Yohana 2 - Dadiya NT

Kangwaal A Kana Nɨ A Galilii

¹ A kum na taalɔ, jǝ maa kangwaal lɛ a tuulɔ Kana nɨ a tǝm Galilii. Nyɨya Yesui wo.

² Yesu jǝbɔ bɛtɔ mɛlalɨ gǝnɔ ja jo ji tʌji.

³ Mwɛ fogfogigɔ jǝ nɔɔ lɛɨ a dɨmɨ, nǝngɔ nyɨya Yesui a sʊwa gǝn gɔ, “Mwɛ fogfogigɔ a dɨm jim.”

⁴ Nǝngɔ Yesu a sʊwa nɛnɛ gɨɨ gɔ, “Nɛnɛ, ka sʊwa ɨ lɛ jʊ mǝ maa lɛɨ. Kwama mǝndɨ lǝga bɔ a la.”

⁵ Nǝngɔ nyɨya Yesui a sʊwa nǝb maajɨgɨɨ gɔ, “Gwam jʊ nɨ a sʊwa jen gɔ jǝ́ maaɨ, bɛ jǝ́ maa.”

⁶ Nǝn dɔɔm a daagɔ, sɛbǝlɔ wo nukun wʊnɨ ja mɔba nǝn tɛlɨ, gwam jinɔ jǝ do do suul mwɛmɔ fʊltiyo a yɔ nǝn a fʊtǝtaal. N sɛbǝl nɨ Yahudawagɔ gǝ talǝm mwɛ saaltǝm bʊtɔ lɛɨ na jǝ maa kaam jǝfʊlǝntɨn jinɔ lɛɨ.

⁷ Nǝngɔ Yesu a sʊwa nǝb maajɨgɨɨ gɔ, “Jǝ́ yii sɛbǝlɔ nǝn mwɛ.” Nǝngɔ ja yiilo nǝn sǝgǝr sǝgǝrɨ.

⁸ Nǝngɔ a sʊwa ji gɔ, “Jǝ́ dʊwa ya jǝ́ nǝ dʊʊ kangwaalɔ.” Nǝngɔ ja maa nyɨɨ.

⁹ Nǝngɔ dʊʊ kangwaalɔ a twɨ mwɛ nɨ wʊnɨ a yǝlam mwɛ fogfogii. A nyǝm bɔ daagɔ ja bɛm nǝnɨ, n nǝb maajɨ nɨ a bɛ gǝm nǝnɨ a nyǝm daagɨɨ. Nǝngɔ a jo nʊ nɨ a naa nɔɔlɨgɨɨ a keli,

¹⁰ nǝngɔ a sʊwa gǝn gɔ, “Nǝbɔ gǝ tǝl bɛtǝmɔ nǝn mwɛ fogfogi nɨ a lǝm dangǝnɨ. Na nǝbɔ a nɔɔ a boi, sǝla ja bɛ nǝn a wʊnɨ a bǝmtǝn a lǝmɨgɨɨ. N wɛ a bwɨ mʊ yʊ a nyanɔ la mʊ bɛ lɛ nǝn kǝngkɨɨ?”

¹¹ Wʊnɨ nǝn gɔ jǝ laatǝm kang tɨkǝgagɔ Yesu a tǝl maatǝmɔ a tuulɔ Kana nɨ a tǝm Galilii, wʊnɨ gǝ nʊng dʊʊlǝn gǝnɔ. Bɛtɔ mɛlalɨ gǝnɔ a nǝ bɨlǝngkɛl a daa gǝ woi.

¹² Nǝngɔ Yesu a shu a Kafarnahum jǝbɔ nɛnɛ gɨɨ, jǝbɔ kɛtǝlam gǝnɔ, jǝbɔ bɛtɔ mɛlalɨ gǝnɔ. Ya ja maa kumtɨn wo dǝmɨ.

