Matta 27 - Dadiya NT

Yesu A Kǝga Bilatusi

¹ Nǝn kumsʌl butʌb, nǝngɔ dʊʊm nǝbkǝlamɔ jǝbɔ nǝb dʊʊm nǝbɨɨ ja mʊrkam nyiyo a dul Yesui, sǝ jǝ jʌ gǝn.

² Nǝngɔ ja bwa gǝn ja shu nǝn ya ja nǝ Bilatusi, gwamnagɔ.

Bwaa Yahuzaɨ

³ Kwama nɨ Yahuza nʊ nɨ a lungto Yesui a kuwo ja mwatɨ Yesu gǝm borang bwaaɨ, nǝngɔ a fʌto bʊʊlalɨ gǝnɔ a yǝla ya nǝ dʊʊm nǝbkǝlamɔ jǝbɔ nǝb dʊʊmɔ kemʌn sǝlǝn nɨ fʊtǝtaalɨ tʌgoi.

⁴ A sʊwa gɔ, “N maa bwɨlangkɛl mǝ lungto nʊ nɨ mɨ nǝn bwɨlangkɛlɨ ja jʌ gǝnɨ.” Nǝngɔ ja sʊwa gǝn gɔ, “N wɛ a dǝg nǝn woi? Nǝmɔ mʊ nyʊwaɨ.”

⁵ Nǝngɔ a wa jim kemʌn nɨ a Kan Kwaaman, a jel ya kwa mɨyaɨ.

⁶ Dʊʊm nǝbkǝlamɔ a wɔɔ kemʌnɔ, nǝngɔ ja sʊwa gɔ, “A bʊm bɔ bǝ ya kemʌn nɨ a daa yatǝm kemʌn na Kan Kwaaman. N kemʌn tʊʊm.”

⁷ Nǝngɔ ja kiyo gɔ jǝ ten talɨ nǝ mɔtǝm goli sǝ a yǝlam talɨ fʌltǝm faabǝmɨ.

⁸ A bɛ nǝn a kǝngkɨɨ jǝ jo talɨ nɨ gɔ talɨ tʊʊm.

⁹ Wʊnɨ a yii sʊwatǝm nǝkuwotǝmkǝga Irimiyaɨ gɔ, “Ja do kemʌn sǝlǝnɔ fʊtǝtaal, kemʌn nɨ nǝbɔ Israilaɨ a ya a dul gǝnɨ.

¹⁰ Ja do ja tenʌm talɨ nǝ mɔtǝm goli, kanga Tɛlalɔ a sʊwa ɨ gɔ n maaɨ.”

Bilatus A Bʌbo Yesu Kɛltɨn

¹¹ Nǝngɔ Yesu a tɨ a kǝga gwamnagɨɨ, gwamnagɔ a bʌ gǝn gɔ, “Nǝmɔ mʊ fɔlɔ Yahudawagɨɨ ka?” Yesu a sʊwa gǝn gɔ, “Kanga mʊ sʊwaɨ.”

¹² Nǝngɔ dʊʊm nǝbkǝlamɔ, jǝbɔ nǝb dʊʊmɔ a yɔ nǝn kɛl gǝnɨ, a sʊwa bɔ kaa kɛl.

¹³ Nǝngɔ Bilatus a sʊwa gǝn gɔ, “Mʊ nyʊwa bɔ katɨ nɨ jǝ sʊwa lɛ a dul mʊnɨ ka?”

¹⁴ Yesu a gar jim bɔ kaa kɛl wo win. Gwamnagɔ a ta kang a nyiyo dangǝn.

Ja Mwatɨ Yesu Gǝm Borang Bwaa

¹⁵ Nǝn kwama dikulomɔ, gwamnagɔ gǝ dem dem kang win a nǝb nɨ gǝm ja bwaba ja tal a lɔsomii, wʊnɨ nǝbɔ swɨ lɛɨ.

¹⁶ Kwama gɔ kaa nǝl wo a lɔsomi, wʊnɨ n nǝ kutʌmi, dunɔ nǝn Barabas.

¹⁷ Ja mʊrkaɨ, nǝngɔ Bilatus a bʌ ji gɔ, “Nuwo jǝ́ swɨ lɛ n dem jem kangɨ? Nǝn Barabas ka? Nǝn Yesu wʊnɨ jǝ jo lɛ gɔ Kiristii ka?”

