1 Samɩɛl 10 - A SƐB-SÕW

¹ A Samɩɛl tɩ de nɩ a kãá nɩ a kole ʋ na tɩ tɛr a, cir ƴãw a Sawul zũú, ɛ́ nyɔw ʋ weri ɛ́ yel: «A Sore tɔr za bɛ n'ʋ ka a nũu ƴãw fʋ, kɛ́ fʋ ɩ a ʋ nɩ-bʋʋrɛ nɩ-kpɛ̃ɛ ɩ?

² Fʋ̃ʋ wa bɛr mɛ̃ a, fʋ na tuor'ɩ nɩbɛ ayi a Selsa, a Bɛ̃zamɛ tẽw tʋr-bɔw nʋɔr, a Arasɛl yaa ƴãw. Bɛ na yel fʋ na: “A bòn-nyan fʋ na cen tɩ bɔ a, bɛ nyɛ̃ a na. Ƴɛrɛŋa a, a fʋ sãà yiir'ɩ a bòn-nyan yele ɛ́ tɩɛrɛ a nyɩ yele. Ʋ tɩɛrɛ nɩ a lɛ ʋ na na ɩ tɩ lɛb nyɛ̃ a ʋ bie a.”

³ Fʋ̃ʋ wa yi a be cãà cere a, fʋ na tɩ ta n a Tabɔɔr sɛn tɩɛ ƴãw. A be a, dɛbr ata na dúor Betɛl zi-sõw a na tuori fʋ na. A kãw tɛr'ɩ bʋli ata, a kãw dipɛ̃ ata, ɛ́ a ata sob tɛr divɛ̃ nɩ wɔ-gbãw.

⁴ Bɛ na puori fʋ na, ɛ́ kʋ̀ fʋ dipɛ̃ ayi fʋ na na sàw de a.

⁵ Al pùorí, fʋ na ta n a Naaŋmɩn tãgɛ̃́, a be a Filisɩtɛ̃ mɩnɛ sojarɩ na be a. A be a, fʋ̃ʋ wa kpɩɛr a tẽw pʋɔ a, fʋ na tuor'ɩ naaŋmɩn-ƴɛ̀r-manbɛ na yi a maalʋ-zie siwr a: pɛ̀n-ŋmɩɛrbɛ de bɛ nɩ niwn lãwnɩ gãga-ŋmɩɛrbɛ, nɩ weli-pɛblbɛ nɩ korijom-ŋmɩɛrbɛ. Naaŋmɩn-ƴɛ̀r-manɛ ƴã-cɩrʋ na tɛr'ɩ bɛ za.

⁶ Lɛ n'a a Sore Vʋʋrʋ na siw a fʋ zu, a naaŋmɩn-ƴɛ̀r-manɛ ƴã-cɩrʋ been nɛ mɩ̀ na tɛr fʋ na, ɛ́ fʋ na lɩɛb'ɩ nɩ-yũo.

⁷ A yele á ŋá wa ɩrɛ a, fʋ̃ʋ ɩrɛ bom nɛ za fʋ na nyɛ̃ a, bʋ̃ʋ n'ʋ vɛ̃, Naaŋmɩn be n a fʋ zie.

⁸ Fʋ na de nɩ niwn a ɩ̃ ƴãw siw a Gilgal. Mãa a, ɩ̃ na siw na wa páw fʋ a pùorí, nyɩw-a-za-bàwr nɩ ƴã-ɓaarʋ bàwr maalʋ ƴãw. Fʋ na gù m'ɩ bibie ayopõi. Mãa wa wa a, ɩ̃ na yel'ɩ bom nɛ a na fɛr kɛ́ fʋ ɩ a kʋ̀ b.»

⁹ A Sawul na wa bɛr a Samɩɛl a, a Naaŋmɩn tɩ ɩ na ʋ lɩɛbɩ ʋ za, ɛ́ a yele al za a Samɩɛl na tɩ yel kʋ̀ a tɩ ɩ n a ʋlɩ bibir nɛ.

¹⁰ A Sawul nɩ a ʋ tõ-tõ-bie na tɩ tarɛ a Givea a, bɛ tɩ tuor'ɩ naaŋmɩn-ƴɛ̀r-manbɛ. Lɛ n'a a Naaŋmɩn Vʋʋrʋ tɩ siw a ʋ zu, ɛ́ a naaŋmɩn-ƴɛ̀r-manɛ ƴã-cɩrʋ been nɛ nyɔw ʋ.

¹¹ A bɛlɩ dem za na tɩ dãw bãw ʋ, ɛ́ nyɛ̃ ʋ be a naaŋmɩn-ƴɛ̀r-manbɛ pʋɔ a naaŋmɩn-ƴɛ̀r-manɛ ƴã-cɩrʋ nyɔw ʋ a, tɩ sowre nɩ taa: «Bʋ̃ʋ n'ʋ tɛr a Kisɩ bidɛb? A Sawul mɩ̀ lɩɛb'ɩ naaŋmɩn-ƴɛ̀r-manɛ bɩɩ?»

¹² A bɛ kãw tɩ yel'a ƴãw pʋɔ: «Ãa nɩ̃ɛ n'ɩ a bɛ sãà?» Alɛ so bɛ mɩ́ lɔb a zʋkpar kɛ́: «A Sawul mɩ̀ nɔ̃w lɩɛb'ɩ naaŋmɩn-ƴɛ̀r-manɛ bɩɩ?»

