Roma 9 - Dadiya NT

Kwaama A Jǝgǝm Israila

¹ N bɨlǝngkɛl mǝ sʊwa lɛɨ, ke bɔ gabakɛl, jʊ a bwɨɨ mǝ na a Kiristi Yesui. Nǝl mɨ nǝn gɔ nɨ ɨ bwatǝm guu lɛɨ a gola Yʊwa Kwaamaɨ gɔ

² mǝ nǝn fitǝm nǝl jǝbɔ komʌn nɨ mɨsɔ dɨ lɛ woi a mʊgɔ nǝl mɨ.

³ Na na maa maa nyɨɨ, bɛ ja lag ɨ, ja wʊlaka ɨ jǝbɔ Kiristi a kɛl dul kɛtǝlam mɨɨ, nǝbam nyiyo mǝndɨ.

⁴ Jǝ nǝbɔ Israilaɨ, n nǝbɔ Kwaama a dǝg ji ja yǝlam bɛtɔ lɔ gɨɨ, a nʊng ji dʊʊlǝn gǝnɨ, a maa jim swatǝm yaa gǝnɨ, a nǝ ji diil gǝnɨ, a nʊng ji gola bǝlátǝm gǝnɨ, a maa jim tangǝn swatǝm yaatɨnɔ, pʌd na a ji.

⁵ Ibrahim, jǝbɔ Ishaku, jǝbɔ Yakubu n tʊgalam ji, Kiristi tǝgǝn a jel wo a dʊʊm jin a mʊgɔ bʊtɔ. Bɛ dʊʊlǝnɔ a ta tʌgo gwanggwang a daagɔ Kwaama woi mɨ dɨtǝm wo, gǝ nɨ a dul kanjǝlɔ gǝm gwamɨ. A daa nyɔ.

⁶ Ke bɔ gɔ kɛl Kwaamaɨ a yal nǝn kwan a dul nǝbam gǝnɨ. Jʊ a bwɨɨ ke bɔ pʌd nǝb nɨ a jel a dʊʊm Israilaɨ, n nǝbɔ Israilaɨ dangǝnɨ.

⁷ Ke bɔ dʊʊm Ibrahimi gwam n bɛtɔ lɔ gɨɨ, Kwaama a sʊwa gɔ, “N daagɔ Ishaku woi, jǝ kiyo dʊʊm mʊnɔ lɛɨ.”

⁸ Jʊ nɨ gǝ nʊng gɔ, yǝlamtǝm bɛtɔ lɔ Kwaamaɨ n ke bɔ yǝlamtǝm guu Ibrahimi a bʊtɔ, n guu swatǝm yaa nɨ jǝ kiyo lɛ gɔ n guu Ibrahimi dangǝnɨ.

⁹ Swatǝm yaa nɨ nǝn gɔ, “Jol nɨ bɛ lɛɨ, nǝn kwama nɨ mǝ yǝla yǝla n bɛ, Saratu bʌ bʌ bwɛ.”

¹⁰ A tɨ bɔ nyɔ, bɛtɨ yo nɨ, nɛnɛ bǝn Rifkatu a do fʌlɔ jǝbɔ tɛtɛ bǝn Ishaku.

^11-12 Nǝn kwama a lǝga bɔ a bʌ bɛtɨ yo nɨɨ, nǝn kwama ja lǝga bɔ ja maa jʊ nɨ a bʊmɨ jǝbɔ jʊ nɨ a bʊm bɨɨ, Kwaama a sʊwa gǝn gɔ, “Bwɛ dʊʊnɔ nǝ nǝ bwɛ dwalɨgɔ dʊʊn.” Kwaama a sʊwa nyɔ sǝ a nʊng nʊ nɨ gǝ jǝgǝmɨ, a jǝg gǝn a gola jǝlatǝm gǝn, ke bɔ a dul makajǝng nyantɨn, n jotǝm gǝn.

¹³ Kanga a mʊla mʊlaɨ gɔ, “Yakubu mǝ swɨ lɛ. Isuwa mǝ kɔ lɛ.”

¹⁴ N wɛ tag bǝ sʊwa lɛɨ? Kwaama mɨ dǝngdǝng ka? A fee, mɨ nyɔ!

¹⁵ Kwaama a sʊwa Musa gɔ, “Mǝ ji ji bʊnǝn nʊ nɨ mǝ swɨ lɛ n ji bʊnǝn gǝnɨ, mǝ maa maa jǝ nya a nʊ nɨ mǝ swɨ lɛ n maa gǝm jǝ nyaɨ.”

¹⁶ Nʊ nɨ Kwaama a jǝgǝmɨ, a na bɔ a dul jʊ nɨ nǝfili swɨ lɛɨ, ke bɔ kwaan gǝn, n bʊnatǝm Kwaamaɨ kwaagɔ.

¹⁷ Mʊlalɨgɔ kɛl Kwaamaɨ a sʊwa Firauna gɔ, “N dǝg ń ń yǝlam fɔlɔ sǝ n nʊng kwaan mǝndɨ a gola mʊn, sǝ ja sʊwa dun mǝndɨ a yooligɔ gǝm gwam.”

