1 Na-mɩnɛ 11 - A SƐB-SÕW

A Salomɔ̃ bɛ tu a Sore ɩ, a ʋ pɔwbɛ zũú

¹ A nãà Salomɔ̃ tɩ nɔ̃w nɩ nɩ-bʋʋr-yoru pɔw-yaga yaga: a Eziptɩ tẽw nãà Faarawɔ̃ pɔwyaa tɩ n'ɩ a dãw-niwn sob, al pùorí ʋ nɔ̃w Mowab tẽw dem, Amɔ̃ tẽw dem, Edɔm tẽw nɩbɛ, Sɩdɔ̃ tẽw dem nɩ Hititɩ mɩnɛ pɔwbɛ.

² Ɛcɛ a Sore tɩ yel'ɩ a Ɩsɩrayɛl nɩbɛ a nɩ-bʋʋr-yoru bɛ ŋa ƴãw: «Nyɩ taa jɛrɛ nɩ a nɩ-bʋʋrɛ bɛ ŋa nɩbɛ ɩ, ɛ́ bɛ mɩ̀ ta jɛr nyɩ ɛ. Alɛ bɛ ɩ lɛ, bɛ na taw nyɩ na ƴãw nyɩ puore a bɛ ŋmɩnɛ.» Ɛcɛ a Salomɔ̃ tɩ tu n a nɩ-bʋʋr-yoru bɛ ŋa, a pɔw-nɔ̃w zũú.

³ Ʋ tɩ kul'ɩ na-mɩnɛ pɔwyaar kɔbr ayopõi (700) nɩ pɔw-bili kɔbr ata (300). A ʋ pɔwbɛ tɩ lɩɛb'ɩ a ʋ tɩɛrʋ.

⁴ A Salomɔ̃ na wa kor baar'a, a ʋ pɔwbɛ tɩ taw ʋ na tu n ŋmɩn-yoru puoru, ʋ bɛ tɩ cãà tu a Sore ʋ Naaŋmɩn, nɩ a ʋ pʋɔ za, mɛ̃ a ʋ sãà Daviir a ɩ.

⁵ Ʋ tɩ puor'ɩ a Sɩdɔ̃ tẽw dem ŋmɩn-pɔw Asɩtarte, nɩ a Mɩlkɔm, a Amɔ̃ tẽw dem ŋmɩn-faa na bɛ tɛr yúor póru a.

⁶ Ʋ tɩ ɩ n a lɛ na bɛ vɩɛl a, a Sore zie, bʋ̃ʋ n'ʋ vɛ̃, ʋ bɛ tɩ sàwr a Sore nʋɔr vla, mɛ̃ a ʋ sãà Daviir a ɩ.

⁷ A lɛn daar a, a Salomɔ̃ tɩ cɔbrɩ maalʋ-zie, a tãw na àr tori a Zerizalɛm a zu, a Mowab tẽw dem ŋmɩn-faa faa Kemɔsɩ ƴãw. Ʋ mɩ̀ tɩ ƴãw na bɛ cɔbrɩ a kãw, a Amɔ̃ tẽw dem ŋmɩn-faa faa Mɩlkɔm ƴãw.

⁸ Lɛ n'a ʋ mɩ̀ tɩ ɩ a ʋ nɩ-bʋʋr-yoru pɔwbɛ za ŋmɩmɛ ƴãw, kɛ́ bɛ tʋ̃ɔ́ mɩ́ nyɩw tɩ-suur-zɔ̃-na-nyùur-vla-vla-a, ɛ́ maalɩ bagɛ kʋ̀ a bɛ ŋmɩmɛ.

^9-10 A Sore, a Ɩsɩrayɛl Naaŋmɩn, tɩ ɩ na a Salomɔ̃ nyɛ̃ ʋ gb'a ayi za, ʋʋ sʋ̃ɔmɩ bul yel ʋ k'ʋʋ taa puore ŋmɩn-yoru ɛ. Ɛcɛ a Salomɔ̃ bɛ tɩ sàw a ʋ nʋɔr ɛ, a ʋ tɩɛrʋ bɛ tɩ cãà tu a Sore ɩ. Lɛ n'a a Sore tɩ nyɛ̃ nɩ a Salomɔ̃ suur,

¹¹ ɛ́ yel ʋ à ŋá: «Fʋ na faa ɩ à à ŋá a, fʋ na faa bɛ maal tɛr a ɩ̃ wõ-taa nɩ a wulu ɩ̃ na kʋ̀ b a, ɩ̃ na faa nɩ a naalʋ-tẽw a fʋ zie, kʋ̀ a fʋ tõ-tõ-bie kãw.

