Roma 13 - Dadiya NT

Shigtǝm Dul A Fɔlɔlɔmɔ Gǝm

¹ Bɛ pʌd jenɔ jǝ́ shig dul a nǝbɔ maa fɔlɔn nɛɨ. Mɨ kaa fɔlɔn wo na ke bɔ nǝn jǝlatǝm Kwaamaɨ. Pʌd nǝb maatǝm fɔlɔn nɨ bǝ nǝngǝnɨ, nǝn Kwaama a nǝ jii.

² A dul kɛl nɨ, pʌd nʊ nɨ a kɔ shigtǝm dul gǝnɔ a nǝb maatǝm fɔlɔnɨ, a kɔ shigtǝm dul a jʊ Kwaama a yaɨ. Nǝb nɨ maa jʊ nɨ lɛɨ, jǝ maa jim maa borang.

³ Fɔlɔlɔmɔ ke bɔ jǝ taal a nǝb nɨ maa jʊ nɨ lɛ dǝngdǝngɨ, na ke bɔ nǝb nɨ maa bwɨlangkɛl lɛɨ. Mʊ swɨ bɔ ń nyʊwa taal nʊ nɨ maa fɔlɔn nɛɨ ka? Bɛ ń maa jǝ nyan, bǝlá ń bǝlá ń.

⁴ N bwɛ jwaalɛ Kwaamaɨ maa mʊn jǝ nyan nɛɨ. Na mʊ nǝ maajɨ shili, bɛ ń nyʊwa taal. Ke bɔ nǝn kwan a ta gulʌni. Gɔ, n bwɛ jwaalɛ Kwaamaɨ, gǝ ywa nǝ bwɨla nǝn nabwɨl.

⁵ A yǝlam nyɔ ń nǝ shigtǝm dul. Ke bɔ mwaltǝm nabwɨl kwaagɔ, sǝ nǝl jenɔ a daa.

⁶ N jʊ a bwɨ jǝ́ ywa kemʌn tǝm lɛɨ, jʊ a bwɨɨ fɔlɔlɔmɔ jǝ maam Kwaama maajɨgɔ. Jǝ maa maajɨ nɨ lɛ kwangkwang.

⁷ Bɛ jǝ́ ywa nǝbɔ jʊ jǝ bwang jem lɛɨ. Nǝb kemʌn tǝmɔ, kemʌn tǝm jinɔ, nǝb kemʌn kanjǝlɔ, kemʌn kanjǝl jinɔ, nǝb nɨ a la nǝtǝm dʊʊnɨ, jǝ́ nǝ ji dʊʊn, nǝb nɨ a la wanatǝmɨ, jǝ́ wana ji.

Swɨkanɔ Nǝn Gɔ A Yii Diili

⁸ Bɛ ka jǝ́ ta lɛ jʊ nɨ a yǝlam a mɨbam nǝlɨ, na ke bɔ a swɨkanɨ. Nʊ nɨ swɨ fwalɨ yɨm gǝnɔ lɛɨ, a yii diilɔ.

⁹ Diiltɨnɔ a sʊwa gɔ, “Bɛ ka ń maa lɛ bulon, bɛ ka ń jʌ lɛ dul, bɛ ka ń kuu lɛ kuul, bɛ ka ń maa lɛ wɛl.” Tangǝn diil nɨ bǝ nǝngǝnɨ, pʌd a nya yiitǝm a mʊgɔ kɛl nɨ sʊwa lɛ gɔ, “Bɛ swɨ fwalɨ yɨm mʊnɔ kanga mʊ swɨm dul mʊnɔ lɛɨ.”

¹⁰ Na mʊ swɨ fwalɨ yɨm mʊnɔ lɛɨ, mɨsɔ mʊ maa gǝm shil lɛ. Swɨkanɔ nǝn gɔ yiitǝm diili.

¹¹ N wɔ tag jǝ́ kwɛl jǝ́ nyǝm nyǝmɨ jol nɨ bǝn a mʊgɔ gǝnɨ, kwamagɔ a kwɛl a la jǝ́ kǝla lɛ a nu dumi. N wɔ kǝngkɔ bǝ kwɛl bǝ la nǝn dɔɔm jǝbɔ nyatǝm bʊʊtǝm nǝn kwama nɨ bǝ tǝlǝm nǝtǝm bɨlǝngkɛlɨ.

¹² Kumɔ a kwɛl a shu shui, tǝmɔ ya saa sɛltǝm lɛ. A dul kɛl nɨ, bɛ bǝ jǝgǝm maajɨ kumtojiligɔ. Bɛ bǝ dʊʊ kanjǝl tatǝm kun na nyalǝmɔ.

¹³ Bɛ bǝ yɔ yɔm nyan kanga a daa tʌgo nǝn kɔkɔɨ. Ka jǝ́ mʊrka lɛ a daa nɨ jǝ́ maam jǝ bwɨla lɛɨ, ka jǝ́ nɔɔ lɛ bʊgɛ ya maa jen nɛ, ka jǝ́ maa lɛ bulon, jǝbɔ jǝ gunidul, jǝbɔ gʊbkatǝm, jǝbɔ nungon.

¹⁴ Bɛ jǝ́ do yɨm Tɛlalɔ Yesu Kiristii, ka jǝ́ do lɛ yɨm nǝfilii, ka jǝ́ maa lɛ wɛl kanjǝl bwɨla.