Matta 24 - Dadiya NT

Yesu A Sʊwa Kʌbotǝm Nɨ Nya Kan Kwaamanɔ Lɛɨ

¹ Nǝn kwama Yesu a jelʌm a Kan Kwaaman shu lɛɨ, nǝngɔ bɛtɔ mɛlalɨ gǝnɔ a bɛ daa gǝ woi, ja nʊng gǝn kantɨnɔ ja mɔba a mʊgɔ talɨ Kan Kwaamanɨ.

² Nǝngɔ a bʌ ji gɔ, “Jǝ́ kuwo kanjǝl nɨ ja mɔbaɨ? N bɨlǝngkɛl mǝ sʊwa jen nɛɨ, mɨ nǝn tɛl nɨ jǝ bǝla lɛ a dʌbʌl kaa tɛlɨ. Gwam jǝ kʌbʌm kʌbʌm.”

Tǝltǝm Gaalanɔ

³ Kwama Yesu yǝm a dʌbʌl Yem Zaituni, nǝngɔ bɛtɔ mɛlalɨ gǝnɔ ba nya gǝn kwaaji gɔ, “Sʊwa nǝn, kanjǝl nɨ bwɨ fɨyang? N wɛ nʊng bɛtǝm mʊnɔ lɛɨ, jǝbɔ dɨltǝm yooli nɨ?”

⁴ Nǝngɔ Yesu a jǝla ji gɔ, “Bɛ jǝ́ nyǝm kage kaa nǝl a swag jen.

⁵ Nǝbɔ a lada na bɛ lɛ a mʊgɔ dun mɨɨ, sʊwa lɛ gɔ, ‘Nǝmǝ mǝ Kiristi,’ jǝ swag swag nǝbɔ a lada.

⁶ Jǝ́ nyʊwa nyʊwa kɛl tatǝm kun jǝbɔ fulon kun. Ka jǝ́ nyʊwa lɛ taal, kanjǝl nɨ bwɨ bwɨ nyɔ, dɨltǝm tǝmɔ a la bɔ dɨn.

⁷ Bǝlǝntǝmɔ tabka tabka kun. Fɔlɔntɨnɔ gabka gabka kɨlan. Jǝ maa maa jʊwan bwɨla jǝbɔ mǝgatǝm tǝm a daatɨnɔ gǝm a lada.

⁸ Wʊnɨ nǝn gɔ tǝltǝm gaalanɔ dɨnɨ.

⁹ “Jǝ ta jen ta, jǝ nǝ jen nǝ gaalan, jǝ jʌ jen jʌ. Yooligɔ kul jen kul a kɛl dul mɨ.

¹⁰ Nǝbɔ a lada nyɔ na yǝla lɛ a nǝn gul a nǝtǝm bɨlǝngkɛl jinɔ gǝmɨ, jǝ miyoka miyoka, jǝ kulko kulko.

¹¹ Nǝbkuwotǝmkǝga gabakɛlɔ gun gun a lada, jǝ swag swag nǝbɔ a lada.

¹² Maakatǝm shilɔ la la daa, a dul kɛl nɨɨ, kɔrɔ nǝbɨɨ swɨkatǝm jinɔ yǝla yǝla a gul.

¹³ Nʊ nɨ a kʊ nǝl a yɔ nǝn a dɨltǝmɨ, bʊʊ bʊʊ.

¹⁴ Jǝ kiyo kiyo fulon kɛl lǝmɨ fɔlɔn lɔ Kwaamaɨ a tǝmɔ gǝm gwam, sǝ a yǝlam nǝtǝm nyiyo sǝla dɨltǝm yooligɔ a bɛ.

Gaalan Bwɨla

¹⁵ “Kwama jǝ́ kuwo jǝ bwɨla nɨ dǝg kalatǝm lɛɨ, wʊnɨ nǝkuwotǝmkǝga Daniyel a sʊwaɨ, tɨm a daa sagsagɨɨ (nǝ kiyotǝmɔ bɛ ga nyǝm),

¹⁶ na jǝ́ kuwo jʊ nɨ bwɨ lɛɨ, nǝb nɨ a mʊgɔ Yahudiyaɨ bɛ ja mwala ja gwi dʌbʌl yemtɨn,

¹⁷ Nʊ nɨ a dʌbʌl kanɨ, ka ga gǝla lɛ gɔ gǝ do jǝl a mʊgɔ lɔ gɔ.

¹⁸ Nʊ nɨ a tɔtwamɨ, ka ga yǝla lɛ gɔ gǝ do dwang kwabtǝm gǝn.