¹² Ɛcɛ a fʋ sãà Daviir zũú a, ɩ̃ bɛ ɩrɛ a lɛ a fʋ cãafʋ daar ɛ: a fʋ bidɛb zie n'a ɩ̃ na faa a naalʋ-tẽw.

¹³ Ɩ̃ cãà mɩ̀ kʋ̃ faa a naalʋ-tẽw za a ʋ zie ɩ, ɩ̃ na bɛr ʋ nɩ dɔwlʋ been, a ɩ̃ tõ-tõ-bie Daviir zũú, nɩ a Zerizalɛm, a tẽ-kpɛ̃ɛ, ɩ̃ na kaa ír a zũú.»

A Salomɔ̃ dɔ̃ dem

¹⁴ A Sore tɩ ɩ na dɔ̃ sob ìr a Salomɔ̃ ƴãw. Edɔm tẽw nɩr tɩ n'ʋ, a yúor dɩ kɛ́ Hadadɩ, ʋʋ ɩ a Edɔm tẽw nãà yir nɩr.

¹⁵ A lɛn daar a Daviir na tɩ zɛb'ɩ a Edɔm naalʋ-tẽw a, a ʋ sojarɩ za nɩ-kpɛ̃ɛ Zowab tɩ cen na k'ʋʋ tɩ ũù a Ɩsɩrayɛl nɩbɛ sojarɩ na kpi a zɛbr zie a. Al pùorí, ʋ tɩ kʋ n a Edɔm tẽw dɛbli nɩ a dɛbr za.

¹⁶ Bʋ̃ʋ n'ʋ vɛ̃, a Zowab nɩ a ʋ nɩbɛ tɩ maal'ɩ cuwr ayʋɔb a be, kɛ́ bɛ tʋ̃ɔ́ kʋ a dɛbli nɩ a dɛbr.

¹⁷ Ɛcɛ a Hadadɩ, na tɩ cãà ɩ pɔlbil-vɛlvɛl lɛ a, tɩ tʋ̃ɔ́ na zɔ cen Eziptɩ tẽw, ʋlɛ nɩ Edɔm tẽw nɩbɛ bɛ mɩnɛ na tɩ ɩ a ʋ sãà tõ-tõ-biir a.

¹⁸ Bɛ tɩ yi n Madian ɛ́ cen tɩ ta Paran wɛja-kpalɛ pʋɔ. Bɛ tɩ ɩ na nɩbɛ bɛ mɩnɛ páw bɛ a be, bɛ cen Eziptɩ tẽw, a tẽw ŋa nãà Faarawɔ̃ zie. A Faarawɔ̃ tɩ kʋ̀ n yir a Hadadɩ, nɩ tẽsɔwr, ɛ́ kaa a ʋ bʋ̃-dɩrɩ zie.

¹⁹ A Hadadɩ tɩ pɛlɩ nɩ a Faarawɔ̃ pʋɔ yaga za, ʋ kʋ̀ ʋ a ʋ pɔw yɛb ʋ kul, a pɔw-sõw Tapenɛsɩ yɛb.

²⁰ A Tapenɛsɩ yɛb tɩ dɔw nɩ bidɛb kʋ̀ a Hadadɩ, ʋ por a yúor Genuvatɩ. A Tapenɛsɩ tɩ ƴãw na bɛ guol'ʋ a nãà yir pʋɔ, ʋ baa a be lãwnɩ a nãà bibiir.

²¹ A Hadadɩ na tɩ cãà be a Eziptɩ tẽw, ɛ́ wõ k'aa Daviir kpi na, a ʋ sojarɩ nɩ-kpɛ̃ɛ Zowab mɩ̀ kpi a, ʋ yel'ɩ a Faarawɔ̃ à ŋá: «Bɛr mɛ̃, ɩ̃ lɛb kul a ɩ̃ tẽw.»

²² A Faarawɔ̃ tɩ sowr'ʋ na: «Fʋ bɔbr'ɩ bom guur a ɩ̃ zie ka bɩɩ? Bʋ̃ʋ n'ʋ so fʋ bɔbr kɛ́ fʋ lɛb kul a fʋ tẽw?» A Hadadɩ sɔw: «Ɩ̃ bɛ bɔbr bom guur ɛ, ɛcɛ, cãà bɛr mɛ̃ ɩ̃ kul.»

