1 Pɩɛr 4 - A SƐB-SÕW

Nyɔ-vʋʋrʋ na bɛ cãà ɩ koro za nyɔ-vʋʋrʋ a

¹ A na ɩ à ŋá a Kɩrɩta wõ a tuo a ʋ ƴã-gan pʋɔ a, a nyɩɩm mɩ̀, nyɩ tɛr a tɩɛrʋ ŋa kpɛ̃w za mɛ̃ zɛbr bom a: nɩr na wõ tuo a ʋ ƴã-gan pʋɔ a, ʋ ír'ɩ nũu a yel-bier pʋɔ,

² k'aa tẽw zu ka nyɔ-vʋʋrʋ na cãà cɛ ʋ a, ʋ tʋ̃ɔ́ vʋʋrɛ mɛ̃ a lɛ a Naaŋmɩn na bɔbr a, ʋ ta vʋʋrɛ tu n a nɩsaal tɛra vʋla ɩ.

³ A dãwdãw nyɩ na tɩ tu a pɩ̃ɔ-yele pùor a, a tɛra vʋla, a dãa-kuolu, a dɩ̀rʋ́, a nyub nɩ a tɩbɛ maalʋ na bɛ vɩɛl towtow a, nyɩ tɩ maal'ɩ a sɔ-kʋra pʋɔ dem pʋ-tɩɛrʋ tɩ sɛw.

⁴ Ƴɛrɛŋa nyɩ na bɛ cãà lãw nɩ bɛ dãwnɛ taa a pɩ̃ɔ ɩ-ɩrɩ maalʋ ƴãw a, a ùr bɛ na ɛ́ ƴãw bɛ tʋʋr nyɩ.

⁵ Ɛcɛ a Naaŋmɩn na cɔbrɩ baarɩ na maal'ɩ a nɩ-vʋʋrɩ lãwnɩ a nɩ-kũuni a ƴɛ̀rʋ a, ʋl zie n'a bɛ nãà wa manɩ a pɛr.

⁶ Al ƴãw n'a bɛ hieri a Yel-nʋ̃ɔ̀ kʋ̀ a kũuni tɛɛ za, k'aa Naaŋmɩn na maal'ɩ bɛ a ƴɛ̀rʋ a bɛ tẽw zu ka nyɔ-vʋʋrʋ ƴãw mɛ̃ a nɩsaalbɛ za a, bɛ tʋ̃ɔ́ vʋʋrɛ a Naaŋmɩn nyɔ-vʋʋrʋ a ƴɛrɛŋa a Vʋʋrʋ Sõw zũú.

Nyɩ maal tɛr a Naaŋmɩn maalʋ

⁷ A yele za baarʋ pɩɛl'a, lɛ so nyɩ mɩ́ nyɔw nyɩ tʋɔra a dɩb nɩ a nyub ƴãw, mɩ́ tʋ̃ɔ́ puori.

⁸ Ɛ́ baa zuo a za, nyɩ nɔnɛ taa yaga za, a nɔ̃wfʋ mɩ́ piwl'ɩ yel-bebe na bɛ tɛr vuo a.

⁹ Nyɩ mɩ́ sàw de taa sãanʋ ɛ́ ta 'hũ'hune ɩ.

¹⁰ A Naaŋmɩn maalʋ a nyɩ been been na mɩ́ páw a, ʋ mɩ́ de ʋ tone nɩ a ʋ taabɛ vla ƴãw. Lɛ n'a nyɩ na ɩ nɩbɛ na kaarɛ a Naaŋmɩn maalʋ zie vla a, a Naaŋmɩn maalʋ na ɩ tɛɛtɛɛ a.

¹¹ Nɩr wa páw maalʋ a ƴɛ̀rʋ ƴãw a, ʋ ƴɛ̀rɛ a Naaŋmɩn ƴɛ̀rʋ kʋ̀rɛ a nɩbɛ. Nɩr wa páw maalʋ a tome ƴãw a, ʋ tone nɩ a Naaŋmɩn fãw, kɛ́ Naaŋmɩn tʋ̃ɔ́ nyɛ̃ danʋ za a Yeezu Kɩrɩta ƴãw, ʋlɛ so yúor-vɩɛlʋ-danʋ nɩ kpɛnʋ yome yome za. Amɛn.

Nyɩ cɩlɛ a nyɩ tuo pʋɔ

¹² Ɩ̃ nɩ-nɔnɩ za a, nyɩmɛ wa be a kpɩɛrʋ vũu pʋɔ a, a ta ùr nyɩ mɛ̃ yel-bʋ̃-bom kãw n'ʋ tarɛ nyɩ ɛ.

¹³ Nyɩ nɩ̃ɛ cɩlɛ nyɩ na pʋɔ a Kɩrɩta tuo pʋɔ a ƴãw, kɛ́ nyɩ mɩ̀ wa tʋ̃ɔ́ be a nʋ̃ɔ̀ nɩ a cɩlʋ pʋɔ, a lɛn daar a ʋ yúor-vɩɛlʋ-danʋ nãà wa sãá a.

¹⁴ Bɛlɛ wa tʋʋr nyɩ zʋmɛ a Kɩrɩta yúor ƴãw a, zu-nʋ̃ɔ̀ dem n'ɩ nyɩ, a Vʋʋrʋ na tɛr danʋ a, a Naaŋmɩn Vʋʋrʋ be n a nyɩ zu.

¹⁵ Nyɩ been kãw za taa wa nyɛrɛ dɔwrʋ ʋ na ɩ nɩ-kʋrɛ, bɩɩ nyãnyuge, bɩɩ yel-fa-maalɛ a ɩ, bɩɩ ʋ na pʋɔrɛ a ʋ taabɛ yele na bɛ jɩ́rɛ ʋ a pʋɔ a ɩ.

¹⁶ Ɛcɛ alɛ wa ɩ ʋ na ɩ kɩrɩta-nɩr a ƴãw n'a a, a ta ɩrɛ ʋ vĩ ɛ, ʋ nɩ̃ɛ danɛ a Naaŋmɩn, a kɩrɩta-nɩr yúor ŋa ʋ na tɛr a ƴãw.

¹⁷ Sɩza n'a, a ƴɛ̀rʋ-maalʋ na tine a daar ta na. Ɛ́ a Naaŋmɩn nɩ-bʋʋrɛ nɛbɛ bɛ de niwn maal'ɩ a ƴɛ̀rʋ. Ɛcɛ alɛ wa tine a tɩ zie a, ŋmɩŋmɩn n'a a baarʋ daar a na ŋmɛ̃ a bɛlɩ dem na zawrɩ na sàw de a Naaŋmɩn Yel-nʋ̃ɔ̀ a zie?

¹⁸ Mɛ̃ a lɛ a Sɛb-sõw na yel a: «A nɩ-mɩŋa wa nyɛ̃ a faafʋ hanɩ nɩ a, ŋmɩŋmɩn n'a a na ŋmɛ̃ a nɩr na bɛ bãw kɛ́ Naaŋmɩn be na a zie, nɩ a yel-bier-maalɛ zie?»

¹⁹ A na ɩ à ŋá a, a bɛlɩ dem na wone tuo mɛ̃ a lɛ a Naaŋmɩn na bɔbr a, bɛ de a bɛ mɩŋa za ƴãw a bɛ Íre na ŋmɛ̃ ʋ ŋmɛ̃a a nuru pʋɔ, ɛ́ cãà ɩrɛ a vla.