Matta 15 - Dadiya NT

Jǝfʊlǝn Nǝb Dʊʊmɨ

¹ Nǝngɔ kaam nǝbɔ Farisaɨ jǝbɔ nǝb mɛlalɨ diilɔ a jel a Urushalima ja bɛ a daa Yesu woi, ja bʌ gǝn gɔ,

² “N wɛ a bwɨ bɛtɔ mɛlalɨ mʊnɔ mɨ bwangtǝn jǝfʊlǝn nǝb dʊʊm bǝnɔ lɛɨ? Mɨ jǝ saal kang jinɔ lɛ sǝla ja ja jǝjalǝnɨ.”

³ Nǝngɔ a jǝla ji gɔ, “N wɛ a bwɨ mɨ jǝ́ bwangtǝn diil Kwaamaɨ lɛ a kɛl dul jǝfʊlǝn jeni?

⁴ Kwaama a sʊwa gɔ, ‘Nǝ tɛtɛ mɔ jǝbɔ nɛnɛ mɔ dʊʊn.’ A sʊwa gɔ, ‘Na nʊ nɨ a sʊwa kɛl bwɨla a dul tɛtɛ gɨɨ jǝbɔ nɛnɛ gɨɨ, bɛ ja jʌ gǝn!’

⁵ A jenɔ jǝ́ sʊwa jengɔ, ‘Na nǝl a sʊwa tɛtɛ gɔ jǝbɔ nɛnɛ gǝ gɔ, “Kanjǝl nɨ na mǝ tɨka jen nɛ nǝnɨ, n kwɛl n swa swaɨ Kwaama gǝm yaa nǝngǝn!” ’ Na ga sʊwa nyɨɨ, jǝ́ mɛla jengɔ ga nǝ bɔ tɛtɛ gɔ dʊʊn.

⁶ N jʊ a bwɨ jǝfʊlǝn jenɔ a dǝg jen mɨ jǝ́ bwangtǝn kɛl Kwaamaɨ lɛɨ.

⁷ Nǝb fento nǝn kwan! N dǝngdǝng Ishaya a maa kuwotǝmkǝga a dul jeni, kwama a sʊwa gɔ,

⁸ “ ‘Nǝb nɨ jǝ nɨ ɨ dʊʊnɔ a nyiyo kwaagɔ. Mʊgɔ nǝl jinɔ a kʊta jǝbɔ mǝ.

⁹ Jǝ jʊng jǝ nɨ ɨ dʊʊn nǝn kwan, jǝ maa mɛlalɨ diil nǝfitʌmi maamɔ n mɛlalɨ diil Kwaamaɨ jǝ maa lɛɨ.’ ”

Kanjǝl Nɨ Gǝ Dǝg Nǝbɔ Lɛ A Dutoi

¹⁰ Yesu a jo nǝbɔ a bɛ a daa gǝ woi, nǝngɔ a sʊwa ji gɔ, “Jǝ́ nyʊwa sǝ jǝ́ nyǝm.

¹¹ Ke bɔ kanjǝl nɨ gǝ dɔ lɛ a nyiyo nǝlɨ gǝ kal gǝn nɛɨ, n kanjǝl nɨ gǝ jel lɛ a nyiyo nǝlɨ gǝ kal gǝn nɛɨ.”

¹² Nǝngɔ bɛtɔ mɛlalɨ gǝnɔ a bɛ a daa gǝ woi ja bʌ gǝn gɔ, “Mʊ nyǝm bɔ nǝbɔ Farisaɨ a maa nabwɨl nǝn kwama ja nyʊwa kɛl nɨɨ ka?”

¹³ Nǝngɔ Yesu a jǝla ji gɔ, “Jʊtǝb nɨ gwam ke bɔ Tɨya mɨ nɨ a kwamaɨ a kwalɨ, jǝ kubom kubom.

¹⁴ Jǝ́ bǝla ji wo, jǝ kululʌm, n nǝbɔ ta kululʌmɔ gǝm kang lɛɨ. Na kuli a ta kuli gǝm kangɨ, ya ja tǝla a bʊwa gwam jinɔ.”

¹⁵ Nǝngɔ Bitrus a sʊwa gɔ, “Fɛta nǝn mɛlalɨ mʊsǝn kɛl nɨ.”

¹⁶ Nǝngɔ a sʊwa ji gɔ, “Jen jǝ́ nyǝm bɔ kǝngkɔ dwal ka?

¹⁷ Mǝ nʊng jʊ nɨ nǝl a jaɨ, dɔ a nyiyo gǝn dɨn, sǝla a gǝla mʊgɔ fʌl. Nǝn gul sǝla ba jel a daa tɛltǝm fʌl.

¹⁸ Kanjǝl nɨ jel lɛ a mʊgɔ nyiyoi, gǝ jel a mʊgɔ nǝl, n kanjǝlɔ gǝ dǝg nǝl lɛ a dutoi.

¹⁹ Bʊʊlalɨ bwɨlagɔ gǝ jel a mʊgɔ nǝl, jǝbɔ jʌtǝm dul, jǝbɔ bulon, jǝbɔ bwɨlan, jǝbɔ kuul, jǝbɔ nǝtǝm nyiyo gabakɛl jǝbɔ kaltǝm dun nǝbɨɨ.

²⁰ N kanjǝl nɨ gǝ dǝg nǝl lɛ a yǝlam nǝ duto a kǝga Kwaamaɨ. Jatǝm nǝn kang duto, mɨ gǝ dǝg nǝl lɛ a yǝlam nǝn duto a kǝga Kwaamaɨ.”

Nǝtǝm Bɨlǝngkɛl Bwɛn Kananaɨ

²¹ Yesu a gun a bǝla daa gɔ a shu a tǝm Taya jǝbɔ Sidon.