¹⁸ A kwɛl a nyǝm nyǝmɨ n kɛl nungon ja bwa Yesu ja nǝ gǝnɨ.

¹⁹ Nǝn kwama nɨ gǝ yǝm a daa yɨm maatǝm borangɨ, nǝngɔ nwala gɔ a twam gǝm gɔ, “Jelʌm a gola nǝ dǝngdǝng nɨ gǝm, jʊ a bwɨɨ dwiyen n dɔta nǝn dʊgam a dul gǝn.”

²⁰ Nǝngɔ dʊʊm nǝbkǝlamɔ jǝbɔ nǝb dʊʊmɔ a nǝ mʊrkalɨ nǝbɨɨ lǝma nyiyo gɔ ja kel Bilatus a dem kang a Barabas gǝm, a jʌ Yesui.

²¹ Nǝngɔ gwamnagɔ a yǝla a bʌ ji gɔ, “Nuwo nyɨ a kʊm nǝb nɨ yoi jǝ́ swɨ lɛ n dem jem kangɨ?” Nǝngɔ ja sʊwa gɔ, “Barabas.”

²² Bilatus a bʌ ji gɔ, “N wɛ mǝ maa lɛ nǝn Yesu wʊnɨ jǝ jo lɛ gɔ Kiristii?” Gwam jinɔ ja jǝla gɔ, “Ja kʊʊ gǝn.”

²³ A bʌ ji gɔ, “A maa wɛ? N bwɨlangkɛl wɛ a maaɨ?” Ja sʊtǝn gatǝm wulongɔ jǝ sʊwa lɛ gɔ, “Ja kʊʊ gǝn!”

²⁴ Bilatus a kuwo ga laa bɔ kwaan jinɔ, kutʌmɔ swɨ lɛ a guni, nǝngɔ a dʊwa mwɛmɔ a saalǝm kang gǝnɔ a kǝga nǝbɨɨ, a sʊwa gɔ, “A mǝndɨ n jelʌm mɨ mwɛ mɨ wo a tʊʊm nʊ nɨ gǝm. Wʊnɨ n mwɛ jen.”

²⁵ Nǝngɔ nǝbɔ gwam a jǝla gɔ, “Bɛ tʊʊm gǝnɔ a yɨ a dul nǝn jǝbɔ bɛtɔ lɔ nǝnɨ.”

²⁶ Nǝngɔ a dem jim kang a Barabas gǝmɨ. A maa Yesu gǝm banjangɨ, nǝngɔ a nǝ ji sǝ ya ja kʊʊ gǝnɨ.

Sʊwajaamtɨnɔ A Mog Yesu

²⁷ Nǝngɔ sʊwajaamtɨn nɨ tɔɔ gwamnagɔ lɛɨ, ja yɔ nǝn Yesu a mʊgɔ lɔ fɔlɔn gwamnagɨɨ, nǝngɔ ja mʊr sʊwajaamtɨnɔ a dul gǝnɨ.

²⁸ Nǝngɔ ja jǝgǝm dwang gǝnɨ, ja mal gǝm kaa belʌn felii.

²⁹ Nǝngɔ ja bwa gǝm dwang dul sholaɨ, ja dǝg gǝm a duli, ja dǝg gǝm dwamɔ a kang jajǝngɨ, ja jʊng a kǝga gǝnɨ, ja mog gǝn gɔ, “Bɛ kʊlɨ mʊnɔ a kʌl, fɔlɔ Yahudawagɨɨ!”

³⁰ Ja tɛɛ gǝm tuum, ja yem dwamɔ, ja jǝga gǝn nǝn a dul.

³¹ Ja dɨ mogtǝm gǝnɨ, nǝngɔ ja jǝgǝm belʌn nɨ ja mal gǝmɨ, ja mal gǝm bɛllɛ gǝnɨ, ja shu nǝn gɔ sǝ ya jǝ kʊʊ gǝnɨ.

Ja Kʊʊ Yesu

³² Jǝ shu lɛɨ, nǝngɔ ja tǝga kaa bwɛ Kuranei dunɔ nǝn Saminu, nǝngɔ ja sɨna gǝm a do tɨya kʊʊtǝm Yesui.

