Matta 8 - Dadiya NT

Yesu A Gung Nǝb Nɨ A Mwata Mwataɨ

¹ Kwama Yesu a gǝla a dʌbʌl yemi, nǝbɔ a lada nyɔ na a bwang gǝmɨ.

² Kaa balɨ bʊtɔgɔ a mwata mwataɨ a bɛ ba jʊng a kǝga gǝn, nǝngɔ a sʊwa gɔ, “Tɛlalɔ, na ń jǝlaɨ, mʊ nǝn kwaan nɨ mʊ gung i lɛɨ sǝ n yǝlam sagsag.”

³ Nǝngɔ Yesu a gung kang gǝnɔ a ke gǝn nǝnɨ gɔ, “N jǝla, gun.” Tʌgo a kang a daa gɔ nǝngɔ a gun a bɔɔla mwatatǝm gǝnɔ gǝmɨ.

⁴ Nǝngɔ Yesu a sʊwa gǝn gɔ, “Bɛ ka ń sʊwa lɛ kaa nǝl. A laa jǝl yɔ, ya nʊng dul mʊnɔ a daa nǝkǝlagɔ woi, sǝ ń tǝla twama, kanga Musa a nʊng gɔ ja maaɨ, sǝ a yǝlam nǝtǝm nyiyo a gungtǝm mʊnɔ gǝm.”

Yesu A Gung Bʊla Kaa Dʊʊ Sʊwajaamɨ

⁵ Nǝn kwama Yesu a dɔ Kafarnahumi, kaa dʊʊ sʊwajaam a bɛ ba bʌ gǝn tɨkalɨ gɔ,

⁶ “Tɛlalɔ, bwɛ jwaalɛ mǝndɨ daam a daa fiyodaalɨ a lɔ, mɨ dwal lɛ a yǝla, gʌ lɛ dangǝn.”

⁷ Nǝngɔ Yesu a sʊwa gɔ, “Mǝ yɔ yɔ sǝ n gung gǝn.”

⁸ Nǝngɔ dʊʊ sʊwajaamɔ a sʊwa gǝn gɔ, “Tɛlalɔ, mǝ la bɔ nyɔ mʊ bɛ lɛ a lɔ mɨɨ. Sʊwa kɛl, bwɛ jwaalɛ mǝndɨ nyʊwa nyʊwa lǝma.

⁹ Mǝ tǝmɨ mǝ na a kang fɔlɔn kaa nǝlɨ, mǝ nǝngǝn nǝn sʊwajaamtɨnɔ a mʊgɔ fɔlɔn mɨ. Mǝ sʊwa sʊwa kaa mǝʊ, ‘Yɔ,’ a yɔ. Mǝ sʊwa sʊwa kaa mǝʊ, ‘Ba,’ a bɛ. Mǝ sʊwa sʊwa kaa bwɛ jwaalɛ mɨɨ mǝʊ, ‘Maa nyɔ,’ a maa.”

¹⁰ Nǝn kwama Yesu a nyʊwa jʊ nɨɨ, a ta kang a nyiyo, a yǝla a sʊwa nǝbɔ bwang gǝm lɛɨ gɔ, “N bɨlǝngǝn mǝ sʊwa jen nɛɨ, a mʊgɔ nǝbɔ Israilaɨ mǝ nya bɔ gʌleng nǝ nǝtǝm bɨlǝngkɛl wo na nʊ nɨ!

¹¹ Mǝ sʊwa jen nɛ nǝbɔ a lada bɛ bɛ a twal jǝbɔ diyeng, ba yɨ a ja jǝjalǝn jǝbɔ Ibrahim, jǝbɔ Ishaku jǝbɔ Yakubu a mʊgɔ fɔlɔn lɔ Kwaamaɨ.

¹² Nǝb nɨ na yǝlam nǝb fɔlɔn lɔ Kwaamaɨ lɛ ja kɔɨ, jǝ mal ji mal a mʊgɔ kumtojili, a daa nɨ jǝ jim wi lɛ jǝbɔ kʊʊtǝm nungʌni.”

¹³ Nǝngɔ Yesu a sʊwa nǝ dʊʊ sʊwajaam nɨ gɔ, “Yilo, kanga mɔ nǝ bɨlǝngkɛlɨ, maa maa nyɔ!” Tʌgo a kang nǝngɔ bwɛ jwaalɛ gǝnɔ a gun a bɔɔla gǝnɔ gǝmɨ.

Yesu A Gung Yul Bitrusi

¹⁴ Nǝn kwama Yesu a dɔ lɔ Bitrusi, nǝngɔ a kuwo yul Bitrusi, wʊnɨ nǝn bɛshenii daam a wɨlǝn.

¹⁵ Nǝngɔ a ke kang gǝnɨ nǝngɔ bɛshenigɔ a bǝla gǝnɨ. Nǝngɔ a gun a nǝ gǝn jǝjalǝnɨ.

Yesu A Gung Nǝbɔ A Lada Nǝn Kwaamɨ

¹⁶ Nǝn kwaamɨ nǝngɔ nǝbɔ a bɛ Yesu gǝm nǝn nǝbɔ nǝn yʊwa bwɨlaɨ, nǝngɔ a sʊwa kɛlɨ, nǝngɔ yʊwa bwɨlagɔ a bǝla jii. A gung nǝb nɨ gwam mɨ kwamɨgǝnɨ.

