Bìoball air-loidhne

1 Na-mɩnɛ 3 - A SƐB-SÕW

A Salomɔ̃ kul'ɩ Eziptɩ tẽw nãà pɔwyaa

¹ A Salomɔ̃ tɩ kul'ɩ a Eziptɩ tẽw nãà, Faarawɔ̃, pɔwyaa kãw. Lɛ n'a ʋ tɩ ɩ a Faarawɔ̃ dɩɛm. Ʋ tɩ ƴãw nɩ a ʋ pɔw a Zerizalɛm zie kãw bɛ na bʋɔlɛ kɛ́ Daviir-Tẽ-kpɛ̃ɛ a, ɛ́ gù k'ʋʋ tɩ mɛ a ʋl mɩŋa yir, nɩ a Sore yir-kpɛ̃ɛ nɩ a dacine na viiri koli a Zerizalɛm a baarɩ.

² A ʋlɩ vuo nɛ pʋɔ a, a nɩbɛ tɩ cãà na maalɛ a bagɛ a maalʋ-ziir a tẽw pʋɔ. Bʋ̃ʋ n'ʋ vɛ̃, bɛ bɛ tɩ ŋmãa a Sore yir-kpɛ̃ɛ sɛr ɛ.

³ A Salomɔ̃ tɩ wul'a k'ʋʋ nɔnɛ nɩ a Sore, ʋ na tɩ ɩrɛ a lɛ a ʋ sãà Daviir na tɩ yel kʋ̀ ʋ a ƴãw. Ɛcɛ ʋ mɩ̀ tɩ kʋrɛ nɩ dʋn maalɛ nɩ bagɛ, ɛ́ nyɩwr a tɩ-suur-zɔ̃-na-nyùur-vla-vla-a, a maalʋ-ziir.

A Salomɔ̃ zɛlɩ nɩ yã-bãwfʋ a Naaŋmɩn zie a nɩbɛ kaafʋ ƴãw
(Nyɛ̃ 1Bi-yel 1:2-13 )

⁴ Bibir kãw, a nãà tɩ cen nɩ Gabaɔ̃ k'ʋʋ tɩ maalɩ bàwr. Bʋ̃ʋ n'ʋ vɛ̃, be n'a a maalʋ-zi-kpɛ̃ɛ za tɩ be. A Salomɔ̃ tɩ kʋ n nyɩw-a-za-bàwr dʋn túr (1 000) a Gabaɔ̃ bàwr-maal-kuur zu.

⁵ A Gabaɔ̃ be a, a Salomɔ̃ tɩ nyɛ̃ nɩ a Sore tɩ̃ɩsɔw, zánʋ pʋɔ. A Naaŋmɩn tɩ yel ʋ na: «Bʋ̃ʋ n'ʋ ɩ̃ na kʋ̀ b? Zɛlɩ.»

⁶ A Salomɔ̃ tɩ sɔw na: «Fʋ tu n a fʋ tõ-tõ-bie ɩ̃ sãà Daviir pùor nɩ nɔ̃wfʋ yaga za, ʋ na tɩ cere a fʋ niŋé, ɩ yel-mɩŋa nɩr, nɩ-mɩŋa nɩ nɩsaal-dẽdẽ a. Fʋ cãà na tɛr a fʋ nɔ̃wfʋ a ʋ zie, kʋ̀ ʋ bidɛb na zɩ̃ a ʋ naalʋ-dà-kɔw zu a dɩ̃a a.

⁷ Sore ɩ̃ Naaŋmɩn i, fʋ̃ʋ n'ʋ ƴãw k'ɩ̃ ɩ a nãà lɩɛrɩ a ɩ̃ sãà Daviir. Ɛcɛ ɩ̃ cãà na ɩ pɔlbil-vɛlvɛl, bɛ bãw a nɩ-kpɛ̃ɛnʋ dɩb ɛ.

