Roma 12 - Dadiya NT

Twɨtǝm Yulʌn Kʊlɨgɔ

¹ A dul kɛl nɨ kambɔ, mǝ kela jen nɛ a dul bʊnatǝm Kwaamaɨ, jǝ́ nǝ bʊtɔ jenɔ jǝ twɨtǝm yulʌn wʊnɨ nǝn kʊlɨɨ, wʊnɨ sagsagɨ, wʊnɨ fulo Kwaama gǝm nǝl lɛɨ. Wʊnɨ nǝn gɔ bǝlátǝmɔ nyangǝnɨ.

² Ka jǝ́ bwangtǝn nɛ kanjǝl joltɨn nɨ. Bɛ jǝ́ bǝla nǝl jenɔ a fʌto a gola fɨ a bʊʊlalɨ jenɔ gǝm. Sǝ jǝ́ jǝla nǝn jʊ Kwaama swɨ lɛɨ, jʊ a bʊm bʊmɨ, jǝbɔ jʊ nɨ dǝngdǝngɨ, n jʊ fulo gǝm nǝl lɛɨ.

³ A gola lǝma nɨ Kwaama a maa mɨɨ, mǝ sʊwa jen nɛ gwam jenɔ, bɛ ka kaa nǝl ya do lɛ dul gǝnɔ a laa laaɨ bʊʊlalɨ gǝnɔ. Bɛ a do dul gǝnɔ dǝngdǝng jǝbɔ nǝtǝm bɨlǝngkɛlɔ Kwaama a nǝ gǝnɨ.

⁴ Kanga jinʌnɔ a lada a mʊgɔ bʊtɔgɔ wini, jinʌn nɨ gwam nǝngǝn nǝn maajɨ jinɔ nǝn dʌmʌni,

⁵ a dul kɛl nɨ, bǝn nɨ sul bǝ lada nyɨɨ, bǝ yǝlam bʊtɔgɔ win a mʊgɔ Kiristii, gwam bǝnɔ bǝ mʊrka bǝ yǝlam win.

⁶ Kanga bǝ nǝngǝn nǝn nǝtǝm lǝmagɔ nǝn dʌmʌn dǝngdǝng kanga Kwaama a nǝ bǝn lǝma nɨɨ, bɛ bǝ maa maajɨ nǝn. Na nǝtǝm lǝma bǝnɔ na maajɨ kuwotǝmkǝgaɨ, bɛ bǝ maa kuwotǝmkǝgagɔ dǝngdǝng a nǝtǝm bɨlǝngkɛl bǝnɔ gǝm.

⁷ Na nǝtǝm lǝma bǝnɔ na maatǝm nǝbɔ gǝm maajɨɨ, bɛ bǝ maa maajɨ nǝn. Na na a mɛlalɨ kɛl Kwaamaɨ, bɛ bǝ maa mɛlalɨgɔ nǝn.

⁸ Na na a kʊʊtǝm nǝlɨ, bɛ bǝ yǝlam nǝn kʊʊtǝm nǝl. Na na a nǝtǝm lǝma na maatǝm tɨkalɨ kambɨɨ, bɛ bǝ nǝ nǝl bǝnɔ win. Na na a dʊʊ jatǝm kǝgaɨ, bɛ bǝ maa maajɨ jatǝm kǝga. Na na a bʊnatǝmɨ, bɛ bǝ maa nǝn fulotǝm nǝl.

Gʊtǝm Lɔl A Yɨm Nǝ Bwangtǝm Kiristii

⁹ Bɛ swɨkan jenɔ a yǝlam bɨlǝngǝn. Bɛ jǝ́ kɔ jʊ nɨ na a bwɨlaɨ, bɛ jǝ́ ta jʊ nɨ a bʊm bʊmɨ nǝn kwaan dangǝn.

¹⁰ A swɨtǝm kambɨɨ, bɛ jǝ́ swɨka dangǝn. A daa nǝtǝm dʊʊn, bɛ ń laa kɨla mɔ.

¹¹ Bɛ ka jǝ́ shigem lɛ bʊtɔ a maajɨ kwaan. Jǝ́ maa kwaan a nǝl jen. Jǝ́ maa Tɛlalɔ gǝm maajɨ.

¹² Bɛ yatǝm nǝl jenɔ a dǝg jen fulotǝm nǝl. Jǝ́ bwa nǝl jenɔ a kwama gaalan. Jǝ́ ja kǝga nǝn maatǝm keligɔ.

¹³ Bɛ jǝ́ tɨka nǝb sagsag nɨ mɨ nǝngǝnɨ. Bɛ ya jǝ́ yo faabǝmɔ lɛ nǝn fulotǝm nǝl.

¹⁴ Bɛ jǝ́ dǝg nǝb nɨ nǝ jen gaalan nɛɨ gǝm bwili. Jǝ́ dǝg jim bwili, ka jǝ́ lag ji lɛ.

¹⁵ Jǝ́ maa fulotǝm nǝl jǝbɔ nǝb nɨ maa fulotǝm nǝl lɛɨ. Jǝ́ ji wi jǝbɔ nǝb nɨ ji wi lɛɨ.

¹⁶ Jǝ́ yɨ yɨm kwamɨgǝn jǝbɔ kambɔ. Ka jǝ́ nʊng lɛ dʊʊlǝn dul. Bɛ jǝ́ yǝlam fatǝm nǝb nɨ ja ya ji bɔ a nyiyo jǝlɨ. Ka jǝ́ do lɛ dul jenɔ jǝ́ laa tangǝn nǝbɔ yʊlan.

¹⁷ Na nǝl a maa jem shili, ka jǝ́ jǝla lɛ jǝ́ maa gǝm shil tǝgǝn. Bɛ jǝ́ maa jʊ nɨ dǝngdǝngɨ a kǝga nǝbɨɨ gwam.

¹⁸ Na na maa maa nyɨɨ, jǝ́ yɨ yɨm kwamɨgǝn jǝbɔ nǝbɔ gwam.

¹⁹ Jǝ́ nǝb nɨ mǝ swɨ lɛɨ, ka jǝ́ ywa lɛ bwɨlangkɛl nǝn bwɨlangkɛl. Bɛ jǝ́ bǝla Kwaama a ywa jem nǝn nabwɨl gǝnɔ. A mʊla mʊlaɨ gɔ, “Ywatǝm naanɔ na a mɨ, nǝmǝ mǝ yǝla lɛ n ywaɨ, n jʊ Tɛlalɔ a sʊwaɨ.”

²⁰ Langǝn bwangǝnɔ a sʊwa gɔ, “Na fwalɨ kii mʊnɔ nyʊwa jʊwan nɛɨ, bɛ ń nǝ gǝn jǝjalǝnɔ. Na nyʊwa diil mwɛn nɛɨ, bɛ ń nǝ gǝn mwɛ nɔɔtǝm. Maatǝmɔ nyɨɨ, mʊ mʊr gǝm kʌbʌl kǝla a dul gǝn.”

²¹ Bɛ ka jǝ́ bǝla lɛ shilɔ a ku jelʌn a dul jen. Bɛ jǝ́ ku jelʌn a dul shilɔ gǝm nǝn maatǝm jǝ nyan.