1 Korɛ̃tɩ 7 - A SƐB-SÕW

Kul-taa yele

¹ Ƴɛrɛŋa a, tɩ pãa ƴɛ̀r a yele al nyɩ na sɛb kʋ̀ m a ƴɛ̀rʋ. A dɛb zie a, a vɩɛl'a ʋ na bɛ kul pɔw a.

² Ɛcɛ a pɩ̃ɔ-yele zũú a, kɛ́ dɛb za mɩ́ kul ʋ pɔw, ɛ́ pɔw za kul ʋ sɩr.

³ A sɩr, ʋ tone a sɩr tome a ʋ pɔw zie, ɛ́ a pɔw mɩ̀ tone a pɔw tome a ʋ sɩr zie.

⁴ A pɔw bɛ n'ʋ so a ʋ mɩŋa ƴã-gan ɛ, a ʋ sɩr so ʋ. Lɛ mɩ̀ n'a, a sɩr bɛ n'ʋ so a ʋ mɩŋa ƴã-gan ɛ, a ʋ pɔw so ʋ.

⁵ Nyɩ ta sɩbr taa a lãw-taa, ɛ́ a bɛ ɩ kɛ́ nyɩ wõ n taa ŋmãa bɛr blãlɛ ƴãw kɛ́ nyɩ tʋ̃ɔ́ puori ɛ. Al pùorí, nyɩ lɛb lãwnɛ taa, alɛ bɛ ɩ lɛ, nyɩ nãà tɛrɛ nɩ nyɩ tʋɔra guur lo a Sɩtaana bɛ̀lʋ pʋɔ.

⁶ À à ŋá ɩ̃ na ƴɛ̀rɛ a, sàwfʋ n'a ɩ̃ sàw kʋ̀ nyɩ k'aa mɩ́ ɩ a lɛ, fɛrʋ bɛ n'a ɩ.

⁷ Ɩ̃ bɔbr'a k'aa nɩbɛ za nãá ŋmɛ̃ mɛ̃ a mãa a, ɛcɛ a Naaŋmɩn mɩ́ kʋ̀ n ŋa za a ʋ maalʋ: ŋa mɩ́ páw nɩ maalʋ ŋa, ŋa páw maalʋ ŋa.

⁸ Lɛ so ɩ̃ yere kʋ̀rɛ a bɛlɩ dem na bɛ tɛr pɔwbɛ a, nɩ a pɔw-kɔbɛ, k'aa vɩɛl'a kɛ́ bɛ cãà ŋmɛ̃ a bɛ ŋmɛ̃a mɛ̃ a mãa a.

⁹ Ɛcɛ bɛlɛ na kʋ̃ tʋ̃ɔ́ nyɔw bɛ tʋɔra a, bɛ kul pɔwbɛ bɩɩ sɩrbɛ. Bʋ̃ʋ n'ʋ vɛ̃, a pɔw kulu bɩɩ a sɩr kulu sa, a pɔw vʋla bɩɩ a dɛb vʋla na na dɩrɛ fʋ a.

¹⁰ A bɛl na kul taa a, ɩ̃ yere na kʋ̀rɛ bɛ, (ɛcɛ mãa bɛ n'ʋ ɛ): a Sore n'ʋ: a pɔw, ʋ ta yi ɛ́ bɛr a ʋ sɩr ɛ,

¹¹ ɛ́ ʋlɛ wa yi ɛ́ bɛr ʋ a, ʋ ta lɛb kul sɩr ɛ, bɩɩ ʋ ɩ ʋlɛ nɩ a ʋ sɩr lɛb kpɛ taa, ɛ́ sɩr mɩ̀ ta zawrɩ ʋ pɔw bɛr ɛ.

