛ nʋɔr ƴãw, ʋ cɩ̃ɛ.

²⁸ Lɛ n'a a Samɩɛl tɩ yel ʋ: «À ŋá tɔr za n'a a Sore taw faa a Ɩsɩrayɛl naalʋ a fʋ zie a dɩ̃a. Ʋ de ʋ na kʋ̀ nɩ-yũo na sa fʋ a.

²⁹ A Sore na ɩ a Ɩsɩrayɛl yúor-vɩɛlʋ-danʋ a bɛ ŋmarɛ ziri ɛ, bɛ tɛr ƴɛ̀r-nɛ́ɛ ayi mɛ̃ nɩsaal a ɩ.»

³⁰ A Sawul tɩ lɛb'a yel: «Ɩ̃ sãw na. Ƴɛrɛŋa a, ɩ̃ zɛlɛ fʋ na, ƴãw mɛ̃ a Ɩsɩrayɛl nɩbɛ nɩ-kore nɩ a Ɩsɩrayɛl nɩbɛ za niŋé. Lɛb wa mãa nɩ fʋ̃ʋ tɩ cen, ɩ̃ tɩ puori a Sore fʋ Naaŋmɩn.»

³¹ Lɛ n'a a Samɩɛl tɩ bɩɛlɩ a Sawul cen nɩ ʋ tɩ puori a Sore.

³² Al pùorí, a Samɩɛl tɩ yel'a: «Nyɩ tɛr a Amalɛkɩ tẽw nãà, Agagɩ, wa kʋ̀ m.» A Agagɩ tɩ wa n a ʋ zie ɛ́ bɛr tɩɛrʋ, bʋ̃ʋ n'ʋ vɛ̃, ʋ tɩ tɩɛrɛ nɩ ʋ pʋɔ: «Bʋnʋ bɛ ka be ɩ, a kũu zɔ na zãá nɩ mɛ̃.»

³³ Ɛcɛ a Samɩɛl tɩ yel ʋ na: «Mɛ̃ a lɛ a fʋ zɛbr-sɔ-kpɛ̃ɛ na ɩ pɔwbɛ bɛ bɛ lɛb nyɛ̃ a bɛ bibiir a, lɛ mɩ̀ n'a, a pɔwbɛ za pʋɔ a, a fʋ mã, ʋ mɩ̀ ta lɛb nyɛ̃ a ʋ bie ɩ.» A Samɩɛl tɩ yel'ɩ à ŋá baarɩ, ɛ́ cɔ̀r a Agagɩ kʋ a Sore niŋé a Gilgal.

³⁴ A Samɩɛl tɩ lɛb'a cen a Arama, ɛ́ a Sawul lɛb kul a ʋ tẽw, a Givea.

³⁵ A Samɩɛl bɛ lɛb tɩ nyɛ̃ a Sawul ɛ, ɛ́ tɩ ta a ʋ kũu daar. A Samɩɛl tɩ kone nɩ a Sawul ƴãw, bʋ̃ʋ n'ʋ vɛ̃, a Sore tɩ yere na kɛ́ ʋlɛ tɩ bãw kɛ́ lɛ a, ʋʋ kʋ̃ʋ tɩ ɩ a Sawul ɩ a Ɩsɩrayɛl nãà ɩ.