Matta 21 - Dadiya NT

Yesu A Dɔ Urushalima

¹ Nǝn kwama Yesu jǝbɔ bɛtɔ mɛlalɨ gǝnɔ ba ja dwama Urushalimagɨɨ, ja bɛ a Betafaji a Yem Zaituni, nǝngɔ a twam bɛtɔ mɛlalɨ gǝnɔ yoi.

² A sʊwa ji gɔ, “Jǝ́ dɔ tuulɔ nɨ a kǝga jeni. Na jǝ́ dɔ lɛɨ, jǝ́ kuwo kuwo lungsongɔ ja kwa kwaɨ, jǝbɔ bʊla gɔ. Jǝ́ kwɨ, jǝ́ bɛ mɨ nǝn.

³ Na kaa nǝl a bʌ jen kɛlɨ, jǝ́ sʊwa gǝn jengɔ, ‘Nǝn Tɛlalɔ swɨ ji lɛɨ.’ Nǝ jen nǝ tʌgo a kang.”

⁴ Jʊ nɨ a bwɨ nyɔ sǝ a yii kɛl nɨ nǝkuwotǝmkǝga Zakariya a sʊwa gɔ,

⁵ “Jǝ́ sʊwa nǝbɔ Sihiyonaɨ jengɔ, ‘Fɔlɔ jenɔ n wɔ bɛ lɛ a daa jen woi, mɨ gung dul lɛ, bɛ lɛ a dʌbʌl lungsong, n kal lungsong.’ ”

⁶ Nǝngɔ bɛtɔ mɛlalɨgɔ ja yɔ ya ja maa kanga Yesu a sʊwa jii.

⁷ Ya ja bɛ nǝn lungsongɔ jǝbɔ bʊla gɨɨ. Ja ma jim dwangtɨn jinɔ, nǝngɔ a gwi a yɨɨ.

⁸ Nǝbɔ a lada a ma dwangtɨn jinɔ a golaɨ, kaam nǝbɔ a kǝlala langǝn tɨyantɨn nǝngɔ ja ma a golaɨ.

⁹ Nǝb nɨ a kǝga gǝnɨ jǝbɔ nǝb nɨ bwang gǝm lɛ a guli, ja gung diilɔ jǝ sʊwa lɛ gɔ, “Bǝlátǝmɔ n dǝngdǝng a dul bʊla Daudaɨ! Bwiligɔ na a nʊ nɨ bɛ lɛ a dun Tɛlalɔɨ! Bǝlátǝmɔ na a Kwaama dʌbʌli!”

¹⁰ Kwama Yesu a dɔm Urushalimaɨ, tuulɔngɔ a koma. Nǝbɔ bʌbko lɛ gɔ, “Nʊ nɨ nuwo nyɨɨ?”

¹¹ Nǝngɔ nǝb nɨ bwang Yesu gǝm lɛɨ, ja sʊwa gɔ, “Nʊ nɨ nǝn Yesu nǝkuwotǝmkǝga nɨ a Nazarat a tǝm Galilii.”

Yesu A Jǝg Nǝb Dʌbogɔ A Talɨ Kan Kwaaman

¹² Yesu a dɔ mʊgɔ talɨ Kan Kwaamanɔ, a kaa nǝb miyotǝmɔ jǝbɔ nǝb tentǝmɔ woi. A tʊngam tebur nǝb nɨ fʌto kemʌn nɛɨ jǝbɔ kotere nǝb nɨ miyo baatitɨn nɛɨ.

¹³ Nǝngɔ a sʊwa ji gɔ, “A mʊla mʊlaɨ gɔ, ‘Lɔ mǝndɨ jǝ jo gɔ kan keli.’ A jenɔ jǝ́ do jǝ́ maam gaatɛ nǝbkuumi.”

¹⁴ Nǝngɔ kululʌmɔ jǝbɔ nǝbɔ a swam swamɨ ja bɛ a daa gǝ woi a Kan Kwaamanɨ, nǝngɔ a gung jii.