¹² A ŋmaarɛ bɛl na cɛ a zie a, ɩ̃ yere na, (mãa n'ʋ ƴɛ̀rɛ, a Sore bɛ n'ʋ ɛ): kɩrɩta-nɩr na tɛr pɔw na bɛ sàw de a Kɩrɩta a, a pɔw wa sàw lãw kpɩɛr'ɩ ʋ a, ʋ ta zawr'ʋ bɛr ɛ.

¹³ Ɛ́ kɩrɩta-nɩr na ɩ pɔw a, wa tɛr sɩr na bɛ sàw de a Kɩrɩta a, a ʋ sɩr ŋa wa sàw lãw kpɩɛr'ɩ ʋ a, ʋ ta zawr'ʋ bɛr ɛ.

¹⁴ Bʋ̃ʋ n'ʋ vɛ̃, a pɔw na ɩ kɩrɩta-nɩr a mɩ́ ɩ n a ʋ sɩr na bɛ sàw de a Kɩrɩta a, ʋ lɩɛbɩ nɩ-sõw, ɛ́ a sɩr na ɩ kɩrɩta-nɩr a ɩ a ʋ pɔw na bɛ sàw de a Kɩrɩta a, ʋ lɩɛbɩ nɩ-sõw. Alɛ bɛ tɩ ɩ à ŋá a, a nyɩ bibiir nãá ɩ n dɛwr nɩbɛ, ɛcɛ bɛ ɩ n nɩ-son.

¹⁵ A ʋl na bɛ sàw de a Kɩrɩta a wa bɔbr k'ʋʋ yi a, ʋ yi. A sɩr bɩɩ a pɔw na ɩ a kɩrɩta-nɩr a, so nɩ ʋ tʋɔra a ka. Ƴã-ɓaarʋ pʋɔ n'a Naaŋmɩn bʋɔlɩ nyɩ kɛ́ nyɩ wa vʋʋrɛ.

¹⁶ Yel-mɩŋa n'a, ŋmɩŋmɩn za n'a a fʋ̃ʋ pɔw na bãw kɛ́ fʋ na faa nɩ a fʋ sɩr? Bɩɩ a fʋ̃ʋ sɩr kɛ́ fʋ na faa nɩ a fʋ pɔw?

Nyɩ vʋʋrɛ tu n a lɛ a Naaŋmɩn na cɔbrɩ bin a nyɩ ƴãw a

¹⁷ A yel ŋa ƴãw bɛ wa n'a a, ŋa za, ʋ mɩ́ vʋʋrɛ tu n a lɛ a Sore na kʋ̀ ʋ a, nɩ a lɛ ʋ na tɩ ŋmɛ̃ a lɛn daar a Naaŋmɩn na bʋɔl'ʋ a. À ŋá n'a ɩ̃ wule a Lãw-yie za pʋɔ kɛ́ bɛ tuur.

¹⁸ A nyɩ ƴen sob tɩ ŋmãa nɩ yʋ̀ɔr a lɛn daar a Naaŋmɩn na bʋɔl'ʋ a bɩɩ? Ʋ ta sɔwlɛ a ʋ yʋɔr-ŋmãafʋ ɛ. Kãw bɛ tɩ ŋmãa yʋ̀ɔr sɛr ɛ? Ʋ ta ƴãw bɛ ŋmãa ʋ ɛ.

¹⁹ A yʋɔr-ŋmãafʋ bɛ ɩ bom ɛ, a yʋ̀ɔr-bɛ-ŋmãafʋ mɩ̀ bɛ ɩ bom ɛ. Naaŋmɩn nɛ-ƴãwnɩ sàwfʋ n'a ɩ bom.

²⁰ Ŋa za, ʋ mɩ́ cãà ŋmɛ̃ a lɛ ʋ na tɩ ŋmɛ̃ a lɛn daar a Naaŋmɩn na tɩ bʋɔl'ʋ a.

