Roma 11 - Dadiya NT

Tangǝn Nǝbɔ Israilaɨ

¹ Mǝ maa bʌtʌm lɛ, Kwaama a yǝla nǝbam gǝnɔ gǝm gul ka? A fee! Mɨ nyɔ dǝm! Mǝ tǝmɨ nǝn dul mɨ mǝ bwɛ Israila, a guu Ibrahimi, a dʊʊm Biliyaminui.

² Mɨ wo dǝm Kwaama a yǝla bɔ nǝbam gǝnɔ a jǝgam galɨgǝnɨ gǝm gul. Jǝ́ nyǝm bɔ jʊ mʊlalɨ kɛl Kwaamaɨ a sʊwa a dul Iliyaɨ ka? A sʊwa kanga a yɔ nǝn wi gǝnɔ a daagɔ Kwaama woi a dul nǝbɔ Israilaɨ gɔ,

³ “Tɛlalɔ, ja jʌbom nǝbkuwotǝmkǝga mʊnɔ. Ja kʌbolam daa twɨtǝm yulʌn mʊnɔ. Nǝmǝ mǝ kwaamɨ win mǝ bǝlaɨ, jǝ saa jʌtǝm mǝndɨ lɛ tǝmɨ.”

⁴ Kwaama a jǝla gǝn gɔ wɛ? A jǝla gǝn gɔ, “N ya dul mɨ gǝm nǝbɔ fʊlkʊblǝn nʌbʌl, nǝb nɨ a jʊng bɔ a nǝ Baal dʊʊn woi.”

⁵ Jʊ nɨ a yǝlam nyɔ kǝngkɔ. Nǝbɔ wo a bǝlaɨ wʊnɨ Kwaama a jǝgǝm a lǝma gǝnɔ gǝmɨ.

⁶ Na Kwaama a jǝgǝm ji a kɛl lǝmaɨ, a jǝg ji bɔ a kɛl maajɨ nyantɨn. Na mɨ nyɨɨ, lǝmagɔ ke bɔ lǝma tag.

⁷ A maa nyǝn? Nǝbɔ Israilaɨ a gaa nyatǝm jʊ jǝ saa lɛɨ. Nǝb nɨ Kwaama a jǝgamɨ, ja yǝlam nǝb dǝngdǝng a daa Kwaama woi, kaamɨ a yǝlam nǝb kwamǝn dul.

⁸ Kanga a mʊla mʊlaɨ gɔ, “Kwaama a dǝg ji ja yǝlam jǝ ke bɔ nǝb nyǝmtǝm. A nǝ ji nu, ke bɔ na kuwotǝm daa, jǝbɔ lɔl, ke bɔ na nyʊwatǝm.” A bɛ nǝn a dwiyeni.

⁹ Dauda a sʊwa tag gɔ, “Bɛ daa jalǝng jinɔ a yǝlam jim shɛɛ jǝbɔ lan. Bɛ a yǝlam jim jǝ fǝtǝm naa tag. Jʊ ja ya a nǝl jini bɛ a yǝlam jim mwɛl.

¹⁰ Bɛ nu jinɔ a yǝlam duddugi, kage ja nya kuwotǝm daa. Bɛ kʊng jinɔ a lʊʊ mɨ dɨtǝm wo.”

Bʊʊtǝm Bʌtʌbi

¹¹ Mǝ bʌ kɛl lɛ tag, fǝtǝm naa nɨ a dǝg ji ja yalaɨ, mɨ guntǝm wo ka? Mɨ nyɔ dǝm! Yalatǝm jinɔ a yǝlam bʊʊtǝm Bʌtʌbi, sǝ a dǝg nǝbɔ Israilaɨ a maa nungon nǝn ji.

¹² Na bwɨlangkɛl jinɔ ja maaɨ nǝn gɔ a bɛ yooli nɨ gǝm nǝn bwilii, na gɨyatǝm jinɔ nǝn gɔ bwili Bʌtʌbi, la ladatǝm bwili Bʌtʌbi na nyǝn na kwama ladatǝm nǝbɔ Israilaɨ yǝlam lɛ a daa Kwaama woi a yii?

¹³ Jǝ́ Bʌtʌbɔ, mǝ sʊwa jen nɛ, mǝ nɨ mǝ bwɛ twama Bʌtʌbi, mǝ maa lɨyal lɛ nǝn maajɨ mǝndɨ.

¹⁴ Mǝ maa nyɔ sǝ n dǝg nǝb nɨ n nyiyo mɨ nungon, sǝ n dǝg kaam jinɔ a nya bʊʊtǝm.

¹⁵ Na kɔtǝm jinɔ ja maaɨ a yǝlam gola fɛkalɨ yooligɔ jǝbɔ Kwaamaɨ, na Kwaama a yo ji tagɨ, a yǝlam na fulotǝm nǝn kʊlɨ a mʊgɔ bwaa.

¹⁶ Na kʊkkʊm nɨ a bɨ nǝn tɨkǝga ja nǝ sagsagɨ, tangǝn kʊkkʊmɔ nyɔ tʌji. Na nʌl tɨyagɔ sagsagɨ, kangtɨn gǝnɔ tʌji sagsag.

¹⁷ Na Kwaama a kǝlam kaam kang tɨyantɨnɨ, mɔ mʊ tɨya zaitun kuul nɨ a bwa mʊn naakan jǝbɔ gɨɨ, mʊ nyʊwa lǝma jʌng tɨyang zaitun nɨ lɛ dakini jǝbɔ tangǝn kang tɨyantɨnɨ,

¹⁸ ka ń jǝg lɛ sʊtɔ mɔʊ ń laa tangǝn kang tɨyantɨnɔ. Na ń maa nyɨɨ, bɛ ń bʊʊla ke bɔ mɔ mʊ do jʌngi, jʌngɔ nǝn gɔ a do ńi.

