Matta 22 - Dadiya NT

Mʊsǝn Kɛl A Dul Kangwaal

¹ Yesu a yǝla a sʊwa ji mʊsǝn kɛlɔ tag gɔ,

² “Fɔlɔn lɔ Kwaamaɨ jǝ mʊrka gǝn jǝbɔ kɛl kaa fɔlɔ wʊnɨ a swɨ bʊla gɔ gǝm kangwaalɨ.

³ A twam jwaalɛb gǝnɔ gɔ ya ja jo nǝbɔ ga sʊwa ji kɛl kangwaalɔ ga swɨɨ ja bɛ. Ja kɔ bɛtǝmɔ.

⁴ “Nǝngɔ a twam kaam jwaalɛbɔ gɔ, ‘Jǝ́ sʊwa nǝbɔ jengɔ, “N wɔ n fɛka jǝjalǝnɔ, n beta nɛɛtɨnɔ jǝbɔ nɛɛtɨn nɨ mǝ tuum tuumi a dʊʊla nǝn lʊglʊg nyɨɨ, wʊnɨ mǝ fɛka a kɛl kangwaal nɨɨ, n fɛka kanjǝlɔ gwam. Jǝ́ bɛ kangwaalɔ!” ’

⁵ “Ja swa bɔ lɔl, ja shu. Kaa a shu a twam gǝn. Kaa a shu a gamdʌbo.

⁶ Kaamɨ a ta bɛtɔ jwaalɛnɔ, ja maa jim bʊgǝn, ja jʌbom ji.

⁷ Fɔlɔgɔ a kal nǝl dangǝn. A twam sʊwajaamtɨn gǝnɔ gɔ ja jʌbom nǝb nɨ a dǝg jʌtǝm duli, ja twɨm tuulɔ jinɔ nǝn pʌd.

⁸ “Nǝngɔ a sʊwa jwaalɛb gǝnɔ gɔ, ‘Ja dɨ fɛkalɨ kangwaalɔ, nǝbɔ mǝ joi ja daa bɔ tʌgo a kangwaalɔ gǝm.

⁹ Jǝ́ yɔ a daa mʊrkalɨtɨnɔ gǝm jǝ́ sʊwa nǝbɔ jǝ́ nyaɨ jengɔ ja bɛ kangwaalɔ.’

¹⁰ Bɛtɔ jwaalɛb nɨ ja bwangtǝn daa mʊrkalɨtɨnɔ, ja jo nǝbɔ gwam ja nyaɨ, nǝb nyanɔ, jǝbɔ nǝb bwɨlamɔ, talɨ kangwaalɔ a yii nǝn faabǝm.

¹¹ “Nǝn kwamagɔ fɔlɔgɔ a dɔ sǝ a dʌng nǝbɨɨ, a kuwo kaa nǝl mɨ nǝn bɛllɛ kangwaalɔ.

¹² Nǝngɔ a sʊwa nʊ gɔ gɔ, ‘Fwalgɔ, a maa nyǝn mʊ dɔ fɔ mʊ mal bɔ bɛllɛ kangwaalɨ?’ Nʊgɔ a nyǝm bɔ jʊ gǝ gar gǝm lɛɨ.

¹³ Nǝngɔ fɔlɔgɔ a sʊwa nǝb fɛkalɨ maajɨ kangwaalɔ gɔ, ‘Jǝ́ bwabam kang gǝnɔ jǝbɔ naa gǝnɔ, jǝ́ mal gǝn a yooli, a kumtojili, n daa nɨ jǝ jim wi lɛ nǝn kʊʊtǝm nungʌni.’

¹⁴ “Ja jo nǝbɔ a lada, nǝn dǝm nyɔ ja jǝgamɨ.”

Bʌtʌm Kɛl A Dul Ywatǝm Kemʌn Tǝm Kaisarɨ

¹⁵ Nǝngɔ nǝbɔ Farisaɨ ja yɔ ya ja fwam kanga jǝ shim Yesu gǝm lanɔ lɛ a mʊgɔ jʊ gǝ sʊwa lɛɨ.

¹⁶ Nǝngɔ ja twam bɛtɔ mɛlalɨ jinɔ jǝbɔ kaam nǝbam Hiridusi a daa gǝ woi gɔ, “Nǝ mɛlalɨ, nǝn nyǝm mʊ nǝ bɨlǝngkɛl, mʊ mɛla gola Kwaamaɨ lɛ nǝn bɨlǝngǝn, nǝbɔ pʌd win a daa mʊ woi, mʊ do bɔ kaa nǝl a laa a wini.

¹⁷ Sʊwa nǝn, a mʊnɔ bʊʊlalɨgɔ, n dǝngdǝng bǝ ywa Kaisar kemʌn tǝm ka? Ka bǝ ywa lɛ ka?”

¹⁸ Yesu a nyǝm bwɨlang bʊʊlalɨ jini, nǝngɔ a sʊwa gɔ, “Jǝ́ nǝb fentogɔ, n wɛ a bwɨ jǝ́ swɨ lɛ jǝ́ tɛl ɨɨ?

¹⁹ Jǝ́ nʊng ɨ kemʌn nɨ jǝ ywam kemʌn tǝm lɛɨ.” Nǝngɔ ja bɛ gǝm nǝn kemʌn sǝlǝnɨ.

²⁰ Nǝngɔ a bʌ ji gɔ, “Duuli nɨ jǝbɔ dun nɨ na a woi?”

²¹ Nǝngɔ ja sʊwa gǝn gɔ, “Na a Kaisarɨ.” Nǝngɔ Yesu a sʊwa ji gɔ, “Jǝ́ nǝ Kaisar jʊ nɨ na a Kaisarɨ, jǝ́ nǝ Kwaama jʊ nɨ na a Kwaamaɨ.”