²¹ Fʋ tɩ ɩ n gbãgbaa a lɛn daar a Naaŋmɩn na bʋɔlɩ fʋ a bɩɩ? A ta ƴãwnɛ fʋ tɩɛrʋ ɛ. Ɛcɛ fʋ̃ʋ wa na na tʋ̃ɔ́ lɩɛbɩ nɩr na so ʋ tʋɔra a, taa bɛrɛ a tɔlɛ ɩ.

²² Bʋ̃ʋ n'ʋ vɛ̃, a gbãgbaa a Sore na bʋɔlɩ a, ʋ lɩɛb'ɩ nɩr a Sore na faa ɛ́ so ʋ a. Lɛ mɩ̀ n'a, a sob nɛ na so ʋ tʋɔra ɛ́ a Sore bʋɔl'ʋ a, ʋ ɩ n a Kɩrɩta gbãgbaa.

²³ Naaŋmɩn ya na de nyɩ: nyɩ ta lɩɛbɩ nɩsaalbɛ gbãgbaar ɛ.

²⁴ Yɛbr i, ŋa za, ʋ mɩ́ be a Naaŋmɩn niŋé ŋmɛ̃ a lɛ ʋ na tɩ ŋmɛ̃ a lɛn daar a Naaŋmɩn na bʋɔl'ʋ a.

A bɛlɩ dem na bɛ kul taa a, nɩ a pɔw-kɔbɛ yele

²⁵ A bɛlɩ dem na bɛ kul taa a, ɩ̃ bɛ tɛr wulu na yi a Sore zie a, na yel kɛ́ bɛ tuur ɛ. Lɛ mãa na nyɛ̃ a n'a ɩ̃ yere, mãa nɩsaal na sɛwnɩ kɛ́ nɩbɛ ta bʋ́nɛ nɩ mɛ̃ a Sore su-ɓaarʋ zũú a.

²⁶ A ƴɛrɛŋa kpɩɛrʋ zũú, mãa tɩɛr k'aa vɩɛl'a kɛ́ ŋa za mɩ́ ŋmɛ̃ a lɛ ʋ na ŋmɛ̃ a.

²⁷ Fʋ kul'ɩ pɔw ɩ? Taa bɛrɛ ʋ ɛ. Fʋ bɛ kul pɔw ɛ? Ta bɔbr pɔw ɛ.

²⁸ Ɛcɛ fʋ̃ʋ wa kul pɔw a, fʋ bɛ maalɩ yel-bier ɛ. Ɛ́ pɔwsɩrale wa kul sɩr a, ʋ bɛ maalɩ yel-bier ɛ. Ɛcɛ a bɛl na kul taa a, bɛ na páw nɩ kpɩɛrʋ yaga, ɛ́ alɛ n'a ɩ̃ bɔbr kɛ́ nyɩ ta páw ɛ.

²⁹ Yɛbr i, yel ŋa n'ʋ ɩ̃ bɔbr k'ɩ̃ɩ yel: a nɩdaar bɛ cãà zãá ɩ. Dɩ̃a na ta a, a pɔw-tɛrbɛ, bɛ ɩ mɛ̃ bɛ bɛ tɛr pɔwbɛ a,

³⁰ a bɛlɩ dem na kone a, bɛ ɩ mɛ̃ bɛ bɛ kone a, a bɛlɩ dem na cɩlɛ a, bɛ ɩ mɛ̃ bɛ bɛ cɩlɛ a, a bɛlɩ dem na daar bome a, bɛ ɩ mɛ̃ bɛ bɛ tɛr bom a,

³¹ bɛlɩ dem na nyɛrɛ tɔnɛ nɩ a tẽw ŋa bome a, bɛ ɩ mɛ̃ bɛ bɛ nyɛrɛ tɔnɛ a. Bʋ̃ʋ n'ʋ vɛ̃, a tẽ-daa ŋa ŋmɛ̃a tɔlɛ na.

³² Ɩ̃ bɔbr'a kɛ́ nyɩ nãá ta tɛr niw-sʋba kãw za ɩ. Dɛb na bɛ kul pɔw a, a Sore yele tɩɛrʋ n'a ʋ mɩ́ tɛr, ʋ mɩ́ bɔbr'a k'ʋʋ ɩrɛ a pɛlɩ a Sore pʋɔ.