¹⁷ Jʊ nɨ a bwɨ sǝ a yii kɛlɔ ja sʊwa a nyiyo nǝkuwotǝmkǝga Ishayaɨ gɔ, “A dem bɔɔlatɨn bǝnɔ, a jǝgǝm twɨlatɨn bǝnɔ.”

Nǝb Nɨ Sʊwa Lɛ Gɔ Jǝ Bwangtǝn Bwang Yesui

¹⁸ Nǝn kwama Yesu a kuwo nǝbɔ a lada a bɛ ba kang gǝnɨ, nǝngɔ a sʊwa bɛtɔ mɛlalɨ gǝnɔ gɔ jǝ yab wɨmagɔ.

¹⁹ Nǝngɔ kaa nǝ mɛlalɨ diil a bɛ a daa gǝ woi, a sʊwa gǝn gɔ, “Feyi, daa nɨ mʊ yɔm lɛ gwamɨ, mǝ bwang mʊn bwang.”

²⁰ Yesu a sʊwa gǝn gɔ, “Fʌlʌmtɨnɔ nǝn bʊwantɨn, lǝbɨtɨnɔ nǝn lɔtɨn. A Bʊla Nǝlɨ mɨ nǝn daa nɨ yam dul gǝnɔ lɛɨ.”

²¹ Nǝngɔ kaa bwɛ mɛlalɨ gǝnɔ a sʊwa Yesu gɔ, “Tɛlalɔ, bǝla ɨ wo n fʌlʌm tɛtɛ mɨ dɨn!”

²² Nǝngɔ Yesu a sʊwa gǝn gɔ, “Bwang mɨ. Bǝla bʌlʌntɨnɔ ya fʌl bʌlʌn jinɔ.”

Yesu A Ga Yʊwa Mwɛmɔ

²³ Nǝngɔ Yesu a dɔ tɨyamwɛngɔ jǝbɔ bɛtɔ mɛlalɨ gǝnɔ dakinii.

²⁴ A kʊta bɔ, yʊwa bwɨlagɔ a gun a mʊgɔ wɨma. Mwɛmɔ mʊla lɛ, dɔ mʊgɔ tɨyamwɛngɔ lɛ, Yesu daa dum lɛ.

²⁵ Nǝngɔ bɛtɔ mɛlalɨgɔ a shu ya gung gǝnɨ, nǝngɔ ja sʊwa gǝn gɔ, “Tɛlalɔ, bʊʊ nǝn bǝn! Ya bǝ bʊla lɛ.”

²⁶ Nǝngɔ a sʊwa ji gɔ, “Jǝ́ nǝb nǝtǝm bɨlǝngkɛl nǝn dǝm nyɔ! Wɛ a bwɨ jǝ́ nyʊwa taal lɛɨ?” Nǝngɔ a gun a ga yʊwa mwɛmɔ jǝbɔ mwɛmɔ mʊla lɛɨ gǝm wulongi, yʊwagɔ jǝbɔ mwɛ nɨ mʊla lɛɨ, a tɨ.

²⁷ Nǝbɔ a ta kang a nyiyo jǝ bʌbko lɛ gɔ, “Nʊ nɨ nuwo yʊwagɔ jǝbɔ mwɛ wɨmagɔ nyʊwa gǝn nɛɨ?”

Yesu A Gung Nǝb Nɨ Nǝn Yʊwa Bwɨlaɨ

²⁸ Nǝn kwama Yesu a yabǝm wɨmagɔ a bɛ a kʌng wini a tǝm Garasinaɨ, nǝngɔ nǝbɔ yo nǝn yʊwa bwɨlaɨ ja jel a kalfʌto ja bɛ a daa gǝ woi. Ja yǝlam jǝ taal, nǝbɔ mɨ mwɨ lɛ a yɔ a golagɔ jǝ woi.

²⁹ Nǝngɔ ja ga kwaalɨ gɔ, “Bʊla Kwaamaɨ, n wɛ a mʊrka nǝn jǝbɔ mʊɨ? Mʊ bɛ sǝ ba ń nǝ nǝn gaalan kumɔ a lǝga bɔ a laɨ?”

³⁰ Daagɔ a kʊta bɔ jǝbɔ daa nyiyolitɨnɔ jam jam lɛɨ.

³¹ Nǝngɔ nǝblaamɔ a kela Yesu gɔ, “Na ń jǝg nǝnɨ, bɛ ń tʊng nǝn a daa nyiyolitɨnɔ woi.”

³² Nǝngɔ a sʊwa ji gɔ, “Jǝ́ yɔ.” Nǝngɔ ja bǝla nǝbɨɨ, ya ja dɔ nyiyolitɨnɨ, nǝngɔ kʌm nyiyolitɨnɔ a mwala yagɨ yagɨ a gǝlalangɔ gǝmɨ, ya jǝ tǝla a mʊgɔ wɨmaɨ, jǝ bʊlala wo a mʊgɔ mwɛɨ.

³³ Nǝngɔ nǝb nɨ tɔɔ nyiyolitɨnɔ lɛɨ, ja mwala ja dɔ mʊgɔ tuulɔngɨɨ, ja sʊwa nǝbɔ fulon kanjǝl nɨ a bwɨ nǝn nǝb yʊwa bwɨlan nɨɨ.

³⁴ Nǝngɔ nǝbɔ gwam a jel yotǝm Yesui. Nǝn kwama ja tǝga gǝnɨ, nǝngɔ ja kela gǝn gɔ a bǝla tǝm jini.