Matta 19 - Dadiya NT

Mɛlalɨ Yesui A Dul Jʌtǝm Naakan

¹ Nǝn kwama Yesu a dɨm sʊwatǝm kɛltɨn nɨ gwamɨ, nǝngɔ a bǝla Galiligɨɨ, a shu a Yahudiya nɨ a dʌng Tiyo Urduni.

² Nǝbɔ a lada dangǝn na ja bwang gǝmɨ, nǝngɔ a gung ji a twɨla jinɔ gǝmɨ.

³ Nǝngɔ kaam nǝbɔ Farisaɨ a bɛ a daa gǝ woi, sǝ ba jǝ tɛl gǝnɨ. Ja bʌ gǝn gɔ, “A diil bǝnɔ gǝmɨ, n dǝngdǝng nǝl a dem kang a nwala gɔ gǝm, a gola kaa kɛl ka?”

⁴ Yesu a jǝla ji gɔ, “Jǝ́ kiyo bɔ wo nyɔ gɔ, nʊ nɨ a fɛ ji a tǝltǝm yoolii, a fɛ balɨ jǝbɔ nɔɔlɨɨ ka?

⁵ Langǝn bwangǝnɔ a sʊwa gɔ, ‘A dul kɛl nɨɨ, nǝl bǝla bǝla tɛtɛ gɔ jǝbɔ nɛnɛ gɔ, a yɨɨ dakini jǝbɔ nwala gɔ. Ji yo nɨɨ, ja yǝlam bʊtɔgɔ win.’

⁶ A kǝga nɨ jǝ ke bɔ yo tag, ja yǝlam bʊtɔgɔ win. Jʊ nɨ Kwaama a mʊrkaɨ, ka nǝfili ya kwɨ lɛ.”

⁷ Nǝngɔ ja bʌ gǝn gɔ, “N wɛ a bwɨ Musa a sʊwa gɔ ja mʊla langǝn bwangǝn jʌtǝm naakan, ja dem kang a nɔɔlɨ gǝmɨ?”

⁸ Yesu a sʊwa ji gɔ, “N bǝngɨ lɔl jenɔ Musa a jǝla jem gɔ jǝ́ dem kang a nɔɔtǝm jenɔ gǝmɨ, galɨgǝnɨ mɨ nyɔ.

⁹ Mǝ sʊwa jen nɛ, gwam nʊ nɨ a dem kang a nwala gɔ gǝmɨ, na ke bɔ a kɛl buloni, na ga naa kaaɨ, gǝ maa bulon. Nʊ nɨ a naa nɔɔlɨ nɨ ja dem kangɨ, gǝ maa bulon.”

¹⁰ Nǝngɔ bɛtɔ mɛlalɨ gǝnɔ a sʊwa gǝn gɔ, “Na gǝ na nyɔ a kʊm balɨ jǝbɔ nwala gɨɨ, a laa jǝl ka batǝmɔ ya naa lɛ nɔɔlɨ.”

¹¹ Nǝngɔ a sʊwa ji gɔ, “N ke bɔ nǝbɔ gwam jǝ maa maajɨ lɛ nǝn kɛl nɨɨ, na ke bɔ nǝb nɨ Kwaama a nǝ ji kwaanɨ.

¹² Kaam nǝbɔ wo ja bʌ ji mɨ ji a lɔ, kaamɨ nǝb a maa jim nyɨɨ, kaamɨ a swɨ bɔ naakan n kɛl dul fɔlɔn lɔ Kwaamaɨ. Gwam nʊ nɨ dwal maatǝmɔ lɛ nyɨɨ, bɛ ga maa.”

Yesu A Dǝg Bɛtɔ Dwalǝnɔ Gǝm Bwili

¹³ Nǝngɔ ja bɛ gǝm nǝn bɛtɔ dwalǝnɔ sǝ ga dǝg jim bwili, ga maa jim kelii. Nǝngɔ bɛtɔ mɛlalɨ gǝnɔ a ga nǝb nɨ bɛ lɛ nǝn bɛtɨɨ.

¹⁴ Yesu a sʊwa gɔ, “Jǝ́ bǝla bɛtɔ dwalǝnɔ a bɛ a daa mɨ woi. Bɛ ka jǝ́ kaa ji lɛ. Fɔlɔn lɔ Kwaamaɨ na a jii.”

¹⁵ A ya jim kang bwiligɨɨ, nǝngɔ a shui.

Bwayǝlɨ Nǝ Shilo

¹⁶ Kaa nǝl a kʌl a bɛ a daa Yesu woi gɔ, “Feyi, n maajɨ nyan wɛ mǝ maa lɛ sǝ n nya kʊlɨ nɨ mɨ dɨtǝm woi?”

