1 Samɩɛl 12 - A SƐB-SÕW

A Samɩɛl ƴɛ̀r-pɛ-baara

¹ A Samɩɛl tɩ yel'ɩ a Ɩsɩrayɛl nɩbɛ za: «Mãa n'ɩ ŋan bɛr wõ a nyɩ zɛlʋ za: ɩ̃ zɩɩl'ɩ nãà, ʋ dɩrɛ naalʋ a nyɩ zu.

² Dɩ̃a na ta a, ʋlɛ n'ʋ na kaarɛ a nyɩ zie, mãa kor'a pɛlɩ zu, — a ɩ̃ bidɛbr ɩ n nɩ-bɛrɛ mɛ̃ a nyɩɩm a. — Ɩ̃ kaa nɩ a nyɩ zie a ɩ̃ pɔ̀lʋ daar za wa tɔ a dɩ̃a.

³ Mãa n'ɩ ŋan a Sore nɩ a nyɩ nãà niŋé, mãa wa tɛr sãwna a, nyɩɩm yel: ãa náab'ʋ ɩ̃ zu? Ãa bõw n'ʋ ɩ̃ zu? Ãa n'ʋ ɩ̃ nɛb? Ãa n'ʋ ɩ̃ dɔwrɩ? Ãa n'ʋ ɩ̃ sàw k'ʋ ŋmɛ m nʋɔr nɩ libie k'ɩ̃ɩ sɔwlɩ a ʋ sãwna? Lɛ wa n'a a, ɩ̃ na lɛb'a tɩr bom nɛ za ɩ̃ na de a.»

⁴ A Ɩsɩrayɛl nɩbɛ tɩ sɔw na: «Fʋ bɛ nɛb tɩ ɛ, bɛ dɔwrɩ tɩ ɛ, fʋ bɛ sàw nɩr ŋmɛ b nʋɔr ɛ.»

⁵ A Samɩɛl lɛb yel: «A na ɩ à ŋá a, a Sore nɩ a nãà dɩ n a dãsɩɛ a dɩ̃a bibir, kɛ́ nyɩ bɛ nyɛ̃ sãwna a ɩ̃ zie ɩ.» Bɛ tɩ sɔw na: «A lɛ n'a.»

⁶ A Samɩɛl tɩ lɛb'a yel bɛ: «A Sore dɩ n a dãsɩɛ, ʋl na ƴãw a Moyiir nɩ a Aarɔ̃ ɩ a nyɩ sãàkʋm-kore bɛ yi a Eziptɩ tẽw a.

⁷ Ƴɛrɛŋa a, nyɩ wa mãa nɩ nyɩɩm wa maalɩ ƴɛ̀rʋ a Sore niŋé. Ɩ̃ na lɛb'a manɩ a ɩ-vɩɛlɩ al za a Sore na maalɩ nyɩɩm nɩ a nyɩ sãàkʋm-kore ƴãw a kʋ̀ nyɩ.

⁸ A Zakɔb nɩ a ʋ nɩbɛ na tɩ ta a Eziptɩ a, a nyɩ sãàkʋm-kore tɩ kõ na cɔw a Sore, ɛ́ a Sore tɩ tõ n Moyiir nɩ Aarɔ̃ bɛ tɩ tɛr a nyɩ sãàkʋm-kore yi n a Eziptɩ wa ƴãw bɛ zɩ̃ a ka.

⁹ Ɛcɛ bɛ tɩ yiir'ɩ a Sore bɛ Naaŋmɩn bɛr, lɛ n'a ʋ tɩ bɛr bɛ kʋ̀ a Hasɔɔr sojarɩ nɩ-kpɛ̃ɛ, Sɩsera, nɩ a Filisɩtɛ̃ mɩnɛ nɩ a Mowab nãà, bɛ zɛb'ɩ bɛ.

¹⁰ Lɛ n'a bɛ lɛb tɩ maal kõ cɔw a Sore yel: “Sore e, tɩ sãw na, tɩ zawrɩ fʋ na bɛr, ɛ́ tu a Báàl mɩnɛ nɩ a Asɩtarte mɩnɛ. Ɛcɛ ƴɛrɛŋa a, faa tɩ a tɩ dɔ̃ dem nuru pʋɔ, ɛ́ tɩ na tone fʋ na!”

¹¹ Lɛ n'a a Sore tɩ tõ Zedeɔ̃ nɩ Bedan nɩ Zɛfɩte nɩ a mãa Samɩɛl, kɛ́ tɩ wa faa nyɩ a nyɩ dɔ̃ dem na jil koli nyɩ a nuru pʋɔ. À ŋá n'a nyɩ tʋ̃ɔ́ kpɛ a tẽw zoom.

