1 Korɛ̃tɩ 16 - A SƐB-SÕW

A cɩɛrʋ bɛ na cɩɛrɛ a Zerizalɛm Lãw-yir ƴãw a

¹ A cɩɛrʋ nyɩ na cɩɛrɛ ɓanɛ taa a kɩrɩta-nɩbɛ ƴãw a, nyɩ mɩ̀ tuur a lɛ ɩ̃ na wul a Galasi Lãw-yie a.

² Kɔsɩɛra bibir za, bom nɛ ŋa za na tʋ̃ɔ́ páw a ʋ yir bɛr a, ʋ mɩ́ taw ʋ bin kõkowrí, kɛ̀ bɛ ta gùre k'ɩ̃ɩ wa wa bɛ pãa cɩɛrɛ ɩ.

³ Mãa wa ta a, ɩ̃ na tõ n a bɛlɩ dem nyɩ nãà kaa ír a, bɛ tɛr sɛb-tʋɔlɩ cen nɩ a Zerizalɛm tɩ tɩr a nyɩ cɩɛrʋ libie.

⁴ Alɛ wa sɛw k'aa mãa mɩŋa cen a, bɛ na páw mɛ̃ na tɩ cen.

A lɛ a Pol na tɩɛrɛ k'ʋʋ cɔlɩ a ten a

⁵ Ɩ̃ na tu na tɔl a Masedʋan wa a nyɩ zie. Tu-tɔlʋ tɛwr'a ɩ̃ na tu tɔl a be,

⁶ ɛ́ a mɩnɛ kãw, ɩ̃ na kpɛ n a nyɩ zie kɔwrɩ blã. A mɩnɛ kãw mɩ̀, ɩ̃ na be n a be a zie tɩ yi, kɛ̀ nyɩ sõw mɛ̃ ɩ̃ cãà lo a ɩ̃ sɔ́r.

⁷ Ɩ̃ bɛ bɔbr k'ɩ̃ɩ wa tɔlɛ nyɛ̃ nyɩ nyɛ́b tɛwr ɛ, ɩ̃ tɩɛrɛ na k'ɩ̃ɩ be a nyɩ zie blã, a Sore wa sàw a.

⁸ Ɛcɛ, ɩ̃ na kpɛ n a Efɛɛzɩ tɩ ta a Pãtɩkɔtɩ,

⁹ bʋ̃ʋ n'ʋ vɛ̃, ɩ̃ nyɛ̃ na ɩ̃ na tʋ̃ɔ́ tõ a ɩ̃ tome vla vla za a be, a dɔ̃ dem na saa bɛ dɩ vuo a.

¹⁰ A Timote wa wa a, nyɩ ƴãw fãw tɛr ʋ vla, ʋ ta kpɩɛr a nyɩ zie nɩ dɛ̃bɩ̃ɛ ɩ, ʋ na tone a Sore tome mɛ̃ a mãa a ƴãw.

¹¹ A na ɩ lɛ a, nɩr za taa wa manɛ k'ʋʋ bɛ tɛr bir ɛ. Nyɩ sõw ʋ ʋ lɛb wa a ɩ̃ zie nɩ ƴã-ɓaarʋ, mãa nɩ a yɛbr gùre ʋ na.

¹² Ɛ́ a tɩ yɛb Apɔlɔsɩ ʋl a, ɩ̃ kpaal'ʋ nɩ gb'aa yaga za k'ʋʋ wa a nyɩ zie ʋlɛ nɩ a yɛbr, ɛcɛ ʋ bɛ bɔbr towtow k'ʋʋ wa a ƴɛrɛŋa ɩ. Ʋlɛ wa nyɛ̃ a vuo a, ʋ na wa na.

A kpaal-pɛ-baara nɩ a nɩbɛ puoru

¹³ Nyɩ bɛr gʋ̃ɔ, nyɩ kpɛmɛ a sàw-deb pʋɔ, nyɩ ɩ dɛbr, nyɩ tɛr fãw.

¹⁴ Nyɩ ɩrɛ bom za nɩ nɔ̃wfʋ.

¹⁵ Yɛbr i, ɩ̃ kpaalɛ nyɩ na: nyɩ bãwnɩ a na k'aa Sɩtefanasɩ nɩ a ʋ yir dem nɛbɛ de niwn lɩɛbɩ a kɩrɩta-nɩbɛ a Akayi ɛ́ sàw tõ a lãw tome.

¹⁶ Lɛ so, nyɩ sàwr a nɩbɛ bɛ ŋa taabɛ nʋɔr, nɩ a bɛlɩ dem za na lãw nɩ bɛ tone ɛ́ hanɛ a.

¹⁷ A Sɩtefanasɩ, nɩ a Fɔrtinatisɩ nɩ a Akayikisɩ waa ɩrɛ mɛ̃ nɩ nʋ̃ɔ̀ yaga. Bɛ lɩɛrɩ nyɩ nɩ a ɩ̃ zie ka.

¹⁸ Bʋ̃ʋ n'ʋ vɛ̃, bɛ ɩ na mãa nɩ a nyɩɩm za bɛr tɩɛrʋ. Lɛ so, nyɩ mɩ́ nɔnɛ a nɩbɛ bɛ ŋa taabɛ yele.

¹⁹ A Azi Lãw-yie puore nyɩ na. Akɩlasɩ nɩ Pɩrɩsɩl nɩ a Lãw-yir na mɩ́ ɓã taa a bɛ yir a, lãw nɩ nɩ a Sore puore nyɩ yaga za.

²⁰ A yɛbr za puore nyɩ na. Nyɩ nyɔw taa weri puori taa mɛ̃ yɛbr a.

²¹ A mãa Pol, mãa mɩŋa nũu n'ʋ sɛb a puoru ƴɛ̀r-bie.

²² Nɩr bɛ wa nɔnɛ a Sore a, ʋ ɩ nɩ-ŋmɛ-ƴãwna. Marana ta (Tɩ Sore e, wa!)

²³ A Sore Yeezu maalʋ, ʋ be a nyɩ zie.

²⁴ Ɩ̃ lãw nɩ nɩ a Yeezu Kɩrɩta nɔnɛ nyɩ za.