Roma 8 - Dadiya NT

Kʊlɨ A Mʊgɔ Yʊwa

¹ Gǝ na nyɔ, mɨ borang bwaa wo kǝngkɔ a dul nǝb nɨ a mʊgɔ Kiristi Yesui.

² Diil Yʊwa Kwaamaɨ nɨ nǝ kʊlɨ lɛ a mʊgɔ Kiristi Yesui, a jǝg ɨ a maajɨ bwɨlangkɛl jǝbɔ bwaa.

³ Jʊ nɨ mɨsɔ diilɔ dwal lɛ a maaɨ, jʊ a bwɨɨ n yɨm bwangtǝm bʊtɔ a dǝg diilɔ a gɨyaɨ, Kwaama a maa. A twam bʊla gɔ nǝn kang gǝn a jelkalǝng bʊtɔ bǝnɔ nɨ n bʊtɔ bwɨlangkɛlɨ, sǝ a yǝlam tǝlatǝm twama a dul bwɨlangkɛl, sǝ a kalǝm bwɨlangkɛlɔ a bʊtɔ bǝn.

⁴ Kwaama a maa jʊ nɨ sǝ kanjǝl nɨ dǝngdǝngɨɨ wʊnɨ diilɔ a sʊwa gɔ bǝ maaɨ, a nya yiitǝm a daa bǝn woi, bǝn nɨ ke bɔ yɨm bwangtǝm bʊtɔ bǝ maa lɛɨ, na a Yʊwagɨɨ.

⁵ Nǝb nɨ yɨ yɨm bwangtǝm bʊtɔ lɛɨ, nǝl jinɔ gǝ na a jʊ nɨ bʊtɔgɔ swɨ lɛɨ. Nǝb nɨ yɨ yɨm Yʊwa lɛɨ, nǝl jinɔ gǝ na a jʊ nɨ Yʊwagɔ swɨ lɛɨ.

⁶ Nǝl nɨ gǝ na a kanjǝl bʊtɔɨ, gǝ bɛ bɛ nǝn bwaa. Nǝl nɨ gǝ na a kanjǝl Yʊwaɨ, gǝ bɛ bɛ nǝn kʊlɨ jǝbɔ yɨm kwamɨgǝn.

⁷ Pʌd nʊ nɨ nǝl gǝnɔ gǝ na a kanjǝl bʊtɔɨ, a yǝlam nǝ kii Kwaamaɨ, jʊ a bwɨɨ mɨ bwangtǝn diil Kwaamaɨ lɛ, mɨsɔ dwal lɛ a maa.

⁸ Nǝb nɨ yɨ yɨm bwangtǝm bʊtɔ lɛɨ, mɨsɔ jǝ fulo Kwaama gǝm nǝl lɛ.

⁹ Jen, n ke bɔ yɨm bwangtǝm bʊtɔ jǝ́ yǝmɨ, n yɨm Yʊwa, na Yʊwa Kwaamaɨ yǝm a mʊgɔ nǝl jeni. Nʊ nɨ pʌd mɨ nǝn Yʊwa Kiristii, ke bɔ a Kiristii.

¹⁰ Na Kiristi a nǝl jeni, bʊtɔgɔ a bʊlam bʊlamɨ a dul maatǝm bwɨlangkɛl sul, Yʊwa Kwaamaɨ nǝ jen kʊlɨ, jʊ a bwɨɨ Kwaama a dǝg jen jǝ́ yǝlam dǝngdǝng.

¹¹ Na Yʊwa nɨ a gung Yesu a bwaaɨ yǝm a nǝl jeni, nʊ nɨ a gung Kiristi Yesu a bwaaɨ fulo fulo nǝn bʊtɔ jenɔ nɨ n bwaaɨ, a gola Yʊwa gǝnɔ nɨ yǝm a nǝl jeni.

¹² A dul kɛl nɨ kambɔ, bǝ nǝngǝn nǝn maajɨ a dul bǝn, ke bɔ yɨm bwangtǝm bʊtɔ nɨ bǝ swɨ lɛɨ.

¹³ Na jǝ́ yɨ yɨm bwangtǝm bʊtɔɨ, jǝ́ bʊla bʊla. Na jǝ́ yɨ yɨm a kwaan Yʊwa jǝ́ jʌm maajɨ bwangtǝm bʊtɔgɨɨ, jǝ́ yɨ yɨ nǝn kʊlɨ mɨ dɨtǝm wo.

