1 Na-mɩnɛ 16 - A SƐB-SÕW

¹ A Sore tɩ ƴɛ̀r'ɩ naaŋmɩn-ƴɛ̀r-manɛ Yehu, na ɩ Hanani bidɛb a zie, yel ʋ k'ʋʋ ƴɛ̀r ƴɛ̀rʋ ŋa kʋ̀ a Baesa:

² «Fʋ bɛ tɩ ɩ bom za ɩ, ɩ̃ɩ ƴãw fʋ ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ. Ɛcɛ fʋ ɩ n a ɩb a bɛ vɩɛl ɛ, mɛ̃ a Zerobowam a. Fʋ ƴãw na a Ɩsɩrayɛl nɩbɛ maalɩ yel-bebe, ɩ a ɩ̃ suur ìr.

³ Alɛ so ɩ̃ na ɩ fʋ̃ʋ nɩ a fʋ yir dem nyɩ baarɩ. Ɩ̃ na ɩ nyɩ na mɛ̃ a lɛ ɩ̃ na ɩ a Nevatɩ bidɛb Zerobowam yir a.

⁴ A fʋ yir nɩr za nãà wa kpi a tẽw pʋɔ a, baar'a na 'wɔb ʋ, ɛ́ nɩr za nãà wa kpi a wɩ̀ɛ pʋɔ a, dùme n'a na dɩ ʋ.»

⁵ A Baesa yele al na cɛ a, a alɩ bome nɛ ʋ na ɩ a, a ʋ gãda-tome, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

⁶ Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a Tɩrsa. A ʋ bidɛb Ela n'ʋ tɩ lɩɛrɩ ʋ dɩ a naalʋ.

⁷ Yele ayi yãw n'a a Sore mɩ̀ tɩ ƴãw a naaŋmɩn-ƴɛ̀r-manɛ Yehu, na ɩ Hanani bidɛb a, ʋ ƴɛ̀r a Baesa nɩ a ʋ yir dem zie: a dãw-niwn sob a, a Baesa nɩ a ʋ yir dem tɩ ɩ n a lɛ na bɛ vɩɛl a, a Sore zie, ɩ a ʋ suur ìr. Bɛ tɩ ɩ n a ɩb a bɛ vɩɛl ɛ, mɛ̃ a Zerobowam nɩ a ʋ yir dem a. A yele ayi sob a, a Baesa tɩ ƴãw na bɛ kʋ a Zerobowam yir dem za.

A Ɩsɩrayɛl tẽw nãà Ela

⁸ A Zuda tẽw nãà Asa naalʋ-dɩb yome lɩzɛr'ɩ ayʋɔb sob pʋɔ n'a, a Baesa bidɛb, Ela, lɩɛbɩ a Ɩsɩrayɛl tẽw nãà. Ʋ tɩ dɩ n a naalʋ yome ayi a Tɩrsa.

⁹ A ʋ sojarɩ nɩ-kpɛ̃ɛ kãw, Zimiri, na so a zɛbr-torkori põ-zɛ̃-taa zie a, tɩ wõ na taa nɩ nɩbɛ a ʋ kʋb ƴãw. A nãà na tɩ be a Tɩrsa, a nãà yir-kaarɛ, Arisa, yir nyũ tɩ kuoli a,

¹⁰ a Zimiri tɩ wa na wa kpɛ kʋ ʋ, a Zuda tẽw nãà Asa naalʋ-dɩb yome lɩzɛr'ɩ ayopõi sob pʋɔ tɩ n'a. A Zimiri tɩ lɩɛr'ɩ a Ela dɩ a naalʋ.

¹¹ Ʋ na dɛ wa zɩnɛ a naalʋ-dà-kɔw zu wa báarɛ a, ʋ ƴãw na bɛ kʋ a Baesa yir dem za. Ʋ tɩ kʋ n a dɛbr za a ʋ yir, nɩ a ʋ nɩbɛ nɩ a ʋ bárɩ za.

¹² A Zimiri tɩ kʋ n a Baesa yir dem za pàw pɛr, a tu a lɛ a Sore na tɩ ƴãw a naaŋmɩn-ƴɛ̀r-manɛ Yehu yel a.

¹³ À á ŋá za tɩ ɩ na, a Baesa nɩ a ʋ bidɛb Ela na tɩ maalɩ a yel-bier, ɛ́ ƴãw a Ɩsɩrayɛl nɩbɛ mɩ̀ maalɩ a, nɩ a tɩbɛ pùor bɛ na tɩ tu, ɩ a Sore, a Ɩsɩrayɛl Naaŋmɩn, suur ìr a.

¹⁴ A Ela yele al na cɛ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

A Ɩsɩrayɛl tẽw nãà Zimiri

¹⁵ A Zuda tẽw nãà Asa naalʋ-dɩb yome lɩzɛr'ɩ ayopõi sob pʋɔ n'a, a Zimiri tɩ lɩɛbɩ a Ɩsɩrayɛl tẽw nãà. Ʋ tɩ dɩ n a naalʋ bibie ayopõi a Tɩrsa. A lɛn daar a, a Ɩsɩrayɛl zɛbr-nɩbɛ tɩ cen nɩ a Gibeton tẽw ƴãw, Filisɩtɛ̃ mɩnɛ na so a.

¹⁶ A sojarɩ tɩ wõ na kɛ́ Zimiri nɩ nɩbɛ bʋ n taa a nãà kʋb ƴãw, k'ʋʋ kʋ ʋ na mɩ̀. Lɛ n'a, a ʋlɩ bibir nɛ, bɛ za tɩ wõ taa a laɩ pʋɔ, kaa ír a sojarɩ nɩ-kpɛ̃ɛ kpɛ̃ɛ za, Omiri, ʋ ɩ a Ɩsɩrayɛl tẽw nãà.

