Roma 1 - Dadiya NT

Yaltǝm

¹ Nǝmǝ mǝ Bulus, bwɛ jwaalɛ Yesu Kiristii, bwɛ twama wʊnɨ a jo, a jǝgǝm a dul kiyotǝm fulon kɛl lǝmɨ Kwaamaɨ.

² Fulon kɛl lǝmɨ nɨ Kwaama a maa swatǝm yaa gǝnɔ galɨgǝn a nyiyo nǝbkuwotǝmkǝga gǝnɨ, kanga ja mʊla a mʊgɔ langǝn bwangǝntɨn Kwaamaɨ sagsagɨ.

³ Fulon kɛl lǝmɨ nɨ gǝ na a dul Bʊla gɨɨ, Tɛlalɔ bǝn Yesu Kiristi. A bʊtɔɨ, a jel a guu Daudaɨ.

⁴ A yʊwa gǝnɔ nɨ sagsagɨ, Kwaama a jǝg gǝn nǝn kwaan gǝn a yǝlam Bʊla gɔ a gola gungtǝm gǝn a bwaa, nǝn gɔ nǝn Yesu Kiristi Tɛlalɔ bǝn.

⁵ N daa gǝ woi bǝ yo lǝma, bǝ yǝlam bɛtɔ twama gǝnɨ, dɨsɔ bǝlǝntǝmɔ gwam a nǝ bɨlǝngkɛl nǝn shigtǝm dul, a kɛl dʊʊlǝn dun gǝn.

⁶ Jǝ́ na a kʊm Bʌtʌb nɨ Yesu Kiristi a jǝgamɨ.

⁷ Langǝn bwangǝn nɨ mǝ twamǝm nǝbɔ gǝm gwam Kwaama swɨ lɛ a Romaɨ, nǝb sagsag nɨ a jo joi. Bɛ lǝmagɔ jǝbɔ yɨm kwamɨgǝn a Kwaama Tɛtɛ bǝnɨ jǝbɔ a Tɛlalɔ Yesu Kiristii a yɨ jǝbɔ jen.

Bulus Swɨ Lɛ A Kǝsa Nǝbɔ Romaɨ

⁸ A tǝltǝmɔ gǝm mǝ buu Kwaama mǝndɨ gǝm kang lɛ a gola Yesu Kiristii a dul jen pʌd, jʊ a bwɨɨ ja sʊwa kɛl nǝtǝm bɨlǝngkɛl jenɔ a daatɨnɔ gǝm gwam a yooli nɨ.

⁹ Kwaama nɨ mǝ maa gǝm maajɨ lɛ nǝn nǝl mɨ gwam a dul kiyotǝm fulon kɛl lǝmɨ Bʊla gɨɨ, n nǝ nǝtǝm nyiyo a dul mɨ kanga kwangkwang mǝ bʊʊla lɛ nǝn jen a mʊgɔ keli mǝndɨ gǝmɨ.

¹⁰ Nǝn kwama gwam mǝ maa keli lɛɨ, mǝ kela Kwaama lɛ na nǝn jǝlatǝm gǝnɨ, kǝngkɔ n nya gola yɔtǝm a daa jen woi.

¹¹ Mǝ swɨ lɛ n kuwo jen, sǝ n sʊ jem kaa nǝtǝm lǝma Yʊwa Kwaamaɨ wʊnɨ nǝ jen kwaan nɛɨ,

¹² sǝ mǝ nǝbɔ jen bǝ kʊʊka nǝl nǝn nǝtǝm bɨlǝngkɛl bǝnɔ.

¹³ Kɛtǝlam mɨ, mǝ swɨ lɛ jǝ́ nyǝm kwangkwang mǝ maa fɛkalɨ yɔm lɛ a daa jen woi, ja nɨ ɨ bɔ gola dɨn. Mǝ swɨ lɛ n yɔ, sǝ n nya kaam nǝb bwangtǝm a daa jen woi, kanga mǝ nya a daagɔ kaam Bʌtʌbɔ woi.

¹⁴ N do tuulo nǝbɔ Girikaɨ jǝbɔ Bʌtʌbɔ, nǝb nyǝmtǝmɔ jǝbɔ nǝb nɨ a nyǝm bɔ jǝlɨ gwam a dul mɨ sǝ n kiyo jim fulon kɛl lǝmɨgɔ.

¹⁵ N jʊ a bwɨ mǝ swɨ lɛ n sʊwa jen fulon kɛl lǝmɨgɔ tʌjeni, jen nɨ a Romaɨ.

Kwaan Fulon Kɛl Lǝmɨgɔ

¹⁶ Fulon kɛl lǝmɨgɔ ke bɔ jǝ gunidul a daa mǝ woi, nǝn gɔ kwaan Kwaamaɨ wʊnɨ yɔ lɛ nǝn nǝb nɨ gwam a nǝ bɨlǝngkɛl a nyatǝm bʊʊtǝmɨ, Yahudawagɔ nǝn tɨkǝga, sǝla Bʌtʌbɔ.

¹⁷ Fulon kɛl lǝmɨ nɨ a nʊng kanga Kwaama a dǝg nǝbɔ a yǝlam dǝngdǝng a daa gɔ woi a gola nǝtǝm bɨlǝngkɛl a tǝltǝmɔ gǝm a yɔ nǝn a dɨltǝmɨ, kanga ja mʊla gɔ, “Nʊ nɨ n nǝ dǝngdǝng a gola nǝtǝm bɨlǝngkɛlɨ, nya nya kʊlɨ.”