²² Nǝngɔ kaa bwɛn Kananaɨ, wʊnɨ yǝm a tǝm gɨɨ, a bɛ a daa gǝ woi, gaba wulongɔ lɛ gɔ, “Tɛlalɔ, Bʊla Daudaɨ! Ji bʊnǝn mǝndɨ! Yʊwa bwɨlagɔ a nyʊwa bwɛnɔɔlɨ mǝndɨ gǝm lɛ dangǝn.”

²³ Yesu a swa bɔ lɔl a daa gǝ woi, nǝngɔ bɛtɔ mɛlalɨ gǝnɔ a bɛ a daa gǝ woi ja tɨtǝn jǝ kel gǝn nɛ gɔ, “Kaa gǝn ya yilo, jʊ a bwɨɨ a tɨtǝn bwang bǝm lɛ gaba wulongɔ lɛ, mǝla bǝm lɔl lɛ nǝn wi.”

²⁴ Nǝngɔ a jǝla gɔ, “Mǝ, ja twam ɨ a daagɔ kwamɨ nǝbɔ Israilaɨ nɨ kwaaji a lɛlaɨ.”

²⁵ Nǝngɔ, nɔɔlɨ nɨ a bɛ ba jʊng a kǝga gǝn a sʊwa gɔ, “Tɛlalɔ, tɨka ɨ.”

²⁶ Nǝngɔ a jǝla gɔ, “A bʊm bɔ nyɔ ja do jǝjalǝn bɛtɨɨ ja nǝ sǝgantɨnɔ.”

²⁷ Nǝngɔ a sʊwa gɔ, “Ɔɔ, Tɛlalɔ, gǝ maa maa nyɔ, sǝgantɨnɔ gǝ ja ja fʌtʌlogi gǝnɔ tǝla lɛ a kang nǝ lɔngɨ.”

²⁸ Nǝngɔ Yesu a jǝla gǝn gɔ, “Nɔɔlɨ, nǝtǝm bɨlǝngkɛl mʊnɔ a lada! Bɛ a yǝlam nyɔ kanga mʊ swɨ lɛɨ.” A tʌgo a kang bwɛnɔɔlɨ gǝnɔ a gun.

Yesu A Gung Nǝbɔ A Lada

²⁹ Nǝngɔ Yesu a gun a daa gɔ a bwangtǝn a kʌng wɨma Galilii. A gwi dʌbʌl yemɔ a yɨɨ.

³⁰ Nǝbɔ a lada na a bɛ a daa gǝ woi, ja bɛ nǝn nǝbɔ naagɔ a swam swamɨ, jǝbɔ kululʌmɔ, jǝbɔ nǝbɔ jinʌnɔ a taam taamɨ, jinʌn jinɔ a yǝla a kwama tʌgo, jǝbɔ nǝbɔ nyiyogɔ a ta taɨ, jǝbɔ kaamɨ a lada nyɔ, ja bɛ nǝn ji a daa gǝ woi, nǝngɔ a gung jii.

³¹ Nǝbɔ a lada a ta kang a nyiyo, jʊ a bwɨɨ ja nyʊwa gɔ nǝbɔ nyiyogɔ a ta taɨ sʊwa kɛl lɛ kǝngkɔ, jǝbɔ nǝbɔ jinʌnɔ a taam taamɨ, jinʌn jinɔ a yǝla kwama tʌgo, nǝbɔ naagɔ a swam swamɨ, yɔ yɔm lɛ, jǝbɔ kululʌmɔ kuwo daagɔ lɛ kǝngkɔ. Nǝngɔ ja bǝlá Kwaama Israilaɨ.

Jatǝm Nǝn Nǝbɔ Fʊlkʊblǝn Naal

³² Nǝngɔ Yesu a jo bɛtɔ mɛlalɨ gǝnɔ a sʊwa ji gɔ, “Nǝb nɨ bʊna ɨ lɛ nyɔ, jʊ a bwɨɨ dwiyen kum jinɔ taal jǝbɔ mǝ, mɨ ji nǝn jǝjalǝn. Mǝ swɨ bɔ n ywa ji ja ja bɔ jǝl, kage ja gaa a gola.”

³³ Nǝngɔ bɛtɔ mɛlalɨ gǝnɔ a bʌ gǝn gɔ, “Bǝ nya jǝjalǝn nɨ fee a kuul nɨ, bǝ ja lɛ nǝn nǝb nɨ a lada nyɨɨ?”

³⁴ Nǝngɔ Yesu a bʌ ji gɔ, “Jǝ́ na nǝn kʊkkʊmɔ nyǝn?” Nǝngɔ ja jǝla gɔ, “Nʌbʌl jǝbɔ kaam bɛlɨ jʌngi.”

³⁵ Nǝngɔ a sʊwa nǝbɔ gɔ ja yɨ yɨɨ a tǝmɨ.

³⁶ Nǝngɔ a do kʊkkʊm nɨ nʌbʌli jǝbɔ jʌngigɔ a buu Kwaama gǝm kangɨ, a kǝlsa a nǝ bɛtɔ mɛlalɨ gǝnɨ, ji tʌji ja nǝ nǝbɨɨ.

³⁷ Pʌd jinɔ ja ja, ja boba. Ja wɔɔ tangǝn fʌtʌlogi gǝnɨ, a yii daltɔ tunɔ nʌbʌl.

³⁸ Nǝb nɨ a jaɨ, batǝmɔ fʊlkʊblǝn naal, ja kiyo bɔ nɔɔtǝmɔ jǝbɔ bɛtɨɨ.

³⁹ Yesu a ywa nǝb nɨ a mʊrka a lada nyɨɨ, nǝngɔ a dɔ tɨyamwɛngɔ a shu a tǝm Magadanɨ.