¹⁵ Dʊʊm nǝbkǝlamɔ jǝbɔ nǝb mɛlalɨ diilɔ ja kuwo jǝ laatǝm kang nɨ ga maaɨ, jǝbɔ bɛtɨ gung diilɔ lɛ a Kan Kwaaman jǝ sʊwa lɛ gɔ, “Bǝlátǝmɔ na a Bʊla Daudaɨ,” nǝngɔ ja nyʊwa nabwɨlɨ.

¹⁶ Ja sʊwa gǝn gɔ, “Ń nyʊwa jʊ nǝb nɨ sʊwa lɛɨ ka?” Yesu a jǝla ji gɔ, “Ɔɔ. Jǝ́ kiyo bɔ wo nyɔ a mʊgɔ langǝn bwangǝn Kwaamaɨ gɔ, “ ‘Nǝmɔ mʊ fɛka kǝtǝn bɛtɨ lɛɨ jǝbɔ bɛtɨ fetʌnɔ sǝ ja maa mʊn bǝlátǝmɨ ka?’ ”

¹⁷ Nǝngɔ a bǝla ji, a jelʌm a tuulɔ gɨɨ, a shu a Betanya ya daa woi.

Yesu A Lag Tɨya Dʌfengɔ

¹⁸ Nǝn tǝmsɛlɨ, kanga Yesu a yǝla bɛ lɛɨ, jʊwanɔ a ta gǝn.

¹⁹ A kuwo kaa tɨya dʌfengɔ a kʌng golaɨ, nǝngɔ a yɔ a daa tɨyagɔ woi, a nya bɔ tʊʊl wo, ka langǝn. Nǝngɔ a lag tɨyagɨɨ gɔ, “Mɨsɔ mʊ tʊʊ tʊʊl lɛ wo tag.” Tʌgo a kang tɨyagɔ a swamǝm.

²⁰ Bɛtɔ mɛlalɨ gǝnɔ ja kuwo nyɨɨ ja ta kang a nyiyo. Jǝ sʊwa lɛ gɔ, “A maa nyǝn tɨya dʌfeng nɨ a swamǝm tʌgo a kangɨ?”

²¹ Yesu a jǝla ji gɔ, “N bɨlǝngǝn mǝ sʊwa jen nɛɨ, na jen nǝn nǝtǝm bɨlǝngkɛl jǝ́ kǝma bɨɨ, ke bɔ jʊ mǝ maa tɨya dʌfengɔ gǝm kwaagɔ jǝ́ maa lɛɨ, jǝ́ maa maa a laa nyɔ. Jǝ́ sʊwa sʊwa yem nɨ jengɔ, ‘Gun ya ń tɨ a mʊgɔ wɨma,’ maa maa nyɔ.

²² Na jǝ́ nǝ bɨlǝngkɛlɨ, jʊ nɨ gwam jǝ́ kela Kwaama a mʊgɔ keli, jǝ́ nya nya.”

Jǝ Bǝng Fɔlɔn Yesui Lɛ

²³ Yesu a dɔ Kan Kwaamanɨ, a mʊgɔ maatǝm mɛlalɨ, nǝngɔ dʊʊm nǝbkǝlamɔ jǝbɔ nǝb dʊʊm nǝbɨɨ ja bɛ a daa gǝ woi, ja bʌ gǝn gɔ, “N fɔlɔn woi mʊ maa jǝ laatǝm kang nɨ lɛ nǝnɨ? Nuwo a nǝ ń fɔlɔn nɨɨ?”

²⁴ Nǝngɔ Yesu a jǝla ji gɔ, “Mǝ tǝmɨ mǝ nǝn kɛl nɨ mǝ bʌ jen nɛɨ, na jǝ́ jǝla bʌtʌm kɛl mǝndɨ dǝngdǝngɨ, mǝ sʊwa jen sʊwa fɔlɔn nʊ nɨ mǝ maam jʊtǝb nɨ lɛɨ.