¹⁹ Mʊ sʊwa sʊwa mɔʊ, “Kwaama a kǝlam kang tɨyangtɨn nɨ sǝ a bwa mɨ naakan nǝn tɨyagɔ.”

²⁰ N bɨlǝngǝn dangǝn. Ja nǝ bɔ bɨlǝngkɛl n jʊ a bwɨ ja kǝlam jii. Mɔ n kɛl nǝtǝm bɨlǝngkɛl mʊnɔ ja bǝla ń woi. Bɛ ka ń gung lɛ dul. Bɛ ń nyʊwa taal Kwaamaɨ.

²¹ Na Kwaama a bǝla bɔ kang tɨyantɨn galɨgɨɨ, mʊ tǝmʊn mɨsɔ bǝla ń nɛ.

²² Dʌng kanga Kwaama a nʊng bʊnatǝmɔ, a nǝ gaalanɨ. A nǝ gaalanɔ a nǝb nɨ a yala yalaɨ. A ji bʊnǝn mʊnɔ, na ń ja kǝga a mʊgɔ gǝnɨ. Na mɨ nyɨɨ, mʊ tǝmʊn mwatɨ ń mwatɨ ń.

²³ Na nǝbɔ Israilaɨ a ja bɔ kǝga nǝn kɔtǝm nǝtǝm bɨlǝngkɛlɨ, Kwaama bwa bwa naakan nǝn tɨyagɔ, jʊ a bwɨɨ nǝn kwaan a maa nyɔ.

²⁴ Mʊ kang tɨya zaitun kuul nɨ a mwatɨ ń a bwa mʊn naakan jǝbɔ tɨya zaitun lɔngɨ wʊnɨ n ke bɔ tɨya mʊnɨ. N bɨlǝngǝn mɨsɔ bwa lɛ kang tɨyantɨn nɨ na a galɨɨ a bwa jim naakan a bʊtɔ tɨya zaitun nɨ na a galɨɨ.

Nǝbɔ Israilaɨ Gwam Nya Nya Bʊʊtǝm

²⁵ Kambɔ, mǝ swɨ lɛ jǝ́ nyǝm kaam kanjǝl nɨ ja yʊ yʊɨ, kage ya jǝ́ gung dul lɛ. Kaam nǝbɔ Israilaɨ n nǝb kwamǝn dul, a yɔ nǝn a kwama nɨ ladatǝm Bʌtʌb nɨ a nyǝm Kiristii a yii.

²⁶ Kwama jʊ nɨ a bwɨɨ, nǝbɔ Israilaɨ gwam nya nya bʊʊtǝm, kanga a mʊla mʊlaɨ gɔ, “Nǝ bʊʊtǝmɔ bɛ bɛ a Sihiyona. Jǝgǝm jǝgǝm nǝb nɨ a kɔ bwangtǝm Kwaamaɨ a guu Yakubui.

²⁷ Wʊnɨ nǝn gɔ n yiitǝm swatǝm yaa mǝndɨ a daa ji woi, na n dem bwɨlangkɛltɨn jini.”

²⁸ A kɛl fulon kɛl lǝmɨ nɨɨ, jǝ nǝb kiim Kwaamaɨ a kɛl dul jen. A kɛl jǝgtǝm Kwaamaɨ, jǝ nǝb swɨtǝm gǝn a kɛl dul tʊgam tʊgalam jini.

²⁹ Jʊ a bwɨɨ nǝtǝm lǝma Kwaamaɨ jǝbɔ jotǝm gǝnɔ mɨsɔ gʊm lɛ.

³⁰ Kanga galɨgǝn jǝ́ kɔ bwangtǝm Kwaamaɨ, a na nyɔ kǝngkɔ Kwaama a ji bʊnǝn jenɔ a dul kɔtǝm bwangtǝm Kwaamaɨ jinɔ gǝm.

³¹ N golagɔ win ja kɔ bwangtǝm Kwaamaɨ kǝngkɨɨ, sǝ Kwaama a ji bʊnǝn jinɔ kanga a maa jemi.

³² Kwaama a kubʌl kubʌli nǝbɔ gwam a kɔtǝm bwangtǝm gǝn sǝ a ji bʊnǝn a dul jin gwam.

Bǝlátǝm Kwaamaɨ

³³ Dʊʊlǝn Kwaamaɨ, jǝbɔ yʊlan gǝnɔ, jǝbɔ nyǝmtǝm gǝnɔ, a laa kwaan! Biyotǝm borang gǝnɔ a laa kwaan dʌngtǝm, golantɨn gǝnɔ a laa kwaan fɨɨtǝm!

³⁴ “Nuwo a nyǝm nǝl Tɛlalɔɨ woi? Nuwo a sʊ gǝm yʊlan woi?”

³⁵ “Nuwo a nǝ Kwaama naan wo wʊnɨ Kwaama yǝla ywa gǝn nɛɨ?”

³⁶ Kanjǝlɔ gwam a bɛ a daa gǝ woi, n gola gǝn ja fɛ kanjǝlɔ gwamɨ, n daa gǝ woi jǝ yǝla lɛɨ. Bɛ nǝtǝm dʊʊlǝnɔ a ta tʌgo gwanggwang a daa gǝ woi mɨ dɨtǝm wo. A daa nyɔ.