²² Ja nyʊwa nyɨɨ, nǝngɔ ja ta kang a nyiyoi, ja bǝla gǝn, ja shui.

Bʌtʌm Kɛl A Dul Guntǝm A Bwaa

²³ A kum gɔ, kaam nǝbɔ Sadukiyaɨ ja bɛ a daa Yesu woi. Nǝji jǝ sʊwa lɛ gɔ, mɨ guntǝm wo a bwaaɨ. Nǝngɔ ja bʌ gǝn gɔ,

²⁴ “Feyi, Musa a sʊwa gɔ, ‘Na nǝl a bʊla, a bʌ bɔ bwɛɨ, bɛ kɨla gɔ a naa nɔɔkʊlagɔ sǝ a bʌ kɨla gɔ gǝm bɛtɨ.’

²⁵ Kaam kɛb batǝn wo jǝ nʌbʌl a kʊm nǝn. Bwɛ tɨkǝgagɔ a naa nɔɔlɨ, nǝngɔ a bʊlaɨ, a bʌ bɔ bwɛ, a bǝla kɨla gɔ gǝm nwala gɔ.

²⁶ N jʊ a bwɨ nǝn na yogɨɨ, jǝbɔ na taalɨ, a yɔ nǝn a na nʌbʌlɔ gǝmɨ.

²⁷ A dɨltǝmɔ gǝm, nǝngɔ nɔɔlɨgɔ a bʊlaɨ.

²⁸ A kɔkɔ guntǝmɔ a bwaaɨ, yǝlam nwala woi a kʊm jin? Jʊ a bwɨɨ gwam jinɔ ja naa gǝn wo.”

²⁹ Yesu a jǝla ji gɔ, “Bʊʊlalɨ jenɔ mɨ dǝngdǝng, jʊ a bwɨɨ jǝ́ nyǝm bɔ mʊlalɨ kɛl Kwaamaɨ wo, jǝ́ nyǝm bɔ kwaan Kwaamaɨ wo tag.

³⁰ A guntǝmɔ a bwaaɨ, mɨ naakan wo, mɨsɔ jǝ nǝ naakan nɛ, nǝbɔ yǝlam na bɛtɔ twama Kwaamaɨ a dʌbʌl.

³¹ A kɛl guntǝmɔ a bwaaɨ, jǝ́ kiyo bɔ jʊ Kwaama a sʊwa jeni ka? Ja mʊla gɔ,

³² ‘Nǝmǝ mǝ Kwaama Ibrahimi, Kwaama Ishakui, jǝbɔ Kwaama Yakubui.’ Nǝn gɔ Kwaama nǝb nɨ nǝn kʊlɨɨ, n ke bɔ a nǝb nɨ mɨ nǝn kʊlɨɨ.”

³³ Kwama nǝbɔ a nyʊwa kɛl nɨɨ, nǝngɔ ja ta kang a nyiyo a mɛlalɨ gǝnɔ gǝmɨ.

Diil Nɨ A Kwam Kwamɨ

³⁴ Kwama nǝbɔ Farisaɨ a nyʊwa a laa nǝbɔ Sadukiyaɨ kɛlɨ, nǝngɔ ja mʊrkaɨ.

³⁵ Kaa nǝ mɛlatǝm diil a kʊm jin a maa Yesu gǝm bʌtʌm kɛl tɛltǝm gɔ,

³⁶ “Nǝ mɛlalɨ, n diil won a laa tangǝnɔ gwam a mʊgɔ diili?”

³⁷ Nǝngɔ Yesu a jǝla gǝn gɔ, “ ‘Bɛ ń swɨ Tɛlalɔ Kwaama mʊnɔ nǝn nǝl mʊnɔ gwam, nǝn dʊʊmɨ mʊnɔ gwam, jǝbɔ bʊʊlalɨ mʊnɔ gwam.’

³⁸ Wʊnɨ n diil na win. N nʊ a laa tangǝnɨ.

³⁹ Na yogɔ a jelka na winɔ, ‘Bɛ ń swɨ fwalɨ yɨm mʊnɔ kanga mʊ swɨm dul mʊnɔ lɛɨ.’

⁴⁰ Gwam diilɔ jǝbɔ mɛlalɨ nǝbkuwotǝmkǝgagɨɨ, gǝ na a mʊgɔ diil nɨ yoi.”

Bʌtʌm Kɛl A Dul Kiristii

⁴¹ Kwama nɨ nǝbɔ Farisaɨ a mʊrka daagɔ wini, nǝngɔ Yesu a bʌ ji gɔ,

⁴² “Bʊʊlalɨ jenɔ a nʊng nyǝn a dul Kiristii? Nǝn bʊla woi?” Nǝngɔ ja sʊwa gǝn gɔ, “Nǝn bʊla Daudaɨ.”

⁴³ Nǝngɔ Yesu a sʊwa ji gɔ, “Dauda nǝn kwaan Yʊwa Kwaamaɨ, a jo gǝn gɔ, ‘Tɛlalɔ,’ a maa nyǝn? Dauda gɔ,

⁴⁴ “ ‘Tɛlalɔ a sʊwa Tɛlalɔ mɨ gɔ, “Yɨ fɔ a kang jajǝng mɨ, ba la nǝn kwama nɨ mǝ ya ń nɛ a dul fatǝm kiim mʊnɨ.” ’

⁴⁵ Na Dauda a jo gǝn gɔ, ‘Tɛlalɔɨ,’ a maa nyǝn la a yǝlam bʊla gɔ tagɨ?”

⁴⁶ Ja nyǝm bɔ jʊ jǝ gar gǝm lɛɨ. A ta a kum gɨɨ, mɨ nǝn nʊ nɨ a mwɨ a bʌ gǝn kɛl tagɨ.