¹³ A Sawul ƴã-cɩrʋ na wa baar'a, ʋ do n a maalʋ-zie.

¹⁴ A ʋ sãà-yɛb tɩ sowr'ɩ ʋlɛ nɩ a ʋ tõ-tõ-bie: «Nyɩnɛ n'a nyɩ cen?» Ʋ sɔw: «A bòn-nyan bɔb'a. Ɛcɛ tɩ bɛ tɩ nyɛ̃ a ɩ, ɛ́ cen Samɩɛl zie.»

¹⁵ A ʋ sãà-yɛb lɛb yel: «Ɩ̃ zɛlɛ fʋ na, manɩ bom nɛ a Samɩɛl na yel kʋ̀ nyɩ a, kʋ̀ m.»

¹⁶ A Sawul tɩ yel'ɩ a sãà-yɛb: «Ʋ manɩ na kʋ̀ tɩ kɛ́ bɛ lɛb'a nyɛ̃ a bòn-nyan.» Ɛcɛ a naalʋ-dɩb yele a, ʋ bɛ manɩ kʋ̀ a ʋ sãà-yɛb a lɛ a Samɩɛl na yel a ɩ.

Bɛ ŋmɛ n gbãw kaa ír a Sawul ʋ ɩ a nãà

¹⁷ A Samɩɛl tɩ bʋɔl'ɩ a Ɩsɩrayɛl nɩbɛ a Sore zie a Misɩpa,

¹⁸ wa yel bɛ à ŋá: «À ŋá n'a a Sore, a Ɩsɩrayɛl Naaŋmɩn, yere: Mãa n'ʋ tɛr nyɩ yi n a Eziptɩ tẽw do wa n. Mãa n'ʋ faa nyɩ a Eziptɩ tẽw dem nɩ a naalʋ-ten al za na tɩ dɔwrɛ nyɩ a nuru pʋɔ.

¹⁹ Ɛ́ dɩ̃a nyɩ wa zawrɩ a nyɩ Naaŋmɩn bɛr, ʋl na sõwne nyɩ a nyɩ kpɩɛrʋ nɩ a nyɩ pʋl-vʋ̃ɔ za pʋɔ a, ɛ́ yel ʋ: “Kʋ̀ tɩ nãà.” A na ɩ à ŋá a, nyɩ wa a Sore niŋé dɔwlʋ dɔwlʋ, yie yie.»

²⁰ A Samɩɛl tɩ ɩ na a Ɩsɩrayɛl dɔwlʋ taw pɩɛlɩ, ʋʋ ŋmɛ a gbãw, a gbãw lo a Bɛ̃zamɛ dɔwlʋ zu.

²¹ Ʋ tɩ ƴãw nɩ a Bɛ̃zamɛ dɔwlʋ taw ta yie yie, ʋʋ ŋmɛ a gbãw, a gbãw lo a Matɩrɩ yir zu. Al pùorí, a gbãw tɩ lo n a Kisɩ bidɛb Sawul zu. Ɛcɛ bɛ tɩ bɔ ʋ na gù.

²² Bɛ tɩ lɛb'a sowri a Sore: «Ʋ nɩ̃ɛ na wa a ka a?» A Sore sɔw: «Ʋlɛ n'ɩ ŋan sɔwlɩ a tuor pɛr.»

²³ Bɛ tɩ zɔ na cen tɩ tɛr ʋ wa n, ʋ wa àr a nɩbɛ sɔgɔ: ʋ tɩ tɔl'ɩ zu zuo a nɩbɛ za.

²⁴ A Samɩɛl tɩ yel'ɩ a Naaŋmɩn nɩ-bʋʋrɛ za: «Nyɩ nyɛ̃ nɩ a sob nɛ a Sore na kaa ír a a? Ʋ bɛ tɛr ʋ tɔ a Naaŋmɩn nɩ-bʋʋrɛ za pʋɔ ɩ.» A Naaŋmɩn nɩ-bʋʋrɛ za tɩ ŋmɛ n cɛlsɩ yel: «Kuryii, a nãà, ʋ vʋʋrɛ!»

²⁵ Al pùorí, a Samɩɛl tɩ manɩ nɩ a lɛ za a nãà na tɛr sɔ́r na ɩrɛ a, nɩ a lɛ za a na fɛr k'ʋʋ ɩrɛ a. Ʋ tɩ sɛb a na ƴãw sɛbɛ pʋɔ, bin a zi-sõw pʋɔ. A na tɩ baar'a, ʋ bɛr'ɩ a Naaŋmɩn nɩ-bʋʋrɛ, ŋa za mɩ́ lɛb kul a ʋ yir.

²⁶ A Sawul mɩ̀ tɩ lɛb'a kul a ʋ yir a Givea. Pɔ́l-kpɛn kãw a Naaŋmɩn na tɩ kaa ír kʋ̀ ʋ a tɩ páw ʋ na kul.

²⁷ Ɛcɛ nɩbɛ kãw na bɛ tɛr pɛr towtow a, tɩ yel'a: «Ŋmɩŋmɩn n'a a nɩr ŋa na tʋ̃ɔ́ faa tɩ?» Bɛ tɩ jewr'ʋ na, ɛ́ bɛ wa n bom za wa kʋ̀ ʋ ɛ. Ɛcɛ a bɛ tɩ ɩ a Sawul bom za ɩ.