1 Korɛ̃tɩ 6 - A SƐB-SÕW

Yɛb'ʋ maalɛ nɩ a ʋ yɛb ƴɛ̀rʋ

¹ A nyɩ ƴen sob na mɩ́ wa tɛr'ɩ a yɛb kãw ƴɛ̀rʋ a, ŋmɩŋmɩn za n'a ʋ mɩ́ sʋ̃ɔmɩ bɛr a lãw nɩbɛ, ɛ́ cen tɩ ƴãw nɩbɛ na bɛ ɩ kɩrɩta-nɩbɛ a, bɛ maalɛ nɩ bɛ a ƴɛ̀rʋ?

² Nyɩ nɔ̃w bɛ bãw k'aa lãw nɩbɛ nɛbɛ na maal'ɩ a tẽ-daa a ƴɛ̀rʋ bɩɩ? Ɛ́ nyɩmɛ wa nɛbɛ na maal'ɩ a tẽ-daa a ƴɛ̀rʋ a, nyɩ ɩ n ŋmɩn bɛ sɛw taa nɩ na maalɩ a ƴɛ̀rʋ a yel-pʋrmɛ á ŋá ƴãw?

³ Nyɩ bɛ bãw kɛ́ tɩ na maalɩ nɩ a malkɩ mɩnɛ a ƴɛ̀rʋ bɩɩ? Ɛ̀ bɛ nãà yere a tẽw ŋa zu nyɔ-vʋʋrʋ yele e!

⁴ Ɛcɛ nyɩ na mɩ́ wa tɛr a ƴɛ̀rʋ-maalʋ á ŋá taabɛ a, bʋ̃ʋ ƴãw n'a nyɩ mɩ́ de nɩbɛ, a Lãw-yir na bɛ de a bɛ yele a, ƴãw bɛ ɩ a ƴɛ̀r-maalbɛ?

⁵ Ɩ̃ yere nɩ à à ŋá kɛ́ nyɩ nyɛ̃ vĩ. A ɩ lɛ nɩsaal za bɛ bãw yã a sɛw a nyɩ pʋɔ na tʋ̃ɔ́ maalɩ a ƴɛ̀rʋ a ʋ yɛbr cara pʋɔ ʋ?

⁶ Ɛ̀ yɛb pãa mɩ́ tɛr'ɩ yɛb ƴɛ̀rʋ nɩbɛ na bɛ sàw de Naaŋmɩn a niŋé!

⁷ Alɛ saa ŋmɛ̃ ŋmɩŋmɩn a, nyɩ sãw na baarɩ, nyɩ na tɛr'ɩ taa ƴɛ̀rʋ a ƴãw. Bʋ̃ʋ n'ʋ so nyɩ nɩ̃ɛ bɛ sàwr bɛ nɛbr nyɩ? Bʋ̃ʋ n'ʋ so nyɩ nɩ̃ɛ bɛ bɛrɛ bɛ farɛ a nyɩ bome za?

⁸ Ɛ́ nyɩmɛ nɩ̃ɛ nɛbɛ nɛbr a nyɩ taabɛ, ɛ́ farɛ a bɛ bome za, ɛ́ a nyɩ yɛbr nɛbɛ nyɩ ɩrɛ a lɛ.

⁹ Nyɩ nɔ̃w bɛ bãw k'aa bɛlɩ dem na nɛbr a bɛ taabɛ a, kʋ̃ kpɛ a Naaŋmɩn Naalʋ pʋɔ ɩ? Nyɩ ta bɛ̀lɛ nyɩ tʋɔra a ɩ! A pɩ̃ɔ-yel-maalbɛ, nɩ a bɛl na maalɛ a tɩbɛ a, a pɔw-gaa yel-bier-maalbɛ, nɩ a dɛb-bɛrɛ na gánɛ nɩ a dɛbli a,

¹⁰ a nyãnyuwr, a bɛl na mɩ́ nyɛ̃ a bɛ tɔ bom a mimir zaalɛ a, a dã-kuolbɛ, a gɛgɛrɩ, lãwnɩ a bɛl na farɛ a bɛ taabɛ bome a, bɛ kʋ̃ kpɛ a Naaŋmɩn Naalʋ pʋɔ ɩ.