¹² Ɛcɛ nyɩ na wa nyɛ̃ a Amɔ̃ tẽw dem nãà, Nahasɩ, ʋ waar a nyɩ ƴãw a, nyɩ yel mɛ̃ na: “Tɩ bɔbr'ɩ nãà!” Mɛ̃ a Sore bɛ tɩ n'ɩ a nyɩ nãà a.

¹³ Ƴɛrɛŋa a, a nãà nyɩ na kaa ír a n'ɩ ŋan, a ʋl nyɩ na zɛlɩ a Sore kʋ̀ nyɩ a.

¹⁴ Nyɩmɛ wa ƴãwnɛ ɛ́ tone a Sore nyɩ Naaŋmɩn a, nyɩmɛ wa sàwr a ʋ nʋɔr, nyɩmɛ bɛ wa zawrɛ a ʋ nɛ́ɛ tub a, nyɩmɛ wa tuur ʋ a, nyɩɩm nɩ a nyɩ nãà a, yel za na vɩɛl'ɩ a nyɩ zie.

¹⁵ Ɛcɛ nyɩmɛ bɛ wa sàwr a ʋ nʋɔr a, nyɩmɛ wa zawrɩ a ʋ nɛ́ɛ tub a, a Sore na wul nyɩ nɩ a ʋ kpɛnʋ, nyɩɩm nɩ a nyɩ sãàkʋm-kore.

¹⁶ A ƴɛrɛŋa mɩ̀ a, nyɩ àr a ka nyɛ̃ a nɔ-ɓãa-yel ŋa a Sore na na maalɩ a nyɩ mimié a.

¹⁷ Mɛ̃ a ble cɛb daar taa n'ɩ à à ŋá? Ɛcɛ ɩ̃ na puor'ɩ a Sore, ʋʋ na ɩ na a saa tanɩ ɛ́ mĩ. Lɛ n'a nyɩ na nyɛ̃ a nyɩ sãwna na ɩ kpɛ̃ɛ sɛw lɛ a Sore zie a, a nyɩ nãà ŋa nyɩ na zɛlɩ a zũú.»

¹⁸ A Samɩɛl tɩ puor'ɩ a Sore, ʋ ɩ a saa tanɩ ɛ́ mĩ a ʋlɩ bibir nɛ. Lɛ n'a a Naaŋmɩn nɩ-bʋʋrɛ za tɩ zɔrɛ a Sore bɛ dɩ vuo ɩ, nɩ a Samɩɛl mɩ̀,

¹⁹ ɛ́ tɩ yel a Samɩɛl: «Puori zɛlɩ a Sore fʋ Naaŋmɩn, a fʋ tõ-tõ-biir ƴãw, tɩ taa kpiir ɛ. Tɩ na zɛlɩ a nãà a, tɩ maal'ɩ yel-bier ƴãw pʋɔ a tɩ yel-bebe ƴãw.»

²⁰ A Samɩɛl tɩ yel bɛ na: «Nyɩ ta zɔrɛ dɛ̃bɩ̃ɛ ɩ, nyɩmɛ nɛbɛ sɩrɩ maalɩ a yel-faa ŋa. Ɛcɛ nyɩ taa lɛb zawrɛ a Sore bɛrɛ ɩ, nyɩ tone ʋ nɩ nyɩ pʋɔ za.

²¹ Nyɩ taa zawrɛ ʋ bɛrɛ ɩ, bʋ̃ʋ n'ʋ vɛ̃, nyɩmɛ wa zawr'ʋ bɛr a, nyɩ na tuur'ɩ bʋ̃-zawlɛ na bɛ tɛr pɛr, ɛ́ kʋ̃ tʋ̃ɔ́ faa nɩr a, a na faa ɩ bʋ̃-zawlɛ a ƴãw.

²² Yel-mɩŋa n'a, a Sore bɛ be za na zawrɩ a ʋ nɩ-bʋʋrɛ bɛr ɛ, a ʋ yúor na ɩ kpɛ̃ɛ a ƴãw, bʋ̃ʋ n'ʋ vɛ̃, ʋl mɩŋa n'ʋ bɔbr sàw nyɩ ɩ a ʋ nɩ-bʋʋrɛ.

²³ Alɛ wa cɛ mãa a, ɩ̃ kʋ̃ sàw sãw a Sore, bɛr a nyɩ puor-kʋ̀b ɛ. Ɩ̃ na cãà na wule nyɩ a sɔr-vla nɩ a sɔr-dẽdẽ.

²⁴ A nyɩɩm a, nyɩ dɛ zɔrɛ a Sore, ɛ́ tone ʋ yel-mɩŋa, nɩ nyɩ pʋɔ za. Nyɩ mɩŋa za nyɛ̃ nɩ a lɛ ʋ na wul nyɩ k'ʋʋ ɩ n kpɛ̃ɛ a.

²⁵ Ɛcɛ nyɩmɛ wa ɩrɛ faa a, nyɩ na kpi na, nyɩɩm nɩ a nyɩ nãà.»