¹⁹ N mwɛ jen jǝ́ nɔɔtǝm nɨ nǝn fʌli jǝbɔ nɔɔtǝm nabwɛmɔ nǝn kwama gɔ.

²⁰ Bɛ jǝ́ maa keli ka sʊgɔl nɨ ya bwɨ lɛ nǝn shena jǝbɔ Kum Fǝbtǝm.

²¹ A kwama gɔ jǝ maa maa gʌleng gaalan bwɨla nɨ ja maa bɔ wo nǝn tǝltǝm fwaltǝm yooli nɨ a bɛ nǝn kǝngkǝnɨ, mɨsɔ jǝ yǝla lɛ ja maa wo tag.

²² Na ja mwatɨm bɔ kumtɨn nɨɨ, na mɨ nǝfili nɨ wo bʊʊ lɛɨ. Jʊ a bwɨ ja mwatɨm kumtɨn nɨɨ, n nǝb nɨ ja jǝgamɨ.

²³ “Nǝn kwama gɔ na nǝl a sʊwa jen gɔ, ‘Jǝ́ dʌng, Kiristi n wɔ, n wuleni,’ bɛ ka jǝ́ jǝla lɛ.

²⁴ Kiristitɨn gabakɛlɔ, jǝbɔ nǝbkuwotǝmkǝga gabakɛlɔ jela jela, jǝ maa maa gʌleng kanjǝl laatǝm kang jǝbɔ jǝ nʊngtǝm, sǝ ja swag nǝbɔ, jǝbɔ nǝb nɨ ja jǝgamɨ na jǝ nya nya golaɨ.

²⁵ N kwɛl n sʊwa jen sʊwaɨ, sǝla a bwɨɨ.

²⁶ “A dul kɛl nɨ, na ja sʊwa jen gɔ, ‘Wulen a kuuli.’ Ka jǝ́ jel lɛ. Na ja sʊwa jen tag gɔ, ‘Wulen a mʊgɔ kan a wuu wuui.’ Ka jǝ́ jǝla lɛ.

²⁷ Kanga kwamagɔ gǝ beta lɛ a twal a yɔ nǝn a diyengi, bɛtǝm Bʊla Nǝlɨ yǝlam nyɔ.

²⁸ Daa nɨ bʌlʌnɔ woi, n daagɔ jɛtɨnɔ gǝ mʊrkam lɛɨ.

Bɛtǝm Bʊla Nǝlɨɨ

²⁹ “Na kwama gʌleng gaalan bwɨla nɨ a shui, nu kwamagɔ fi fi kum, mɨsɔ bwaalagɔ fulo lɛ. Nyanyamɨtɨnɔ gǝla tǝla tǝla a tǝm, kanjǝl nɨ a dʌbʌli jǝ mǝga mǝga.

³⁰ A kwama gɔ jǝ kuwo kuwo kaa jǝ nʊngtǝm a dʌbʌl kwama, na Bʊla Nǝlɨ a nʊng dul gǝnɨ. Nǝbɔ a yooli nɨɨ ji ji wi bwaa, na ja kuwo Bʊla Nǝlɨ bɛ lɛ a mʊgɔ luli, nǝn kwaan jǝbɔ gʌleng dʊʊlǝn gǝnɔ.

³¹ Twam twam bɛtɔ twama gǝnɔ sǝ ja guu jum nɨ nǝn diil dʊʊn, sǝ ja mʊr nǝb nɨ ja jǝgamɨ, jʊ a tǝl a twal a bɛ nǝn a diyengi, jǝbɔ gǝlalǝng a bɛ nǝn a gwilʌngi, jʊ a tǝl a dʌbʌl kwama a yɔ nǝn a kaa gwanga a dʌbʌl kwamaɨ.

Mɛlalɨ Nǝn Tɨya Dʌfeng

³² “Bɛ jǝ́ mɛla kaa jǝl nǝn tɨya dʌfengɔ. Na kangtɨn gǝnɔ a tǝl to langǝn fɨgɔ lɛɨ, jǝ́ nyǝm shenagɔ a dwama.

³³ Gǝ na nyɔ tag, na jǝ́ kuwo kanjǝl nɨ gwamɨ, bɛ jǝ́ nyǝm a dwama, tɨm a nyanga kan.

³⁴ N bɨlǝngkɛl mǝ sʊwa jen nɛɨ, nǝbɔ kal nɨɨ, mɨsɔ jǝ bʊla lɛ, na kanjǝl nɨ gwam a bwɨ bɨɨ.

