1 Korɛ̃tɩ 10 - A SƐB-SÕW

A Pol kpaalɛ nɩ a Korɛ̃tɩ tẽw dem a tɩbɛ ƴãw

¹ Yɛbr i, a yele na ta a tɩ sãàkʋm-kore a Moyiir daar a, ɩ̃ bɛ bɔbr kɛ́ nyɩ ɩ zɔn a ƴãw ɛ. Bɛ za nɛbɛ a zũzuwr tɩ piw tɛr, bɛ za nɛbɛ tɩ kpɛ gãw a Kʋ̃ɔ-kpɛ̃ɛ-zɩɛ.

² Bɛ za nɛbɛ tɩ lãw nɩ a Moyiir de a suob a zũzuwr pʋɔ nɩ a Kʋ̃ɔ-kpɛ̃ɛ-zɩɛ pʋɔ.

³ Bɛ za nɛbɛ tɩ dɩ a Naaŋmɩn Vʋʋrʋ bʋ̃-dɩ-been,

⁴ ɛ́ nyũ a Naaŋmɩn Vʋʋrʋ bʋ̃-nyúura been: Naaŋmɩn Vʋʋrʋ pìir kãw na tɩ bɩɛlɛ bɛ a pʋɔ n'a kʋ̃ɔ tɩ yire bɛ nyúur: a pìir nɛ tɩ ɩ n a Kɩrɩta.

⁵ Ɛcɛ a bɛ yaga zie bɛ tɩ pɛlɩ a Naaŋmɩn pʋɔ ɩ, lɛ so bɛ tɩ kpi pàw a wɛja-kpalɛ.

⁶ A yele á ŋá ɩ na, k'aa tʋ̃ɔ́ ɩ wulu a tɩ zie, kɛ́ tɩ taa bɔbr a yel-faa mɛ̃ a bɛl na tɩ dãw bɔ a a ɩ.

⁷ Nyɩ taa lɩɛbɛ nɩbɛ na maalɛ tɩbɛ a ɩ, mɛ̃ a lɛ bɛ mɩnɛ kãw na tɩ ɩ a bɛ pʋɔ a ɩ, mɛ̃ a lɛ bɛ na sɛb a: «A nɩ-bʋʋrɛ tɩ zɩ̃ na kɛ́ bɛ dɩ ɛ́ nyũ, al pùorí bɛ ìr kɛ́ bɛ dɩ̃ɛnɩ.»

⁸ Tɩ mɩ̀ ta tuur a pɩ̃ɔ-yele pùor mɛ̃ a lɛ a bɛ mɩnɛ kãw na tɩ ɩ a bɛ pʋɔ a ɩ: bɛ kpi n bibi-been ta nɩbɛ tùr-lɩzɛr'ɩ ata (23 000).

⁹ Tɩ mɩ̀ ta ɩrɛ a Sore kaar ɛ, mɛ̃ a lɛ a bɛ mɩnɛ kãw na tɩ ɩ a bɛ pʋɔ a ɩ: wɩɩr kʋ bɛ na.

¹⁰ Nyɩ ta buule zɛbr'ɩ mɛ̃ a lɛ a bɛ mɩnɛ kãw na tɩ ɩ a bɛ pʋɔ a ɩ: a kũu malkɩ tɩ kʋ bɛ na pàw pɛr.

¹¹ A yele á ŋá tɩ ta bɛ na k'aa ɩ wulu, ɛ́ bɛ sɛb'ɩ a yele á ŋá a tɩɩm wulu ƴãw, tɩɩm na be a yele baarʋ vuo pʋɔ a.

¹² A na ɩ à ŋá a, nɩr wa tɩɛrɛ k'ʋʋ àr'ɩ saaƴẽwn a, ʋ gù vla taa lore ɩ.

¹³ A bɛlʋ al za na ta nyɩ a, ɩ n a al na tarɛ a nɩsaalbɛ a. A lɛ a Naaŋmɩn na yel k'ʋʋ na ɩ na a, ʋ bɛ mɩ́ lɩɛb'a bɛr ɛ, ɛ́ bɛ mɩ́ lɛb sàw kɛ̀ bɛ̀lʋ na zuo a nyɩ fãw a ta nyɩ ɛ. A bɛ̀lʋ wa ta nyɩ a, ʋ na kʋ̀ nyɩ nɩ a fãw nyɩ tʋ̃ɔ́ a bɛ̀lʋ, ɛ́ yi zaa a bɛ̀lʋ pʋɔ.

¹⁴ Alɛ so, ɩ̃ nɩ-nɔnɩ i, nyɩ zɔrɛ dɛrɛ a tɩbɛ maalʋ.

¹⁵ Ɩ̃ ƴɛ̀rɛ nɩ a nyɩ zie mɛ̃ nɩbɛ na bãw yã a zie. Nyɩ mɩŋa za nyɩ jieli nyɛ̃ a lɛ ɩ̃ na yere a.

¹⁶ A yãanɩ koli-nyúura tɩ na mɩ́ puore nɩ a yãanɩ a, a Kɩrɩta zɩ̃ɩ pʋɔ bɛ n'a tɩ mɩ́ pʋɔ ɩ? A dipɛ̃ tɩ na mɩ́ ŋmarɛ pone a, a Kɩrɩta ƴã-gan pʋɔ bɛ n'a tɩ mɩ́ pʋɔ ɩ?

¹⁷ Dipɛ̃-been na n'ʋ a, a tɩɩm nɩ-yaga bɛ ŋa za, tɩ ɩ n ƴã-gã-been, a tɩ za na mɩ́ lãw 'wɔb a dipɛ̃-been a ƴãw.

