1 Pɩɛr 2 - A SƐB-SÕW

A Kɩrɩta n'ɩ a kʋsɩɛr na tɩɛ a yir tɛr a

¹ A na ɩ lɛ a, a po-tuolu bʋʋrɛ za nɩ a ziri za, a libelibe bʋʋrɛ za, a nyuur nɩ a tɔ yel-faar manʋ a, nyɩ bɛr a za a lo.

² Nyɩ bɔbr a Naaŋmɩn ƴɛ̀rʋ bʋ̀r-kʋ̃ɔ tɛwr mɛ̃ bi-pɩɩlɛ a, k'ʋʋ tʋ̃ɔ́ mɩ́ ɩ nyɩ kɛrɛ tɩ páw a faafʋ.

³ Bʋ̃ʋ n'ʋ vɛ̃, Mɛ̃ a lɛ a Sɛb-sõw na yel a: «Nyɩ lɛm'a nyɛ̃ a lɛ a Sore na nʋmɛ a.»

⁴ Nyɩ taw pɩɛlɩ a Sore: ʋlɛ n'ɩ a kʋsɛ-mimir ʋl a nɩsaalbɛ na jɛ bɛr, ɛ́ a Naaŋmɩn zie ʋ ɩ kʋsɛ-kaa-íra nɩ kʋsɛ-yúor a.

⁵ A nyɩɩm mɩ̀, nyɩ ɩ mɛ̃ kʋsɛ-mimie bɛ na ŋmaarɛ nɩ yir Vʋʋrʋ Sõw na kpɩɛr a. Nyɩ ɩ Naaŋmɩn bàwr-maal-son maalɛ tɩɛrʋ bàwr a Naaŋmɩn na na tʋ̃ɔ́ sàw de a Yeezu Kɩrɩta zũú a.

⁶ Lɛ so bɛ sɛb a Sɛb-sõw pʋɔ kɛ́: «Mãa n'ɩ ŋa n ƴãwnɛ dacĩ-goraa kʋsɩɛr a Sɩyɔ̃ tẽw pʋɔ, kʋsɛ-yúor ɩ̃ na kaa ír a. Ʋlɩ sob na de a ʋ tɩɛrʋ ƴãw a ʋ ƴãw a, ʋ kʋ̃ nyɛ̃ vĩ ɛ.»

⁷ A na ɩ lɛ a, nyɩɩm na sàw de a Naaŋmɩn a, nyɩmɛ so ƴãwfʋ. Ɛcɛ a bɛlɩ dem na bɛ sàw de a ƴãw, «a kʋsɩɛr ʋl a yir-mɩɛrbɛ na ír lɔb bɛr a, lɩɛb'ɩ a yir pɛr kʋsɩɛr», nɩ kɛ́:

⁸ «Ɛ́ ɩ a kʋsɩɛr ʋl ƴãw bɛ na mɩ́ ŋmɩɛr gbɛ́ɛ a, pìir kʋsɩɛr na ɩrɛ bɛ lore a.» A bɛlɩ dem na bɛ sàw de a, bɛ ŋmɩɛr'ɩ gbɛ́ɛ a ʋ ƴãw, a bɛ na bɛ sàw de a Naaŋmɩn ƴɛ̀rʋ a zũú. Ɛ́ lɛ n'a a tɩ fɛr k'aa ɩ a bɛ zie.

⁹ Ɛcɛ nyɩɩm a, nyɩ ɩ n «Nɩ-bʋʋrɛ bɛ na kaa ír a, Nãà bàwr-maalbɛ, nɩ-son bʋʋrɛ, nɩbɛ Naaŋmɩn na ya de a», kɛ́ nyɩ manɛ a ʋ tõ-vɩɛlɩ, ʋl na bʋɔlɩ nyɩ a lige pʋɔ yi wa n a ʋ cãà na bɛ tɛr tɔ a pʋɔ a.

¹⁰ Nyɩɩm na bɛ tɩ ɩ a ʋ nɩ-bʋʋrɛ a, ƴɛrɛŋa a, nyɩ ɩ n a Naaŋmɩn nɩ-bʋʋrɛ. Nyɩɩm na bɛ tɩ páw a ʋ su-ɓaarʋ a, ƴɛrɛŋa a, nyɩ páw ʋ na.

Nyɩ ɩrɛ mɛ̃ Naaŋmɩn tõ-tõ-biir a

¹¹ Ɩ̃ nɩ-nɔnɩ za na ɩ mɛ̃ nɩ-tɔlɩ nɩ nɩ-sãanbɛ a, ɩ̃ zɛlɛ nyɩ na, nyɩ ciir a ƴã-gan nʋ̃ɔ̀-faar vʋla na mɩ́ zɛbr'ɩ nyɩ a.

