1 Korɛ̃tɩ 8 - A SƐB-SÕW

A tɩbɛ bàwr-nɛnɛ yele

¹ Ɛ́ a nɛnɛ al bɛ na mɩ́ kʋ ƴãw a tɩbɛ ƴãw a, «tɩ za tɛr'ɩ a yele bãwfʋ», mɛ̃ a lɛ nyɩ na mɩ́ yel a. Ɛcɛ a yele bãwfʋ mɩ́ ɩ n a nɩsaal zɛwr ʋ tʋɔra, ɛ́ nɔ̃wfʋ mɩ́ ɩ a Lãw-yir ʋ kɛrɛ dɔwlɛ.

² Nɩr wa tɩɛrɛ k'ʋʋ bãw nɩ bom kãw a, ʋ cãà bɛ bãw mɛ̃ a lɛ a na sɛw k'ʋʋ bãw a ɩ.

³ Ɛcɛ nɩr wa nɔnɛ Naaŋmɩn a, a Naaŋmɩn mɩ́ bãw ʋ na.

⁴ Ɛ́ a nɛnɛ al bɛ na mɩ́ kʋ ƴãw a tɩbɛ ƴãw a 'wɔbrʋ ƴãw a, tɩ bãwnɩ a na kɛ́ tɩɩb kãw za bɛ ɩ bʋ̃-sɩza ɩ, ɛ́ ŋmɩn kãw za bɛ be a tẽ-daa zu a bɛ ɩ a Naaŋmɩn-been yõ ɩ.

⁵ Ŋmɩn-yaga na saa be a salom zu bɩɩ a tẽw zu bɛ bʋɔlɛ ŋmɩmɛ a — ɛ́ ŋmɩn-yaga nɩ sorbɛ yaga sɩrɩ na be be —

⁶ tɩɩm zie a, Naaŋmɩn-been yõ n'ʋ be, a Naaŋmɩn Sãà na ír bom za ɛ́ tɩ vʋʋrɛ a ʋ ƴãw a, nɩ Sore been yõ, Yeezu Kɩrɩta, na so bom za be ɛ́ so tɩ vʋʋrɛ a.

⁷ Ɛcɛ nɩbɛ za bɛ nɛbɛ tɛr a yele bãwfʋ ŋa ɩ. Bɛ mɩnɛ na mili nɩ a tɩbɛ a, 'wɔbr'ɩ a tɩbɛ bàwr-nɛnɛ mɛ̃ a tɩbɛ sɩrɩ so a a. A bɛ tɩɛrʋ bɛ kpɛmɛ ɩ, lɛ so bɛ mɩ́ nyɛ̃ a nɛn ŋa wa n dɛwr a bɛ zie.

⁸ Bʋ̃-dɩra bɛ n'ʋ na taw tɩ pɩɛl'ɩ a Naaŋmɩn ɛ. Tɩmɛ bɛ wa dɩ a, a kʋ̃ ɩ tɩ bom za ɩ, ɛ́ tɩmɛ saa wa dɩ a, tɩ kʋ̃ páw bom za dɔwlɩ ɛ.

⁹ Ɛcɛ nyɩ gù vla k'aa nyɩ só-nyɩ-tʋɔra taa ɩrɛ a bãbàalbɛ bɛ lore ɩ.

¹⁰ Bʋ̃ʋ n'ʋ vɛ̃, nɩr wa nyɛ̃ a fʋ̃ʋ na bãw a, fʋ zɩ̃ a tɩbɛ yir pʋɔ dɩrɛ a, mɛ̃ ʋ taa mɩ̀ na bɔbr a tɩbɛ bàwr-nɛnɛ 'wɔbrʋ, ʋl a tɩɛrʋ na bɛ kpɛmɛ a?

¹¹ Ɛ́ a fʋ̃ʋ na bãw a zũú, a bãbàal na kpi na, a yɛb ŋa ƴãw a Kɩrɩta na kpi a.

¹² Nyɩmɛ wa sãwnɛ a nyɩ yɛbr à ŋá a, ɛ́ sãwnɛ a bɛ tɩɛrʋ na bɛ kpɛmɛ a, Kɩrɩta n'ʋ nyɩ sãwnɛ.

¹³ Lɛ so, bʋ̃-dɩra na na ɩ a ɩ̃ yɛb lo a sãwna pʋɔ a, ɩ̃ na ciir'ɩ a nɛn kʋralɛ, k'ɩ̃ɩ taa ɩrɛ a ɩ̃ yɛb lore sãwna pʋɔ ɩ.