Matta 16 - Dadiya NT

Saatǝm Jǝ Nʊngtǝm

¹ Kaa di nǝbɔ Farisaɨ jǝbɔ nǝbɔ Sadukiyaɨ, ja bɛ sǝ ja tɛl gǝn, sǝ ga nʊng ji kaa jǝ laatǝm kang a dʌbʌl, wʊnɨ yǝlam jim jǝ nʊngtǝm lɛɨ.

² Nǝngɔ a jǝla ji gɔ, “Na jǝ́ kuwo langǝn lul feligɔ a dʌbʌl nǝn kwaamɨɨ, jǝ́ sʊwa sʊwa jengɔ, ‘Fʌng tǝmɔ bʊm bʊm.’

³ Na nǝn kumsʌl jǝ́ kuwo langǝn lulɔ a fo a gaba dʌbʌlɔ nyɨɨ, jǝ́ sʊwa sʊwa jengɔ, ‘Dwiyen jǝ maa maa yʊwa mwɛ.’ Jǝ́ nyǝm yǝlatǝm dʌbʌl kwamagɔ, mɨsɔ jǝ́ dwal lɛ jǝ́ nyǝm jʊ yǝlatǝm joltɨn nɨ nʊng lɛɨ.

⁴ Kal nɨ, nǝb bwɨlan, mɨ jǝ nyʊwa taal Kwaamaɨ lɛ. Jǝ swɨ lɛ ja kuwo jǝ nʊngtǝm! Mɨ kaa jʊ nɨ wo jǝ nʊng ji lɛɨ, na ke bɔ a Yunanaɨ.” Nǝngɔ a bǝla ji, a shui.

Yisti Nǝbɔ Farisaɨ Jǝbɔ A Nǝbɔ Sadukiyaɨ

⁵ Nǝn kwama bɛtɔ mɛlalɨ gǝnɔ a lam kʌng wɨma wini, ja bʊʊla gɔ jǝ twabǝm jǝ do bɔ kʊkkʊmɔ.

⁶ Nǝngɔ Yesu a sʊwa ji gɔ, “Bɛ jǝ́ nyǝm, jǝ́ kɨla yisti nǝbɔ Farisaɨ jǝbɔ a nǝbɔ Sadukiyaɨ.”

⁷ Nǝngɔ ja sʊwaka a kʊm jin gɔ, “N kɛlɔ bǝ bɛ bɔ nǝn kʊkkʊmɨ.”

⁸ Yesu a kwɛl a nyǝm bʊʊlalɨ jini, nǝngɔ a sʊwa gɔ, “Jen, jǝ́ nǝb nɨ nǝn nǝtǝm bɨlǝngkɛl nǝn dǝm nyɨɨ, n wɛ a bwɨ jǝ́ sʊwa lɛ a kʊm jen, jengɔ mɨ jen nǝn kʊkkʊmɨ?

⁹ Jǝ́ nyǝm bɔ dwal ka? Jǝ́ bʊʊla bɔ kanga mǝ ja nǝn nǝbɔ fʊlkʊblǝn nʊ nǝn kʊkkʊmɔ nʊɨ ka? Jǝ́ bʊʊla bɔ tunɔ nyǝn jǝ́ mʊr fʌtʌlogi gǝnɨ?

¹⁰ Jǝ́ bʊʊla bɔ tag jǝbɔ kʊkkʊmɔ nʌbʌl jǝbɔ nǝbɔ fʊlkʊblǝn naalɨ ka? Jǝ́ bʊʊla bɔ daltɔ tunɔ nyǝn jǝ́ yii nǝn fʌtʌlogi gǝnɔ jǝ́ mʊrɨ ka?

¹¹ N wɛ bwɨ jǝ́ nyǝm bɔ gɔ n ke bɔ kʊkkʊm mǝ sʊwa kɛl lɛ a dul gǝnɨ? Bɛ jǝ́ kɨla yisti nǝbɔ Farisaɨ jǝbɔ a nǝbɔ Sadukiyaɨ.”

¹² Nǝngɔ la ja nyǝm gɔ n ke bɔ yisti kʊkkʊmɨ sʊwa ji lɛɨ. Gǝ sʊwa ji mɛlalɨ kanjǝl nǝbɔ Farisaɨ jǝbɔ a nǝbɔ Sadukiyaɨ.

Sʊwatǝm Bitrusi Gɔ Yesu Nǝn Kiristi

¹³ Nǝn kwama Yesu a dɔ tǝm Kaisar Filibii, nǝngɔ a bʌ bɛtɔ mɛlalɨ gǝnɔ gɔ, “Nǝbɔ gǝ sʊwa gɔ Bʊla Nǝlɨ nuwo?”

¹⁴ Nǝngɔ ja jǝla gɔ, “Kaamɨ sʊwa lɛ gɔ mʊ nǝn Yohana nǝ Yʊtǝm mwɛ Sagsagɔ, kaamɨ gɔ mʊ nǝn Iliya nǝkuwotǝmkǝga, kaamɨ tag gɔ mʊ nǝn Irimiya, kaamɨ gɔ mʊ na kaa win a mʊgɔ nǝbkuwotǝmkǝga.”

