1 Na-mɩnɛ 4 - A SƐB-SÕW

A Salomɔ̃ na cɔbrɩ a ʋ naalʋ-tẽw a

¹ A Salomɔ̃ tɩ dɩ n a naalʋ a Ɩsɩrayɛl tẽw za zu.

² A ʋ tõ-tõ-bi-bɛrɛ bɛrɛ yée n'ɩ á ŋá: a bàwr-maalɛ Azarɩa na ɩ Sadɔkɩ bidɛb a,

³ a sɛ-sɛbrbɛ Elihorɛfɩ nɩ Ahiya na ɩ Sɩsa bidɛbr a, Ahiludɩ bidɛb Yehosafatɩ na ƴɛ̀rɛ a nãà yúor ƴãw a,

⁴ a zɛbr-nɩbɛ nɩ-kpɛ̃ɛ Benaya na ɩ Yehoyada bidɛb a, a bàwr-maalbɛ Sadɔkɩ nɩ Abɩataar,

⁵ a nãà-lɩɛrbɛ nɩ-kpɛ̃ɛ Azarɩa na ɩ Natan bidɛb a, a bàwr-maalɛ nɩ a nãà yã-wule Zabudɩ na ɩ Natan bidɛb a,

⁶ a nãà yir nɩ-kpɛ̃ɛ Ahisaar, a pɔ̃tɔrɩ tome nɩ-kpɛ̃ɛ Adonɩram na ɩ Abɩda bidɛb a.

⁷ A Salomɔ̃ mɩ̀ tɩ tɛr'ɩ nãà-lɩɛrbɛ pie nɩ ayi a Ɩsɩrayɛl tẽw za pʋɔ. Bɛlɛ nɛbɛ tɩ so a nãà nɩ a ʋ yir dem bʋ̃-dɩrɩ yele: ŋa za cuw-been a yũon pʋɔ.

⁸ A bɛ yée n'ɩ á ŋá: Huur bidɛb'ʋ so a Efarayim tãw vuo.

⁹ Dekɛɛr bidɛb so Makasɩ, Saalvim, Bɛtɩ-Semɛsɩ nɩ Elon-Bɛtɩ-Hanan vuo.

¹⁰ Hesɛdɩ bidɛb na be Arubotɩ a so Soko vuo nɩ a Hefɛɛr tẽw za.

¹¹ Abinadab bidɛb so a Door tãli vuo ʋl za —ʋ tɩ kul'ɩ Tafatɩ, a Salomɔ̃ pɔwyaa kãw—.

¹² Ahiludɩ bidɛb, Baana, so Taanakɩ nɩ Megido vuo, de nɩ a Bɛtɩ-Sean vuo za. —A Bɛtɩ-Sean vuo cen na tɩ tɔ Sartan, a Izireyɛl pile. Ʋ yi n a Bɛtɩ-Sean ɛ́ cen tɩ tɔ Avɛl-Mehola, ɛ́ tɩ gãw Yokimowam bɛr—.

¹³ Gevɛɛr bidɛb, na be Aramɔtɩ tẽw a Galaadɩ a, so a Manase bidɛb Yayiir tẽli vuo, a Galaadɩ tẽw, de nɩ a Argɔvʋ tẽw na be a Basan tã-sɛr zu a. A vuo ŋa za tɩ tɛr'ɩ tẽ-bɛrɛ bɛrɛ lɩz'a ata na tɛr zɛbr yir-kpɛn a. Bɛ tɩ mɛ n dacĩ-bɛrɛ viiri koli a, ɛ́ a dɩ̃dɛɛ pamɛ tɛr kur-zɩɛ bʋ̃-kparɩ.

¹⁴ Ido bidɛb, Ahinadavʋ, so a Mahanayim vuo.

¹⁵ Ahimaasɩ so a Nɛfɩtali vuo —ʋ mɩ̀ tɩ kul'ɩ a Salomɔ̃ pɔwyaa kãw na tɩ dɩ kɛ́ Basɩmatɩ a—.

¹⁶ Husaɩ bidɛb, Baana, so Asɛɛr nɩ Beyalɔtɩ vuo.

¹⁷ Paruwa bidɛb, Yehosafatɩ, so a Ɩsakaar vuo.

¹⁸ Ela bidɛb, Simeyi, so a Bɛ̃zamɛ vuo.

¹⁹ Uuri bidɛb, Gevɛɛr, so a Galaadɩ tẽw, de nɩ a Amoritɩ mɩnɛ nãà Sihon tẽw, nɩ a Basan nãà Ɔgɩ tẽw. Nãà-lɩɛrɛ been mɩ̀ tɩ be n a Zuda tẽw pʋɔ, ƴãw pʋɔ a pie nɩ ayi bɛ ŋa ƴãw.

²⁰ A Zuda naalʋ-tẽw nɩbɛ nɩ a Ɩsɩrayɛl naalʋ-tẽw nɩbɛ tɩ yãwmɛ na mɛ̃ a kʋ̃ɔ-kpɛ̃ɛ nʋɔr biire a. Bɛ tɩ tɛr a na dɩrɛ kɛ́ nyuur, ɛ́ nʋ̃ɔ̀ ɩrɛ bɛ.