Matta 28 - Dadiya NT

Guntǝm Yesui A Bwaa

¹ Kum Fǝbtǝm Yahudawagɨɨ a shui, nǝn dibɨlɨ nǝn kumsʌl, nǝngɔ Maryamu bwɛn Magadaliyaɨ jǝbɔ Maryamu wini ja yɔ dʌngtǝm tuugɨɨ.

² Tʌgo a kang, nǝngɔ ja maa kaa dalɨ mǝgtǝm tǝmɨ, jʊ a bwɨɨ kaa bwɛ twama Tɛlalɔɨ a gǝla a dʌbʌl a tʊngǝm tɛl nɨ ja swa a nyanga tuugɔ gǝmɨ, a yɨ a dʌbʌl gǝn.

³ Beta lɛ na kwama, bɛllɛ gǝnɔ a fulo nǝn fǝbfǝb nyɔ na fǝmǝn.

⁴ Nǝb tɔɔtǝmɔ a kuwo gǝnɨ, taalɔ a ta ji dangǝn, bʊtɔ jinɔ ka lɛ nǝn kʌbkʌb nyɔ. Nǝngɔ ja tǝla a tǝm mǝ ja bʊlala bʊlalaɨ.

⁵ Nǝngɔ bwɛ twama Kwaamaɨ a sʊwa nɔɔtǝm nɨ gɔ, “Ka jǝ́ nyʊwa lɛ taal, n nyǝm jǝ́ saa Yesu wʊnɨ ja kʊʊɨ.

⁶ Mɨ fɔ. A gun kanga a sʊwaɨ. Ba jǝ́ kuwo daagɔ ja yam gǝnɨ.

⁷ Jǝ́ yɔ dǝbǝr dǝbǝr ya jǝ́ sʊwa bɛtɔ mɛlalɨ gǝnɔ gɔ, ‘A gun a bwaagɔ gǝm. N wɔ ya laa jen laa a Galili, n daa gɔ jǝ́ kuwom gǝn nɛɨ.’ N jʊ a bɛ nǝn mǝ sǝ ba n sʊwa jeni.”

⁸ Nǝngɔ ja bǝla tuugɔ dǝbǝr dǝbǝr nǝn taalɨ, jǝbɔ fulotǝm nǝl a lada. Jǝ mwal lɛ sǝ ya jǝ sʊwa bɛtɔ mɛlalɨ Yesui.

⁹ Nǝngɔ Yesu nǝn kang gǝn a tǝga jii. A sʊwa ji gɔ, “Mǝ yal jen nɛ.” Nǝngɔ ja kʌl ba ja kwal naa gǝnɔ ja jʊng ja nǝ gǝn dʊʊnɨ.

¹⁰ Nǝngɔ Yesu a sʊwa ji gɔ, “Ka jǝ́ nyʊwa lɛ taal. Ya jǝ́ sʊwa kɛtǝlam mɨɨ ja shu a Galili, n daa gɔ ya jǝ kuwo i lɛ woi.”

Fulon Kɛl Nǝb Dʌngtǝm Tuugɨɨ

¹¹ Nɔɔtǝm nɨ shu lɛɨ, nǝngɔ kaam nǝb a mʊgɔ nǝb dʌngtǝm tuugɔ a dɔ mʊgɔ tuulɔngɨɨ, ja sʊwa dʊʊm nǝbkǝlamɔ fulon jʊ nɨ a bwɨɨ.

¹² Nǝngɔ nǝbkǝlamɔ jǝbɔ nǝb dʊʊm nǝbɨɨ ja mʊrka ja kiyo kɛlɨ, ja nɨ sʊwajaamtɨnɔ kemʌnɔ a lada nyɨɨ.

¹³ Nǝngɔ ja sʊwa gɔ, “Jǝ́ sʊwa nǝbɔ jengɔ bɛtɔ mɛlalɨ gǝnɔ a yɔ nǝn kum ya ja kuum gǝn nǝn kwama jǝ́ daam dum lɛɨ.

¹⁴ Na fulon kɛl nɨ a dɔ lɔl gwamnagɨɨ, nǝn kela gǝn kela sǝ a jǝg jen a gaalan.”

¹⁵ Nǝngɔ sʊwajaamtɨnɔ a yo kemʌnɔ nǝngɔ ja maa kanga ja sʊwa jii. Fulon kɛl nɨ wo dwiyen Yahudawagɔ sʊwa lɛ wo.

Maajɨ Nɨ Yesu A Nǝ Bɛtɔ Mɛlalɨ Gǝnɨ

¹⁶ Nǝngɔ bɛtɔ mɛlalɨ nɨ kʊb jeli wini a shu a Galilii. Ja yɔ a yem a daa nɨ Yesu a sʊwa gɔ ja yɔ woi.

¹⁷ Ja kuwo gǝnɨ, nǝngɔ ja jʊng ja nǝ gǝn dʊʊnɨ, kaamɨ a kɨɨ nǝl.

¹⁸ Nǝngɔ Yesu a yɔ nǝn dɔɔm a sʊwa ji woi gɔ, “Kwaama a nɨ ɨ fɔlɔnɔ gwam a dʌbʌl jǝbɔ tǝm.

¹⁹ A dul kɛl nɨ ya jǝ́ sʊwa nǝbɔ tǝm yooli nɨ gwam ja yǝlam nǝb bwangtǝm mɨ, jǝ́ yʊ ji mwɛ sagsagɔ a mʊgɔ dun Tɛtɛɨ, jǝbɔ a Bwɛɨ, jǝbɔ a Yʊwa Kwaamaɨ.

²⁰ Jǝ́ mɛla jim ja bwangtǝn kanjǝl nɨ gwam mǝ sʊwa jeni. Jǝ́ nyǝm mǝ na dakini nǝbɔ jen kwangkwang a yɔ nǝn a dɨltǝm yooli.”