1 Na-mɩnɛ 9 - A SƐB-SÕW

A Sore ɩ na a Salomɔ̃ lɛb nyɛ̃ ʋ

¹ A nãà Salomɔ̃ na tɩ ŋmãa a Sore Ŋmɩn-yir-kpɛ̃ɛ baar'a, lãwnɩ a ʋ nãà yir nɩ a alɩ bome nɛ za ʋ na tɩ bɔr k'ʋʋ ŋmãa a,

² a Sore tɩ ɩ na k'ʋ nyɛ̃ ʋ a gb'a ayi sob, mɛ̃ a lɛ ʋ na tɩ ɩ k'ʋ nyɛ̃ ʋ a Gabaɔ̃ a.

³ A Sore tɩ yel'ɩ a Salomɔ̃ à ŋá: «Ɩ̃ wõ n a puoru fʋ na puori, ɛ́ zɛlɩ mɛ̃ a yãayãa a: a Ŋmɩn-yir-kpɛ̃ɛ ŋa fʋ na ŋmãa a, ɩ̃ maal'ʋ na, k'ɩ̃ɩ tʋ̃ɔ́ mɩ́ be a nyɩ sɔgɔ kʋralɛ a zie ŋa. Ɩ̃ na gùre ʋ nɩ vla vla kʋralɛ.

⁴ Ɛ́ a fʋ̃ʋ a, fʋ̃ʋ wa ɩrɛ a ɩ̃ zie mɛ̃ a fʋ sãà Daviir a, fʋ̃ʋ wa tu m nɩ a fʋ pʋɔ za, ɛ́ cere dẽdẽ a, fʋ̃ʋ wa ɩrɛ a lɛ za ɩ̃ na yere kʋ̀rɛ fʋ a, fʋ̃ʋ wa sàwr a wulu nɩ a tub ɩ̃ na kʋ̀ b a,

⁵ ɩ̃ na ɩ na fʋ dɩrɛ naalʋ kʋralɛ a Ɩsɩrayɛl nɩbɛ zu, mɛ̃ à à ŋá ɩ̃ na yel a fʋ sãà Daviir zie a: “A fʋ bʋʋrɛ nɩr kãw na mɩ́ be n be kʋralɛ dɩrɛ naalʋ a Ɩsɩrayɛl nɩbɛ zu, a fʋ pùorí.”

⁶ Ɛcɛ fʋ̃ʋ nɩ a Ɩsɩrayɛl nɩbɛ, nɩ a nyɩ bʋʋrɛ wa gùr pùor cɔw mɛ̃ a, nyɩmɛ bɛ wa sàwr a nɛ-ƴãwnɩ nɩ a wulu ɩ̃ na kʋ̀ nyɩ a, nyɩmɛ wa puore ŋmɩn-yoru, ɛ́ gbine dume a niŋé a,

⁷ ɩ̃ na ír nyɩ na nɩ fãw, a nyɩɩm Ɩsɩrayɛl nɩbɛ, a tẽw ɩ̃ na kʋ̀ nyɩ a pʋɔ. Ɩ̃ na jɛ n a Ŋmɩn-yir-kpɛ̃ɛ ŋa ɩ̃ na maalɩ a ɩ̃ yúor ƴãw a bɛr, ʋ zãá nɩ mɛ̃. Lɛ n'a a nɩ-bʋʋrɛ za na ɩrɛ a Ɩsɩrayɛl laar ɛ́ tʋʋr ʋ.

⁸ A nɩbɛ mɩ́ wa tɔlɛ pɩɛlɩ a Ŋmɩn-yir-kpɛ̃ɛ ŋa na lo a, bɛ na mɩ́ nyɔw nɩ nʋɔr, ɛ́ pʋ̀lá vʋ̃ɔ bɛ, bɛ yere: “Bʋ̃ʋ n'ʋ so a Sore ɩ a tẽw ŋa nɩ a Ŋmɩn-yir-kpɛ̃ɛ ŋa à à ŋa?”