¹⁴ Nǝb nɨ gwam Yʊwa Kwaamaɨ yɔ lɛ nǝn jii, nǝji jǝ bɛtɔ lɔ Kwaamaɨ.

¹⁵ Yʊwa nɨ jǝ́ yei, n ke bɔ Yʊwa nɨ dǝg jen jwaalɛn nɛ jǝ́ yɨ nǝn taal tagɨ. Yʊwa nɨ jǝ́ yei, a dǝg jen jǝ́ yǝlam bɛtɔ lɔ Kwaamaɨ, bǝ jo gǝn bǝngɔ, “Tɛtɛ.”

¹⁶ Yʊwagɔ nǝn dul gǝn, jǝbɔ yʊwa bǝnɔ jǝ nǝ bwatǝm guu lɛ, sʊwa lɛ gɔ bǝn bǝ bɛtɔ lɔ Kwaamaɨ.

¹⁷ Na bǝ bɛtɔ lɔ Kwaamaɨ, bǝ yǝlam nǝb jatǝm kʊla. Bǝn nǝb jatǝm kʊla Kwaamaɨ jǝbɔ fatǝm jatǝm kʊla bǝnɔ Kiristi. Yǝlam nyɔ na bǝ nɔɔ gaalan bǝnɔ Kiristii, dɨsɔ ja dʊʊl nǝn nǝbɔ gɔ.

Dʊʊlǝn Nɨ Jǝ Maa Bǝm Lɛ A Kǝga Nɨɨ

¹⁸ A kuwotǝm mǝndɨɨ, gaalan nɨ bǝ gʌ lɛɨ a yooli nɨ kǝngkɨɨ, a la bɔ ja mʊrka jǝbɔ dʊʊlǝn nɨ jǝ nʊng bǝn nɛ a kǝga nɨɨ.

¹⁹ Kanjǝl nɨ gwam Kwaama a fwalɨ, jǝ ya nǝl lɛ nyangǝn, jǝ yam Kwaama lɛ sǝ a nʊng bɛtɔ lɔ gɨɨ.

²⁰ Kwaama a lag kanjǝl nɨ ga fwalɨ a yǝlam jǝl nǝn kwan. Jʊ nɨ a bwɨ nyɔ ke bɔ kanga yooligɔ swɨ lɛɨ, n jʊ Kwaama swɨ lɛɨ. A maa nyɔ sǝ kanjǝl nɨ ga fwalɨ ja ya nǝl

²¹ gɔ jǝ nya nya jǝgtǝm dul a jwaalɛn bʊtatǝm, sǝ ja nya yɨm dul a dʊʊlǝn nɨ jǝ nǝ bɛtɔ lɔ Kwaamaɨ lɛɨ.

²² Bǝ kwɛl bǝ nyǝm nyǝmɨ kanjǝl fwaltǝmɔ gwam tǝna lɛ ba la nǝn kǝngkɨɨ, kanga nɔɔlɨ gǝ tǝnam lɛ a kwama butom lɛɨ.

²³ Ke bɔ kanjǝl fwaltǝm tǝna lɛ kwaajii, bǝ wo a mʊgɔ gǝn, bǝn nɨ bǝ kwɛl bǝ nya nyaɨ Yʊwa Kwaamaɨ, wʊnɨ nǝn gɔ tǝltǝm kanjǝl nɨ Kwaama a nǝ bǝnɨ, bǝ tǝna lɛ a nǝl bǝn, kanga bǝ yam lɛ nǝn yatǝm nǝl nyangǝnɨ, sǝ Kwaama a do bǝn bǝ yǝlam bɛtɔ lɔ gɨɨ, nǝn kwama a jǝg bʊtɔ bǝnɨ.

²⁴ A nǝ bǝn yatǝm nǝl nɨ kwama bǝ nya bʊʊtǝmɨ. Na bǝ ya nǝl a jʊ nɨ bǝ kuwoi, n ke bɔ yatǝm nǝl. Nuwo ya nǝl lɛ a jʊ nɨ a kwɛl a nyaɨ?

²⁵ Na bǝ ya nǝl lɛ a jʊ nɨ bǝ nya bɨɨ, bǝ yam nǝn kʊtǝm nǝl.

²⁶ Gǝ na nyɔ, Yʊwagɔ maa bǝm tɨkalɨ lɛ a mʊgɔ gɨyatǝm bǝnɔ gǝm. Bǝ nyǝm bɔ kanga bǝ maam keli lɛ dǝngdǝngɨ, Yʊwagɔ nǝn dul gǝn kela Kwaama lɛ a dul bǝn, a tǝnatǝm kɛltɨn nɨ mɨsɔ dwal lɛ a nʊngɨ.

