1 Na-mɩnɛ 15 - A SƐB-SÕW

A Zuda tẽw nãà Abiyam

¹ A Ɩsɩrayɛl tẽw nãà, Nevatɩ bidɛb, Zerobowam, naalʋ-dɩb yome pie nɩ ani sob pʋɔ n'a a Abiyam tɩ lɩɛbɩ a Zuda tẽw nãà.

² Ʋ tɩ dɩ n a naalʋ yome ata a Zerizalɛm. A mã tɩ dɩ na kɛ́ Maaka, ɛ́ ɩ Abɩsalɔm pɔwyaa.

³ A Abiyam tɩ maal'ɩ a yel-bebe al za a ʋ sãà na de niwn a ʋ ƴãw maalɩ a. Ʋ bɛ tɩ tu a Sore ʋ Naaŋmɩn nɩ a ʋ pʋɔ za, mɛ̃ a lɛ a ʋ sãàkʋm-kʋra na tɩ ɩ a ɩ.

⁴ Ɛcɛ a Daviir zũú n'a, a Sore ʋ Naaŋmɩn, tɩ kʋ̀ ʋ bidɛb k'ʋʋ wa lɩɛr'ʋ dɩ a naalʋ, a nãà yir taa pàwr pɛr ɛ, ɛ́ a Zerizalɛm ɩ a nãà tẽ-kpɛ̃ɛ kʋralɛ.

⁵ Bʋ̃ʋ n'ʋ vɛ̃, a Daviir tɩ ɩ n a lɛ na vɩɛl a, a Sore niŋé. A ʋ nyɔ-vʋʋrʋ daar za a, ʋ bɛ tɩ zawrɩ a Sore nɔ-ƴãwna been kãw za ɩ, alɛ bɛ ɩ a Uuri na ɩ Hititɩ a yele pʋɔ a.

⁶ Zɛbr tɩ be n a Orobowam nɩ a Zerobowam cara pʋɔ kʋralɛ.

⁷ A Abiyam yele al na cɛ a, a za sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ. Ʋ mɩ̀ tɩ zɛb'ɩ nɩ a Zerobowam.

⁸ Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a «Daviir Tẽ-kpɛ̃ɛ» pʋɔ. A ʋ bidɛb Asa tɩ lɩɛr'ʋ na dɩ a naalʋ.

A Zuda tẽw nãà Asa

⁹ A Ɩsɩrayɛl tẽw nãà Zerobowam naalʋ-dɩb yome lɩzɛr sob pʋɔ n'a, a Asa tɩ lɩɛbɩ a Zuda tẽw nãà.

¹⁰ Ʋ tɩ dɩ n a naalʋ yome lɩz'a ayi nɩ been a Zerizalɛm. A ʋ mãkʋm tɩ dɩ na kɛ́ Maaka, ɛ́ ɩ Abɩsalɔm pɔwyaa.

¹¹ A Asa tɩ ɩ n a lɛ na vɩɛl a, a Sore zie, mɛ̃ a ʋ sãàkʋm-kʋra Daviir a.

¹² Ʋ tɩ diw nɩ a dɛ-yɛmɛ nɩ a pɔw-yɛmɛ bɛr a tẽw pʋɔ, ɛ́ ír a tɩbɛ za a ʋ sãàkʋm-kore na tɩ maalɩ a bɛr.

¹³ Ʋ mɔ̃ mɩ̀ tɩ faa nɩ a «Pɔw-sõw» yúor a ʋ mãkʋm Maaka zie, ʋ na tɩ ƴãw bɛ maalɩ a ŋmɩn-pɔw Asera tɩɩb faa faa kãw a ƴãw. A Asa tɩ ƴãw na bɛ ír a tɩɩb ŋa nyɩw bɛr a Sedrɔ̃ bà-fʋɔla pʋɔ.