³³ Ba ja la daa nɨ jǝ jo lɛ gɔ Golgotaɨ, wʊnɨ nʊng lɛ gɔ n daa kwasɨ duli.

³⁴ Nǝngɔ ja nǝ gǝn bʊgɛ wʊnɨ ja shɛka nǝn jǝ tuuli, sǝ ga nɔɔ. A twɨ nyɨɨ, nǝngɔ a kɔ nɔɔtǝmɨ.

³⁵ Ja kʊʊ gǝnɨ, nǝngɔ ja wɔɔ dwang dʊʊl gǝnɔ ja gam kwannya nǝnɨ.

³⁶ Nǝngɔ ja yɨ a daa gɔ jǝ tɔɔ gǝn nɛɨ.

³⁷ A dʌbʌl dul gǝnɔ gǝm ja mʊla kɛl katǝm wo a dul gǝn gɔ, “wʊnɨ nən yesu, fɔlɔ yahudawagɨɨ.”

³⁸ Nǝngɔ ja kʊʊ nǝbkuumɔ yo jǝbɔ gɨɨ, win a kang jajǝng gǝn, win a kang fɔlɔng.

³⁹ Nǝb nɨ shu lɛɨ, jǝ sʊwala gǝn bwɨlang katɨ lɛ, jǝ mǝg dul jinɔ lɛ.

⁴⁰ Jǝ sʊwa lɛ gɔ, “Mʊ nɨ mʊ kʌb Kan Kwaamanɔ lɛ ń yǝla ń mɔ tʌgo a mʊgɔ kumɔ taalɨ, bʊʊ nǝn dul mʊnɔ! Na mʊ nǝn Bʊla Kwaamaɨ, gun gǝla a dʌbʌl tɨya kʊʊtǝm nɨɨ.”

⁴¹ Dʊʊm nǝbkǝlamɔ tʌji jǝbɔ nǝb mɛlalɨ diilɔ jǝbɔ nǝb dʊʊmɔ jǝ mog gǝn nɛ gɔ,

⁴² “A bʊʊ nǝn kaam nǝbɔ. A dwal bɔ a bʊʊ nǝn dul gǝnɔ. Na nǝn gɔ gǝ fɔlɔ Israilaɨ, bɛ ga gǝla a dʌbʌl tɨya kʊʊtǝm kǝngkɔ sǝ bǝ nǝ bɨlǝngkɛl nǝn gɔ.

⁴³ A ya nǝl a daa Kwaama woi, bɛ Kwaama a jǝg gǝn kǝngkǝnɨ na swɨ gǝn nɛɨ. Kanga a sʊwa gɔ, gǝ nǝn Bʊla Kwaamaɨ.”

⁴⁴ Nǝbkuum nɨ tʌji ja kʊʊ ji dakinii, ja sʊwala gǝn bwɨlang katɨ tʌji.

Bwaa Yesui

⁴⁵ Nǝn sɨmang kɔkɔ kumtojiligɔ a sumʌm tǝmɔ gwam, a yɔ nǝn a kemʌnɔ taal na kwaamɨ.

⁴⁶ Kemʌnɔ taal nǝngɔ Yesu a gung diilɔ nǝn kwaan a sʊwa gɔ, “Eloi, Eloi, lama sabaktani?” Wʊnɨ gǝ nʊng gɔ, “Kwaama mɨ Kwaama mɨ, n wɛ a bwɨ mʊ bǝla ɨɨ?”

⁴⁷ Nǝb nɨ tɨlam wo ja nyʊwa nyɨɨ, nǝngɔ ja sʊwa gɔ, “Bwɛ nɨ jo Iliya lɛ.”

⁴⁸ Nǝngɔ kaa win a kʊm jin a mwal ya do fʊgɔgɔ a dǝg a mwɛ fwalɨɨ, a gal a dwam sǝ a nǝ gǝn a nɔɔ.

⁴⁹ Nǝngɔ kaamɨ gɔ, “Jǝ́ bǝla wo bǝ kuwo kɛna Iliya bɛ ba bʊʊ lɛ nǝn gɨɨ.”

⁵⁰ Nǝngɔ Yesu a yǝla gung diilɔ nǝn kwaan, nǝngɔ a dem kang a kʊlɨ gǝnɔ gǝmɨ.