¹⁷ Nǝngɔ a sʊwa gǝn gɔ, “N wɛ a bwɨ mʊ bʌ i maajɨ nyan nɛɨ? Nǝ maatǝm jǝ nyanɔ win, nǝn Kwaama kwaagɔ. Na mʊ swɨ lɛ ń nya kʊlɨ nɨ mɨ dɨtǝm woi, bɛ ń kɨla diiltɨn nɨɨ.”

¹⁸ Nǝngɔ a bʌ gɔ, “Diiltɨn gɔ n nǝb won?” Nǝngɔ Yesu gɔ, “Bɛ ka ń jʌ lɛ nǝl. Bɛ ka ń maa lɛ bulon. Bɛ ka ń kuu lɛ kuul. Bɛ ka ń maa lɛ gabakɛl.

¹⁹ Nǝ tɛtɛ mɔ dʊʊn jǝbɔ nɛnɛ mɔ. Bɛ ń swɨ fwalɨ yɨm mʊnɔ, kanga mʊ swɨm dul mʊnɔ lɛɨ.”

²⁰ Nǝngɔ bwayǝlɨ nɨ a sʊwa gǝn gɔ, “N kɨla kɨlaɨ diiltɨn nɨ gwam. N wɛ a taam mɨ mǝ maa lɛɨ?”

²¹ Nǝngɔ Yesu a sʊwa gɔ, “Na mʊ swɨ lɛ ń yǝlam dǝngdǝngɨ, yɔ ya miyo jʊ mʊ nǝnɨ gwam, ń nǝ nǝb bʊnǝnɔ, mʊ nya nya shilo a dʌbʌl kwama, sǝla ń bɛ ba ń bwang mɨ.”

²² Bwayǝlɨ nɨ a nyʊwa nyɨɨ, nǝngɔ a shu nǝn kaltǝm nǝlɨ, jʊ a bwɨɨ n nǝ shilo dangǝn.

²³ Nǝngɔ Yesu a sʊwa bɛtɔ mɛlalɨ gǝnɔ gɔ, “N bɨlǝngǝn mǝ sʊwa jen nɛɨ, bwa bwa sǝ nǝ shilo a nya dɔtǝm fɔlɔn lɔ Kwaamaɨ.

²⁴ Mǝ sʊwa jen nɛ tag, bwa nɨ namtenʌm a dɔ bʊwa lalʌmʌn, na nǝ shilo dɔ dɔ fɔlɔn lɔ Kwaamaɨ.”

²⁵ Kwama nɨ bɛtɔ mɛlalɨgɔ a nyʊwa kɛl nɨɨ, ja ta kang a nyiyo, ja sʊwa gɔ, “Na gǝ na nyɨɨ, nuwo la nya bʊʊtǝm lɛɨ?”

²⁶ Yesu a dʌng jii, nǝngɔ a sʊwa gɔ, “A daa nǝbɔ woi mɨsɔ maa lɛ, a daa Kwaama woi kanjǝlɔ gwam maa maa.”

²⁷ Nǝngɔ Bitrus a sʊwa gɔ, “N wɔ nǝn bǝla kanjǝl nǝnɔ gwam, nǝn bwang mʊn. N wɛ nǝn nya lɛɨ?”

²⁸ Yesu a sʊwa ji gɔ, “N bɨlǝngǝn mǝ sʊwa jen nɛɨ, yooligɔ bɛ lɛ wo, n kwama Bʊla Nǝlɨ yɨm lɛ a kotere fɔlɔn dʊʊn gǝn a maa fɔlɔnɨ, jen nɨ jǝ́ bwang mɨɨ, nǝjen jǝ́ yɨ lɛ a kotere fɔlɔn nǝbɔ Israilaɨ nɨ kʊb jeli yoi. Jǝ́ maa maa fɔlɔn nǝbɔ Israilaɨ nɨ kʊb jeli yoi.

²⁹ Gwam nʊ nɨ a bǝla lɔ gǝnɨ, a bǝla kɛtǝlam gǝnɔ batǝn jǝbɔ a nɔɔtǝn, bǝ tɛtɛ gɔ jǝbɔ nɛnɛ gɔ, bɛtɨ jǝbɔ twamtɨn gǝnɔ, a kɛl dun mɨɨ, nya nya naagɔ fʊlkʊb, jǝbɔ nyatǝm kʊlɨ nɨ mɨ dɨtǝm woi.

³⁰ Nǝb kǝgamɔ a lada, yǝlam nǝb gul, nǝb gulɔ yǝlam nǝb kǝgam.