1 Na-mɩnɛ 19 - A SƐB-SÕW

A Eli na cen a Orɛb tãw zu a

¹ A nãà Akab tɩ man nɩ a lɛ za a Eli na ɩ a, kʋ̀ a ʋ pɔw Zezabɛl, nɩ a lɛ ʋ na tɩ ƴãw bɛ kʋ a Báàl ƴɛ̀r-manbɛ za a.

² Lɛ n'a a Zezabɛl tɩ tõ nɩr ʋ tɩ yel à ŋá kʋ̀ a Eli: «Bio, a tɛm ŋa pʋɔ, mãa bɛ wa ɩ fʋ mɛ̃ a lɛ fʋ na ɩ a ƴɛ̀r-manbɛ bɛ ŋa a, a ŋmɩnɛ, bɛ dɔwrɩ mɛ̃ ɛ́ lɛb maal dɔwrɩ!»

³ Dɛ̃bɩ̃ɛ tɩ kpɛ n a Eli, ʋ ìr zɔ k'ʋʋ faa a ʋ nyɔ-vʋʋrʋ. Ʋ tɩ ta n Bɛɛr-Seva, Zuda naalʋ-tẽw, bɛr a ʋ tõ-tõ-bie a be,

⁴ ɛ́ cen bibi-ɓil a wɛja-kpalɛ pʋɔ, tɩ zɩ̃ tɩle kãw pile. Ʋ tɩ zɛlɛ nɩ a kũu yere nɩ à ŋá: «Ƴɛrɛŋa ʋl a, Sore e, ɩ̃ bɛ cãà laar ɛ! De a ɩ̃ nyɔ-vʋurʋ, bʋ̃ʋ n'ʋ vɛ̃, ɩ̃ bɛ sa a ɩ̃ sãàkʋm-kore ɩ.»

⁵ Al pùorí, ʋ gã gúr a tɩle pile. Ɛcɛ malkɩ tɩ wa na wa tɔ ʋ, ɛ́ yel: «Ìr dɩ.»

⁶ A Eli tɩ jɩ́r'a nyɛ̃ dipɛ̃ bɛ na sɛ̃ kʋsɛ-tʋlɛ zu a, nɩ kʋ̃ɔ nɩ duwle a ʋ zu ƴãw. Ʋ tɩ dɩ na ɛ́ nyũ, ɛ́ lɛb gã.

⁷ Ɛcɛ a malkɩ tɩ lɛb'a wa tɔ ʋ ɛ́ yel: «Ìr dɩ, bʋ̃ʋ n'ʋ vɛ̃, a sɔ́r na wõwme nɩ yaga za.»

⁸ A Eli tɩ ìr'a dɩ kɛ́ nyũ. A bʋ̃-dɩra ŋa tɩ kʋ̀ ʋ nɩ fãw, ʋ cen bibie lɩz'a ayi nɩ tɩ̃ɩsɔwr lɩz'a ayi, tɩ ta a Orɛb, a Naaŋmɩn tãw.

Naaŋmɩn lɛb'a kʋ̀ a Eli fãw

⁹ A Eli na wa ta a Orɛb a, ʋ kpɛ n tãw bɔw pʋɔ gã vɩɛ a zie. A Sore tɩ ƴɛ̀r'ɩ a ʋ zie sowr'ʋ: «Eli i, bʋnʋ ƴãw n'a fʋ be a ka?»

¹⁰ Ʋ sɔw: «Sore, Kpɛnʋ-za-sob i, nɔ̃wfʋ bɛ n'a ɩ̃ nɔnɛ fʋ ɛ! Ɛcɛ a Ɩsɩrayɛl nɩbɛ zawr'ɩ a fʋ wõ-taa bɛr, bɛ ŋmɛr'ɩ a fʋ bàwr-maal-kube bɛr, bɛ kʋ n a fʋ ƴɛ̀r-manbɛ. Mãa ɩ̃ yõ n'ʋ cɛ, bɛ bɔbr kɛ́ bɛ ír a ɩ̃ nyɔ-vʋʋrʋ.»

¹¹ A Sore yel ʋ: «Yi àr a tãw zu, a ɩ̃ niŋé, ɩ̃ na tɔl'a.» Daadaalɛ, sɛsɛb-kpɛ̃ɛ tɩ fu n nɩ fãw, a tan ɓárɛ́ ɛ́ a pìe pure a Sore niŋé, ɛcɛ a Sore bɛ tɩ be a sɛsɛb pʋɔ ɩ. A sɛsɛb pùorí a, a tẽsɔw-kɔbr tɩ dam'a, ɛcɛ a Sore bɛ tɩ be a tẽsɔw-kɔbr damnʋ pʋɔ ɩ.