¹² Nyɩ cere dẽdẽ a nɩ-bʋʋr-yoru sɔgɔ, lɛ n'a a bom ʋl ƴãw bɛ na yere kɛ́ nyɩ ɩ n nɩ-faar a, a nyɩ ɩ-vɩɛlɩ na caalɩ bɛ, bɛ danɛ a Naaŋmɩn a ʋ waa bibir.

¹³ Nɩsaal za na dɩ nɩ-kpɛ̃ɛnʋ a, nyɩ sàwr a ʋ nʋɔr a Sore ƴãw: a Ʋrɔm tẽw na-kpɛ̃ɛ n'ʋ bɩɩ, nyɩ sàwr a ʋ nʋɔr, ʋ na so bom za a zũú.

¹⁴ A Ʋrɔm tẽw na-kpɛ̃ɛ-lɩɛrbɛ nɛbɛ bɩɩ, nyɩ sàwr a bɛ nʋɔr, a na-kpɛ̃ɛ n'ʋ ír bɛ ƴãw kɛ́ bɛ mɩ́ dɔwrɩ a ɩ-fa-maalbɛ ɛ́ mʋʋrɩ a nɩ-vɩɛlɩ.

¹⁵ A Naaŋmɩn bɔbr'a kɛ́ nyɩ ɩrɛ ɩ-vɩɛlɩ, k'aa bɛlɩ nɩbɛ nɛ na bɛ bãw bom, ɛ́ bɛ bãw yã a, ta mɩ́ nyɛ̃ ƴɛ̀rʋ ƴɛ̀r ɛ.

¹⁶ Nyɩ vʋʋrɛ mɛ̃ nɩbɛ na so bɛ tʋɔra a, ɛcɛ nyɩ ta de a só-nyɩ-tʋɔra pàw nɩ a nyɩ po-to-ɩb ɛ, nyɩ ɩrɛ mɛ̃ Naaŋmɩn tõ-tõ-biir a.

¹⁷ Nyɩ ƴãwnɛ a nɩsaalbɛ za, nyɩ nɔnɛ a nyɩ yɛbr, nyɩ zɔrɛ a Naaŋmɩn, nyɩ ƴãwnɛ a na-kpɛ̃ɛ.

Tõ-tõ-biir i, nyɩ sàwr a nyɩ nɩ-bɛrɛ nʋɔr

¹⁸ Tõ-tõ-biir i, nyɩ sàwr a nyɩ nɩ-bɛrɛ nʋɔr nɩ zɔba yaga za, a bɛl na ɩ nɩ-vɩɛlɩ nɩ nɩsaal-bàalʋ mɩnɛ a, nɩ a bɛl na kpɛ po-tuo a.

¹⁹ Bʋ̃ʋ n'ʋ vɛ̃, nɩr na sàw a Naaŋmɩn nʋɔr de a tuo na bɛ sɛw a, a ɩ n maalʋ.

²⁰ Nyɩmɛ mɩ́ wa sàw de a dɔwrʋ nyɩ na sãw a ƴãw a, bʋ̃ʋ yúor'ʋ nyɩ na páw a pʋɔ? Ɛcɛ nyɩmɛ mɩ́ wa ɩ a vla baarɩ ɛ́ cãà sàw de a dɔwrʋ a, a ɩ n maalʋ nyɩ páw a Naaŋmɩn zie.

²¹ À á ŋá tɔr za ƴãw n'a bɛ bʋɔlɩ nyɩ. A Kɩrɩta mɩŋa mɩ̀ wõ n tuo a nyɩ ƴãw, a ɩ wulu ʋ kʋ̀ nyɩ kɛ́ nyɩ tuur a ʋ gbɛ́ɛ,

²² ʋl na bɛ maalɩ yel-bier, ɛ́ ziri mɩ̀ bɛ yi a ʋ nʋɔrɩ́ a,

²³ ʋl bɛ na mɩ́ tɩ tʋ, ʋʋ bɛ tʋ yáa a san a, ʋl na mɩ́ tɩ wone tuo ɛ́ bɛ ŋmɩɛr ƴãwn nɩr za a. Ʋ nɩ̃ɛ na mɩ́ tɩ de ʋ tʋɔra bɛr kʋ̀ a Naaŋmɩn na maalɛ a ƴɛ̀rʋ nɩ mɩnʋ a,

²⁴ ʋl na tuo a tɩ yel-bebe a ʋ ƴã-gan pʋɔ a da-gara zu, kɛ́ tɩ kpi ta cãà pʋɔ yel-bier pʋɔ, ɛ́ vʋʋrɛ vʋʋrʋ na tu yel-mɩnʋ a, a ʋl natɩɛ na sanɩ nyɩ a.

²⁵ Nyɩ tɩ bɔrɛ na gʋɔr mɛ̃ píir a, ɛcɛ ƴɛrɛŋa a, nyɩ lɛb'a cen a sob nɛ na ɩ a nyɩ cɩ̃ɩnɛ nɩ a nyɩ kaarɛ a zie.