⁵¹ Nǝngɔ dwang Kan Kwaamanɔ a bel yoi, a dʌbʌl a gǝla nǝn a tǝmɨ. Tǝmɔ a mǝga, gamtɨnɔ a wulola.

⁵² Tuutɨnɔ a wumola, bʊtɔ nǝb nɨ sagsag a lada nyɔ a daa dumi, ja gun.

⁵³ Ja jela a mʊgɔ tuutɨn jinɔ gǝm. Nǝn kwama Yesu a gun a bwaaɨ, nǝngɔ ja dɔ mʊgɔ tuulɔ nɨ sagsagɨ, nǝbɔ a lada na a kuwo jii.

⁵⁴ Nǝn kwama nɨ nǝ dʊʊ sʊwajaam nɨ jǝbɔ nǝb nɨ jǝ dakini jǝ tɔɔ Yesu lɛɨ, ja kuwo tǝmɔ a mǝgaɨ, jǝbɔ jʊ nɨ a bwɨ gwamɨ, taalɔ a ta ji. Nǝngɔ ja sʊwa gɔ, “Bɨlǝngǝn bwɛ nɨ nǝn Bʊla Kwaamaɨ!”

⁵⁵ Nɔɔtǝmɔ a lada nyɔ wo, jǝ dʌng lɛ a kʊta. Ja jel a Galili jǝ bwang Yesu gǝm lɛ, jǝ maa gǝm maajɨ lɛ.

⁵⁶ A kʊm jin Maryamu bwɛn Magadaliyaɨ, jǝbɔ Maryamu nyɨya Yakubui jǝbɔ Yusufui, jǝbɔ nyɨya bɛtɔ lɔ Zabadii.

Fʌltǝm Yesui

⁵⁷ Kwamagɔ dɔ lɛɨ, nǝngɔ kaa nǝ shilo n bwɛ Arimatiyaɨ, dunɔ nǝn Yusufu, gǝ tǝgǝn a yǝlam bwɛ mɛlalɨ Yesui.

⁵⁸ A yɔ a daa Bilatus woi, ya kela gɔ ja nǝ gǝn bʊtɔ Yesui. Nǝngɔ Bilatus a dǝg ji gɔ ja nǝ gǝnɨ.

⁵⁹ Yusufu a do bʊtɔ Yesui a kʊlʊm a dwang lilin fɨ nɨ sagsagɨ.

⁶⁰ A ya gǝn a kaa tuu fɨ nɨ ga wʊ dul gǝnɔ gǝmɨ, nǝngɔ a bʌl gʌleng tɛlɔ a swa a nyanga tuui, nǝngɔ a shui.

⁶¹ Maryamu bwɛn Magadaliyaɨ jǝbɔ Maryamu wini jǝ yǝm dakini a kǝga tuugɔ gǝm.

Nǝb Tɔɔtǝm Tuugɔ

⁶² Nǝn tǝmsɛlɨ, kum fɛkatǝmɔ a shui, nǝngɔ dʊʊm nǝbkǝlamɔ jǝbɔ nǝbɔ Farisaɨ ja mʊrka a kǝga Bilatusi,

⁶³ ja sʊwa gɔ, “Nǝ dʊʊ, nǝn bʊʊla kanga nǝ swagtǝm nɨɨ, a sʊwa a kwama nǝn kʊlɨɨ gɔ, kum na taalɔ gǝ gun gun a bwaa.

⁶⁴ A dul jʊ nɨ, sʊwa kɛl ya ja tɔɔ tɔɔɨ tuugɔ a la kumɔ taal, kage bɛtɔ mɛlalɨ gǝnɔ ba kuum bʌlʌnɔ sǝ ja sʊwa nǝbɔ gɔ a gun a bwaagɔ gǝm. Swagtǝm gulɔ laa laa na tɨkǝgagɔ bwɨlatǝm.”

⁶⁵ Nǝngɔ Bilatus a sʊwa ji gɔ, “A daa nyɔ. Jǝ́ wɔɔ sʊwajaamɔ ya ja tɔɔ gǝn dangǝn kanga jǝ́ swɨ lɛɨ.”

⁶⁶ Nǝngɔ ja shu ya ja tɔɔ tuugɨɨ, ja gatǝn mɛlɔ tʌgo a tɛlɔ gǝmɨ, ja dǝg sʊwajaamɔ tɔɔtǝmɔ.