1 Korɛ̃tɩ 9 - A SƐB-SÕW

A Pol bɛ ɩrɛ a lɛ ʋ nãá tʋ̃ɔ́ ɩrɛ a ɩ

¹ Ɩ̃ bɛ so ɩ̃ tʋɔra bɩɩ? Ɩ̃ bɛ ɩ nɩ-tona bɩɩ? Ɩ̃ bɛ nyɛ̃ a Yeezu tɩ Sore ɩ? Nyɩmɛ bɛ nɛbɛ ɩ a ton ɩ̃ na tõ a Sore pʋɔ a ɩ?

² Bɛ mɩnɛ zie mãa bɛ wa ɩ nɩ-tona a, a nyɩɩm zie ʋl a, ɩ̃ ɩ ʋ na. Bʋ̃ʋ n'ʋ vɛ̃, nyɩ na lãw nɩ a Sore a, nyɩmɛ nɛbɛ ɩ a ɩ̃ nɩ-tona tome bãwfʋ.

³ À ŋá n'a ɩ̃ na ƴɛ̀rɛ, k'ɩ̃ɩ wul a ɩ̃ yel-mɩŋa a bɛlɩ dem na manɛ a ɩ̃ sãwna a zie:

⁴ tɩ bɛ tɛr sɔ́r na dɩrɛ ɛ́ nyúur a tɩ tome zũú bɩɩ?

⁵ Tɩ bɛ tɛr sɔ́r na tɛr pɔw na ɩ kɩrɩta-nɩr a, ʋ bɩɛlɛ tɩ mɛ̃ a lɛ a nɩ-toni ŋmaarɛ, a Sore yɛbr nɩ a Pɩɛr na ɩrɛ a bɩɩ?

⁶ Mãa yõ nɩ a Banabasɩ, tɩmɛ nɛbɛ bɛ tɛr sɔ́r na bɛr a tome ɩ?

⁷ Ãa n'ʋ dãw de ʋ mɩŋa libie tone nɩ sojarɩ tome? Ãa n'ʋ dãw sɛl divɛ̃ tɩɛ ɛ́ ciir a wɔmɛ? Bɩɩ ãa n'ʋ dãw àrɛ nɩ dʋn ɛ́ a dʋn bʋ̀rʋ bɛ guole ʋ?

⁸ Yele na càarɩ a nɩsaal nyɔ-vʋʋrʋ tɛwr a n'a ɩ̃ yere e? A Wulu tɔr za mɩ̀ bɛ yere a lɛn tɔr za ɩ?

⁹ Bʋ̃ʋ n'ʋ vɛ̃, bɛ sɛb'ɩ a Moyiir wulu pʋɔ kɛ́: «A náab na vàrɛ a ble a, fʋ kʋ̃ 'lẽ a ʋ nʋɔr pàw ɛ.» A Naaŋmɩn nɔ̃w tɩɛrɛ nɩ nĩi yele bɩɩ?

¹⁰ Tɩɩm ƴãw bɛ n'a ʋ sɩrɩ ƴɛ̀rɛ ɩ? Sɩza n'a, tɩɩm ƴãw n'a bɛ sɛb à à ŋá, bʋ̃ʋ n'ʋ vɛ̃, a fɛr'a kɛ́ a ka-kʋɔra kʋɔr tɩɛrɛ nɩ k'ʋʋ nãà cɛ na, ɛ́ ci-vàrɛ vàrɛ tɩɛrɛ nɩ k'ʋʋ nãà páw a na.

¹¹ Tɩmɛ wa bʋ̀r a Vʋʋrʋ Sõw bʋ̃-bʋʋrɛ a nyɩ pʋɔ a, ɛ́ wa de a nyɩ bʋ̃-tɛrɩ a, bɔ-zuo n'a bɩɩ?

¹² Bɛ mɩnɛ wa tɛr sɔ́r na ɩrɛ a lɛ a nyɩ zu, bʋ̃ʋ n'ʋ so tɩɩm kʋ̃ nɩ̃ɛ ɩrɛ a lɛ zuo lɛ? Ɛcɛ tɩ bɛ ɩ à à ŋá tɩ na tɩ tɛr sɔ́r na ɩrɛ a ɩ. Tɩ nɩ̃ɛ na sàw de bom za, kɛ́ yel za ta piw a Kɩrɩta Yel-nʋ̃ɔ̀ ɩ.

¹³ Nyɩ bɛ bãw k'aa bɛlɩ dem na tone a Ŋmɩn-yir-kpɛ̃ɛ pʋɔ a, a Ŋmɩn-yir-kpɛ̃ɛ n'ʋ guole bɛ ɩ? Ɛ́ a bɛlɩ dem na tone a bàwr-maal-kuur zu tome a, bɛ pʋɔ nɩ a bàwr-maal-kuur zu de-kʋ̀b bome pʋɔ ɩ?

¹⁴ Lɛ mɩ̀ n'a, a Sore yel'ɩ a bɛlɩ dem na hiere a Yel-nʋ̃ɔ̀ a, kɛ́ a Yel-nʋ̃ɔ̀ ton guole bɛ.

¹⁵ Ɛcɛ mãa a, à á ŋá za ɩ̃ na tɩ tɛr sɔ́r nãá ɩrɛ a, ɩ̃ bɛ ɩ a towtow ɛ, ɛ́ mɩ̀ bɛ lɛb sɛbr à á ŋá k'ɩ̃ɩ tʋ̃ɔ́ ɩrɛ a ɩ. Mãa nɩ̃ɛ kpi a, alɛ sa. Nɩr bɛ be na faa a nyʋʋr bom ŋa a ɩ̃ zie ɩ.

