Titus 2 - Dadiya NT

Mɛlatǝm Mɛlalɨ Nyan

¹ Titus, bɛ ń mɛla jʊ nɨ a daa tʌgo a mɛlalɨ nyanɨ.

² Bɛ ń mɛla batǝm dʊʊmɔ gǝm ja yǝlam nǝb tatǝm dul, nǝbɔ a shing shingi, nǝbɔ a dǝg kang a sʊɨ, nǝbɔ a tɨ dangǝn a nǝtǝm bɨlǝngkɛl jinɔ gǝmɨ, jǝbɔ swɨtǝm nǝbɨɨ jǝbɔ bwatǝm nǝl.

³ A na nyɔ, bɛ ń mɛla nɔɔtǝm dʊʊmɔ gǝm nyɔ tʌji ja yɨ yɨm nɨ dʊʊl Kwaama lɛɨ. Bɛ ka ja yǝlam lɛ nǝb yʊʊlatǝm nǝbɨɨ, jǝbɔ nǝb wɛl nɔɔlatǝm bʊgɛ. Bɛ ja yǝlam nǝb maatǝm mɛlalɨ nya.

⁴ Dɨsɔ ja mɛla kal nɔɔtǝmɔ gǝm ja swɨ batǝlam jinɔ jǝbɔ bɛtɔ lɔ jii.

⁵ Bɛ ja yǝlam nǝb tatǝm dul, nǝb nǝl sagsag, nǝb nɨ dʌng lɔ lɛɨ, nǝb maatǝm lǝma, nǝb nɨ nǝ batǝlam jinɔ dʊʊn nɛɨ, kage ja tuwo kɛl Kwaamaɨ.

⁶ A na nyɔ, bɛ ń gʊ bɛtɔ bayǝlǝmɔ gǝm lɔl, ja ta dul.

⁷ A mʊgɔ kanjǝlɔ gǝm gwam bɛ ń nʊng gola maajɨ nyan a golantɨnɔ gǝm gwam. Bɛ ń maa mɛlalɨ mʊnɔ nǝn bɨlǝngǝn nǝn kwaan bʊtɔ,

⁸ jǝbɔ kɛl nya nɨ mɨsɔ jǝ tuwo gǝn nɛɨ, sǝ nǝb kiim mʊnɔ a nyʊwa gunidul mɨ ji nǝn jǝ bwɨla nɨ jǝ sʊwa lɛ a dul bǝnɨ.

⁹ Bɛ ń mɛla jwaalɛbɔ gǝm ja nǝ tɛlalɔ jinɔ shigtǝm dul. Bɛ ja fulo jim nǝl a golantɨnɔ gǝm gwam. Ka ja gʊbka lɛ kɛl jǝbɔ tɛlalɔ jinɔ,

¹⁰ ka ja kuu lɛ kuul. Bɛ ja nʊng tɛlalɔ jinɔ jǝla jǝla nǝn ji, sǝ ja dǝg nǝbɔ a nǝ dʊʊn a mɛlalɨ Kwaama Nǝbʊʊlɨ bǝnɨ a golantɨnɔ gǝm gwam.

¹¹ Mɛla jim nyɔ jʊ a bwɨɨ, lǝma Kwaamaɨ a bɛ sǝ a bʊʊ nǝn nǝbɔ gwam.

¹² Wʊnɨ mɛla bǝm lɛ gɔ bǝ bǝla gola nɨ ke bɔ a bwangtǝm Kwaamaɨ, jǝbɔ dǝlatǝm nu a kanjǝl yooli nɨ. A mɛla bǝm tag gɔ bǝ yɨ yɨm bǝnɔ a yooli nɨ bǝ ta dul bǝnɔ, bǝ yǝlam nǝb yɨm dǝngdǝng, bǝ maa bʊʊlalɨ nɨ lɛ na a Kwaamaɨ.

¹³ Bɛ bǝ yɨ nyɔ, bǝ yam bwili yatǝm nǝl nɨ lɛ wʊnɨ nǝn gɔ n kumɔ Kwaama dʊʊn bǝnɔ jǝbɔ Nǝbʊʊlɨ Yesu Kiristi bɛm lɛ nǝn dʊʊlǝn gǝnɨ.

¹⁴ Wʊnɨ a nǝ dul gǝnɔ a kɛl dul bǝnɨ, sǝ a jǝg bǝn a mʊgɔ bwɨlang maajɨ gwamɨ, sǝ a saalǝm ji ja yǝlam nǝb gǝnɔ nɨ nǝn nǝl maatǝm maajɨ nyaɨ.

¹⁵ Bɛ ń tɨtǝn sʊwatǝm kanjǝl nɨ. Mʊ gʊ jim lɔl lɛ. Mʊ ga ji lɛ nǝn diil nǝn kwaan. Ka ń jǝla lɛ nǝbɔ a soga ń.