¹² A tẽsɔw-kɔbr damnʋ pùorí a, vũu tɩ n'a, ɛcɛ a Sore bɛ tɩ be a vũu pʋɔ ɩ. A vũu pùorí a, sɛsɛble damnʋ tɩ n'a.

¹³ A Eli na tɩ wõ a sɛsɛble damnʋ a, ʋ nyɔw nɩ a ʋ kpar-kpɛ̃ɛ pàw nɩ a niwn, ɛ́ yi àr a tãw bɔw nʋɔr. Lɛ n'a ʋ tɩ wõ kɔkɔr ʋ ƴɛ̀r a ʋ zie yel à ŋá: «Eli i, bʋnʋ ƴãw n'a fʋ be a ka?»

¹⁴ Ʋ sɔw: «Sore, Kpɛnʋ-za-sob i, nɔ̃wfʋ bɛ n'a ɩ̃ nɔnɛ fʋ ɛ! Ɛcɛ a Ɩsɩrayɛl nɩbɛ zawr'ɩ a fʋ wõ-taa bɛr, bɛ ŋmɛr'ɩ a fʋ bàwr-maal-kube bɛr, bɛ kʋ n a fʋ ƴɛ̀r-manbɛ. Mãa ɩ̃ yõ n'ʋ cɛ, bɛ bɔbr kɛ́ bɛ ír a ɩ̃ nyɔ-vʋʋrʋ.»

¹⁵ A Sore tɩ yel ʋ na: «Lɛb de a sɔ́r, tu a wɛja-kpalɛ pʋɔ cen Damasɩ. Fʋ̃ʋ wa tɩ ta a, fʋ na cir'ɩ a kãá ƴãw Hazayɛl, ʋ ɩ a Siiri tẽw nãà.

¹⁶ Al pùorí, fʋ na cir'ɩ a kãá ƴãw Nimisi bidɛb, Yehu, ʋ ɩ a Ɩsɩrayɛl tẽw nãà, ɛ́ cir a kãá ƴãw Safatɩ bidɛb Elize, na yi Avɛl-Mehola a, ʋ ɩ ƴɛ̀r-manɛ lɩɛrɩ fʋ.

¹⁷ Bɛlɩ dem za a Hazayɛl nãà bɛ wa páw kʋ a, Yehu na kʋ bɛ na, ɛ́ bɛlɩ dem za a Yehu nãà bɛ wa páw kʋ a, Elize na kʋ bɛ na.

¹⁸ Ɛcɛ ɩ̃ na bɛr'ɩ Ɩsɩrayɛl nɩbɛ túr ayopõi (7 000) bɛ cãà vʋʋrɛ, a bɛl za nãà bɛ wa gbĩ dume a ŋmɩn Báàl niŋé a, ɛ́ bɛ nyɔw a ʋ dasuli weri a.»

A Eli kaa na ír Elize k'ʋʋ lɩɛr'ʋ

¹⁹ A Eli tɩ yi n a be cen tɩ nyɛ̃ a Safatɩ bidɛb, Elize, ʋ kʋɔr. Nɛ́ɛ pie nɩ ayi n'a ʋ tɩ tɛr na kɔ, ɛ́ tɩ be a pie nɩ ayi sob zu. A Eli na tɩ tɔlɛ pɩɛlɩ a Elize a, ʋ lɔb'ɩ a ʋ kpar-kpɛ̃ɛ dɔwlɩ a ʋ zu.

²⁰ Lɛ n'a a Elize tɩ bɛr a nĩi, ɛ́ zɔ tu a Eli tɩ yel ʋ: «Kʋ̀ m sɔ́r ɩ̃ tɩ puori a ɩ̃ sãà nɩ a ɩ̃ mã, al pùorí, ɩ̃ na tuur fʋ na.» A Eli yel ʋ: «Fʋ na tʋ̃ɔ́ na lɛb tɩ tone a fʋ tome. Ɩ̃ ɩ b'ɩ bom bɩɩ?»

²¹ A Elize tɩ lɛb'a cen a ʋ pu-pʋɔ. Ʋ tɩ nyɔw nɩ a ʋ nĩi ayi a be maal'ɩ bàwr, dʋw a nɛn nɩ a dàar bɛ na caw nɩ a nĩi a, ƴãw a nɩbɛ bɛ 'wɔb. Al pùorí ʋ ìr tu a Eli pùor, ɩ a ʋ tõ-tõ-bie.