⁸ Ɛ́ mãa n'ɩ ŋa ɩ a nɩ-bʋʋrɛ fʋ na kaa ír a niw-diere, nɩ-bʋʋrɛ na yãwmɛ yãwmɛ bɛ kʋ̃ tʋ̃ɔ́ sɔ́r bãw bɛ nʋɔr a.

⁹ A lɛ pʋɔ a, kʋ̀ a mãa, fʋ tõ-tõ-bie, tɩɛrʋ na cɛlɛ be a, a fʋ nɩbɛ kaafʋ ƴãw, a vla nɩ a faa owru ƴãw. Alɛ bɛ ɩ lɛ, ãa n'ʋ na tʋ̃ɔ́ kaarɛ a nɩ-bʋʋrɛ na sɛw à ŋá a zie?»

¹⁰ A Salomɔ̃ zɛlʋ ŋa tɩ pɛlɩ nɩ a Sore pʋɔ.

¹¹ A Naaŋmɩn tɩ sɔw nɩ a nãà à ŋá: «Fʋ bɛ zɛlɩ nyɔ-vʋʋr-wogo ɩ, bɛ zɛlɩ a tɛra ɩ, bɛ zɛlɩ a fʋ dɔ̃ dem kũu ɛ. Fʋ zɛlɩ na kɛ́ fʋ bãw a yele jielu vla, tʋ̃ɔ́ kaarɛ a nɩbɛ zie nɩ mɩnʋ. À ŋá na n'a fʋ zɛlɩ a,

¹² ɩ̃ na kʋ̀ b'ɩ a ʋlɩ bom nɛ fʋ na zɛlɩ a: a yã-bãwfʋ nɩ a yã. Nɩr bɛ dãw de niwn tɛr a man fʋ ɛ, ɛ́ nɩr kʋ̃ tɛr a a pùorí man fʋ ɛ.

¹³ Ɩ̃ mɔ̃ mɩ̀ na kʋ̀ b'ɩ a ʋlɩ bom nɛ fʋ na bɛ zɛlɩ a: a tɛra nɩ a yúor. A fʋ nyɔ-vʋʋrʋ daar za a, nãà kãw za kʋ̃ ŋmɛ̃ taa nɩ fʋ ɛ.

¹⁴ Fʋ̃ʋ wa tuur a ɩ̃ sɛ́ɛ, fʋ̃ʋ wa sàwr a ɩ̃ wulu, nɩ a ɩ̃ nɛ-ƴãwnɩ mɛ̃ a fʋ sãà Daviir a, ɩ̃ na kʋ̀ b'ɩ nyɔ-vʋʋr-wogo.»

¹⁵ A Salomɔ̃ tɩ zaw na ìr, nyɛ̃ a ɩ zánʋ. Ʋ tɩ lɛb'a wa a Zerizalɛm, wa àr tori a Sore wõ-taa daga. Ʋ tɩ maal'ɩ nyɩw-a-za-bagɛ nɩ lãw-taa bagɛ. Al pùorí ʋ cɔbrɩ cuw-kpɛ̃ɛ dɩb a ʋ tõ-tõ-biir ƴãw.

A Salomɔ̃ na dɩ a ƴɛ̀rʋ nɩ yã-bãwfʋ a

¹⁶ Bibir kãw, pɔw-yɛmɛ ayi tɩ wa n a nãà Salomɔ̃ zie wa àr a ʋ niŋé.

¹⁷ A dãw-niwn sob tɩ yel'a: «Ɩ̃ nãà a, ɩ̃ zɛlɛ fʋ na, bɛr wõ a ɩ̃ ƴɛ̀rʋ. Mãa nɩ a pɔw ŋa lãw na kpɩɛr yir-been, ɛ́ ɩ̃ tɩ dɔw vuo kãw pʋɔ ʋ na tɩ be be a.

¹⁸ Bibie ata pùorí a, ʋ mɩ̀ tɩ dɔw na. Tɩ tɛwr nɛbɛ kpɩɛr a yir pʋɔ: nɩr bɛ lɛb ka be pʋɔ a tɩ ayi ƴãw ɛ.

