Roma 15 - Dadiya NT

Bɛ Ń Dǝg Kɨla Mɔ Fulotǝm Nǝl Ke Bɔ Dul Mʊn

¹ Bǝn nɨ bǝ kwam a nǝtǝm bɨlǝngkɛlɨ, bɛ bǝ do tuulogɔ, bǝ tɨka nǝb nɨ a kwam bɔ a nǝtǝm bɨlǝngkɛlɨ. Bǝ maa nyɔ sǝ bǝ fulo jim nǝl, ke bɔ dul bǝn.

² Bɛ bǝ maa fatǝm yɨm bǝnɔ gǝm jǝ nyan. Bɛ bǝ maa jʊ nɨ tɨka ji lɛɨ, sǝ ja dʊʊl a mʊgɔ nǝtǝm bɨlǝngkɛl jinɔ gǝm.

³ Kiristi nǝn kang gǝn a maa bɔ swɨtǝm dul, kanga a mʊla mʊlaɨ gɔ, “Tuwol nɨ jǝ maa mʊn nɛɨ, gǝ tǝla a dul mɨ.”

⁴ Pʌd jʊ nɨ a mʊla mʊlaɨ galɨgǝnɨ, ja mʊla sǝ a mɛla bǝm, sǝ a nǝ bǝn yatǝm nǝl a gola bwatǝm nǝl jǝbɔ kʊʊtǝm nǝl wʊnɨ kɛl Kwaamaɨ a nǝ bǝnɨ.

⁵ Kwaama nɨ nǝ kʊʊtǝm nǝl lɛ jǝbɔ bwatǝm nǝlɨ, bɛ a nǝ jen yɨm nyan jǝbɔ kambɔ a bwangtǝm Yesu Kiristii,

⁶ dɨsɔ jǝ́ dʊʊl Kwaama, wʊnɨ nǝn Tɛtɛ Tɛlalɔ bǝn Yesu Kiristii, bʊʊlalɨ jenɔ win, nyiyogɔ win.

Fulon Kɛl Lǝmɨ A Bʌtʌbɔ Gǝm

⁷ Jǝ́ yobka kangɔ yo yo, kanga Yesu Kiristi a yo jen kangɔ yoi, sǝ ja bǝlá Kwaama.

⁸ Mǝ sʊwa jen nɛ, Kiristi a yǝlam bwɛ jwaalɛ a daagɔ Yahudawagɔ woi, sǝ a nʊng bɨlǝngkɛl Kwaamaɨ, sǝ a yii swatǝm yaa Kwaamaɨ wʊnɨ a maa tʊgalam jinɔ gǝmɨ.

⁹ Sǝ Bʌtʌbɔ a dʊʊl Kwaama a kɛl bʊnatǝm gǝnɔ gǝm. Kanga a mʊla mʊlaɨ gɔ, “Mǝ bǝlá ń bǝlá ń a kʊm Bʌtʌbi, n ma nafɨ bǝlátǝm dun mʊnɔ.”

¹⁰ Nǝn gɔ a sʊwa tag gɔ, “Jen jǝ́ Bʌtʌbɔ, ya jǝ́ maa fulotǝm nǝl lɛ dakini jǝbɔ nǝbam gǝnɔ.”

¹¹ A sʊwa tag gɔ, “Jǝ́ bǝlá Tɛlalɔ, jǝ́ Bʌtʌbɔ gwam, jǝ́ mala nafɨ bǝlátǝm gǝnɔ, jǝ́ nǝbɔ pʌd.”

¹² Ishaya a sʊwa tag gɔ, “Kaa nʌl jel jel a dʊʊm Yessei, nʊ nɨ gun nɛ sǝ a maa fɔlɔn a dul Bʌtʌbi, N daa gǝ woi Bʌtʌbɔ ya nǝl lɛɨ.”

¹³ Bɛ Kwaama nɨ gǝ bɛ lɛ nǝn yatǝm nǝlɨ, a yii nǝl jenɔ nǝn fulotǝm nǝl gwam jǝbɔ yɨm kwamɨgǝn a kɛl dul bɨlǝngkɛl jenɔ gǝm, sǝ jǝ́ yii nǝn yatǝm nǝl a kwaan Yʊwa Kwaamaɨ.

Maajɨ Bulusi A Daa Bʌtʌbɔ Woi

¹⁴ Kambɔ, n jǝla nǝn jen, mǝʊ jǝ́ nǝb nyan dangǝn, nǝb nyǝmtǝm nyangǝn, nǝb nɨ a la kanga mɛla kambɔ gǝm lɛɨ.

¹⁵ Kaam kanjǝl nɨ mǝ mʊla jemi, n jel a talɨ nyangnyang, sǝ n bʊʊla jem a dul lǝma nɨ Kwaama a maa mɨɨ.

