Matta 23 - Dadiya NT

Yesu A Gʊ Nǝbɔ Gǝm Lɔl Gɔ Ka Ja Yǝlam Lɛ Na Nǝbɔ Farisaɨ

¹ Nǝngɔ Yesu a sʊwa nǝb nɨ a mʊrkaɨ jǝbɔ bɛtɔ mɛlalɨ gǝnɔ gɔ,

² “Nǝb mɛlalɨ diilɔ jǝbɔ nǝbɔ Farisaɨ, ja yɨ a daa yɨm Musaɨ.

³ Bɛ ya jǝ́ bwangtǝn kanjǝl nɨ lɛ jǝ mɛla jem lɛɨ. Bɛ ka jǝ́ maa lɛ jʊ nɨ jǝ maa lɛɨ, jʊ a bwɨɨ mɨ jǝ maa kanjǝl nɨ lɛ jǝ sʊwa nǝbɔ lɛ gɔ ja maaɨ.

⁴ Ja ya nǝbɔ gǝm kanjǝl tuulo nɨ a laa kwaan dotǝm nǝbɨɨ, ja tɨka bɔ nǝbɔ gungtǝm gǝnɔ.

⁵ “Kanjǝl nɨ jǝ maa lɛɨ, jǝ maa sǝ nǝbɔ a kuwo. Jǝ bwa tafɨyatɨn nɨ ja mʊla kɛl Kwaamaɨ woi a tɛkǝga jinɔ gǝm. Dwang malǝng jinɔ a som nyɔ gǝla kwaala lɛ a tǝm.

⁶ Jǝ swɨ daa yɨm nɨ nǝbɔ nǝ ji dʊʊn nɛ a lɔ kangwaalɨ, jǝbɔ daa yɨm dʊʊntɨn a kan mɛlalɨ.

⁷ Jǝ swɨ lɛ nǝbɔ ya yal ji lɛ a gamdʌbo. Jǝ swɨ lɛ nǝbɔ ya jo ji lɛ gɔ, ‘Nǝ mɛlalɨ.’

⁸ “Ka jǝ́ jǝla lɛ nǝbɔ a jo jen gɔ, ‘Nǝ mɛlalɨ,’ jʊ a bwɨɨ nǝ mɛlalɨ jenɔ win, gwam jenɔ jǝ́ yǝlam kɛb.

⁹ Ka jǝ́ jo lɛ kaa nǝl jengɔ ‘tɛtɛ’ a tǝm nɨ. Jʊ a bwɨɨ Tɛgɔ win na jǝ́ nǝngǝnɨ, n nʊ a dʌbʌl kwamaɨ.

¹⁰ Ka jǝ́ jǝla lɛ ja jo jen gɔ, ‘tɛlalɔ,’ jʊ a bwɨɨ Tɛlalɔ win swar, nǝn Kiristi.

¹¹ Nʊ a laa jen dʊʊn gwamɨ, bɛ a yǝlam jwaalɛ jen.

¹² Nʊ nɨ a gung dul gǝnɨ, jǝ shig gǝn shig. Nʊ nɨ a shig dul gǝnɨ, jǝ gung gǝn gung.

Yesu A Buulʌm Mɛlalɨ Nǝb Dʊʊm Yahudawagɨɨ A Dul Jǝfʊlǝn

¹³ “N mwɛ jen, jǝ́ nǝb mɛlalɨ diilɔ jǝbɔ nǝbɔ Farisaɨ, nǝb fento nǝn kwan! Jǝ́ nʊngǝm nyanga dɔtǝm fɔlɔn lɔ Kwaamaɨ a kǝga nǝbɨɨ. Jen tʌjen jǝ́ dɔ bɔ, jǝ́ kaa nǝbɔ swɨ lɛ a dɔɨ, dɔtǝmɔ. [

¹⁴ N mwɛ jen, nǝb mɛlalɨ diilɔ jǝbɔ nǝbɔ Farisaɨ, nǝb fento nǝn kwan! Jǝ́ jam kʊla nɔɔtǝmkʊlabɨ lɛ. Jǝ́ maa keligɔ a som nyɔ, sǝ nǝbɔ kuwo jen. Jǝ́ nya nya mwɛl a laa a tangǝn nǝbɨɨ.]