²³ A Sore tɩ ɩ na dɔ̃ sob ƴen sob ìr a Salomɔ̃ ƴãw. Eliyada bidɛb Erezon n'ʋ. Ʋ tɩ yi n a ʋ nɩ-kpɛ̃ɛ Hadadezɛɛr na ɩ Sova tẽw nãà a zie zɔ.

²⁴ A lɛn daar a Daviir na tɩ kʋ a Hadadezɛɛr sojarɩ faa faa a, a Erezon tɩ bʋɔl'ɩ nɩbɛ ɓã taa a ʋ zie, ɛ́ ɩ a bɛ nɩ-kpɛ̃ɛ. Bɛ tɩ cen nɩ Damasɩ tɩ zɩ̃ a be wa de a naalʋ.

²⁵ À ŋá n'a a Erezon tɩ ɩ a Ɩsɩrayɛl nɩbɛ dɔ̃ sob, a Salomɔ̃ naalʋ-dɩb daar za, mɛ̃ a Hadadɩ a. A Erezon bɛ tɩ nɔ̃w a Ɩsɩrayɛl nɩbɛ towtow ɛ, lɛn daar za ʋ na ɩ a Siiri tẽw nãà a.

Naaŋmɩn-ƴɛ̀r-manɛ Ahiya yel'ɩ a naalʋ-tẽw pob yele kʋ̀ Zerobowam

²⁶ A Nevatɩ bidɛb Zerobowam tɩ ɩ n Efarayim bʋʋrɛ, ɛ́ yi Sereda. A mã tɩ ɩ n pɔw-kʋɔr, ɛ́ a yúor dɩ Seruya. A Zerobowam tɔr za tɩ tone nɩ a nãà Salomɔ̃ tome wa ìr gaarɩ.

²⁷ Nyɛ̃ a lɛ a na ɩ a Zerobowam gaarɩ a: a tɩ ɩ n a lɛn daar a Salomɔ̃ na maalɛ a gàr bɛ na bʋɔlɛ a Milo a, ɛ́ fɔbr a Daviir Tẽ-kpɛ̃ɛ dacin vʋɔr pàwr a.

²⁸ A Zerobowam tɩ ɩ n pɔlbile na kpɛmɛ ɛ́ kpɛ socir a. A Salomɔ̃ tɩ nyɛ̃ nɩ a lɛ a pɔlbile na tone a, ɛ́ ƴãw ʋ jɩ́rɛ a Efarayim nɩ a Manase dɔwlʋ tõ-tõ-biir.

²⁹ Bibir kãw, a Zerobowam tɩ yi n a Zerizalɛm. A naaŋmɩn-ƴɛ̀r-manɛ Ahiya na yi Silo a tɩ tuor'ʋ nɩ a sɔ́r zu. A bɛ tɛwr ayi tɩ nɛbɛ a wɩ̀ɛ pʋɔ. A Ahiya tɩ su n kpar-kpɛ̃ɛ-paala.

³⁰ Ʋ tɩ nyɔw ʋ na taw cɩɛrɩ põ ziir pie nɩ ayi.

³¹ Al pùorí, ʋ yel a Zerobowam: «De a bʋ̃-ŋmaarɛ á ŋá pie. Bʋ̃ʋ n'ʋ vɛ̃, à ŋá n'a a Ɩsɩrayɛl Naaŋmɩn yere: Ɩ̃ na faa nɩ a naalʋ-tẽw a Salomɔ̃ zie, ɛ́ kʋ̀ b a Ɩsɩrayɛl nɩbɛ dɔwlʋ pie.

³² Ɩ̃ na bɛr ʋ nɩ dɔwlʋ been yõ, a ɩ̃ tõ-tõ-bie Daviir zũú, nɩ a Zerizalɛm, a tẽ-kpɛ̃ɛ, ɩ̃ na kaa ír a Ɩsɩrayɛl tẽw za pʋɔ a zũú.

³³ Ɩ̃ na ɩ n à à ŋá, a Ɩsɩrayɛl nɩbɛ na zawrɩ mɛ̃ bɛr a ƴãw. Bʋ̃ʋ n'ʋ vɛ̃, bɛ puor'ɩ a Sɩdɔ̃ tẽw dem ŋmɩn-pɔw Asɩtarte, a Mowab tẽw dem ŋmɩn Kemɔsɩ, nɩ a Amɔ̃ tẽw dem ŋmɩn Mɩlkɔm. Bɛ bɛ tu a sɔ́r ɩ̃ na wul bɛ a ɩ, bɛ bɛ ɩ a lɛ na vɩɛl a ɩ̃ zie a ɩ. Bʋ̃ʋ n'ʋ vɛ̃, bɛ bɛ tu a wulu nɩ a tub ɩ̃ na kʋ̀ bɛ a, mɛ̃ a lɛ a Salomɔ̃ sãà Daviir na tɩ tu a ɩ.