¹⁶ A jǝg ɨ n yǝlam bwɛ jwaalɛ Yesu Kiristii a daagɔ Bʌtʌbɔ woi. A dǝg ɨ n yǝlam nǝkǝla sǝ n kiyo fulon kɛl lǝmɨ Kwaamaɨ a daagɔ Bʌtʌbɔ woi. A maa nyɔ sǝ ja yǝlam na twɨtǝm yulʌn wʊnɨ Kwaama yo lɛɨ, sǝ ja yǝlam sagsag a gola Yʊwa Kwaamaɨ.

¹⁷ Mǝ nǝn jʊ a bwɨ mǝ maa lɨyal, a mʊgɔ Kiristi Yesui a maajɨ Kwaamaɨ mǝ maaɨ.

¹⁸ Mɨsɔ mǝ lɛla lɛ n sʊwa kɛl na ke bɔ jʊ Kiristi a maa a gola mɨɨ. A dǝg Bʌtʌbɔ a jǝla a bwangtǝn Kwaama a kɛl mǝndɨ jǝbɔ maajɨ mɨɨ.

¹⁹ Yʊwa Kwaamaɨ a nɨ ɨ kwaan maatǝm kanjǝl nʊngtǝm jǝbɔ kanjǝl tatǝm kang a nyiyo. Jʊ a ta a Urushalima a yɔ nǝn a Ilirikuni, n dɨɨ kiyotǝm fulon kɛl lǝmɨ Kiristii a daatɨn gɔ gǝm gwam.

²⁰ Kwangkwang mǝ swɨ lɛ n kiyo fulon kɛl lǝmɨ a daatɨn nɨ ja nyǝm bɔ Kiristi woi, kage n mɔ tʌgo a fʌlʌm kaa nǝlɨ.

²¹ Kanga a mʊla mʊlaɨ gɔ, “Nǝb nɨ ja kiyo jim bɔ fulon kɛl gǝnɔ woi, jǝ nyǝm nyǝm. Nǝbɔ ja nyʊwa bɔ fulon kɛl gǝnɔ woi, jǝ fɛta fɛta.”

Bulus A Maa Fɛkalɨ Yɔm A Roma

²² Kwangkwang maajɨ mɨɨ kʌshi i bɛtǝmɔ lɛ a daa jen woi.

²³ A kǝngkǝnɨ mɨ kaa daa nɨ wo a bǝla mɨ a tǝm nɨ mǝ yɔ bɔ woi, jolɔ a gǝlala mǝ ya nǝl yɔm lɛ a daa jen woi.

²⁴ Mǝ ya nǝl lɛ n tɨ n kuwo jen, na mǝ shu lɛ a tǝm Asbaniyaɨ. Na n yɨ dǝm n nyʊwa lǝma yɨmɔ a daa jen woi, mǝ ya nǝl lɛ mǝ ya jǝ́ ywa ɨ wo.

²⁵ Kǝngkɔ, mǝ yi a Urushalima, sǝ ya n nǝ nǝb sagsagɔ tɨkalɨgɔ ja maa jimi.

²⁶ Nǝbɔ Makidoniyaɨ jǝbɔ nǝbɔ Akayaɨ, ja nyʊwa lǝma nǝtǝm tɨkalɨ a dul nǝb bʊnǝnɔ gǝm a mʊgɔ nǝb sagsag nɨ a Urushalimaɨ.

²⁷ Ja nyʊwa lǝma maatǝmɔ nyɔ, jʊ a bwɨɨ a yǝlam jim na naan a dul jin. Bʌtʌbɔ a tǝga bwili yʊwagɔ dakini jǝbɔ ji. A yǝlam nyɔ tʌji ja tǝga bwili yooligɔ jǝbɔ ji.

²⁸ Na kwama mǝ dɨ maajɨ nɨɨ, mǝ nǝ ji tɨkalɨ nɨ kwamɨgǝnɨ, mǝ tɨ tɨ n yal jen a gola yɔm mɨ a tǝm Asbaniya.

²⁹ N nyǝm na n bɛ a daa jen woi, mǝ bɛ bɛ a mʊgɔ yiitǝm bwili Kiristii.

³⁰ Kambɔ, mǝ kela jen nɛ a dul Tɛlalɔ Yesu Kiristii, jǝbɔ swɨtǝm Yʊwa Kwaamaɨ, jǝ́ tɨka ɨ a mʊgɔ gaalanɔ mǝ woi, jǝ́ kela mɨ Kwaama.

³¹ Jǝ́ maa mɨ keli sǝ n nya bʊʊtǝm a daa nǝb nɨ a kɔ yotǝm Kwaamaɨ a Yahudiyaɨ. Jǝ́ maa mɨ keli tag sǝ nǝb bwangtǝm nɨ a Urushalimaɨ, ja yo tɨkalɨ nɨ mǝ yilo jim nǝn a kang mɨɨ.

³² Jǝ́ maa keli na Kwaama a jǝla, n la a daa jen woi nǝn fulotǝm nǝlɨ, sǝ n fǝb dakini nǝbɔ jen.

³³ Bɛ Kwaama nɨ nǝ yɨm kwamɨgǝn nɛɨ, a yɨ dakini jǝbɔ jen gwam. A daa nyɔ.