Yohana 20 - Dadiya NT

Guntǝm Yesui A Bwaa

¹ Nǝn kumsʌl nǝn dibɨlɨ kwama nɨ tǝmɔ a lǝga bɔ a sɛlɨ, Maryamu bwɛn Magadaliyaɨ a yɔ a tuu Yesui, ya nya ja bʌlʌm dalɨ tɛlɔ ja swa a nyanga tuui.

² Nǝngɔ a mwal a yɔ a daa Bitrus woi jǝbɔ bwɛ mɛlalɨ nɨ Yesu swɨ lɛɨ. A sʊwa ji gɔ, “Ja dem Tɛlalɔɨ a mʊgɔ tuu. Nǝn nyǝm bɔ daa nɨ ja yam gǝnɨ.”

³ Nǝngɔ Bitrus jǝbɔ bwɛ mɛlalɨ nɨ ja jel ja ta gola tuui.

⁴ Gwam jinɔ yoi ja ka sʊgɔl. Bwɛ mɛlalɨ nɨ a tul Bitrus, ya laa Bitrus a nyanga tuu.

⁵ A gǝla a li a dʌngi, nǝngɔ a kuwo dwang lilinɔ daamɨ. A dɔ bɔ mʊgɔ tuugɔ.

⁶ Nǝngɔ Bitrus a bɛ a gul gǝnɨ, ba dɔ mʊgɔ tuugɨɨ, a kuwo dwang lilinɔ daamɨ.

⁷ A kuwo dwang nɨ ja bwa Yesu gǝm a duli daam fʌlen kwaagɔ, a kʊlǝm kʊlǝmɨ mɨ dakini jǝbɔ dwang lilinɔ.

⁸ Nǝngɔ bwɛ mɛlalɨ nɨ ya laa Bitrus a tuui, a dɔ tǝgǝnɨ. A kuwo nyɨɨ, nǝngɔ a nǝ bɨlǝngkɛlɨ.

⁹ Ja nyǝm bɔ jʊ nɨ dwal wʊnɨ mʊlalɨ kɛl Kwaamaɨ a sʊwaɨ gɔ, Yesu yǝla gun gun a bwaa.

¹⁰ Nǝngɔ bɛtɔ mɛlalɨ nɨ a yǝla shu a lɔɨ.

Yesu A Nʊng Dul Gǝnɔ A Daa Maryamu Bwɛn Magadaliyaɨ Woi

¹¹ A Maryamui a tɨ a nyanga tuu, ji wigɔ lɛ. Kanga ji wigɔ lɛɨ, nǝngɔ a li a dʌng mʊgɔ tuugɨɨ.

¹² Nǝngɔ a kuwo kaam bɛtɔ twama Kwaamaɨ yo nǝn dwang fulontɨn jǝ yǝm a daa nɨ bʌlʌn Yesui woi, win yǝm a gwanga dul Yesui, win a gwanga naatɨn gǝn.

¹³ Nǝngɔ bɛtɔ twama Kwaamaɨ ja bʌ gǝn gɔ, “Nɔɔlɨ dʊʊ, n wɛ bwɨ mʊ ji wi lɛɨ?” A sʊwa ji gɔ, “Ja dem Tɛlalɔ mɨ. Mǝ nyǝm bɔ daa nɨ ja yam gǝnɨ.”

¹⁴ Gǝ dɨ sʊwatǝm kɛlɔ lɛ nyɨɨ, nǝngɔ a yǝla a kuwo Yesu tɨmɨ. A nyǝm bɔ gɔ nǝn Yesu.

¹⁵ Nǝngɔ Yesu a bʌ gǝn gɔ, “Nɔɔlɨ, n wɛ a bwɨ mʊ ji lɛɨ? Mʊ saa wo?” Nyǝma lɛ gɔ kɛna nǝn gɔ nʊ nɨ maa maajɨ lɛ a twam jǝ mwɛɨ, nǝngɔ a sʊwa gǝn gɔ, “Tɛlalɔ, na nǝmɔ mʊ do gǝnɨ, sʊwa ɨ daa nɨ mʊ yam gǝn woi, sǝ ya n do gǝn.”

¹⁶ Yesu a jo gǝn gɔ, “Maryamu!” Nǝngɔ a yǝla a daagɔ Yesu woi, a sʊwa gǝn nǝn nyiyo Yahudawagɨɨ gɔ, “Rabboni!” (Wʊnɨ gǝ nʊng gɔ, Feyi.)

¹⁷ Yesu a sʊwa gǝn gɔ, “Ka ń ta ɨ lɛ, jʊ a bwɨɨ mǝ gwi bɔ n yɔ a daa Tɛtɛ mɨ woi dɨn. Yɔ a daa kɛtǝlam mɨ woi ya ń sʊwa ji mɔʊ, ‘Mǝ yi a daa Tɛtɛ mɨ woi jǝbɔ Tɛtɛ jen, Kwaama mɨ jǝbɔ Kwaama jen.’ ”

¹⁸ Nǝngɔ Maryamu bwɛn Magadaliyaɨ a yɔ ya sʊwa bɛtɔ mɛlalɨgɨɨ gɔ, “N kuwo Tɛlalɔ!” Nǝngɔ a sʊwa ji jʊ nɨ Yesu a sʊwa gǝnɨ.