¹⁴ Ɛcɛ ʋ bɛ tɩ ír a maalʋ-ziir bɛr ɛ, ʋ na saa tɩ tu a Sore nɩ ʋ pʋɔ za, a ʋ nyɔ-vʋʋrʋ daar za a.

¹⁵ A bome al ʋlɛ nɩ a ʋ sãà na tɩ de kʋ̀ a Naaŋmɩn a: salm-pla, salm-zɩɛ nɩ bʋ̃-pɛ-bʋʋrɛ bʋʋrɛ a, ʋ mɩ̀ ƴãw na bɛ de a wa n a Sore Ŋmɩn-yir-kpɛ̃ɛ pʋɔ.

¹⁶ Zɛbr tɩ be n a Asa nɩ a Ɩsɩrayɛl tẽw nãà Baesa cara pʋɔ kʋralɛ.

¹⁷ A Baesa tɩ ìr'ɩ bibir kãw wa ŋmãa nɩ a Zuda tẽw zɛbr, ɛ́ mɩɛr dacin viire kole a Arama tẽw, k'aa Asa nɩ a Zuda tẽw dem ta mɩ́ lɛb tu a be tɔl ɛ.

¹⁸ Lɛ n'a a Asa tɩ de a salm-pla nɩ a salm-zɩɛ na tɩ cãà cɛ be a Ŋmɩn-yir-kpɛ̃ɛ na-bome binu zie nɩ a nãà na-bome binu zie a, kʋ̀ a ʋ tõ-tõ-biir, ɛ́ yel kɛ́ bɛ cen nɩ a za a Damasɩ, tɩ kʋ̀ a Siiri tẽw nãà Bɛn-Hadadɩ, na ɩ Tavirimon bidɛb, ɛ́ ɩ Hezion yãw a, ɛ́ yel ʋ à ŋá:

¹⁹ «Ɩ tɩ tɛr wõ-taa, mãa nɩ a fʋ̃ʋ, mɛ̃ a lɛ a ɩ̃ sãà nɩ a fʋ sãà na tɩ tɛr a. Salm-pla nɩ salm-zɩɛ n'ɩ a ŋan ɩ̃ tɩr kɛ́ bɛ wa kʋ̀ b. A na ɩ à ŋá a, cen tɩ ɩ fʋ̃ʋ nɩ a Ɩsɩrayɛl tẽw nãà Baesa wõ-taa baarɩ, ʋ tɛr a ʋ sojarɩ yi zaa nɩ a ɩ̃ tẽw pʋɔ.»

²⁰ A Bɛn-Hadadɩ tɩ sàw nɩ a Asa ƴɛ̀rʋ, ɛ́ tõ a ʋ zɛbr-nɩbɛ nɩ-bɛrɛ a Ɩsɩrayɛl tẽw tẽ-bɛrɛ ƴãw. Bɛ tɩ zɛb'a de Iyon, Dan, Abɛl-Bɛtɩ-Maaka, a Kinerɔtɩ vuo nɩ a Nɛfɩtali tẽw za.

²¹ A Baesa na tɩ wõ à à ŋá a, ʋ bɛr'ɩ a dacin ʋ na tɩ mɩɛr jile kole a Arama a, ɛ́ lɛb cen tɩ be a Tɩrsa.

²² Lɛ n'a a nãà Asa tɩ bʋɔlɩ a Zuda nɩbɛ za, bɛ jɩɩrɩ nɩr bɛr ɛ. Bɛ tɩ wob'ɩ a kʋsɛbɛ nɩ a wɛwr a Baesa na tɩ mɩɛr'ɩ a dacin jile kole a Arama a, cen nɩ tɩ mɛ n dacine viiri koli a Bɛ̃zamɛ tẽw Geva nɩ Misɩpa, mɛ̃ a lɛ a nãà Asa na tɩ yel a.