³³ Ɛcɛ a dɛb ʋl na kul a pɔw a, a tẽ-daa zu yele tɩɛrʋ n'a ʋ mɩ́ tɛr: ʋ mɩ́ bɔbr'ɩ lɛ ʋ na na ɩrɛ a nʋmɛ a ʋ pɔw zie a,

³⁴ lɛ n'a a ʋ tɩɛrʋ dɛ mɩ́ põ. Lɛ mɩ̀ n'a, pɔw na bɛ kul sɩr a, bɩɩ a pɔwsɩrale a, a Sore yele tɩɛrʋ n'a ʋ mɩ́ tɛr. Ʋ mɩ́ bɔbr'a k'aa Sore so ʋ, a ʋ ƴã-gan pʋɔ nɩ a ʋ tɩɛrʋ pʋɔ. Ɛcɛ a pɔw na kul sɩr a, a tẽ-daa zu yele tɩɛrʋ n'a mɩ́ be a ʋ zie: ʋ mɩ́ bɔbr'a k'ʋʋ ɩrɛ a nʋmɛ a ʋ sɩr zie.

³⁵ A nyɩ vla ƴãw n'a ɩ̃ yere à à ŋá, bɛra pʋɔ bɛ n'a ɩ̃ ƴãwnɛ nyɩ ɛ, ɩ̃ nɩ̃ɛ na bɔbr kɛ́ nyɩ ɩrɛ bom na vɩɛl sɛwnɩ ƴãwfʋ a, kɛ́ nyɩ lãw nɩ a Sore ta bãw taw-taa kãw za ɩ.

³⁶ Pɔlbile wa nyɛ̃ ʋ sãwnɛ a ʋ ƴãwnɩ-yúor pʋɔ, ʋ na kʋ̃ kul ʋ a, a pɔw vʋla wa kpɩɛr ʋ tɩ zuo, ʋʋ bãw k'aa tɩ sɛw na kɛ́ bɛ kul taa a, bɛ̃ɛ kul bɛ taa mɛ̃ a lɛ ʋ na bɔbr a. Ʋ bɛ maalɛ yel-bier ɛ.

³⁷ Ɛcɛ, nɩr fɛrʋ kãw za na bɛ be ʋ zie, ʋʋ tɩɛr ʋ pʋɔ k'ʋʋ bɛ be za na kul pɔw a, ʋlɛ na na tu a lɛ ʋ na bɔbr a, ɛ́ yel a ʋ tɩɛrʋ pʋɔ k'ʋʋ kʋ̃ lãw nɩ a ʋ ƴãwnɩ-yúor a, ʋ maal'ɩ vla.

³⁸ A na ɩ lɛ a, nɩr na kul a ʋ ƴãwnɩ-yúor a maal'ɩ vla, ɛ́ nɩr na bɛ kul ʋ a maal'ɩ vla zuo lɛ.

³⁹ A pɔw be n a ʋ sɩr ƴãw lɛn daar za a ʋ sɩr na vʋʋrɛ a. A ʋ sɩr wa kpi a, ʋ so nɩ ʋ tʋɔra na tʋ̃ɔ́ kul sob nɛ ʋ na bɔbr a, ɛcɛ a sob nɛ a, ʋ ɩ kɩrɩta-nɩr.

⁴⁰ Ɛcɛ mãa zie a, ʋlɛ wa be be mɛ̃ a lɛ ʋ na ŋmɛ̃ a, ʋ na wone nɩ nʋ̃ɔ̀ zuo. À ŋá n'a ɩ̃ nyɛ̃, ɩ̃ɩ tɩɛr bãw k'ɩ̃ɩ mɩ̀ tɛr'ɩ a Naaŋmɩn Vʋʋrʋ.