Yesu A Nʊng Dul Gǝnɔ A Daa Bɛtɔ Mɛlalɨ Gǝnɔ Woi

¹⁹ Nǝn kwaamɨ nǝn dibɨlɨ, bɛtɔ mɛlalɨ Yesui yǝm daagɔ win. Ja nʊngalam nyanga kanɔ jʊ a bwɨɨ jǝ nyʊwa taal nǝb dʊʊm Yahudawagɨɨ lɛ. Nǝngɔ Yesu a bɛ ba tɨ a tɨbǝl jini, a sʊwa ji gɔ, “Bɛ yɨm kwamɨgǝnɔ a na jǝbɔ jen.”

²⁰ A sʊwa ji kɛl nɨ nyɨɨ, nǝngɔ a nʊng ji kangtɨn gǝnɔ jǝbɔ baya gǝnɨ. Nǝngɔ bɛtɔ mɛlalɨgɔ ja maa fulotǝm nǝl nǝn kuwotǝm Tɛlalɔɨ.

²¹ Nǝngɔ Yesu a yǝla sʊwa ji gɔ, “Bɛ yɨm kwamɨgǝnɔ a na jǝbɔ jen! Kanga Tɛ bwɛ nɨ a twam ɨɨ, mǝ tǝmɨ n twam jen.”

²² A sʊwa nyɨɨ, nǝngɔ a fǝ jim fǝbǝm gǝnɨ, a sʊwa ji gɔ, “Jǝ́ yo Yʊwa Kwaamaɨ.

²³ Na jǝ́ kǝlǝm nǝbɔ gǝm bwɨlangkɛltɨn jini, Kwaama a kǝlǝm jim. Na jǝ́ kǝlǝm bɔ nǝbɔ gǝm bwɨlangkɛl jini, Kwaama a kǝlǝm jim bɔ.”

Toma A Kǝma Nǝn Tɨkǝga

²⁴ Toma, win a mʊgɔ kʊb jeli yo nɨ, wʊnɨ jǝ jo gǝn nɛ gɔ bɛtɔ yoi, mɨ dakini jǝbɔ ji kwama Yesu a bɛmɨ.

²⁵ Nǝngɔ tangǝn bɛtɔ mɛlalɨgɔ a sʊwa gǝn gɔ, “Nǝn kuwo Tɛlalɔ.” Toma a sʊwa ji gɔ, “Na mǝ kuwo bɔ bʊwantɨn kusagɔ a kangtɨn gǝnɨ, n dǝg bawuli kang mǝndɨ a bʊwa kusagɔ gǝm, n ya kang mɨ tag a gwanga baya gǝnɨ, mɨsɔ mǝ nǝ bɨlǝngkɛl lɛ.”

²⁶ Kum naalǝbɔ a yii, bɛtɔ mɛlalɨgɔ a mʊrka a mʊgɔ lɔngɨ, Toma wo jǝbɔ ji. Nyanga kanɔ a nʊng nʊngɨ, nǝngɔ Yesu a bɛ ba tɨ a tɨbǝl jini a sʊwa gɔ, “Bɛ yɨm kwamɨgǝnɔ a na jǝbɔ jen.”

²⁷ Nǝngɔ a sʊwa Toma gɔ, “Dǝg bawuli kang mʊnɔ fɔ, dʌng kangtɨn mǝndɨ. Mal kang mʊnɔ ń dǝg ń tɛl baya mǝndɨ. Bǝla nyǝmatǝmɔ wo, nǝ bɨlǝngkɛl.”

²⁸ Nǝngɔ Toma a sʊwa gǝn gɔ, “Tɛlalɔ mɨ jǝbɔ Kwaama mɨ tag.”

²⁹ Yesu a sʊwa gǝn gɔ, “Ń kuwo i n jʊ a bwɨ mʊ nǝ bɨlǝngkɛlɨ. Bwiligɔ na nǝb nɨ a kuwo i bɔ woi, ja nǝ bɨlǝngkɛl nǝn mɨ.”

Jʊ Langǝn Bwangǝn Nɨ Nʊng Lɛɨ

³⁰ Yesu a maa jǝ laatǝm kangtɨn a gǝlala a nu bɛtɔ mɛlalɨ gǝnɨ, wʊnɨ ja mʊla bɔ a mʊgɔ langǝn bwangǝn nɨɨ.

³¹ Ja mʊla kanjǝl nɨ sǝ jǝ́ nǝ bɨlǝngkɛl Yesu nǝn Kiristi, Bʊla Kwaamaɨ, sǝ jǝ́ nya kʊlɨ a mʊgɔ dun gǝn a nǝtǝm bɨlǝngkɛl.