²⁵ Fɔlɔn yʊtǝm mwɛ sagsag Yohanaɨ a jel a fee? A jel a daa Kwaama woi ka? A jel a daa nǝfili woi ka?” Nǝngɔ jǝ sʊwaka lɛ a bʊtɔ ji daddad gɔ, “Na bǝ sʊwa bǝngɔ a jel a daa Kwaama woi, sʊwa sʊwa gɔ, ‘N wɛ a bwɨ jǝ́ nǝ bɔ bɨlǝngkɛl nǝn gɨɨ?’

²⁶ Na bǝ sʊwa bǝngɔ, ‘A jel a daa nǝfili woi,’ bǝ nyʊwa taal lɛ jʊ nǝfitʌmɔ maa bǝm lɛɨ, jʊ a bwɨɨ nǝbɔ gwam a do Yohana n nǝkuwotǝmkǝga.”

²⁷ Nǝngɔ ja jǝla Yesu gɔ, “Nǝn nyǝm bɔ.” Nǝngɔ a sʊwa ji gɔ, “Mǝ tǝmɨ mɨsɔ mǝ sʊwa jen fɔlɔn nʊ nɨ lɛ mǝ maam kanjǝl nɨ lɛ nǝnɨ.

Mʊsǝn Kɛl A Dul Nʊ Nɨ Nǝn Bɛtɨ Yoi

²⁸ “Jǝ́ kuwo nyǝn? Kaa nǝl wo nǝn bɛtɔ batǝnɔ yo. A yɔ a daa bwɛ tɨkǝgagɔ woi, nǝngɔ a sʊwa gǝn gɔ, ‘Bʊla mɨ, dwiyen yɔ ya maa maajɨgɔ a mʊgɔ tɔtwam.’

²⁹ “Nǝngɔ bwɛ a sʊwa gǝn gɔ, gǝ yɔ bɔ. Nǝn gul nǝngɔ a maa bʊʊlalɨ nǝngɔ a shui.

³⁰ “Nǝngɔ tɛ bwɛ a yɔ a daa bʊla gǝ na yogɔ woi, ya sʊwa gǝn kɛlɔ kanga a sʊwa bwɛ tɨkǝgagɨɨ. Nǝngɔ bwɛ a sʊwa gɔ, ‘Mǝ yɔ yɔ tɛtɛ.’ Nǝngɔ a kɔ a yɔ bɨɨ.

³¹ “A mʊgɔ ji nɨ yoi, n nʊ won a maa jʊ tɛtɛ ji swɨ lɛɨ?” Nǝngɔ ja sʊwa gɔ, “N bwɛ tɨkǝgagɔ.” Nǝngɔ Yesu a sʊwa ji gɔ, “N bɨlǝngǝn mǝ sʊwa jen nɛɨ, nǝb yotǝm kemʌn tǝmɔ jǝbɔ nɔɔtǝm bulonɔ jǝ dɔ dɔ fɔlɔn lɔ Kwaamaɨ ja laa jen.

³² Yohana ba nʊng jen gola dǝngdǝngɔ, jǝ́ nǝ bɔ bɨlǝngkɛl nǝn gɔ. Nǝb yotǝm kemʌn tǝmɔ jǝbɔ nɔɔtǝm bulonɔ ja nǝ bɨlǝngkɛl nǝn kɛl Yohanaɨ. Jǝ́ kuwo nyɨɨ, jǝ́ yǝla bɔ jǝ́ bǝla bwɨlangkɛl jenɔ, jǝ́ nǝ bɨlǝngkɛl nǝn gɔ.

Mʊsǝn Kɛl A Dul Nǝb Nɨ A Yo Twam Fogfogi Ywatǝmɨ

³³ “Kaa mʊsǝn kɛlɔ wɔ tag. Kaa nǝl wo a kwal tɔtwam fogfogi, a kang nǝn kwalɨ, a wʊ bʊwa yamtǝm tʊʊl fogfogigɔ. A fɛ sǝlɨgɔ a deba nyɔ na dʌngtǝm tɔtwam. Nǝngɔ a nǝ kaam nǝb gɔ ya ja jʊng lɛɨ, nǝngɔ a shu a kaa tǝmɨ.