¹¹ À ŋá n'a nyɩ mɩnɛ tɩ ŋmɛ̃. Ɛcɛ bɛ so n a nyɩ dɛwr bɛr nyɩ, bɛ ɩ na nyɩ lɩɛbɩ nɩ-son nɩ nɩ-mɩn a Sore Yeezu Kɩrɩta yúor ƴãw nɩ a tɩ Naaŋmɩn Vʋʋrʋ Sõw ƴãw.

Nyɩ zɛwr a Naaŋmɩn yúor-vɩɛlʋ-danʋ nɩ a nyɩ ƴã-gamɛ

¹² Nyɩ mɩnɛ mɩ́ yel'a: «Ɩ̃ tɛr'ɩ sɔ́r na tʋ̃ɔ́ ɩ bom za», sɩza n'a, ɛcɛ «bom za bɛ n'a maalɛ nyɩ ɛ.» Ɩ̃ na tʋ̃ɔ́ na yel: «Ɩ̃ tɛr'ɩ sɔ́r na tʋ̃ɔ́ ɩ bom za», ɛcɛ ɩ̃ kʋ̃ sàw ɩ bom za gbãgbaa ɩ.

¹³ Nyɩ mɩ̀ mɩ́ yel'a: «Púor ƴãw n'a a bʋ̃-dɩrɩ be, ɛ́ bʋ̃-dɩrɩ ƴãw n'a a púor mɩ̀ be.» Ɛ́ Naaŋmɩn na sãw nɩ a bʋ̃-dɩrɩ bɛr, ɛ́ sãw a púor bɛr. Ɛcɛ a ƴã-gan bɛ be a pɩ̃ɔ-yele maalʋ ƴãw ɛ, a Sore ƴãw n'a ʋ be, ɛ́ a Sore mɩ̀ be a ƴã-gan ƴãw.

¹⁴ Ɛ́ a Naaŋmɩn na ɩ a Sore lɛb yi a kũu pʋɔ a, ʋ mɩ̀ na ɩ na tɩ lɛb yi a kũu pʋɔ nɩ a ʋ fãw.

¹⁵ Nyɩ bɛ bãw kɛ́ a nyɩ ƴã-gamɛ ɩ n a Kɩrɩta ƴã-gan ɓɛrmɛ bɩɩ? Ɩ̃ na sàw na de a Kɩrɩta ƴã-gan ɓɛrmɛ ƴãw a lɩɛbɩ pɔw-yɛm ƴã-gan ɓɛrmɛ bɩɩ? Ʋ̃ʋ'hʋ̃! Towtow!

¹⁶ Nyɩ bɛ bãw kɛ́ nɩr na gã nɩ a pɔw-yɛm a, ʋ lãw nɩ ʋ na bɛ ɩ ƴãw-been ɛ? Bʋ̃ʋ n'ʋ vɛ̃, bɛ yel'ɩ à ŋá: «A bɛ za ayi na ɩ n nɩ-been.»

¹⁷ Ɛcɛ ʋlɩ sob na lãw nɩ a Sore a, ʋ lãw nɩ ʋ na bɛ ɩ vʋʋr-been.

¹⁸ Nyɩ zɔrɛ dɛrɛ a pɩ̃ɔ-yele. Yel-bier kãw za nɩsaal na mɩ́ maalɩ a bɛ ɓanɛ a ʋ ƴã-gan ɛ, ɛcɛ a pɩ̃ɔ-yel-bier-maalɛ a, a ʋ ƴã-gan tɔr za n'ʋ ʋ mɩ́ maalɩ a yel-bier kʋ̀.

¹⁹ Bɩɩ nyɩ taa bɛ bãw kɛ́ a nyɩ ƴã-gan ɩ n a Vʋʋrʋ Sõw yir u? A Vʋʋrʋ Sõw ŋa na be a nyɩ pʋɔ ɛ́ yi Naaŋmɩn zie wa a. Nyɩ bɛ bãwnɩ a nyɩ na bɛ so nyɩ tʋɔra a bɩɩ?

²⁰ Naaŋmɩn dà nyɩ na nɩ libie na bɛ vʋʋr a. A na ɩ lɛ a, nyɩ íre a Naaŋmɩn yúor-vɩɛlʋ-danʋ nɩ a nyɩ ƴã-gamɛ.