¹⁶ Bʋ̃ʋ n'ʋ vɛ̃, a Yel-nʋ̃ɔ̀ ɩ̃ na hiere a, a bɛ ɩ yúor ɩ̃ bɔbr ɛ, fɛrʋ ton n'ʋ. Baw-bio sob nɛ m, mãa bɛ wa hiere a Yel-nʋ̃ɔ̀ a.

¹⁷ Mãa mɩŋa tɩ n'ʋ nɔnɛ tone a ton ŋa a, ɩ̃ tɩ tɛr'ɩ sɔ́r nãá páwr sã-ya. Ɛcɛ ʋlɛ wa ɩ fɛrʋ ton a, ʋ ɩ n ton bɛ kʋ̀ m.

¹⁸ A na ɩ lɛ a, a ɩ̃ sã-ya pãa n'ɩ buor a? Ʋlɛ n'ɩ k'ɩ̃ɩ hiere a Yel-nʋ̃ɔ̀ kʋ̀rɛ a nɩbɛ zawlalɛ, ɛ́ bɛr a tɔnɛ al za ɩ̃ na tɛr sɔ́r nãá páwr a Yel-nʋ̃ɔ̀ hieru pʋɔ a.

¹⁹ Mãa na so ɩ̃ tʋɔra bɛ ɩ nɩr za gbãgbaa a, ɩ̃ sàw na lɩɛbɩ nɩbɛ za gbãgbaa, k'ɩ̃ɩ tʋ̃ɔ́ páw a bɛ bɛ́rʋ zie kʋ̀ a Kɩrɩta.

²⁰ A Zifʋ mɩnɛ zie a, ɩ̃ mɩ́ ɩrɛ na mɛ̃ Zifʋ a, k'ɩ̃ɩ tʋ̃ɔ́ páw a Zifʋ mɩnɛ. A bɛlɩ dem a Wulu na fɛrɛ a zie, ɩ̃ mɩ́ ɩrɛ na mɛ̃ a Wulu fɛrɛ mɛ̃ na a, ɛcɛ a Wulu bɛ fɛrɛ mɛ̃ ɩ, k'ɩ̃ɩ tʋ̃ɔ́ páw a bɛlɩ dem a Wulu na fɛrɛ a.

²¹ A bɛlɩ dem na bɛ bãw a Moyiir wulu a zie a, ɩ̃ mɩ́ ɩrɛ na mɛ̃ a bɛl a, k'ɩ̃ɩ páw a bɛlɩ dem na bɛ bãw a Moyiir wulu a. Ɛcɛ ɩ̃ bɛ ɩ nɩr na bɛ bãw a Naaŋmɩn wulu a ɩ, Kɩrɩta na n'ʋ ɩ a ɩ̃ wulu a ƴãw.

²² Ɩ̃ mɩ́ lɩɛb'ɩ bãbàal a bãbàalbɛ zie, k'ɩ̃ɩ páw a bãbàalbɛ. Ɩ̃ mɩ́ lɩɛb'ɩ bom za a bɛ za zie, kɛ́ alɛ saa ŋmɛ̃ ŋmɩŋmɩn a, mãa tʋ̃ɔ́ faa bɛ mɩnɛ.

²³ A Yel-nʋ̃ɔ̀ ƴãw n'a ɩ̃ ɩrɛ à à ŋá, k'ɩ̃ɩ tʋ̃ɔ́ pʋɔ a ʋ maalʋ pʋɔ.

²⁴ Nyɩ bɛ bãw k'aa bɛlɩ dem na mɩ́ dãwnɛ taa a dɩ̃ɛnʋ zie a, bɛ za nɛbɛ mɩ́ zɔrɛ, ɛcɛ been yõ n'ʋ mɩ́ wa páw a zɔ-tʋ̃ɔ́fʋ bom ɛ? A na ɩ à ŋá a, nyɩ zɔrɛ zɔba na na ɩ nyɩ páw a zɔ-tʋ̃ɔ́fʋ sã-ya a.

²⁵ A dɩ̃ɛ-dɩ̃ɛnbɛ za mɩ́ ƴãw nɩ a bɛ ƴã-gan dɔwrʋ yaga, dɛpaal-kpawʋɔ na mɩ́ wɛ a ƴãw n'a bɛ mɩ́ ɩrɛ a lɛ, ɛcɛ tɩɩm a, dɛpaal-kpawʋɔ na bɛ tɛr nãà wɛ a ƴãw n'a.

²⁶ A na ɩ à ŋá a, à ŋá n'a mãa zɔrɛ: ɩ̃ bɛ bʋ̀nɛ zɔrɛ ɩ, ɛ́ à ŋá n'a ɩ̃ ŋmɩɛr a cɔ̀rɛ: ɩ̃ bɛ ŋmɩɛr vuo pʋɔ ɩ.

²⁷ Ɛcɛ ɩ̃ 'wɔnɛ nɩ a ɩ̃ ƴã-gan ɛ́ dɔwrɛ ʋ, k'ɩ̃ɩ tʋ̃ɔ́ so ʋ, k'ɩ̃ɩ taa wa mab hieri a Yel-nʋ̃ɔ̀ kʋ̀ a nɩbɛ, ɛ́ bɛ nyɛ̃ ɩ̃ bɛ sɛwnɩ ʋ ɛ.