³⁴ Kwama kwasatǝmɔ a laɨ, nǝngɔ a twam kaam jwaalɛb gǝnɔ gɔ, ‘Jǝ́ yɔ a daagɔ nǝb nɨ mǝ nǝ ji twam ywatǝmɨ, jǝ́ yo mɨ a mɨ tʊʊl tɨyagɔ.’

³⁵ “Nǝngɔ nǝb nɨ a yo twam ywatǝmɨ a taba bɛtɔ jwaalɛb nɨɨ, ja maa a wini gǝm bʊgǝn, ja jʌ a wini, ja mala a wini nǝn tɛl, a bʊla.

³⁶ Nǝngɔ a twam kaam jwaalɛbɨɨ, ja lada ja laa na tɨkǝgagɔ. Nǝb nɨ ga nǝ ji twam ywatǝmɨ ja maa nǝb nɨ gǝm jʊ ja maa nǝb tɨkǝgamɔ gǝmɨ.

³⁷ A dɨltǝmɔ gǝm, nǝngɔ nǝ twamɔ a twam bwɛ bʊla gɨɨ gɔ, ‘Jǝ nǝ nǝ bʊla mɨ dʊʊn.’

³⁸ “Kwama nǝb nɨ ga nǝ ji twam ywatǝmɨ ja kuwo bʊla gɨɨ, nǝngɔ ja sʊwaka a bʊtɔ ji gɔ, ‘Nǝ wɔɔtǝm kʊla twamɔ n wɔ, bǝ jʌm gǝn sǝ kʊlagɔ a yǝlam a bǝn!’

³⁹ Nǝngɔ ja ta gǝnɨ, ja ma gǝn a gul kwalɨ tɔtwam ja jʌm gǝnɨ.

⁴⁰ “Na nǝ tɔtwamɔ a yǝla a bɛɨ, n wɛ ba maa nǝb nɨ gǝm lɛɨ?”

⁴¹ Nǝngɔ nǝbɔ a sʊwa gǝn gɔ, “Ba maa maa bwɨlang nǝb nɨ gǝm jʌtǝm bwɨla, sǝ a nǝ kaam nǝb twam ywatǝmɔ, wʊnɨ ya jǝ nǝ gǝn tʊʊl tɨya gǝnɔ lɛ na ja kwasaɨ.”

⁴² Yesu a sʊwa ji gɔ, “Jǝ́ kiyo bɔ wo a mʊlalɨ langǝn bwangǝn Kwaamaɨ ka? Wʊnɨ sʊwa lɛ gɔ, “ ‘Tɛl nɨ nǝb mɔtǝm kanɔ a kɔɨ, nǝn gɔ a yǝlam tɛl fʌlʌm kanɨ. Jʊ nɨ n maatǝm Tɛlalɔɨ, n jǝ laatǝm kang a daa bǝn woi.’

⁴³ “A dul kɛl nɨɨ, mǝ sʊwa jen nɛ, jǝ yem yem fɔlɔn lɔ Kwaamaɨ a kang jen, sǝ ja nǝ nǝb nɨ maa Kwaama gǝm jǝ nyan nɛɨ. [

⁴⁴ Nʊ nɨ a yal a dʌbʌl tɛl nɨɨ, kǝlala kǝlala. Na nʊ nɨ tɛl nɨ a yal a dul gǝnɨ, kʊwa gǝn sǝ ga yǝlam na mim.”]

⁴⁵ Dʊʊm nǝbkǝlamɔ jǝbɔ nǝbɔ Farisaɨ ja nyʊwa mʊsǝn kɛl nɨ Yesu a sʊwaɨ, nǝngɔ la ja nyǝm gɔ kɛl nɨ gǝ sʊwa a dul jin.

⁴⁶ Jǝ swɨ lɛ ja ta gǝn sul, jǝ nyʊwa taal nǝbɨɨ lɛ, jʊ a bwɨɨ nǝbɔ a do gǝn gɔ n nǝkuwotǝmkǝga.