⁹ Bɛ na mɩ́ sɔw bɛ na: “A Ɩsɩrayɛl nɩbɛ na zawrɩ a Sore bɛ Naaŋmɩn bɛr a n'a so, ʋl na tɩ ɩ a bɛ sãàkʋm-kore yi a Eziptɩ tẽw a. Bɛ tu n ŋmɩn-yoru, gbĩ dume a niŋé puor'a. Alɛ n'a so a Sore ɩ a kpɩɛrʋ á ŋá za páw bɛ.”»

A Salomɔ̃ tõ-bʋʋrɛ bʋʋrɛ a mɩnɛ

¹⁰ A na wa maalɩ yome lɩzɛr a, a Salomɔ̃ tɩ ŋmãa nɩ a Ŋmɩn-yir-kpɛ̃ɛ nɩ a ʋl mɩŋa nãà yir baarɩ.

¹¹ Tɩ́ɩ̀r tẽw nãà, Hiram, n'ʋ tɩ kʋ̀ ʋ a sɛɛdɩr dàar za, a sɩpɩrɛ dàar za nɩ a salm-zɩɛ za ʋ na tɩ bɔbr a ʋ yie ŋmab tome tob ƴãw a. Alɛ n'a so a Salomɔ̃ tɩ kʋ̀ ʋ tẽ-bɛrɛ lɩzɛr a Galile vuo pʋɔ.

¹² A Hiram tɩ yi n a Tɩ́ɩ̀r wa k'ʋʋ wa nyɛ̃ a tẽ-bɛrɛ a Salomɔ̃ na kʋ̀ ʋ a. Ɛcɛ a bɛ tɩ pɛlɩ a ʋ pʋɔ ɩ.

¹³ A Hiram tɩ yel ʋ na: «Yɛb i, tẽ-bɛrɛ n'ɩ a abobe sob fʋ na kʋ̀ m a?» Alɛ n'a so, wa tɔ dɩ̃a, bɛ cãà bʋɔlɛ a vuo ŋa “Kavul Tẽw.”

¹⁴ Ɛcɛ, a Hiram tɩ ƴãw na bɛ kʋ̀ a Salomɔ̃ salm-zɩɛ tɔn ata nɩ ŋmãa.

¹⁵ A nãà Salomɔ̃ tɩ ƴãw nɩ pɔ̃tɔrɩ tome a Ŋmɩn-yir-kpɛ̃ɛ, a nãà yir, a gàr bɛ na bʋɔlɛ Milo a, nɩ a Zerizalɛm dacine mɛb ƴãw, de nɩ Hasɔɔr, Megido nɩ Gezɛɛr tẽ-bɛrɛ mɛb ƴãw.

¹⁶ A Eziptɩ tẽw nãà Faarawɔ̃ tɩ yi n a zɛbr ƴãw. Ʋ tɩ zɛb'a de a Gezɛɛr tẽ-kpɛ̃ɛ, kʋ a Kanãa tẽw dem na tɩ kpɩɛr a ʋ pʋɔ a, ɛ́ nyɩw ʋ bɛr, al pùorí ʋ de ʋ kʋ̀ a ʋ pɔwyaa na kul a Salomɔ̃ a, ʋ ɩ a ʋ kul-taa cuw bom.

¹⁷ Alɛ n'a so a tɩ fɛr a Salomɔ̃ ʋ lɛb mɛ a Gezɛɛr tẽ-kpɛ̃ɛ. Ʋ mɩ̀ tɩ lɛb'a mɛ Bɛtɩ-Horon-le-Ba,

¹⁸ Baalatɩ nɩ Tamaar tẽ-bɛrɛ na be a tẽw wɛja-kpalɛ vuo pʋɔ a,

¹⁹ de nɩ a tẽ-bɛrɛ al pʋɔ ʋ na mɩ́ tɩ ƴãw bɛ maal bin a ʋ bʋ̃-dɩrɩ a, a al pʋɔ ʋ na mɩ́ tɩ ƴãw a ʋ zɛbr-torkori a, nɩ a al pʋɔ ʋ na mɩ́ tɩ ƴãw a ʋ wie a. Ʋ tɩ mɛ n alɩ bome nɛ za ʋ na bɔbr a, a Zerizalɛm tẽ-kpɛ̃ɛ tɔr za pʋɔ, a Libã tãw zu nɩ a tẽw za pʋɔ ʋ na dɩrɛ a naalʋ a.