¹⁵ “N mwɛ jen, jǝ́ nǝb mɛlalɨ diilɔ jǝbɔ nǝbɔ Farisaɨ, nǝb fento nǝn kwan! Jǝ́ yab wɨma, sǝ jǝ́ la tǝmtɨn nɨ a kʊtaɨ sǝ jǝ́ nya nǝ bwangtǝm win. Na jǝ́ nya gǝnɨ, jǝ́ dǝg gǝn a dɔtǝm mʊgɔ lɔ kǝla nɨ a shilo a kwaba a jeni.

¹⁶ “N mwɛ jen, jǝ́ kululʌm nɨ jǝ́ nʊng nǝbɔ gola lɛɨ! Jǝ́ sʊwa lɛ jengɔ, ‘Na nǝl a wɛɛl wɛɛlɨ nǝn kemʌn mʊn nɨ a mʊgɔ Kan Kwaamanɨ, wɛɛlɨgɔ a ta gǝn.’

¹⁷ Jǝ́ kululʌm, nǝb fʌmʌn! N nʊ won a laa jǝlɨ, n kemʌn mʊnɔ ka? N Kan Kwaaman wʊnɨ a dǝg kemʌn mʊnɔ a yǝlam jǝ sagsagɨɨ ka?

¹⁸ Jǝ́ sʊwa tag jengɔ, ‘Na nǝl a wɛɛl wɛɛlɨ nǝn daa twɨtǝm yulʌni, a kal bɔ jǝl. Jǝ́ sʊwa tag jengɔ na a wɛɛl nǝn jʊ nɨ ja ya a dʌbʌl daa twɨtǝm yulʌni, wɛɛlɨgɔ a ta gǝn.’

¹⁹ Jǝ́ kululʌm! N nʊ won a laa jǝlɨ? N jǝ twɨtǝmɔ ka? N daa twɨtǝm yulʌn nɨ a dǝg jǝ twɨtǝm nɨ sagsagɨɨ ka?

²⁰ Gǝ na nyɔ, na nʊ nɨ a wɛɛl wɛɛlɨ nǝn daa twɨtǝm yulʌni, a wɛɛl nǝn jǝbɔ kanjǝl nɨ gwam a daa twɨtǝm yulʌni.

²¹ Nʊ nɨ a wɛɛl wɛɛlɨ nǝn Kan Kwaamanɨ, a wɛɛl nǝn jǝbɔ nʊ nɨ yǝm a Kan Kwaamanɨ.

²² Nʊ nɨ a wɛɛl wɛɛlɨ nǝn dʌbʌli, a wɛɛl nǝn kotere fɔlɔn Kwaamaɨ jǝbɔ nʊ nɨ yǝm a dʌbʌl gǝnɨ.

²³ “N mwɛ jen, nǝb mɛlalɨ diilɔ, jǝbɔ nǝbɔ Farisaɨ, nǝb fento nǝn kwan! Jǝ́ nǝ win a mʊgɔ kʊb na kanjǝl geggeg jenɔ, jǝbɔ welewele jǝbɔ yam, jǝ́ bǝla kanjǝl nɨ a laa jǝl a mʊgɔ diili, kanjǝl nɨ nǝn gɔ n maatǝm borang dǝngdǝng, jǝbɔ bʊnatǝm, jǝbɔ tatǝm swatǝm yaa. N kanjǝlɔ a bʊm na jǝ́ maa lɛɨ, ka jǝ́ bǝla lɛ maatǝm kǝtǝn kanjǝlɔ tag.

²⁴ Jǝ́ nǝb tatǝm kang kululʌmɔ! Jǝ́ kɔm bɛ ywɛgɔ lɛ, jǝ́ mɨm namtenʌmɔ lɛ.

²⁵ “N mwɛ jen, nǝb mɛlalɨ diilɔ jǝbɔ nǝbɔ Farisaɨ, nǝb fento nǝn kwan! Jǝ́ saal gul kʌshi nɔɔmwɛnɔ jǝbɔ kʌshi jajɨgɔ. Mʊgɔ jinɔ a yii nǝn wɛl jǝbɔ swɨtǝm dul.

²⁶ Mʊ kuli bwɛ Farisa! Tǝl saaltǝm mʊgɔ kʌshi nɔɔmwɛnɔ jǝbɔ kʌshi jajɨgɔ, sǝ gul jinɔ a jel tʌji.

