Roma 2 - Dadiya NT

Borang Kwaamaɨ N Dǝngdǝng

¹ A dul kɛl nɨɨ, mɨ mʊ nǝn tabatǝm fɨɨ mʊ nǝfili, mʊ nɨ mʊ maa nǝl gǝm borang lɛɨ. Kwama mʊ maa nǝl gǝm borang lɛɨ, mʊ tǝmʊn ń mwatɨ dul mʊnɔ gǝm borang, jʊ a bwɨɨ mʊ nɨ mʊ maa borang lɛɨ mʊ maa nyɔ tǝmʊn.

² Bǝ kwɛl bǝ nyǝm nyǝmɨ borang Kwaamaɨ a dul nǝb nɨ maa lɛ nyɨɨ, n dǝngdǝng.

³ Mʊ nǝfili, na mʊ maa nǝb nɨ maa bwɨlangkɛl lɛɨ gǝm borangɨ, na mʊ tǝmʊn mʊ maa lɛ nyɨɨ, mʊ bʊʊla lɛ mɔʊ mʊ bʊʊ bʊʊ borang Kwaamaɨ ka?

⁴ Mʊ soga soga yotǝm lǝma gǝnɔ nɨ a lada nyɨɨ jǝbɔ kʊtǝm nǝl gǝnɔ ka? Mɔ nyǝm bɔ n lǝma Kwaamaɨ a gʊ ń, mʊ yǝla mʊ bǝla bwɨlangkɛl mʊnɨ ka?

⁵ N wɔ bǝngɨ lɔl mʊnɔ jǝbɔ nǝl mʊnɔ nɨ a jǝla bɔ fɛkalɨɨ, mʊ sʊ dul mʊnɔ gǝm nabwɨl Kwaamaɨ lɛ nǝn kɔkɔ nɨ ja nʊng gɔ borang Kwaamaɨ nɨ n dǝngdǝngɨ.

⁶ Kwaama ywa ywa nǝbɔ gwam maajɨgɔ ja maaɨ.

⁷ Nǝ nǝ kʊlɨ nɨ mɨ dɨtǝm woi a nǝb nɨ a ja kǝga nǝn maatǝm jǝ nyaɨ, nǝb nɨ saa dʊʊlǝn nɛ jǝbɔ gungtǝmɨ.

⁸ A nǝb nɨ swɨ dul jinɔ lɛ jǝbɔ nǝb nɨ a kɔ bwangtǝm bɨlǝngkɛlɔ jǝ maa bwɨlan nɛɨ, ywa ywa nǝn nabwɨl jǝbɔ kaltǝm nǝl.

⁹ Nǝb nɨ gwam maa bwɨlan nɛɨ, jǝ nɔɔ nɔɔ gaalan jǝbɔ gʌtǝm. Tǝl nǝn Yahudawagɔ, sǝ a la Bʌtʌbɔ.

¹⁰ Kwaama nǝ nǝ dʊʊlǝn jǝbɔ gungtǝm, jǝbɔ yɨm kwamɨgǝn, a nǝb nɨ gwam a maa jǝ nyaɨ. Tǝl nǝn Yahudawagɔ, sǝla Bʌtʌbɔ.

¹¹ Jʊ a bwɨɨ, Kwaama mɨ nǝn swɨtǝm dul.

¹² Nǝb nɨ a maa bwɨlangkɛl ja nyǝm bɔ diil woi, jǝ kala kala ke bɔ a gola diil. Nǝb nɨ a maa bwɨlangkɛl a mʊgɔ diili, jǝ maa jim maa borang a gola diil.

¹³ Ke bɔ nǝbɔ a nyʊwa diili n nǝbɔ dǝngdǝng a kǝga Kwaamaɨ, n nǝb nɨ bwangtǝn diil gǝnɔ lɛɨ n nǝb dǝngdǝngɨ.

¹⁴ Na Bʌtʌbɔ, nǝb nɨ mɨ ji nǝn diili, bʊtɔ jinɔ a nʊng ji kanga jǝ bwangtǝn diilɔ lɛɨ, jǝ diil nǝn dul jin, mɨ ji nǝn diil sul.

¹⁵ Makajǝng jinɔ nʊng ji lɛ gɔ, jʊ nɨ diilɔ a sʊwa ji gɔ ja maaɨ, a mʊla mʊlaɨ a nǝl ji, nǝl jinɔ jǝbɔ bʊʊlalɨ jinɔ tuwo ji lɛ a kaa gola, kʌshi ji lɛ a kaa gola.