¹⁷ A Omiri tɩ yi n nɩ a ʋ zɛbr-nɩbɛ za a Gibeton, cen a Tɩrsa ƴãw.

¹⁸ A Zimiri na tɩ nyɛ̃ bɛ zɛb de a tẽw a, ʋ kpɛ n a nãà yir dĩo kãw pʋɔ tɩ ƴãw vũu, kpi a vũu pʋɔ.

¹⁹ À á ŋá za tɩ ɩ na, a Zimiri na tɩ ɩ a lɛ na bɛ vɩɛl a Sore zie, maalɩ yel-bier a ƴãw, nɩ ʋ na tɩ cɔwrɩ a Zerobowam ɩb na bɛ vɩɛl a, a Zerobowam na tɩ ƴãw a Ɩsɩrayɛl nɩbɛ maalɩ yel-bier a.

²⁰ A Zimiri yele al na cɛ a, nɩ a lɛ ʋ na wõ taa nɩ a nɩbɛ a Ela kʋb ƴãw a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

²¹ A Zimiri na wa kpi a, a Ɩsɩrayɛl nɩbɛ põ nɩ ziir ayi: a bɛ ŋmãa tɩ bɔbr'a kɛ́ bɛ kaa ír Ginatɩ bidɛb Tivini ʋ ɩ a nãà, ɛ́ ŋmãa bɔbr kɛ́ bɛ kaa ír Omiri.

²² A Omiri nɩbɛ tɩ tʋ̃ɔ́ nɩ a Ginatɩ bidɛb Tivini nɩbɛ. A Tivini tɩ kpi na, ɛ́ a Omiri ɩ a nãà.

A Ɩsɩrayɛl tẽw nãà Omiri

²³ A Zuda tẽw nãà Asa naalʋ-dɩb yome lɩzɛr'ɩ pie nɩ been sob pʋɔ n'a, a Omiri tɩ lɩɛbɩ a Ɩsɩrayɛl tẽw nãà yome pie nɩ ayi. Tɩrsa n'a ʋ tɩ de niwn be dɩ a naalʋ yome ayʋɔb.

²⁴ Al pùorí ʋ cen tɩ páw Semɛɛr, dà a Samaari tãw a ʋ zie, salm-pla libie túr ayʋɔb (6 000). Ʋ tɩ ŋmãa nɩ tẽ-kpɛ̃ɛ a be, por a yúor Samaari, ʋ tu a Semɛɛr, na dãw so a tãw a, yúor.

²⁵ Ɛcɛ a Omiri tɩ ɩ n a lɛ na bɛ vɩɛl a, a Sore zie. Ʋ tɩ maalɩ faa zuo a na-mɩnɛ bɛl za na de niwn dɩ a naalʋ a ʋ ƴãw a.

²⁶ Ʋ tɩ cɔwr'ɩ a Nevatɩ bidɛb Zerobowam ɩb na bɛ vɩɛl a, a Zerobowam na tɩ ƴãw a Ɩsɩrayɛl nɩbɛ maalɩ a yel-bier, ɛ́ tu a tɩbɛ pùor, ɩ a Sore, a Ɩsɩrayɛl Naaŋmɩn, suur ìr a.

²⁷ A Omiri yele al na cɛ a, a alɩ bome nɛ ʋ na ɩ a, nɩ a ʋ gãda-tome, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

²⁸ Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a Samaari. A ʋ bidɛb Akab tɩ lɩɛr'ʋ na ɩ a nãà.

A Ɩsɩrayɛl tẽw nãà Akab

²⁹ A Zuda tẽw nãà Asa naalʋ-dɩb yome lɩzɛr'ɩ pie nɩ ani sob pʋɔ n'a, a Omiri bidɛb, Akab, tɩ lɩɛbɩ a Ɩsɩrayɛl tẽw nãà. Ʋ tɩ dɩ n a naalʋ a Samaari yome lɩzɛr'ɩ ayi.

³⁰ Ɛcɛ ʋ tɩ ɩ n a lɛ na bɛ vɩɛl a, a Sore zie, zuo a na-mɩnɛ bɛl za na de niwn dɩ a naalʋ a ʋ ƴãw a.

³¹ Ʋ cɔwr'ɩ a Nevatɩ bidɛb Zerobowam yel-bebe, a bɛ saal'ʋ ɛ, ʋ kul Zezabɛl, Sɩdɔ̃ tẽw dem nãà, Ɛtɩbaal, pɔwyaa, ɛ́ puori a ŋmɩn Báàl, gbĩ dume a ʋ niŋé.

³² Ʋ tɩ ŋmãa nɩ yir a Báàl ƴãw, a Samaari, mɛ bàwr-maal-kuur a ʋ pʋɔ, a bagɛ maalʋ ƴãw,

³³ ɛ́ bà dà-bara. A ʋ ɩ-ɩrɩ á ŋá za tɩ ɩ na a Sore, a Ɩsɩrayɛl Naaŋmɩn, suur ìr zuo a Ɩsɩrayɛl tẽw na-mɩnɛ bɛl za na de ʋ niwn ɩ a ʋ suur ìr a.

³⁴ A ʋlɩ daar nɛ n'a, Hɩɛl na yi Betɛl a lɛb mɛ a Zeriko tẽ-kpɛ̃ɛ. Ɛcɛ ʋ na tɩ sʋ̃ɔ́nɛ a dacine pɛ́ɛ a, a ʋ bidɛb-kpɛ̃ɛ Aviram tɩ kpi na, ʋ wa ƴãwnɛ a dɩ̃dɛɛ pamɛ a ʋ bidɛb-bile Seguvʋ kpi, a tu a lɛ a Sore na tɩ ƴãw a Nun bidɛb Zozue yel a.