¹⁵ Nǝngɔ a bʌ ji gɔ, “A jenɔ jǝ́ sʊwa jengɔ mǝ nǝn nuwo?”

¹⁶ Nǝngɔ Saminu Bitrus a jǝla gɔ, “Mʊ nǝn Kiristi, Bʊla Kwaamaɨ, Nǝ kʊlɨ.”

¹⁷ Nǝngɔ Yesu a sʊwa gǝn gɔ, “Saminu bʊla Yunanaɨ, bɛ Kwaamagɔ a nǝ ń bwili. Ke bɔ nǝfili a nǝ ń kwaan nyǝmtǝm jʊ nɨɨ, Tɛtɛ mɨ nɨ a kwamaɨ nǝn gɔ a nʊng ń nɨ.

¹⁸ Mǝ sʊwa ń nɛ, mʊ nǝn Bitrus, a dul sunte nɨ mǝ mɔ mʊrkalɨ nǝb bwangtǝm mǝndɨ lɛɨ, wʊnɨ bwaagɔ mɨ nǝn kwaan a dul gǝnɨ.

¹⁹ Mǝ nǝ ń nǝ ń jǝ wumtǝm nyanga kantɨn fɔlɔn lɔ Kwaamaɨ. Jʊ nɨ mʊ bwa a tǝm nɨɨ, jǝ bwa bwa nyɔ a dʌbʌl kwama. Jʊ nɨ mʊ kwɨ a tǝm nɨɨ, jǝ kwɨ kwɨ nyɔ a dʌbʌl kwama.”

²⁰ Nǝngɔ a gʊ lɔl bɛtɔ mɛlalɨ gǝnɔ gɔ bɛ ka ja sʊwa lɛ kaa nǝl gɔ, gǝ nǝn Kiristi.

Yesu A Sʊwa Bwaa Gǝnɔ Jǝbɔ Guntǝm Gǝnɔ

²¹ A kumtɨn gɔ, Yesu a tǝl fɛta bɛtɔ mɛlalɨ gǝnɔ kɛlɔ lɛ gɔ, “A yǝlam nyɔ n yɔ a Urushalima, mǝ nɔɔ nɔɔ gaalan nǝn dʌmʌn a kang nǝb dʊʊmɨ, jǝbɔ dʊʊm nǝbkǝlamɔ jǝbɔ nǝb mɛlalɨ diilɔ. Jǝ jʌ i jʌ i. A kum na taalɔ gǝm, mǝ gun gun nǝn dʊʊmɨ.”

²² Nǝngɔ Bitrus a gʊ gǝn gwanga win a tǝl wɛla gǝm lɛɨ, sʊwa lɛ gɔ, “Bɛ Kwaamagɔ a shigʌm Tɛlalɔ, tǝmɔ gun nǝngǝn, mɨ nǝn jʊ nɨ bwɨ lɛ nǝn mʊɨ.”

²³ Nǝngɔ Yesu a yǝla a sʊwa Bitrus gɔ, “Yǝla a gul mɨ Mamm! Mʊ tɛl fǝtǝm naa a daa mǝ woi, jʊ a bwɨɨ mʊ ya bɔ bʊʊlalɨ mʊnɔ a kanjǝl Kwaamaɨ, mʊ maa bʊʊlalɨ nǝfitʌmi.”

²⁴ Nǝngɔ Yesu a sʊwa bɛtɔ mɛlalɨ gǝnɨ gɔ, “Na nʊ nɨ swɨ lɛ a bwang mɨɨ, bɛ ga kɔ dul gǝnɔ, ga do tɨya kʊʊtǝm gǝnɔ, ga bwang mɨ.

²⁵ Nʊ nɨ swɨ lɛ a bʊʊ nǝn kʊlɨ gǝnɨ, jʊ jʊ. Na nʊ nɨ a jʊ kʊlɨ gǝnɔ a kɛl dul mɨɨ, nya nya dʊʊmɨ gǝnɔ.

²⁶ N wɛ nǝl nya lɛɨ, na nǝl a nya yooli nɨ gwam, a nya bɔ kʊlɨ gǝnɔ a lɔ Kwaamaɨ? Wɛ nǝl nǝ lɛ sǝ a yǝla a fʌto kʊlɨ gǝnɨ?

²⁷ Bʊla Nǝlɨ bɛ bɛ nǝn dʊʊlǝn Tɛtɛ gɨɨ jǝbɔ bɛtɔ twama gǝnɔ. Ywa ywa nǝbɔ win win a jʊ ja maaɨ.

²⁸ Bɨlǝngkɛl mǝ sʊwa jen nɛɨ, kaam nǝb nɨ tɨlam fǝɨ, mɨsɔ jǝ bʊla lɛ, na ja kuwo bɔ Bʊla Nǝlɨ bɛ lɛ a mʊgɔ fɔlɔn gǝnɔ gǝmɨ.”