²⁷ “N mwɛ jen, jǝ́ nǝb mɛlalɨ diilɔ jǝbɔ nǝbɔ Farisaɨ, nǝb fento nǝn kwan! Jǝ́ jelka tuutɨn nɨ nyɔ ja waatǝn gwaal fulo tʌgoi, ja fulo a bʊm nyɔ a yooli, mʊgɔ gǝnɔ n kuto nǝb nɨ a bʊlala bʊlalaɨ, jǝbɔ duto nǝn dʌmʌn.

²⁸ Jǝ́ na nyɔ tʌjen, nǝbɔ kuwo jen nɛ a yooli maamɔ jǝ́ nǝb dǝngdǝng. Mʊgɔ bʊtɔ jenɔ n kɛl fento jǝbɔ maatǝm bwɨlan.

²⁹ “N mwɛ jen, nǝb mɛlalɨ diilɔ jǝbɔ nǝbɔ Farisaɨ, nǝb fento nǝn kwan! Jǝ́ mɔba tuutɨn nǝbkuwotǝmkǝgagɔ a bʊma nyɔ, jǝ́ fɛla kalfʌto nǝb dǝngdǝngɨɨ a bʊma nyɔ.

³⁰ Jǝ́ sʊwa jengɔ, ‘Na na bǝ wo a jol tʊgalam bǝnɨ, na bǝ tɨka ji bɔ jʌbotǝm nǝbkuwotǝmkǝgagɔ.’

³¹ A dul kɛl nɨ, jǝ́ nǝ nyiyo nǝn kang jen jengɔ nǝjen jǝ́ bɛtɔ lɔ nǝb nɨ a jʌbo nǝbkuwotǝmkǝgagɨɨ.

³² Jǝ́ tagǝm maajɨ bwɨla nɨ tʊgalam jenɔ a tǝlɨ!

³³ “Jǝ́ sɔɔtɨn, jǝ́ bɛlɨ sɔɔ bwɨlantɨn! Jǝ́ bʊʊ borang lɔ kǝlagɔ nyǝn?

³⁴ Mǝ twam jem twam nǝbkuwotǝmkǝgagɔ, jǝbɔ nǝb nyǝmtǝmɔ, jǝbɔ nǝb mɛlalɨ diilɔ. Jǝ́ jʌbo jʌbo kaam jinɔ. Jǝ́ kʊʊ kʊʊ kaam jinɔ. Jǝ́ tʊm tʊm kaam jinɔ a kantɨn mɛlalɨ. Jǝ́ bwang jim lɛ a tuulɔtɨn jǝ́ nǝ ji gaalan nɛ.

³⁵ Mǝ twam twam nǝb nɨ dɨsɔ tʊʊm nǝb dǝngdǝng nɨ ja tǝla a yooli nɨɨ a yǝla a bɛ a dul jen, jʊ a tǝl a tʊʊm Habilaɨ nǝ dǝngdǝng, ba la nǝn a daa Zakariya woi, bʊla Berikiyaɨ, wʊnɨ jǝ́ jʌ a tɨbǝl daa Sagsag jǝbɔ daa twɨtǝm yulʌni.

³⁶ N bɨlǝngkɛl mǝ sʊwa jen nɛɨ, gwam kanjǝl nɨ bwɨ bwɨ jǝbɔ nǝbɔ jol nɨ.

Kɛl Urushalimagɔ A Kom Yesu Bɨlǝngǝn

³⁷ “A laa dɨsɔ jǝ́ nǝbɔ Urushalimaɨ, jǝ́ nǝbɔ Urushalimaɨ nɨ jǝ́ jʌbo nǝbkuwotǝmkǝgagɨɨ, jǝ́ mala nǝb nɨ ja twam ji a daa jen woi nǝn tɛl ja bʊlalaɨ! Naa nyǝn mǝ swɨ lɛ n dǝg jen a mʊgɔ gaamɨ mǝndɨ gǝmɨ, kanga jangagɔ gǝ dǝgam bɛlɨ gǝnɔ lɛ a mʊgɔ bɨlǝn gǝnɨ, jǝ́ kɔɨ!

³⁸ N wɔ kǝngkɔ ja bǝla jem lɔ jenɔ mɨ kaa nǝl wo.

³⁹ Mǝ sʊwa jen nɛ, mɨsɔ jǝ́ kuwo i lɛ wo tag, na ke bɔ kwama jǝ́ sʊwa lɛ jengɔ, ‘Bwiligɔ na a nʊ nɨ bɛ lɛ a mʊgɔ dun Tɛlalɔɨ.’ ”