¹⁸ Nyɩ nyɛ̃ a Ɩsɩrayɛl bʋʋrɛ nɩbɛ a: a bɛlɩ dem na 'wɔbr a nɛnɛ bɛ na de kʋ̀ a Naaŋmɩn a, bɛ bɛ mɩ́ lãw nɩ a Naaŋmɩn na so a bàwr-maal-kuur a bɩɩ?

¹⁹ Bʋ̃ʋ n'ʋ ɩ̃ bɔbr k'ɩ̃ɩ yel? K'aa nɛn bɛ na kʋ ƴãw a tɩɩb ƴãw a, bɩɩ k'aa tɩɩb ɩ n bʋ̃-sɩza bɩɩ?

²⁰ Ʋ̃ʋ'hʋ̃! Ɩ̃ yere na k'aa bàwr-maal-nɛnɛ a tɩbɛ dem na kʋrɛ a, kɔ̃tɔmɛ n'a bɛ kʋrɛ kʋ̀rɛ, Naaŋmɩn bɛ n'ʋ ɛ. Ɩ̃ɩ bɛ bɔbr kɛ́ nyɩ lãw nɩ a kɔ̃tɔmɛ ɩ.

²¹ Nyɩ kʋ̃ tʋ̃ɔ́ mɩ́ nyũ a Sore koli-nyúura ɛ́ mɩ̀ lɛb nyũ a kɔ̃tɔmɛ dem ɛ, nyɩ kʋ̃ tʋ̃ɔ́ mɩ́ pʋɔ a Sore dɩb pʋɔ ɛ́ mɩ̀ lɛb pʋɔ a kɔ̃tɔmɛ dem pʋɔ ɩ.

²² Bɩɩ tɩ bɔbr'a kɛ́ tɩ ɩ a Sore nyuur ìr bɩɩ? Tɩ tɛr'ɩ fãw zuo ʋ bɩɩ?

Bom nɛ za tɩ na ɩrɛ a, a ɩ a Naaŋmɩn yúor-vɩɛlʋ-danʋ ƴãw

²³ Nyɩ mɩ́ yel'a: «Sɔ́r be n be bom za ƴãw». Sɩza n'a, ɛcɛ bom za bɛ sɛw taa nɩ ɛ! «Sɔ́r be n be bom za ƴãw», ɛcɛ a za bɛ maalɛ a lãw ɛ.

²⁴ Kãw za ta mɩ́ bɔbr a ʋ tɔnɛ tɛwr ɛ, ʋ mɩ́ bɔbr a ʋ tɔ dem.

²⁵ Bom za bɛ na kʋɔrɛ dàa pʋɔ a, nyɩ dɩrɛ ʋ ɛ́ ta bɛr a nyɩ tɩɛrʋ sowre nyɩ bom ɛ.

²⁶ Bʋ̃ʋ n'ʋ vɛ̃, mɛ̃ a lɛ bɛ na sɛb a: «A Sore so a tẽsɔw nɩ a ʋ pʋɔ bome za.»

²⁷ Nɩr na bɛ sàw de a Sore a, ʋlɛ wa bʋɔlɩ nyɩ nyɩ sàw cen a ʋ bʋɔlʋ a, nyɩ tɩ dɩrɛ bom nɛ za ʋ na kʋ̀rɛ nyɩ a, ɛ́ ta bɛr a nyɩ tɩɛrʋ sowre nyɩ bom ɛ.

²⁸ Ɛcɛ nɩr wa yel kʋ̀ nyɩ kɛ́ bɛ kʋ n a nɛn ŋa ƴãw tɩɩb ƴãw a, nyɩɩm taa 'wɔbr ʋ ɛ, a sob nɛ na yel kʋ̀ nyɩ a zũú, nɩ a nyɩ tɩɛrʋ zũú.

²⁹ A ka a, a nyɩ tɩɛrʋ ƴɛ̀rʋ bɛ n'a ɩ̃ ƴɛ̀rɛ ɩ, a sob nɛ na yel kʋ̀ nyɩ a, tɩɛrʋ n'ʋ ɩ̃ yere. Bʋ̃ʋ n'ʋ vɛ̃, bʋ̃ʋ ƴãw n'a nɩ-yũo tɩɛrʋ na bãwnɛ a ɩ̃ tʋɔra sob yele?

³⁰ Mãa mɩ́ wa puori a Naaŋmɩn yãanɩ ɛ́ dɩ a ɩ̃ bʋ̃-dɩra a, bʋ̃ʋ ƴãw n'a bɛ na yere mɛ̃ bʋ̃-dɩra ƴãw ɩ̃ na puori a Naaŋmɩn yãanɩ a?

³¹ A na ɩ à ŋá a, dɩb'a nyɩ dɩrɛ bɩɩ nyub'a nyɩ nyúur a, bom nɛ za nyɩ na ɩrɛ a, nyɩ ɩrɛ a za a Naaŋmɩn yúor-vɩɛlʋ-danʋ ƴãw.

³² Nyɩ ta ɩrɛ bom na na ɩ nɩr faa lo a ɩ, a Zifʋ mɩnɛ zie bɩɩ a bɛl na bɛ ɩ Zifʋ mɩnɛ a zie bɩɩ a Naaŋmɩn Lãw-yir zie ɩ.

³³ Mɛ̃ a lɛ a mãa tɔr za na ƴãw fãw ɩrɛ a yele za pʋɔ kɛ́ a nʋmɛ a nɩbɛ za zie, mãa na bɛ bɔbr ɩ̃ tɔnɛ, ɛ́ bɔbr a nɩbɛ yaga zie tɔnɛ, kɛ́ bɛ tʋ̃ɔ́ nyɛ̃ a faafʋ a.