²³ A Asa yele al na cɛ a, a alɩ bome nɛ za ʋ na ɩ a, a ʋ gãda-tome, a tẽ-bɛrɛ ʋ na mɛ a dacine viiri koli a, a za sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ. Ʋ na wa kor a, gbɛ́ɛ bàalʋ kãw nyɔw ʋ na.

²⁴ Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ. A ʋ bidɛb Zozafatɩ n'ʋ tɩ lɩɛr'ʋ dɩ a naalʋ.

A Ɩsɩrayɛl tẽw nãà Nadab

²⁵ A Zuda tẽw nãà Asa naalʋ-dɩb yome ayi sob'a, a Zerobowam bidɛb Nadab tɩ lɩɛbɩ a Ɩsɩrayɛl tẽw nãà, ɛ́ dɩ a naalʋ yome ayi.

²⁶ Ʋ tɩ ɩ n a lɛ na bɛ vɩɛl a, a Sore zie. Ʋ tɩ cɔwr'ɩ a ʋ sãà ɩb na bɛ vɩɛl a, a ʋ sãà na tɩ ƴãw a Ɩsɩrayɛl nɩbɛ maalɩ a yel-bier a, ɛ́ mɩ̀ maalɩ a alɩ yel-bebe nɛ tɛɛ za ʋ na maalɩ a.

²⁷ Lɛ n'a Ahiya bidɛb, Baesa, na ɩ Ɩsakaar dɔwlʋ nɩr a, tɩ wõ taa nɩ nɩbɛ a ʋ kʋb ƴãw. A Nadab nɩ a Ɩsɩrayɛl zɛbr-nɩbɛ na tɩ zɛbr'ɩ a Gibeton tẽ-kpɛ̃ɛ a Filisɩtɛ̃ mɩnɛ na so a n'a, a Baesa tɩ kʋ a nãà Nadab.

²⁸ A Zuda tẽw nãà Asa naalʋ-dɩb yome ata sob'a, a tɩ ɩ à à ŋa. A Baesa tɩ lɩɛr'ɩ a Nadab ɩ a Ɩsɩrayɛl tẽw nãà.

²⁹ Ʋ na dɛ wa lɩɛbɛ a nãà wa báarɛ a, ʋ ƴãw na bɛ kʋ a Zerobowam yir dem za, ʋ bɛ tɩ cɛ been za bɛr ɛ, a tu a lɛ a Sore na tɩ ƴãw a Silo tẽw naaŋmɩn-ƴɛ̀r-manɛ Ahiya yel a.

³⁰ À á ŋá za tɩ ɩ na, a Zerobowam na tɩ maalɩ a yel-bier ƴãw a Ɩsɩrayɛl nɩbɛ mɩ̀ maalɩ a ƴãw, a tɩ ɩ na a Sore, a Ɩsɩrayɛl Naaŋmɩn, suur ìr yaga za.

³¹ A Nadab yele al na cɛ a, a lɛ za ʋ na ɩ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

³² Zɛbr tɩ be n a Asa nɩ a Ɩsɩrayɛl tẽw nãà Baesa cara pʋɔ kʋralɛ.

A Ɩsɩrayɛl tẽw nãà Baesa

³³ A Zuda tẽw nãà Asa naalʋ-dɩb yome ata sob pʋɔ n'a, a Ahiya bidɛb, Baesa, lɩɛbɩ a Ɩsɩrayɛl tẽw za nãà. Ʋ tɩ dɩ n a naalʋ a Tɩrsa yome lɩzɛr'ɩ anaar.

³⁴ Ʋ tɩ ɩ n a lɛ na bɛ vɩɛl a, a Sore zie. Ʋ tɩ cɔwr'ɩ a Zerobowam ɩb na bɛ vɩɛl a, ɛ́ maalɩ a yel-bebe ʋ na maalɩ a, a Zerobowam ŋa na tɩ ɩ ƴãw a Ɩsɩrayɛl nɩbɛ maalɩ a yel-bier a.