³⁴ Ɛcɛ a Salomɔ̃ zie bɛ n'a ɩ̃ na faa a naalʋ-tẽw za ɩ: ɩ̃ na bɛr ʋ na k'ʋ ɩ a Ɩsɩrayɛl nɩbɛ nɩ-kpɛ̃ɛ tɩ ta a ʋ nyɔ-vʋʋrʋ baarʋ daar, a ɩ̃ tõ-tõ-bie Daviir ɩ̃ na kaa ír a zũú, ʋʋ sàw a ɩ̃ nɛ-ƴãwnɩ nɩ a ɩ̃ wulu a.

³⁵ A Salomɔ̃ bidɛb zie n'a ɩ̃ na faa a naalʋ-tẽw, ɛ́ a fʋ̃ʋ, Zerobowam a, ɩ̃ na kʋ̀ b'ɩ dɔwlʋ pie.

³⁶ Ɩ̃ na bɛr'ɩ dɔwlʋ been a Salomɔ̃ bidɛb, k'aa ɩ̃ tõ-tõ-bie Daviir mɩ́ tɛr bʋʋrɛ kʋralɛ ʋ dɩrɛ a naalʋ a ɩ̃ niŋé a Zerizalɛm, a tẽ-kpɛ̃ɛ ɩ̃ na kaa ír k'ɩ̃ɩ mɩ́ wul a be ɩ̃ na be a nyɩ sɔgɔ a.

³⁷ A fʋ̃ʋ, Zerobowam a, ɩ̃ kʋ̀rɛ fʋ nɩ a naalʋ, mɛ̃ a lɛ fʋ na bɔbr a: fʋ na dɩrɛ nɩ naalʋ a Ɩsɩrayɛl nɩbɛ dɔwlʋ pie zu.

³⁸ Fʋ̃ʋ wa bɛrɛ wone a lɛ za ɩ̃ na na yel kʋ̀ b a, fʋ̃ʋ wa tuur a sɔ́r ɩ̃ na na wul fʋ a, fʋ̃ʋ wa ɩrɛ vla a ɩ̃ zie a, fʋ̃ʋ wa sàwr a wulu nɩ a nɛ-ƴãwnɩ ɩ̃ na na kʋ̃ b a, mɛ̃ a lɛ a ɩ̃ tõ-tõ-bie Daviir na tɩ ɩrɛ a, a lɛn daar a, ɩ̃ na be n a fʋ zie, ɩ̃ na zɩɩl'ɩ a naalʋ ʋ kpɛmɛ a fʋ yir pʋɔ, mɛ̃ a lɛ ɩ̃ na ɩ a Daviir ƴãw a. Ɩ̃ na kʋ̀ b ɩ a Ɩsɩrayɛl nɩbɛ dɔwlʋ pie,

³⁹ ƴãw vĩ a Daviir bʋʋrɛ, ɛcɛ a kʋ̃ ɩ a kʋralɛ ɩ.”»

⁴⁰ Lɛ n'a a Salomɔ̃ tɩ bɔbr k'ʋʋ kʋ a Zerobowam, ʋ zɔ cen Eziptɩ tẽw Sɩsakɩ na ɩ a tẽw nãà a zie. Ʋ tɩ be n a be tɩ ta a Salomɔ̃ kũu daar.

⁴¹ A Salomɔ̃ yele al na cɛ a, a alɩ bome nɛ za ʋ na ɩ a, a yã-bãwfʋ ʋ na tɩ tɛr a, a za sɛb'ɩ a “Salomɔ̃ Ɩ-ɩrɩ” sɛbɛ pʋɔ.

⁴² A Salomɔ̃ tɩ dɩ n a naalʋ a Ɩsɩrayɛl nɩbɛ za zu yome lɩz'a ayi a Zerizalɛm.

⁴³ Ʋ na wa kpi lɛb cen tɩ páw a ʋ sãà mɩnɛ a, bɛ ũù ʋ nɩ a ʋ sãà Daviir Tẽ-kpɛ̃ɛ pʋɔ. A ʋ bidɛb Orobowam n'ʋ tɩ lɩɛr'ʋ ɩ a nãà.