¹⁹ Ɛcɛ a pɔw ŋa bidɛble kpi n a tɩ̃ɩsɔw, ʋ na gã dĩ ʋ a ƴãw.

²⁰ Lɛ n'a ʋ tɩ ìr a zie na bɩ põ ɩ̃ gúre a, ɓáw a ɩ̃ bidɛble a ɩ̃ zie, tɩ gaalɩ a ʋ gado zu, ɛ́ de a ʋ bidɛbli-kũu wa gaalɩ kɔw mɛ̃.

²¹ Ɩ̃ ìr'ɩ a biɓaara ŋa k'ɩ̃ɩ ƴɛnɩ a ɩ̃ bie, nyɛ̃ ʋ k'ʋ kpi. A zie na wa cãà a, ɩ̃ jɩ́r ʋ nɩ vla nyɛ̃ k'ʋ bɛ ɩ a ɩ̃ bidɛble ɩ̃ na dɔw a ɩ...»

²² Lɛ n'a a pɔw ŋanɩ sob tɩ yel kpɛ̃w za: «Ziri n'a! A ɩ̃ bie n'ʋ vʋʋrɛ, ɛ́ a fʋ bie n'ʋ kpi!» Ɛcɛ a dãw-niwn sob tɩ sɔw na: «Ziri n'a! A fʋ bie n'ʋ kpi, ɛ́ a ɩ̃ dem'ʋ vʋʋrɛ!» À ŋá n'a bɛ tɩ zɛbr taa a nãà niŋé.

²³ Lɛ n'a a nãà Salomɔ̃ tɩ de a ƴɛ̀rʋ yel à ŋá: «Ŋa mɩ́ yel'a: “A ɩ̃ bie n'ʋ vʋʋrɛ, ɛ́ a fʋ bie n'ʋ kpi!” Ŋa sɔw: “Ziri n'a! A fʋ bie n'ʋ kpi, ɛ́ a ɩ̃ bie n'ʋ vʋʋrɛ!”»

²⁴ Al pùorí, ʋ yel ƴãw pʋɔ: «Nyɩ wa n zɛbr-sɔ-kpɛ̃ɛ wa kʋ̀ m!» Ɛ̀ bɛ wa n.

²⁵ A nãà lɛb yel: «Nyɩ ŋmãa a bi-mimir põ ziir ayi, kʋ̀ ŋa a pɔw kãw, ɛ́ kʋ̀ ŋa a pɔw ƴen sob!»

²⁶ A bi-mimir mã tɩ nyɔw nɩ ʋ tʋɔra gù, a ʋ bie ʋ na nɔnɛ yaga za a ƴãw, ɛ́ yel a nãà: «Fʋ gaafara, ɩ̃ nãà a! Nɩ̃ɛ kʋ̀ a bi-mimir a pɔw ŋa, ɛ́ taa kʋrɛ ʋ ɛ!» Ɛcɛ a pɔw ŋanɩ sob tɩ yere na: «Nyɩ ŋmãa a bie põ a ziir ayi, lɛ n'a ɩ̃ kʋ̃ so ʋ, ʋ mɩ̀ kʋ̃ so ʋ ɛ!»

²⁷ A lɛ n'a a nãà tɩ de a ƴɛ̀rʋ yel: «Nyɩ taa kʋrɛ a bie ɩ. Nyɩ kʋ̀ ʋ a pɔw-dãw-niwn sob, ʋlɛ n'ɩ a bi-mimir mã!»

²⁸ A Ɩsɩrayɛl nɩbɛ za tɩ wõ n a ƴɛ̀rʋ a Salomɔ̃ na dɩ a, ɛ́ tɩ tɛr a nãà ƴãwfʋ yaga za. Bʋ̃ʋ n'ʋ vɛ̃, bɛ tɩ nyɛ̃ na bãw kɛ́ Naaŋmɩn kʋ̀ ʋ nɩ yã-bãwfʋ yaga a ƴɛ̀rʋ-dɩb ƴãw.

« Roimhe

Air adhart »

Bible Society of Burkina Faso

Lean sinn:

Ceanglaichean taic

Sanasan