Yesu A Kaa Nǝb Dʌbogɔ A Kan Kwaaman

¹³ Kwama Dikulom Yabtǝm Yahudawagɔ a dwamaɨ, nǝngɔ Yesu a gwi a shu a Urushalimaɨ.

¹⁴ Nǝngɔ Yesu ya nya nǝbɔ miyo nɛɛtɨn nɛ, jǝbɔ kwamɨtɨn, jǝbɔ baatitɨn, jǝbɔ nǝb fʌtotǝm kemʌnɔ yǝmam a daa yɨmtɨn jinɔ gǝm, a mʊgɔ talɨ Kan Kwaaman.

¹⁵ Nǝngɔ Yesu a mʊl banjangɨgɔ nǝn dwangɨ, a kaa nǝbɔ gwam a mʊgɔ Kan Kwaamanɨ, jǝbɔ kwamɨtɨnɔ jǝbɔ nɛɛtɨnɔ. A tʊngam tebur nǝb nɨ fʌto kemʌn nɛɨ, a watam kemʌn jinɔ fʌleni.

¹⁶ Nǝngɔ a sʊwa nǝbɔ miyo baatitɨn nɛɨ gɔ, “Jǝ́ jǝg kanjǝl nɨ a yooli, ka jǝ́ do lɛ lɔ Tɛtɛ mɨ a yǝlam jem gamdʌbo.”

¹⁷ Jʊ nɨ a bwɨ nyɨɨ, nǝngɔ bɛtɔ mɛlalɨ gǝnɔ a bʊʊla nǝn daa langǝn bwangǝnɔ a sʊwa gɔ, “Swɨtǝm nɨ mǝ maa lɔ mʊnɔ gǝm lɛɨ, twɨ ɨ lɛ a mʊgɔ nǝl na kǝla.”

¹⁸ Nǝngɔ nǝb dʊʊm Yahudawagɔ a bʌ Yesu gɔ, “N jǝ laatǝm kang wɛ mʊ nʊng nǝn nɛɨ, wʊnɨ a nʊng mɔ nǝn fɔlɔn nɨ mʊ maa jʊ nɨ?”

¹⁹ Nǝngɔ Yesu a sʊwa ji gɔ, “Jǝ́ wul Kan Kwaaman nɨ, mǝ gung gung tʌgo a mʊgɔ kumɔ taal.”

²⁰ Nǝngɔ Yahudawagɔ a bʌ gǝn gɔ, “A do jolɔ fʊltǝnaal jeli nukun na jǝ mɔ Kan Kwaaman nɨ lɛɨ, sǝla ń sʊwa mɔ mʊ gung gung a mʊgɔ kumɔ taal ka?”

²¹ Kan Kwaaman nɨ Yesu sʊwa lɛɨ, gǝ sʊwa bʊtɔ gǝn.

²² Nǝn kwama ja gung Yesu a bwaaɨ, nǝngɔ bɛtɔ mɛlalɨ gǝnɔ a bʊʊla nǝn jʊ Yesu a sʊwaɨ, nǝngɔ jǝ nǝ bɨlǝngkɛl a mʊlalɨ kɛl Kwaamaɨ, jǝbɔ kɛl nɨ Yesu a sʊwaɨ.

Yesu A Nyǝm Nǝl Nǝbɨɨ Gwam

²³ Nǝn kwama Yesu a mʊgɔ Urushalimaɨ a di Dikulom Yabtǝmɨ, nǝbɔ a lada a nǝ bɨlǝngkɛl a daa gǝ woi a dul kanjǝl laatǝm kang nɨ ga maa a nu jini.

²⁴ Yesu a jǝla bɔ jǝbɔ ji a bʊm, jʊ a bwɨɨ a nyǝm ji dangǝn.

²⁵ A swɨ bɔ kaa nǝl a sʊwa gǝn kɛl a dul nǝfitʌmi, jʊ a bwɨɨ a kwɛl a nyǝm jʊ a nǝl nǝfitʌmi.