²⁰ Nɩbɛ na bɛ ɩ a Ɩsɩrayɛl bʋʋrɛ a tɩ cãà na kpɩɛr a tẽw: Amoritɩ mɩnɛ, Hititɩ mɩnɛ, Perizitɩ mɩnɛ, Hivitɩ mɩnɛ nɩ Zebi tẽw dem.

²¹ Bɛ tɩ cãà nɩ be, a Ɩsɩrayɛl nɩbɛ na bɛ tɩ tʋ̃ɔ́ kʋ bɛ pàw pɛr a ƴãw. Bɛlɛ nɛbɛ a Salomɔ̃ tɩ ír ƴãw a pɔ̃tɔrɩ tome pʋɔ, bɛ cãà be nɩ dɩ̃a.

²² A Salomɔ̃ bɛ tɩ ír Ɩsɩrayɛl nɩr kãw za ƴãw a pɔ̃tɔrɩ tome pʋɔ ɩ: bɛ nɩ̃ɛ na tɩ ɩ zɛbr-nɩbɛ, a ʋ tõ-tonbɛ, a ʋ zɛbr-nɩbɛ nɩ-bɛrɛ, a ʋ wie kaarbɛ, a ʋ zɛbr-torkori nɩ-bɛrɛ nɩ a ʋ wi-zɔmnbɛ nɩ-bɛrɛ.

²³ A nãà-lɩɛrbɛ tɩ kaa na ír tõ-tõ-nɩ-bɛrɛ kɔbr anũu dɔwlɩ lɩz'a ayi nɩ pie (550), kɛ́ bɛ jɩ́rɛ a Salomɔ̃ tome a zu-sɛbla na tone a.

²⁴ A Faarawɔ̃ pɔwyaa na wa wob yi a Daviir Tẽ-kpɛ̃ɛ pʋɔ, cen a yir a Salomɔ̃ na ŋmãa kʋ̀ ʋ pʋɔ baar'a n'a, a Salomɔ̃ ƴãw bɛ maalɩ a gàr bɛ na bʋɔlɛ a Milo a.

²⁵ A Salomɔ̃ mɩ́ tɩ maal'ɩ nyɩw-a-za-bagɛ nɩ lãw-taa bagɛ gb'a ata a yũon pʋɔ. Ʋ mɩ́ tɩ nyɩw a nɩ a Sore ƴãw a bàwr-maal-kuur ʋ na tɩ mɛ a ʋ ƴãw a zu. À ŋá n'a a Ŋmɩn-yir-kpɛ̃ɛ tɩ be be a ʋlɩ bom nɛ ƴãw bɛ na ŋmãa ʋ a.

²⁶ A nãà Salomɔ̃ tɩ ƴãw na bɛ maalɩ gbee Esion-Gevɛɛr na pɩɛlɩ Eilatɩ a. Gbee siwfʋ zie n'ʋ be a Bàa-kɛkɛɛ kʋ̃ɔ-kpɛ̃ɛ nʋɔr, a Edɔm tẽw pʋɔ.

²⁷ A nãà Hiram tɩ tɩr'ɩ a Fenisɩ̃ɛ gbor-duwrbɛ, na bãw a kʋ̃ɔ-kpɛ̃ɛ vla a, kʋ̀ a Salomɔ̃, kɛ́ bɛ wa bɩɛlɩ a ʋ nɩbɛ.

²⁸ A gbor-duwrbɛ bɛ ŋa za tɩ lãw na cen Ofɩɩr tẽw, tɩ wa n salm-zɩɛ na zuo tɔn pie nɩ ayi a, wa kʋ̀ a nãà Salomɔ̃.