1 Pɩɛr 5 - A SƐB-SÕW

A Naaŋmɩn píir cɩ̃ɩnʋ yele

¹ Mãa mɩ̀ na pʋɔ a nɩ-kore pʋɔ ɛ́ dɩ a Kɩrɩta tuo-wob dãsɩɛ a, mãa mɩ̀ na na páw a yúor-vɩɛlʋ-danʋ na waar na sãá a, ɩ̃ zɛlɛ nɩ a nɩ-kore na be a nyɩ pʋɔ a:

² nyɩ cɩ̃ɩnɛ a píir a Naaŋmɩn na kʋ̀ nyɩ a. Nyɩ kaarɛ a zie vla, ɛcɛ a ta ɩ mɛ̃ fɛrʋ n'a ɩ, ɛ́ ɩ nyɩ na nɔnɛ a, mɛ̃ a lɛ a Naaŋmɩn na bɔbr a. A mɩ̀ ta ɩ sã-ya nɔ̃wfʋ zũú ɛ, ɛ́ ɩ tome nyɩ na nɔnɛ a zũú.

³ Nyɩ ta dɩrɛ naalʋ a bɛlɩ dem bɛ na kʋ̀ nyɩ kɛ́ nyɩ kaarɛ a zu ɛ, nyɩ nɩ̃ɛ lɩɛbɩ nɩ-vɩɛlɩ a píir na na cɔwrɛ a.

⁴ A Pi-cɩ̃ɩn-kara wa sãá a lɛn daar a, nyɩ na páw nɩ a yúor-vɩɛlʋ-danʋ dɛpaal-kpawʋɔ na bɛ tɛr sãwfʋ a.

⁵ Lɛ mɩ̀ n'a, a nyɩɩm pɔ́lɛ́, nyɩ mɩ̀ sàwr a bɛlɩ dem na ɩ bɛrɛ a nyɩ ƴãw a nʋɔr. Ɛ́ a nyɩ za a, nyɩ siwre nyɩ tʋɔra a nyɩ ɩ-ɩrɩ pʋɔ, bʋ̃ʋ n'ʋ vɛ̃, bɛ sɛb'a: «A bɛlɩ dem na zɛwr bɛ tʋɔra a, Naaŋmɩn bɛ mɩ́ de a bɛ yele ɩ, ɛcɛ a bɛl na siwre bɛ tʋɔra a, ʋ mɩ́ kʋ̀ bɛ nɩ a ʋ maalʋ.»

⁶ A na ɩ à ŋá a, nyɩ siwri nyɩ tʋɔra a Naaŋmɩn kpɛnʋ-za-sob zie, ʋ tʋ̃ɔ́ zɛw nyɩ a daar ʋl ʋ na ƴãw a nãà wa ta a.

⁷ A yele al za na ƴãwnɛ nyɩ tɩɛrʋ a, nyɩ de a kʋ̀ ʋ, bʋ̃ʋ n'ʋ vɛ̃ ʋ kaarɛ nɩ nyɩ zie.

⁸ Nyɩ mɩ́ nyɔw nyɩ tʋɔra a dɩb nɩ a nyub ƴãw, nyɩ bɛr gʋ̃ɔ! A nyɩ dɔ̃ sob, a Gɛgɛra, lanɛ na viire mɛ̃ gbẽw na ùore bɔbr'ɩ nɩr k'ʋʋ vɔl a.

⁹ Nyɩ bà gbɛ́ɛ a ʋ niŋé ɛ́ kpɛmɛ a naaŋmɩn-sàwfʋ pʋɔ, ɛ́ bãwnɩ a tuo á ŋá tɛɛ za mɩ̀ na gùre a nyɩ yɛbr na be a tẽ-daa zu a.

¹⁰ Ɛ́ nyɩmɛ wa wõ tuo kɔwrɩ blã a, a maalʋ za Naaŋmɩn na bʋɔlɩ nyɩ a ʋ yúor-vɩɛlʋ-danʋ na be kʋralɛ a Kɩrɩta pʋɔ a ƴãw a, ʋl tɔr za na lɛb maalɩ nyɩ na ƴãw a pùorí. Ʋ na ɩ na nyɩ kpɛmɛ dɔwlɩ, ʋ na kʋ̀ nyɩ nɩ fãw dɔwlɩ, ɛ́ ɩ nyɩ ta bãw damnʋ ɛ.

¹¹ Ʋlɛ so kpɛnʋ yome yome za! Amɛn.

A sɛbɛ baarʋ ƴɛ̀r-bie

¹² A Sɩlvɛ̃ na ɩ yɛb na bɛ lɛbr pùor a mãa zie a, ʋlɛ n'ʋ ɩ̃ ƴãw ʋ sɛb a sɛb-ŋmale ŋa kʋ̀ nyɩ, k'ɩ̃ɩ kpaalɩ nyɩ ɛ́ yel kʋ̀ nyɩ kɛ́ a Naaŋmɩn maalʋ sɩza pùor'a nyɩ tu.

¹³ A Naaŋmɩn nɩ-kaa-íri lãw na be a Babɩlɔn a puore nyɩ na. A ɩ̃ bie Markɩ mɩ̀ puore nyɩ na.

¹⁴ Nyɩ weri taa puori taa nɩ nɔ̃wfʋ mɛ̃ yɛbr a. A nyɩɩm na lãw nɩ a Kɩrɩta a, a ƴã-ɓaarʋ, ʋ be a nyɩ za zie.