¹⁸ Kwaama gǝ ji ji bʊnǝn a nʊ nɨ swɨ lɛ a ji bʊnǝn gǝnɨ, gǝ dǝg kwamǝn dul a nʊ nɨ ga swɨɨ sǝ a kɔ nyʊwatǝmɔ.

Nabwɨl Kwaamaɨ Jǝbɔ Bʊnatǝm Gǝnɔ

¹⁹ Kaa a kʊm jen sʊwa ɨ sʊwa ɨ gɔ, “N wɛ a bwɨ Kwaama tuwo bǝn nɛ nǝn bwɨlangkɛlɨ? Nuwo dwal lɛ a kʌshi jʊ nɨ Kwaama swɨ lɛɨ?”

²⁰ Nǝmɔ mʊ wo mʊ nǝfili mʊ maa gʊbkatǝm lɛ jǝbɔ Kwaamaɨ? Bʊm bʊm nyɔ gobʌl boligɔ ja mɔɨ a sʊwa nʊ nɨ a mɔ gǝnɨ gɔ, “N wɛ a bwɨ mʊ maa ɨ nyɨɨ ka?”

²¹ Nʊ nɨ mɔba gobʌl boli lɛɨ, nǝn kwaan a maa jʊ swɨ lɛ nǝn nya boligɔ kanga a swɨɨ. Swɨtǝm gǝn a do nya boligɔ win a mɔ kaa nǝn a yǝlam na maajɨ nyantɨn, kaa tag a la bɔ na maajɨ nyantɨn.

²² Kwaama swɨ lɛ a nʊng nabwɨl gǝnɔ jǝbɔ kwaan gǝnɔ, a dul nǝb nɨ a la jʌtǝmɨ. A na nyɔ a kʊ nǝl jǝbɔ ji.

²³ N jǝlatǝm gǝn a nǝ shilo dʊʊlǝn gǝnɔ a nǝb nɨ ga ji bʊnǝn jini, nǝb nɨ ga maa jim gola nyatǝm dʊʊlǝn nǝn tɨkǝgaɨ.

²⁴ Bǝ nǝb nɨ ga joi, ke bɔ a kʊm Yahudawagɨɨ kwaaji, a jo nǝb nɨ n Bʌtʌbi tʌji.

²⁵ Kanga a sʊwa a mʊgɔ Langǝn Bwangǝn Yushaui gɔ, “Nǝb nɨ ke bɔ nǝbam mɨɨ, mǝ jo ji jo mǝʊ n ‘nǝbam mɨ.’ Nǝb nɨ galɨgǝn mǝ swɨ bɨɨ, kǝngkɔ mǝ jo ji mǝʊ n ‘nǝbɔ mǝ swɨ lɛɨ.’

²⁶ A daa nɨ Kwaama a sʊwa ji gɔ, ‘Jǝ́ ke bɔ nǝbam mɨ.’ N daa nɨ tag a jo ji gɔ jǝ ‘bɛtɔ lɔ Kwaama Nǝ Kʊlɨɨ.’ ”

²⁷ N kɛl dul nǝbɔ Israilaɨ Ishaya a gung diil gǝnɔ sʊwa lɛ gɔ, “Ladatǝm nǝbɔ Israilaɨ a lada na swiyoti wɨma sul, a mʊgɔ jin nǝbɔ nǝn dǝm nyɔ na bʊʊ lɛɨ.

²⁸ Jʊ a bwɨɨ Tɛlalɔ mwatɨ mwatɨ borang gǝnɔ a yooligɔ gǝm gwam mɨ tatǝm bʊtɔ wo.”

²⁹ Kanga Ishaya a sʊwa gɔ, “Na ke bɔ Tɛlalɔ nǝ kwaan pʌd a bǝla bǝm dʊʊm nɨɨ, na ja jʌm bǝn gwam na Sadumagɔ, jǝ dǝg bǝn tag bǝ yǝlam na Gwamrata.”

Israila Jǝbɔ Fulon Kɛl Lǝmɨgɔ

³⁰ N wɛ bǝ sʊwa lɛ tagɨ? Nǝb nɨ n Bʌtʌb ja saa bɔ dǝngdǝng Kwaamaɨ n wɔ ja nya. Ja nya dǝngdǝng nɨ a gola nǝtǝm bɨlǝngkɛl.

³¹ Nǝbɔ Israilaɨ a sɨn saatǝm gola dǝngdǝng Kwaamaɨ a bwangtǝm diili, n wɔ ja nya bɔ.

³² N wɛ a bɛ nǝn nyɨɨ? Jʊ a bwɨɨ ja saa bɔ dǝngdǝng nɨ a gola nǝtǝm bɨlǝngkɛl, n saatǝm a gola makajǝng nyatǝm jin. Nǝngɔ ja fǝ naa nǝn tɛl nɨ gǝ dǝg fǝtǝm naa lɛɨ.

³³ Kanga a mʊla mʊlaɨ sʊwa lɛ gɔ, “N wɔ n ya tɛl fǝtǝm naa a Sihiyona, jǝbɔ sunte nɨ dǝg nǝbɔ lɛ ja yalaɨ. Pʌd nʊ nɨ a nǝ bɨlǝngkɛl a daa gǝ woi, mɨsɔ nyʊwa gunidul lɛ wo.”