¹⁶ Jʊ nɨ bwɨ nǝn kumɔ Kwaama maa nǝfitʌmɔ gǝm borang lɛ a gola Yesu Kiristii, a jʊ nɨ jǝ maa lɛ daddadɨ, kanga fulon kɛl lǝmɨ nɨ mǝ kiyo lɛɨ a sʊwaɨ.

Yahudawagɔ Jǝbɔ Diilɔ

¹⁷ Na ń sʊwa mɔʊ, mʊ bwɛ Yahudaɨ, na mʊ ya nǝl a diili, mʊ maa lɨyal lɛ nǝn Kwaamaɨ,

¹⁸ na ń kwɛl ń nyǝm jʊ swɨ lɛɨ, mʊ nyǝm kanjǝlɔ lɛ dǝngdǝngɨ, kanga mʊ nyǝm diili,

¹⁹ na ń jǝla nǝn dul mʊnɔ mɔʊ mʊ nǝ tatǝm dwam kululʌmi, mʊ nyalǝm a kʊm nǝb nɨ a kumtojilii,

²⁰ mʊ nʊ nɨ mʊ ga nǝb nɨ lɛ a swɛla swɛlaɨ, mʊ mɛla bɛtɔ dwalǝnɔ gǝm lɛɨ, jʊ a bwɨɨ a mʊgɔ diilɔ mʊ nǝngǝn nǝn nyǝmtǝm jǝbɔ nyǝmtǝm bɨlǝngkɛl nyangǝn.

²¹ Mʊ nʊ nɨ mʊ mɛla kaa nǝl gǝm lɛɨ, mɨ mʊ mɛla dul mʊnɔ gǝm lɛ ka? Mʊ nʊ nɨ mʊ maa mɛlalɨ lɛ mɔʊ ka jǝ́ kuu lɛ kuuli, mɨ mʊ kuu kuul lɛ ka?

²² Mʊ nɨ mʊ sʊwa lɛ mɔʊ ka nǝbɔ ya maa lɛ buloni, mɨ mʊ maa lɛ ka? Mʊ nɨ mʊ kɔ shom lɛɨ, mɨ mʊ kuu kuul lɛ a kan shomi ka?

²³ Mʊ nɨ mʊ maa lɨyal lɛ nǝn diili, ke bɔ sogan mʊ maa Kwaama gǝm lɛɨ ka, na ń kǝl diilii?

²⁴ Kanga a mʊla mʊlaɨ gɔ, “N kɛl dul jen Bʌtʌbɔ kal dun Kwaamaɨ lɛɨ.”

²⁵ Biyotǝm mwɛnɔ a bʊm, na mʊ bwangtǝn diilɔ lɛɨ. Na mɨ mʊ bwangtǝn lɛɨ, biyotǝm mwɛn mʊnɔ mɨ a nyiyo kaa jǝl.

²⁶ Na nʊ nɨ a biyo bɔ mwɛnɨ, bwangtǝn jʊ lɛ Kwaama a sʊwa a mʊgɔ diili, mɨsɔ bʊm lɛ ja kiyo gǝn a kʊm nǝb nɨ a biyo mwɛnɨ ka?

²⁷ Nʊ nɨ biyotǝm mwɛnɔ ke bɔ jǝfʊlǝn gǝnɨ, n wɔ bwangtǝn diilɔ lɛ dǝngdǝng, mwatɨ mʊn mwatɨ borang mʊ nʊ nɨ mʊ nǝngǝn nǝn diilɔ a mʊla mʊlaɨ jǝbɔ biyotǝm mwɛnɨ, mɨ mʊ bwangtǝn nɛɨ.

²⁸ Bwɛ Yahuda nyanɔ, n ke bɔ nʊ nɨ mʊlalɨ bʊtɔ gǝnɔ a nʊng a talɨ gɔ n bwɛ Yahudaɨ. Biyotǝm mwɛn nyanɔ, n ke bɔ biyotǝm tɛ bʊtɔ a talɨ.

²⁹ Nʊ nɨ n bwɛ Yahuda a mʊgɔ nǝlɨ, nǝn gɔ n bwɛ Yahuda nyanɨ. Biyotǝm mwɛn nyanɔ gǝ na a mʊgɔ nǝl, a mʊgɔ yʊwa, ke bɔ biyotǝm tɛ bʊtɔ. N nʊ nɨ Kwaama bǝlá gǝn nɛɨ, ke bɔ nǝfilii.