Bwɨlangkɛl Nǝfitʌmi

¹⁸ Kwaama a nʊng nabwɨl gǝnɔ a dʌbʌl a dul nǝb nɨ a kɔ bwangtǝm gǝnɨ jǝbɔ nǝb maatǝm bwɨlangkɛlɔ. Nǝb nɨ n nǝbɔ jǝ bǝm bɨlǝngkɛl lɛ a gola bwɨlangkɛl jinɔ gǝmɨ.

¹⁹ Jʊ jǝ nyǝm lɛ a dul Kwaamaɨ gǝ na a talɨ, jʊ a bwɨɨ Kwaama a nʊng ji nʊngɨ.

²⁰ A fwaltǝm yooligɔ gǝm a bɛ nǝn a kǝngkɨɨ, kanjǝl bʊmɨ Kwaamaɨ nɨ mɨ jǝ kuwo lɛɨ, kwaan gǝnɔ nɨ mɨ dɨtǝm woi, jǝbɔ yɨm gǝnɔ, ja kuwo nyangnyang ja nyǝm a gola kanjǝl nɨ ga fwalɨ. A dul kɛl nɨ nǝb nɨ mɨ ji nǝn tabatǝm fɨɨ.

²¹ Ja nyǝm Kwaama sul, mɨ jǝ dʊʊl gǝn nɛ gɔ n Kwaama, mɨ ji buu gǝm kang lɛ. Bʊʊlalɨ jinɔ gǝ na nǝn kwan, nǝl jinɔ a yǝlam kumtojili, mɨ nyǝmtǝm wo.

²² Ja do gɔ jǝ nǝngǝn nǝn yʊlan, ja yǝlam nǝb nɨ mɨ nǝn yʊlanɨ.

²³ Ja fʌto bǝlátǝm dʊʊlǝn Kwaamaɨ nɨ mɨsɔ bʊla lɛ woi, nǝn jelkalǝng nǝfilii, wʊnɨ bʊla lɛɨ, jǝbɔ lǝbɨtɨn, jǝbɔ namtɨnɔ, jǝbɔ kanjǝl nɨ wuul lɛ nǝn fʌli.

²⁴ Gǝ na nyɔ Kwaama a bǝla ji nǝn nǝl bwɨlangkɛl jinɔ na bulon, sǝ ja maa jǝ gunidul nǝn bʊtɔ jinɔ, a kʊm jin.

²⁵ Ja fʌto bɨlǝngkɛl Kwaamaɨ nǝn gabakɛl. Ja bǝlá jʊ nɨ Kwaama a fwalɨ, jǝ maa gǝm maajɨ lɛ. Ja kɔ Nǝ fwaltǝmɔ, nʊ nɨ bǝlátǝmɔ na a gɔ mɨ dɨtǝm woi. A daa nyɔ.

²⁶ N jʊ a bwɨ Kwaama a bǝla ji maatǝm jǝ gunidul nɨ a bʊm bɔ kuwotǝmɨ. Nɔɔtǝlam jinɔ a fʌto daam fiyodaalɨgɔ jǝbɔ batǝmɔ jǝ daa a kang bʊtɔ jin.

²⁷ Gǝ na nyɔ batǝmɔ tʌji ja bǝla jʊ jǝ maa lɛ a gola nɨ dǝngdǝng jǝbɔ nɔɔtǝmɨ. Wɛlɔ a dɔ kʊm jin a wɔɔ ji jǝ maa kanjǝl nɨ lɛ a bʊm bɨɨ jǝbɔ kaam batǝmɔ. N jʊ a bwɨ jǝ yo mwɛtǝm nɨ lɛ a yɔ dǝngdǝng jǝbɔ kanjǝl bwɨlan nɨ jǝ maa lɛɨ.

²⁸ Kanga ja kɔ jǝlatǝm nyǝmtǝm Kwaamaɨ, Kwaama a bǝla ji nǝn bʊʊlalɨ bwɨla jinɔ, sǝ ja maa jǝ gunidul.

²⁹ Nǝl jinɔ a yii nǝn kanjǝl shil gwam, jǝbɔ maajɨ bwɨlan, jǝbɔ wɛl, jǝbɔ katǝm naa. Nǝl jinɔ a yii nǝn nungon, jǝbɔ jʌtǝm dul, jǝbɔ gʊbkatǝm, jǝbɔ swagkatǝm, jǝbɔ maatǝm kii. Kaamɨ n nǝb yʊʊlakatǝm,

³⁰ jǝbɔ nǝb kalkan, jǝbɔ nǝb kɔtǝm Kwaamaɨ, jǝbɔ nǝb gungtǝm dul, jǝbɔ nʊngtǝm latǝm nyɔ, jǝbɔ nǝb fɛkalɨ maatǝm shil, jǝbɔ nǝb nɨ mɨ bwangtǝn tɛb lɛɨ,

³¹ jǝbɔ nǝb nɨ a fʌm fʌmi, jǝbɔ nǝb jatǝm swatǝm yaa, jǝbɔ nǝbɔ mɨ nǝn swɨkanɨ, jǝbɔ nǝb nɨ mɨ ji bʊnǝn nɛɨ.

³² Nǝb nɨ a kwɛl a nyǝm diil Kwaamaɨ nɨ a sʊwa gɔ, nǝb nɨ maa kanjǝl nɨ lɛɨ, bʊmǝn jinɔ n bwaa. Ke bɔ tɨtǝm nǝn maatǝm kanjǝl nɨ kwaagɔ, jǝ bwa nǝb maatǝmɔ gǝm guu tag.