²⁷ Kwaama wʊnɨ kuwo nǝl nǝfilii lɛɨ, a kwɛl a nyǝm nyǝmɨ nǝl Yʊwagɨɨ, jʊ a bwɨɨ Yʊwagɔ maa keli lɛ a dul nǝb sagsagɔ gǝm kanga Kwaama swɨ lɛɨ.

²⁸ Bǝ nyǝm a mʊgɔ kanjǝlɔ gǝm gwam Kwaama maa maa jʊ nɨ a bʊmɨ a nǝb nɨ swɨ gǝn nɛɨ, a nǝb nɨ ga jo a fɛkalɨ gǝnɨ.

²⁹ Nǝb nɨ Kwaama a kwɛl a nyǝmɨ, n nǝbɔ ga jǝgǝmɨ, a jǝla jim gɔ ja do jelkalǝng Bʊla gɨɨ, sǝ bwɛ a yǝlam bwɛ tɨkǝga a kʊm kambɨɨ nɨ a ladaɨ.

³⁰ Nǝb nɨ Kwaama a jǝgamɨ, nǝji ga joi. Nǝb nɨ ga joi, nǝji ga dǝg ji ja yǝlam nǝb dǝngdǝngɨ. Nǝb nɨ ga dǝg ji ja yǝlam dǝngdǝngɨ, nǝji gǝ dʊʊl ji lɛɨ.

Swɨtǝm Kwaamaɨ A Mʊgɔ Kiristii Mɨ Dɨtǝm Wo

³¹ N wɛ bǝ sʊwa lɛ a dul jʊ nɨɨ? Na Kwaama dakini jǝbɔ bǝnɨ, nuwo dwal lɛ a maa kii jǝbɔ bǝnɨ?

³² Kwaama a kɔ bɔ nǝtǝm bǝn bʊla gɨɨ, a nǝ bǝn pʌd bǝnɔ. Kwaama nɨ a kwɛl a nǝ bǝn Bʊla gɨɨ, mɨsɔ nǝ bǝn kanjǝlɔ lɛ gwam tag ka?

³³ Nuwo yɔ lɛ nǝn nǝb nɨ Kwaama a jǝgǝmɨ a kan borangɨ? Kwaama nǝn kang gǝn a dǝg ji ja yǝlam nǝb dǝngdǝng a kǝga gǝn.

³⁴ Nuwo a la nyɔ nǝ bǝn bwɨlangkɛl lɛɨ? Mɨ wo! Kiristi Yesu a bʊla, a gun nǝn kʊlɨ, yǝm a daa yɨm dʊʊn a kang jajǝng Kwaamaɨ, kela Kwaama lɛ a kɛl dul bǝn.

³⁵ N wɛ dwal lɛ a wʊlaka bǝn jǝbɔ swɨtǝm nɨ Kiristi maa bǝm lɛɨ? N gaalan ka? N gʌtǝm ka? N nɔɔtǝm gaalan ka? N jʊwan ka? N bʊnǝn ka? N jʌbotǝm bʊtɔ jǝbɔ bwaa ka?

³⁶ Kanga a mʊla mʊlaɨ gɔ, “N kɛl dul mʊn bǝn a nyiyo bwaa kwangkwangɨ, ja do bǝn na kwamɨ biyotǝm.”

³⁷ A mʊgɔ kanjǝlɔ gǝm gwam bǝ laa nyɔ ja sʊwa bǝn gɔ bǝ ku jelʌn, a gola nʊ nɨ swɨ bǝn nɛɨ.

³⁸ N jǝla nǝn mǝʊ mɨ jʊ nɨ wo wʊlaka bǝn nɛ jǝbɔ swɨtǝm Kwaamaɨ. Na n bwaaɨ, na n kʊlɨɨ, na n bɛtɔ twama Kwaamaɨ, na n nǝblaamɨ, na n kanjǝl nɨ kǝngkɨɨ, na n kanjǝl nɨ bɛ lɛ a kǝgaɨ, na n kwaan fɔlɔntɨnɨ,

³⁹ na n debatǝmɨ, na n tushitǝmɨ, na kaa jǝl wo a kanjǝl nɨ gwam ja fwalɨ, ja la bɔ ja wʊlaka bǝn jǝbɔ swɨtǝm nɨ Kwaama maa bǝm lɛ a mʊgɔ Kiristi Yesu Tɛlalɔ bǝnɨ.