³⁵ Dʌbʌlɔ jǝbɔ tǝmɔ dɨ dɨ, kɛl mǝndɨ mɨsɔ dɨ lɛ wo.

Mɨ Nǝn Nʊ Nɨ A Nyǝm Kwama Bɛtǝm Bʊla Nǝlɨ

³⁶ “Mɨ nǝn nʊ nɨ a nyǝm kumɔ, jǝbɔ kemʌnɔ jʊ nɨ bwɨm lɛɨ. Bɛtɔ twama Kwaamaɨ nɨ a dʌbʌli jǝbɔ Bʊlagɔ ja nyǝm bɔ. Nǝn Tɨyagɔ kwaagɔ win a nyǝmɨ.

³⁷ Kanga ja maam nǝn jol Nuhui, jǝ maa nyɔ a bɛtǝm Bʊla Nǝlɨ.

³⁸ Nǝn kwamagɔ mwɛ nɨ a fʌlʌm tǝmɔ gwamɨ a lǝga bɔ a bɛɨ, nǝbɔ ja lɛ, nɔɔ lɛ, jǝ naaka lɛ, a bɛ ba la kwama Nuhu a dɔm tɨyamwɛngɨ.

³⁹ Nǝn kwama la ja nyǝmǝm jʊ nɨ bwɨ lɛɨ, mwɛ nɨ a fʌl tǝmɔ gwamɨ, a ba wɔɔ ji gwam. Yǝlam nyɔ nǝn bɛtǝm Bʊla Nǝlɨ.

⁴⁰ Nǝn kwama gɔ na nǝbɔ yo maa maajɨ lɛ a mʊgɔ tɔtwamɨ, jǝ dem dem nʊ win, ja bǝla win.

⁴¹ Nɔɔtǝmɔ yo kʊwa nɛl lɛ, jǝ dem dem win, ja bǝla win.

⁴² “Bɛ jǝ́ fɛka yɨm jenɔ, jʊ a bwɨɨ jǝ́ nyǝm bɔ kɔkɔ nɨ Tɛlalɔ jenɔ bɛm lɛɨ.

⁴³ Bɛ jǝ́ nyǝm, na nǝ lɔngɔ a nyǝm kwama nɨ nǝkuugɔ bɛm lɛ nǝn kumi, na mɨsɔ daa dum lɛ, na mɨsɔ jǝla lɛ ja dɔ gǝm lɔ.

⁴⁴ Gǝ na nyɔ jen tʌjen bɛ jǝ́ fɛka yɨm jenɔ, Bʊla Nǝlɨ bɛ lɛ nǝn kwama nɨ jǝ́ maa bɔ bʊʊlalɨ.

Bwɛ Jwaalɛ Nya Jǝbɔ A Bwɨla

⁴⁵ “Nuwo n bwɛ jwaalɛ, n nǝ tatǝm swatǝm yaa jǝbɔ nǝ yʊlanɨ? N nʊ nɨ tɛlalɔ gǝnɔ a ya gǝn dʌngtǝm lɔ gǝnɨ, ya nǝ ji jǝjalǝnɔ lɛ nǝn kwama jǝ jam lɛɨ.

⁴⁶ Bwiligɔ na a bwɛ jwaalɛ nɨɨ, na tɛlalɔ gǝnɔ a yǝla a bɛ ba nya gǝn maa lɛ nyɨɨ.

⁴⁷ N bɨlǝngǝn mǝ sʊwa jen nɛɨ, nǝ gǝn nǝ tɔɔtǝm kanjǝl gǝnɔ gwam.

⁴⁸ Na bwɨlang bwɛ jwaalɛ nɨ a yǝla a bʊʊla a nǝl gǝn gɔ, ‘Tɛlalɔ mɨ a tɨla,’

⁴⁹ nǝngɔ a tǝl bʊgtǝm tangǝn bɛtɔ jwaalɛn nɨ jǝ dakinii, ja lɛ, nɔɔ lɛ jǝbɔ fatǝm nɔɔtǝm gǝnɔ.

⁵⁰ Tɛlalɔ bwɛ jwaalɛ nɨɨ bɛ nǝn kum nɨ ga ya bɔ a nǝlɨ, kwama nɨ ga nyǝm bɨɨ.

⁵¹ Ba bashɨ gǝn, sǝ a maa gǝm borang jǝbɔ nǝb fentogɔ, n daa gɔ jǝ jim wi lɛ nǝn kʊʊtǝm nungʌni.