1 Korɛ̃tɩ 2 - A SƐB-SÕW

A Pol hiere nɩ a Kɩrɩta bɛ na kpa da-gara zu a

¹ Yɛbr i, a mãa mɩŋa na tɩ wa a nyɩ zie a, ƴɛ̀r-bãw bɩɩ yã-bãw bɛ n'a ɩ̃ tɩ manɩ nɩ a Naaŋmɩn pʋ-tɩɛr-sɔwla kʋ̀ nyɩ ɛ.

² Bʋ̃ʋ n'ʋ vɛ̃, ɩ̃ tɩ yel'a k'ɩ̃ɩ kʋ̃ bãw bom za a nyɩ sɔgɔ, a bɛ ɩ a Yeezu Kɩrɩta yõ ɩ, a Yeezu Kɩrɩta ŋa bɛ na kpa a da-gara zu a.

³ Alɛ so ɩ̃ wa a nyɩ zie ɩ bãbàal, ɛ́ dɛ̃bɩ̃ɛ ɩ ɩ̃ màwr ɩ̃ za.

⁴ A ɩ̃ ƴɛ̀rʋ nɩ a ɩ̃ Yel-nʋ̃ɔ̀ hieru bɛ tɩ tu nɩsaal yã-bãwfʋ ƴɛ̀r-bie k'ɩ̃ɩ ƴɛ̀r tʋ̃ɔ́ nɩ nyɩ ɛ, a tɩ ɩ n wulu a Vʋʋrʋ Sõw na mɩ́ tɩ wul a sãá a,

⁵ k'aa nyɩ sàw-deb ta yi nɩsaalbɛ zie ɩ, ɛ́ yi a Naaŋmɩn kpɛnʋ zie.

A Naaŋmɩn yã-bãwfʋ

⁶ Yã-bãwfʋ ƴɛ̀rʋ n'a tɩ sɩrɩ ƴɛ̀rɛ a kɩrɩta-nɩbɛ bɛl na bɩ nɩbɛ a bɛ naaŋmɩn-sàw-deb pʋɔ a sɔgɔ, yã-bãwfʋ na bɛ ɩ tẽw ŋa zu dem, bɛ lɛb ɩ tẽw ŋa zu na-mɩnɛ dem a n'ʋ, bɛl be n kũu ƴãw.

⁷ Ɛcɛ a yã-bãwfʋ ʋl tɩɩm na yere a, ʋ ɩ n Naaŋmɩn yã-bãwfʋ tɩ na kʋ̃ tʋ̃ɔ́ bãw tɔ, ʋʋ sɔwlɩ gã a. A yã-bãwfʋ ʋl a Naaŋmɩn na tɩ dãw bãwnɩ tɩ cɔbrɩ a tɩ yúor-vɩɛlʋ-danʋ ƴãw, ɛ́ a dɩta-pɛ-yome za bɛ be sɛr a.

⁸ A tẽw ŋa zu nãà kãw za bɛ tɩ bãw a yã-bãwfʋ ŋa ɩ. Bɛlɛ tɩ ɩ mɛ̃ bɛ bãw ʋ na a, bɛ kʋ̃ʋ tɩ kpa a yúor-vɩɛlʋ-danʋ za Sore a da-gara zu ɛ.

⁹ Ɛcɛ, mɛ̃ a lɛ bɛ na sɛb a: «Bom nɛ mimir na bɛ nyɛ̃ a, bom nɛ tobr na bɛ wõ a, bom nɛ a tɩɛrʋ na bɛ tɔ a nɩsaal a, ʋlɛ n'ʋ a Naaŋmɩn cɔbrɩ a bɛlɩ dem na nɔnɛ ʋ a ƴãw.»

¹⁰ Tɩmɛ nɛbɛ a Naaŋmɩn sɩrɩ ƴãw a Vʋʋrʋ Sõw wul a yel ŋa ʋ ɩ cãà. Bʋ̃ʋ n'ʋ vɛ̃, a Vʋʋrʋ n'ʋ jɛlɛ a yele za, mɩ́ tɩ lãwnɩ a Naaŋmɩn yel-sɔwlɩ za.

¹¹ A nɩsaalbɛ pʋɔ a, ãa n'ʋ pãa bãw bom nɛ na be a nɩsaal pʋ̃ɔmɩ a, a bɛ ɩ a nɩsaal tɩɛrʋ na be a nɩsaal pʋɔ a? Lɛ mɩ̀ n'a, bom nɛ na be a Naaŋmɩn pʋɔ a, nɩr za bɛ bãw ʋ a bɛ ɩ a Naaŋmɩn Vʋʋrʋ ɛ.

¹² Tɩɩm a, tɩ bɛ páw a tẽ-daa vʋʋrʋ ɛ, Vʋʋrʋ na yi Naaŋmɩn zie a n'ʋ tɩ páw, kɛ́ tɩ tʋ̃ɔ́ bãw a maalʋ a Naaŋmɩn na kʋ̀ tɩ a.

¹³ Tɩ bɛ ƴɛ̀rɛ a maalʋ á ŋá ƴɛ̀rʋ nɩ nɩsaal yã-bãwfʋ ƴɛ̀r-bie ɩ, tɩ ƴɛ̀rɛ nɩ a ƴɛ̀rʋ nɩ a Vʋʋrʋ yã-bãwfʋ, manɛ bom na ɩ vʋʋrʋ bom a, nɩ a Vʋʋrʋ ƴɛ̀r-bie.

¹⁴ A nɩsaal nɩ a ʋ nɩsaalʋ tɛwr kʋ̃ tʋ̃ɔ́ sàw de a yel na yi a Naaŋmɩn Vʋʋrʋ zie a ɩ. A yel ŋa mɩ́ ɩ n gẽgemi a ʋ zie ʋ kʋ̃ tʋ̃ɔ́ bãw ʋ ɛ, a Vʋʋrʋ Sõw yõ na n'ʋ mɩ́ ɩ bɛ bãw a pɛr a ƴãw.

¹⁵ Ɛcɛ nɩr na tɛr a Naaŋmɩn Vʋʋrʋ a, ʋ mɩ́ bãwnɛ nɩ yele za, ɛ́ nɩr za kʋ̃ tʋ̃ɔ́ bãw a ʋ yele ɩ.

¹⁶ Bʋ̃ʋ n'ʋ vɛ̃, bɛ sɛb'a kɛ́: «Ãa n'ʋ bãw a Sore pʋ-tɩɛrʋ? Ãa n'ʋ na tʋ̃ɔ́ wul ʋ yã?» Ɛ́ tɩɩm a, tɩ tɛr'ɩ a Kɩrɩta pʋ-tɩɛrʋ.